قطع غيار اكسنت rb لا تعليق

[SAMEH_FOUAD]

السلام عليكم ورحمة الله وبركاتة

معلش هو الموضوع بس انا هكتبة لانى بجد انا وصاحبى متضايقين جداااااااا من اللى حصل دة

الموضوع بأختصار , ان صاحبى عمل حادث بسيط بال rb انة كان ماشى بسرعة 60 كم وخبط فى عربية قدامة لانة داس فرامل والعربية مالحقتش تقف , وكمان كان فية خبطة قبل كدة فى جنب العربية بوظ الباب الخلفى والمرايا وكان فية خبطة فى الاكصدام الخلفى و فالعربية خسايرها بعد المعاينة طلعت كاالاتى :

1- استعدال كبوت

2- تغير اكصدام امامى وخلفى

3- تغير فانوس امامى شمال

4- تغير باب

5- دهان للسيارة

5- استعدال شاسية عشان بيقولوا ان الخبطة دية أثرت على السلاحين

6- شبكة للعربية

7- تغير برابريز امامى

المهم المعاينة المبدئية قالت 14.500 جنية

صاحبى اداهم العربية وقال لشركة التأمين وتمام التمام

جية بقى قبل مايستلم بيومين كلموة وقالولة العربية هتخلص بكرة , وتكلفتها 21.560 الف

طبعا صوت فى التليفون وقالهم لية , وطبعا ولا حياة لمن تنادى

المهم راح امبارح وبيشوف الفاتورة , لقاة طبعا فاتورة متقسمة لخمس اجزاء كل واحدة فيهم فيها حاجات كتييييييييييييييييييييير

اللى غاظة بقى :

1- دلوقتى هو كان عندة التبريد سواء بتاع المحرك او التكييف , كانوا تمام وشغالين زى الفل ( غيروهم ليييييييييييييييييييييييييية ) والمشكلة ان الرقم خزعبلى غريب

سعر السربنتينة 2500 جنية ليييييييييييييييييية

2- الفانوس بيقولى كان فية شرخ بسيط جدااا , غيروة وتمنة من غير لمبة 1550 جنية , وتمن اللمبة 850 جنية ينهار ابيض لمبة اية دية اللى ب850 جنية

3- سعر الاكصدام الامامى ب 1850 جنية , وسعر مصد الاكصدام ب 650 جنية + فك الاكصدام 70 جنية وتركيب الاكصدام 120 جنية ( مش عارف اقول اية الصراحة )

4- كاوتش البرابريز الامامى سليم 100% , تم تغيرة فى التوكيل بكام بقى يامعلم 1650 جنية لييييييييييييييييييييييييييييييييييييييييييييييييي يييييييييييييييييييييييييييييييييييييييييييييييييي ييييييييييييييية
دة غير فكة وتركيبة 220 جنية

5- طقم مسامير صغير كدة ب20 جنية اصلا تمنهم برة وهما هما ب4 جنية

6- البهوات بقى مغيروش الباب اللى قالوا هيغيروة , راحوا مغيرين طبلة باب ومادراك بقى دة حساب شغل الباب لوحدة :

1- فك فرش باب : 55 جنية

2- كلبسات ب120 جنية

3- تغير طبلة باب : 850 جنية

4- تركيب فرش الباب : 75 جنية

5- فك الباب نفسة 85 جنية

6- تركيب الباب : 130 جنية

احسبوا انتوا بقى

نيجى بقى للى يحرق الدم

1- شحن فريون : 200 جنية , تمام كدة . صاحبى يطلع يدور ويمشى يشغل التكييف جايب هواء ساخن , راحلهم قالولوا اة معلش اصل اسطوانة الفريون خلصت , قالة مانا دافع تمن الشحن , يقولوا ابقى تعالى وقت تانى , صاحبى قالى امتى قالة كمان اسبوع

طيب محدش قالى لية انة ماتشحنش , قالة معلش نسينا

2- العربية هو رايح الساعة 8:30 الصبح عشان يستلمها , وهية اصلا خلصانة من امبارح , بقالها 28 يوم بتتصلح على فكرة , بيقولى مستلمها الساعة 5:30 مساءا مش عارف لييييييييييييييييييييييييييييييية , وفى الاخر ياخدها وهية مبهدلة , وصاحبى مش قادر يستنا اكتر من كدة خدها ومشى

