مسمار الجنط فوت :(

[msobhy]

الحمد لله رب العالمين
امبارح كنت بجرب العربيه (النترا - 2010) وده بسبب استمتاعى بيها بصراحه ولاحظت التالى
العربيه مش مظبوطه خالص وبتحدف شمال ويمين
المهم
روحت على بتوع بريدجيستون
كشفوا لاقوا ان فيه فرده فيها مسمار (هو انا لحقت) وقالوا بالمره هانعيد على الترصيص ونظبط زوايا
عادوا على الترصيص - كله كان حاجات عبيطه - لكن المشكله وهما بيفكوا الجنط اللى ورا مسمار منهم فوت - هناك اكدوا لى ان ده عادى - وروحت جبت مسمار وسيبتها عند ميكانيكى جنب الشغل هايغيرهولى
وطبعا هما رفضوا انى اظبط زوايا غير لما اغير المسمار ده

فى رأيكم أظبط زوايا عندهم ولا بره أحسن ؟؟؟؟؟؟؟؟؟؟؟؟؟؟
انا طول عمرى بظبط عند واحد اعرفه فى شارع البحر الاعظم - الجيزه
كمان ساعه ان شاء الله استكمال اللى عملته

ملحوظه رفيعه
ثمن المسار بالصاموله 15 جنيه
من غير الصاموله 7.5 جنيه
مكان الشراء - المنير فيصل

[bmya]

الحركه دي حصلتلي مرتين وده نتيجه الاغبيه بتوع الكاوتش بيربط الصاموله غلط او بيحرق جامد اوي عليها فبتفوت

[Amr Axel]

عادي يا باشا وارد انا غيرت طقم المسامير الامامي كله 8 مسامير بسبب اللي مرة يفوت و مرة يتعوج و مرة الصامولة تركب غلط و اضطر اروح افورها
و متقلقش متاخدش نص ساعة بس نصيحة متسيبهاش للميكانيكي بدون ما تقف ع ايديه لأنه ممكن يشيلك اجزاء صاج و يقولك أصل ملهاش لازمة متخليش حد يقولك ع اي حاجة ملهاش لازمة طالما راكبة كده تفضل زي مهي

و بريدجستون كويسيين في ظبط الزوايا و الترصيص

[msobhy]

الحمد لله رب العالمين
روحت للميكانيكى بعتنى لواحد بتاع شكمانات علشان يفور المسمار
بتاع الشكمانات قال لى ان المسمار مش هو اللى بيتفور - احنا بنفور الصاموله
فور الصاموله - لسه بيركب - مسمار تانى فوت

طيب طلع الصاموله سليمه - شمال يمين برضو مخرجتش - راح مفورها هيه كمان
المهم روحت جبت مسمار بصاموله جديده

روحت على الميكانيكى - فك يا عم وركب - 20 دقيقه والحمد لله كان مخلص
المصناعيه 30 جنيه - 5 جنيه شاى الصبى اللى راح معايا لبتاع الشكمانات
طلعت على بتاع بريدجيستون تااااااااااااانى
شوف يا عم الزوايا - باللفظ العربيه مظبوطه وفيها حاجه بسيطه - طيب يا جدعان التعويمه - فى النهايه نظبط زوايا أمامى بس
ظبط زوايا أمامى وخرجت وانا فعلا مش طايق نفسى لأن فعلا مفيش فى جيبى ولا ملييييييييييييم

التكلفه الاجماليه
30 جنيه ------ مسمارين جنط بالصاموله (من المنير)
20 جنيه ------ فك الصامولتين القدام (سمكرى أو بتاع شكمانات)
30 جنيه ------ تركيب المسمارين (أى ميكانيكى)
5 جنيه ------ أكراميه
20 جنيه ------ خرم الكاوتش - (5 جنيه تخفيض)
30 جنيه ------ ظبط زوايا - (10 جنيه تخفيض)

[mahmoud_afifi]

معلش قدر الله وما شاء فعل.

اول حاجه بالنسبه للمسامير ده عادي جدا بس بعد كده ابقى فورها بنفسك ولا انك تدفع مبالغ زياده.
وانا سمعت ان حلها تغيير الصاموله بنوع تاني يكون الطرف بتاعه مش حامي زي الاصلي. انا سمعت الكلام وجبت صواميل تانيه وهبقى اشوف الكلام ده صح ولا لأ لما اجي اغير اي فرده.

