اتعلم الترصيص + تجربتي في تغيركاوتش وترصيص فيرنا

[waleed_89]

السلام عليكم,

النهارده رحت غيرت ال 4 فرد كاوتش رحت البطل الروماني في السواح جبت ال 4 الواحده وقفت ب 400 جنيه بعد فصال شويه النوع اندونيسي اسمه FORCEUM
185-60-14 H وال H يعني يتحمل لحد سرعة 220 الماركة ما سمعتش عنها قبل كده ومش عارف السعر غااالي وله مناسب.

- المشكلة اليه قابلتني اني بعد ما خلصت رصصت ال 4 فرد عنده وكنت واقف اودام الجهاز شايف رقم يمين ورقم شمال ومش فاهم الرقمين دول ايه وبعدين شفت الفيديو اليه مشيره في الموضوع لمه جيت واكتشف اني اضحك عليا في الترصيص وانا ما كنتش فاهم علشان كده قلت ارفع ليكوا الفيديو يمكن حد يستفيد بيه و ما يقعش في نفس غلطتي ........ هو ببساطه في رقم يمين ورقم شمال المفروض اليه عرفته من الفيديو اني المفروض الرقمين يكونوا في الاخر 0 - 0 واني الزيادة بتكون بمقاسات موجوده عنده في لوحة مرقمة لكن اليه تم انه كان يطلع علي الشاشة 16 يقوم قايل عاايزين حته صغيره يروح يدور في الأرض او اي جنط قديم يفك منه حتة رصاص ويقم كاسر منها حته من اليمين والشمال ومصغرها ومركب وهكذا وكان بيشيل الفرده والرقمين اليمين والشمال مش 0 - 0 يعني كانت بتبقي لسه مش مظبوطخ و مره كان 0 - 16 ومره - 0 - 5 يعني من الاخر اضحك عليه ودفعت وخلاص بس ما حدش بيتعلم ببلاش ...........

[youtube]http://www.youtube.com/watch?feature=player_embedded&v=uZmADiUX8CQ#![/youtube]

‫ترصيص الاطارات بإستخدام جهاز tires Balance- hunter gsp9700‬‎ - YouTube!

[khaabas]

طيب ما كنت تجيب بريدجستون احسن والفرق بسيط بينهم

[Ashraf_Ibrahim]

طيب حسب معلوماتي ان اجهزة الترصيص نوعين
نوع بيطلعلك رقم فردي يعني 20 او 40 او اي رقم منفرد
ونوع تاني بيطلعهولك على جهتين رقم في اليمين ورقم في الشمال
النوع الاول بتحط الترصيص كله في ناحية واحدة وخلاص وبتصفرها
النوع التاني بيوزنلك العجلة يعني بترصص من برا ومن جوا
الرقم اللي على اليمين بيتحط على يمين العجلة لحد ما يصفر والرقم الي في الشمال بيتحط على شمال العجلة لحد ما يصفر برده
يعتبر الجهاز الاول اللي بيطلع رقم واحد بس منفرد احدث من التاني اللي بيطلع رقمين

[waleed_89]

طيب ما كنت تجيب بريدجستون احسن والفرق بسيط بينهم

- كااام سعر بريدجستون؟
- انا ما عنديش خبرة اوي فا مش عارف اسعار وهو اقنعني بالاندونيسي لأني كان في اكتر من عربية واقفه بتركب منه.

[waleed_89]

طيب حسب معلوماتي ان اجهزة الترصيص نوعين
نوع بيطلعلك رقم فردي يعني 20 او 40 او اي رقم منفرد
ونوع تاني بيطلعهولك على جهتين رقم في اليمين ورقم في الشمال
النوع الاول بتحط الترصيص كله في ناحية واحدة وخلاص وبتصفرها
النوع التاني بيوزنلك العجلة يعني بترصص من برا ومن جوا
الرقم اللي على اليمين بيتحط على يمين العجلة لحد ما يصفر والرقم الي في الشمال بيتحط على شمال العجلة لحد ما يصفر برده
يعتبر الجهاز الاول اللي بيطلع رقم واحد بس منفرد احدث من التاني اللي بيطلع رقمين

هو الجهاز كان في شاشتين شكل مستطيل صغيرين اوي الارقام باللون الأحمر و مكتوب عليهم بالانجليزي من فوق الشرح في ما معناه "داخلي" "خارجي"

هو النقطه اليه بكلم فيها انه شال الفرده من علي الجهاز والرقم اليه علي الشمال 16 مش 0

وكمان الغريب انه كان 5 في الاول وبعدين لمه زود رصاص بقي 16 راح شايل الفرده.

علشان كده مستغرب جداااً ومش فاهم حاجه.

[Ashraf_Ibrahim]

الرقم بيزيد لما بيتم وضع الرصاص في مكان غلط
لأن قبل ما بيحط الرصاص بيلف العجلة بايده لحد ما توصل للوضع اللي تصفر
وبعدين يحط عدد الجرامات المطلوبة فعلا من الرصاص بزاوية معينة بالنسبة للجهاز عشان لما تلف العجلة تاني تصفر معاه بعد كدة ودا معناه انها كدة رصصت صح فعلا

[khaabas]

- كااام سعر بريدجستون؟
- انا ما عنديش خبرة اوي فا مش عارف اسعار وهو اقنعني بالاندونيسي لأني كان في اكتر من عربية واقفه بتركب منه.

هو اولا الف مبروك وان شاء الله اللى فيها احسن
بس انتا عارف بقي شغل المصريين ههههههههههه اللى نعرفه احسن من اللى منعرفوش
وتقريبا 420 لنفس المقاس

[aymanshebl]

اولا الف مبروك على الكاوتش الجديد و معلش عيد الترصيص تانى علشان تبقى مطمن احسن و هو ما انضحكش عليك و لا حاجة هو الفكرة قلة الضمير و الامانة فى الشغل مش اكتر يعنى المحل او اى حد بيبيع يستغل ان الزبون معندوش فكرة عن السلعة اللى بيبعها و يغش و يسمى ده شطارة فهلوة او التجارة شطارة او انه يبيع لزبون بسعر و زبون تانى بسعر تانى على حسب رؤيته للزبون و امكانياته كأنه شئون اجتماعية هههههههه و طبعا ده بعيد عن التجارة الشريفة خالص و الله اعلم برده ممكن يكون الراجل كويس فاحسن حاجة انك ترصص و تشوف لو كان الترصيص اللى فات وحش يبقى كتر خيرك حذرت الناس منه و بالتوفيق

[waleed_89]

شكراً علي المتابعة والأهتمام, ان شاء الله هجرب الترصيص واقول ليكوا النتيجة ...

[mahmoud_afifi]

انا اخر مره عملت ترصيص كان بيحط حاجه اسمها رصاص لزق. عامل زي البلاستر بتاع الجروح كده بيشيل اللزق ويحط الرصاص على الجنط في المكان الي الجهاز بيعلمله عليه ومش محتاجه شغل العك بتاع الروماني.

وفي نوع اسمه ترصيص حصان كان باشمهندس عاصم (verna2008auto) عامل موضوع عنه