سؤال خاص بالنيو اكسنت و محتاج مساعتدكم !!!

[momenhamdy]

السلام عليكم اعضاء منتدي هيونداي الكرام

انا كنت عايز تقيم كامل و شامل للسيارة النيو اكسنت من ناحية التقفيل و الموتور و السحب و الثبات و الصالون و العفشة ..... الخ

ارجو من الاخوة ملاك السيارة و من له خبرة بهذه السيارة افادتنا بهذه المعلومات لتعم الفائده و شكراً لكم

[momenhamdy]

ايه يا جماعة معقول كل الناس الي في رابطة هيونداي و الاعضاء الكرام الي معاهم العربية و مفيش لحد دلوقتي رد علي الموضوع بتاعي

[Hassan Khalil]

كان فيه احد الزملاء سألني عن انطباعي عن العربية .. و ارسلت له انطباعات سريعة عن العربية .. اقتبس منها هذه الفقرات .. لحد ما اعمل تقييم شامل ان شاء الله ..

حقولك علي الاكسنت باختصار ...
الحمد لله رب العالمين ان وفقني لهذا الاختيار .. العربية زي الفل .. و الحمد لله داخل علي ال 3000 دلوقتي ...
العربية توقعت منها حاجات .. ملقيتهاش ... و توقعت اني ملقيش فيها حاجات .. لقيتها و انبهرت بها ..
اول ما يلفت الانتباه للعربية دي انها عربية ( أداء ) علي حساب الرفاهية الزائدة... و الكلام ده يحس بيه واحد بيسوق ..
محرك نشيط جدا جدا.. رغم انها اوتوماتيك .. و بقولها بثقة .. العربية دي لو مانيوال .. و لو السايق مش ظابط نفسه كويس .. العربية دي حتوديه في داهية ..
اداء المحرك بيقل بشكل ملحوظ مع التكييف ..
التكييف لوحده حكاية .. ما شاء الله .. تكييف تحفة .. تحفة .. بالليل .. لا يزيد عن 1 .. و بخلي العلامة الزرقا في النصف .. و بالنهار ممكن ازوده لتلاتة لمدة خمس دقائق فقط .. و بعدين ارجع بسرعة لاتنين
* استهلاك البنزين افضل من بقية السيارات 1600 و لكن الفرق مش كبير ..
* وضعية القيادة في السيارة جيدة جدا .. مش عالية زي الياريس و السيريون .. و مش واطية زي الصني و اللانسر ال99مثلا .. تحس انها قريبة جدا من اللانسر ..
*ثبات العربية هاااايل بالنسبة لحجم العربية ووزنها .. في الطبيعي مش باسوق بسرعة .. لكن لازم اجرب .. و صلت بيها لحد 130 و الثبات كويس جدا .. و معني كويس .. اني لسه عندي قدرة علي التحكم في العربية ( لاممها )
* عفشة العربية .. اسوأ ما فيها .... فيه ناتس ركبت معايا و لقيتها عادية .. لكن اخوكم عنده حساسية شوية .. العفشة جيدة جدا في الطوالي و السفر و الطرق المفتوحة .. و ماسكة العربية كويس .. و محافظة علي اتزانها ..
في الطرق غير المسفلتة .. حتتعذبوا عذاب محترم .. و لا انصح اصحاب امراض الظهر و الانزلاق الغضروفي و الحوامل و اللي لسه واكلين اكل مسبك بركوب العربية دي في طرق مكسرة ..
*الصالون .. مناسب جدا من الامام .. ضيق شوية من الخلف ..
*خامات الصالون .. مصنع بلاستيك .. قعدت ادور علي حتة جلد و اللا قماش و اللا خشب في الصالون ( بخلاف فرش الكراسي ) مش لاقي .. الخامات البلاستيك ليست رديئة .. و لكنها عرضة للخدوش ..
* تقفيل السيارة بشكل عام .. جيد جدا جدا .. العربية كوري بالكامل . عدا السنتر و الكاسيت .. راكبين بايدي مصرية تستحق القطع ..
* الشنطة واسعة بالنسبة لحجم العربية .... كعادة العربيات الحديثة كالياريس و السيتي .. تعطيك من الخارج انطباع بضيق حجم الشنطة .. و لما تفتحها تلاقي العكس تماما
* الكاسيت .. سي دي ام بي 3 .. و فيه وصلة يو اس بي بركب عليها الفلاشة مباشرة .. و ده اللي انا بعمله ..
* صوت المحرك .. مش هادي كاخواتها اليابانيات .. و لكنه مش بيجعر الا عند الوصول لار بي ام 2500 .او 2800 .. و يبدأ الجعورة .. برضه مش جعورة لكل الناس .. و لكن صوته عالي شوية بالنسبة لي ..
* العزل .. مش كويس اوي .. يكاد يوازي عزل اللانسر او اقل قليلا .. الياريس افضل منه ...
....
يمكن مش كل حاجة واضحة في ذهني دلوقتي .. بس دي شوية حاجات علي السريع اتمني انها تكون وضحت الصورة عن العربية ..