* دية عينة من الفاتورة اللى تحرق الدم , والله ياجماعة العربية كانت ماشية عادى وزى الفل ولا سخونية وتكيييف كويس وشغال عادى , غيروهم ليييييييييييييييية وفين الحاجة ؟؟؟؟ مش لاقيها وزعق وعمل وبردة خدوا الاكصدام الامامى مش موجود ادولة واحد تانى مش بتاعة

- وسعر المراية ب850 جنية بالتركيب والذى منة وصلت ل1320 جنية ياحلاوة

= صاحبى بعد الموقف دة قالى انا هبيع العربية , الكورى حاجاتة نااااااااااااار بجد والناس مش حاسة

بجد حرام والله ادفع فى خبطة عبيطة زى دية 21.560 جنية غير ال tips اللى دفعة للناس جوة عشان يجيبولة الحاجة القديمة وياريتة لاقها

[amrseif]

لا بصراحة الارقام ديه فلكية جدا ........ بس كويس ان انت نشرت الحاجات ديه عشان الناس تعرف ان الكورى مش رخيص و لا حاجة ( و ده طبعا ميقللش من مكانة السيارات الكورية )

[profimh]

لا حول و لا قوة الا بالله
حسبى الله و نعم الوكيل و الله ما عندى رد غير كده
ان شاء ربنا يجيره فى مصيبه و يبدله خيرا منها

[khaabas]

الار بى عربية ورق فعلا وده من ضمن عيوبها وربنا يعوضه خير
بالنسبة لقطع الغيار فى التوكيل حاجة وبره ارخص بكتيييييييير طبعا لك ان تتخيل اكصطدام امامى ميفرقش عن الاصلى ب 350 جنيه فكان يجيب الحاجة من بره احسن ده اذا كان ينفع
وفى النهاية اهم حاجة انه بخير وربنا يعوضه باحسن منها

[تامر.محمد]

سربنتينة التكييف اتأثرت بالخبطة اكيد و عشان كده اتغيرت , ما تقدرش تحكم ايه كمان اتأثر فما تستغربش اوي من التغيير , حالة القطعة هي اللي تحكم

اما الاسعار فحدث ولا حرج , اوروبي يا باشا :(

[SYD]

يا خبر ابيض

[S O P H O S]

ايه الاسعار دي !!!
ونسيب الاوروبي ونقول قطع الغيار ليه

[حماده المصري]

باشا انت زعلان على 20 الف في كل الحاجات دي

ايام النيو اكسنت 2006 الاكصدام الي قدام خبطه طلعولي 8 الف جنيه تصليحات سبتهم ومشيت

منهم بس 3 الف جنيه رش ومش العربيه كلها والعربيه مكنش فيها حاجه يشوف خدش صغير يقولك ده يترش يشوف خدش في مش عارف ايه يقولك القطعه كلها تترش ب 300 جنيه مثلا وغير الكبوت الي كان عايز يكسره وبرضو الاكصدام ب 1300 وشاسيه الاكصدام ب 1500 وصدر العربيه البلاستك ده ب 1500 وقواعد الاكصدام ب مش عارف كام كلها خزعبلات

بص الحوادث الي زي كده لو بعين عن التامين الحرفيين تنجزك زي الفل وفيها صنايعيه يرشوا العربيه وتطلع تحت ايديهم زي الزيرو

[Elawany13]

يانهار ازرق

[M.Elgergawy]

هي دي اسعار التصليح في التوكيلات كلها عادي يعني
انما تفرق لما تيجي تصلح بره هنلاقي الكوري والياباني رخيص جدا والاوربي غالى طبعا
بس موضوع الباب دا لو كانه باب جديد كان هيكون ارخص وانضف واوفر بد ما تعبه نفسهم وغيروا الكليبسات :)

[Habd]