بالنسبه للعومان الي انت حاسس بيه ده سببه ان الطريق فيه تيار هوا قوي شوية بيمرجحلك العربيه. و اوقات العيب من الطريق. واجهت نفس المشكله ورصصت وظبطت العجل وعملت كل حاجه والعربيه كانت بتلعب وبتتمرجح :d
في الاخر العيب طلع ان الهوا قوي.

[Walid_M]

عزيزي msobhy

شوف اللينك ده ...........

http://www.nilemotors.net/Nile/342504-4.html

أخي الفاضل

انا معايا نفس عربيتك ...... ومشوفتش الكلام ده خالص !!!

تصوري إنك عندك مشكلة ما في العفشة تحديداً !!!

من وصفك ده أعتقد ان عندك مشكلة في تيش الميزان وجلب المقصات
اكشف عليهم وعلى العفشة عموماً وأعد التقييم

تحياتي

[Samir Elshahawy]

طيب النتيجة النهائية أيه ؟
العربية أتظبطت و لا لسه بتحدف ؟

[msobhy]

طيب النتيجة النهائية أيه ؟
العربية أتظبطت و لا لسه بتحدف ؟

جارى التجربه يا باشا

[azwoz65]

طمنا ايه آخر التجارب

[samihanwar]

وانا برضو لسه مقطوم منى المسمار بس على فكره كل فتره مسمار يقطم وبشتريه ب 15 جنيه وتركيبو 10 جنيه عند الميكانيكى
وعلى فكره تركيبو سهل جدا
بتفور الطنبوره وتشيل القديم وتركب الجديد زى السلامو عليكو

[HOSSAM99]

كان الله في العون \
نفس مشكلة حضرتك و هي : أول ما بقول يا هادي في صياانة العربيه و نيجي نفك أول عجله بيبقي الضحيه علي الأقل مسمارين و صاموله
صواميل و مسامير عجل هيونداي ضعيفه مع الربط الغلط (بيدب علي اللافيه أو يتنطط عليه فبيربط علي العاصي) بيربط المسمار لكن في الفك بيعذبنا و بفوت و الجديد في الماتريكس بقي بيتقطم
إن شاء الله في أقرب فرصه هاجيب 16 مسمار يكونو إطالي أو يباني و أركبهم للماتريكس ... عند حضرتك هاتحتاج (20) غيرهم في أقرب فرصه

[EngAhmedSakr]

ايه يا جدعان دا
دي طلع موضوع المسامير دا شوطه في الإلنترا بقي ولا ايه !!
انا كمان عربيتي فيها فرده قدام أحد مساميرها -- مقطوم -- يعني ماسكه بأربعه بس
وماشي عليها بقالي كذا شهر وزي الفل :)
بقول هبقي اغيره قدام لما اجي اغير تيل فرامل او اي صيانه مهمه
تفتكروا كدا غلط او خطر ؟؟ ولا اطمن واكمل عليها كدا ؟ ... هي بالمناسبه في المشي 10/10 ولا حدفه ولا تعويمه ولا اي حاجه

[maka]

باشا انت بتظبط عند مين فى البحر الاعظم ؟؟

انا بظبط دائما عند شل البحر الاعظم و شغلهم كويس

[mahmoud_afifi]

ايه يا جدعان دا
دي طلع موضوع المسامير دا شوطه في الإلنترا بقي ولا ايه !!
انا كمان عربيتي فيها فرده قدام أحد مساميرها -- مقطوم -- يعني ماسكه بأربعه بس
وماشي عليها بقالي كذا شهر وزي الفل :)
بقول هبقي اغيره قدام لما اجي اغير تيل فرامل او اي صيانه مهمه
تفتكروا كدا غلط او خطر ؟؟ ولا اطمن واكمل عليها كدا ؟ ... هي بالمناسبه في المشي 10/10 ولا حدفه ولا تعويمه ولا اي حاجه

انا قعدت شهور برضه بمشي بفرده فيها 4 مسامير بس وعادي والدنيا تمام. بس لما جيت افك العجل عشان اعمل الrotation الدوري اتكسر كمان مسمار وبقيت ماشي ب3 مسامير بس. طبعا طلعت على اقرب مركز وغيرت كل الي بايظ عندي مره واحده. بس نصيحه ماتجيبش من مراكز معتمده لأنها غاليه حوالي 30 الواحد ولا حاجه. انما من بره بيعمل 12-15 المسمار بالصاموله.