فعلا العربية دى اسعارها مولعة مش عارف على ايه و رايي ان صاحبك غلط انه راح التوكييل انا عربيتى اتخبطت من ورا الاكصدام اللى ورا اتكسر من النص و اتخربش حتة منه و نقرة فى باب الشنطة رحت التوكيل قالى هانغير الاكصدام مع انه ممكن يتلحم قلت ماشى و هنرد الخبطة اللى باب الشنطة و ندهنها حتة قد بصمة صباعك كده قلت ماشى كام يابا الحاج عشان نكلم التامين قالى 5000 جنيه و تقعد ثتلات اسابيع :b4_237: بس هو قال كده انا سبيت و لعننت و اديتوا على دماغوا هو و توكيلوا و سيبتوا و مشيت اصلا الاكصدام الجديد الاصلى يوم ما يبقى ايه فى رنج من 600 ل800 يوم ما اشتريت العربية مش عارف الاسعار ايه دلوقتى برشه بتركيبه برد الخبطة تاخد لها نص يوم و تتكلف باكو باكو و نصف و تبقى فلة فاكرنى اهبل اسلمه عربيتى 3 اسابيع و بعدين الخمس تلاف يبقوا سبعة بليل كنت عند السمكرى لحم كسر الاكصدام و ركبه و مش باين لان الكسر ف الجزء المتنى فيه و رديت الخبطة ع البارد و مرشيتش كمان و سايبها تاخد العين بدل ما كل شوية ازاز مكسور من زلطة متعرفش جاية منين و الطريق اصلا فاضى و تريحة عربية على باب و كل ده اتعمل فى 3 ساعات و ب 150 جنيه و بارك الله فيما رزق

[hossam_elwani]

- فك فرش باب : 55 جنية

2- كلبسات ب120 جنية

3- تغير طبلة باب : 850 جنية

4- تركيب فرش الباب : 75 جنية

5- فك الباب نفسة 85 جنية

6- تركيب الباب : 130 جنية


لييييييييييييييييييييييييييييه

دى شرقه عينى عينك

على طريقة نجيب الريحانى

صنفره اول وش كذا

صنفره تانى وش كذا

دهان اول وش بكذا

توكيلان حراميه

[A.Adel]

هو أنا عندي سؤال ممكن يبقى بره الموضوع شوية

ضمان hyundai و kia خمس سنين
الناس بتعمل صيانتها فين ؟

هل التوكيل بيسمح بعمل صيانة بره في حالة الحوادث وتفضل العربية في الضمان ؟
هل مراكز الخدمة المعتمدة بتبقى رخيصة ولا زي التوكيل ؟

ولو رخيصة , أُمال التوكيل شغال إزاي ؟؟

[eng.m7md.ali]

مرايا ب 1300 جنيه؟؟

دي بتاعت البروتون ب350 جنيه ومستغليها كمان .. يعني اسعار قطع غيار بروتون كدة ارخص بكتيييير من الهيونداي؟!!

[SAMEH_FOUAD]

ياجماعة والله انتوا مش متخيلين , اللى احنا فية , انتوا عارفين العربية فضلت ماشية بعد الخبطة لمدة 3 شهور , مافيش اى مشكلة فى العربية تماما , يغيروا ريدياتير , وسربنتينة لييييييييييية ؟؟؟؟ وهما راحوا فين ؟؟؟؟؟

ولو اى حد شاف العربية قبل ماتتصلح هيقول دية اخرها ربط الاكصدام وتغير الاكصدام والشبكة وشكرا , اصلا صاحبى بيقولى اخرهم 8000 جنية , هيعملوا اية يعنى , فجأءة سمع الرقم دة , وانا كنت جنبة على المكتب , سمعت 21,560 جنية , حتى مصدقتش , لقيتة بعديها بيومين جاى

واقسم بالله بيفردلى ورقة الحساب ههههههههههههههههه والله العظيم كأنة مثلا مغير العربية كلها , والله كنت هصورها بس معرفتش من كبرها , ورقة الحساب كان طولها لا يقل عن 150 سم

والله العظيم من كتر الحاجات المكتوبة , كنت بنساها

بجد حاجة غريبة جداااااااااااااااااااااااااااااااااااااااااااااااا اااااااااا

اول مرة فى حياتى اشوف توكيل بيحاسب على فك القطعة وتركيبها , على اساس انى هفك ومش هركب مثلا

بس فعلا كل واحد مقبل على شراء كورى مايتخيلش ابدا ان قطع الغيار رخيصة زى زماااااااااان

نسيت اقول انى سألت على موضوع السربنتينة اتغيرت لية , قالى عشان فيها ماسورة اتعوجت سنة بسيطة قالك غيرها , والمشكلة انهم رمووهااااااااا , ومش لاقيها