[momenhamdy]

اشكرك استاذ حسن و في انتظار التقيم المفصل ان شاء الله

[limo]

ده راى فى العربيه كنت كاتبه هنا فى القسم اتمنى انه يفيدك

انا واحد صحبى لسه شارى العربيه ده من اسبوع وانا وسوقتها منه
انا هحاول اقولك رأى فيها بحياد تام
اولا الصالون
الصالون كمساحه معقول لاسره متوسطه
يعنى الصالون مش واسع تقريبا اد صالون الفرنا
الطابلوه شكله جميل جدا متناسق مع بعضه منطقه العدادات شكلها تحفه بالذات وهيه منوره باليل
العربيه مفيهاش عداد للحراره بس ليه لمبتين للحراره واحده لونها زرقاء وده لو العربيه لسه برده وواحده حمراء لو العربيه شخنت عن الحد المسموح بيه
عندك الكاسيت cd اصلى صوته نقى جدا وحلو اوى
خامات التأفيل الداخلى معقوله احسن من الفرنا بكتير
فرش الكراسى حسيت انه عادى زى الفرنا كده
العربيه فيها مسند يد للسواق فقط والكنبه الخلفيه من غير مسند
لمبتين للقراءه واحده للسائق والتانيه للراكب الامامى كل واحده شغاله بزرار منفصل وممكن بزرار تانى تشغل الاثنين مع بعض بشرط ان باب العربيه يكون مفتوح كل ده بالا ضافه الى لمبه اضائه فى منتصف السقف
-فيها مدخلين لولاعه سجاير واحده فيها الولاعه والتانيه لو عايز تحط فيها شاحن الموبيل
-فيها كل الكماليات معادا المرايات الكهرباء بالنسبه للعربيه المانوال
تانيا التسارع والسحب
العربيه كانت 1600 مانوال
السحب جميل جدا متورها سلس جدا فى التسارع والطلعه بتاعها قويه
عندك المتور صوته ناعم جدا مختلف عن الفرنا اهدى كتير جدا منها
ثالثا غرفه المحرك وصندوق الامتعه
صدر العربيه فبر بالكامل
المحرك مغطى بفبره كبيره مش مبينه اى حاجه من المتور ولا اسلاك ولا اى حاجه
صندوق الامتعه واسع جدا يمكن هوه ده الى مصغر حجم الكنبه الخلفيه
كمان الشنطه من جوه تقفيلها ممتاز
رابعا مواصفات الامان
للاسف العربيه مفيهاش ولا فرامل abs ولا اير باج واحده
لما شوفت اخبار الامان بتاعها لقيت المقدمه من الوع الى بيمتص الصدمه وميدخلش على الكابينه
الفرامل قويه جدا
خامسا العفشه والباور
العفشه بتاعتها مش ناعمه اوى ومش خشنه اوى يعنى معقوله مش مزعجه
يعنى تقدر تقول انها انعم من الانسر بحاجه بسيطه جدا

الباور بتاعها كهرباء تحس انه ناعم جدا لو العربيه واقفه ولو العربيه ماشيه تحس انه زيه زى الباور العادى
بس الصراحه العربيه الى انا جربتها كان فيها حاجه غريبه وهى انى لما الف الدكسيون ناحيه الشمال العربيه من ادام بتنزل لتحت شويه مش عارف ده عادى ولا فيه مشكله

دهان العربيه خفيه شويه والعربيه من بره شكلها صغير بس ظريقه
بصراحه انا شايف انها عربيه ممتازه جدا لو بتقارنها بالانوس والافيو والنوبيرا والفرنا والوجان

بس اعتقد انك لو تقدر على الصنى هتكون احسن منها

[momenhamdy]

ده راى فى العربيه كنت كاتبه هنا فى القسم اتمنى انه يفيدك

تقيم شامل الي حد كبير و به كثير من الدقة و شكراً ليك

[Hassan Khalil]

اود فقط ان اضيف ان عربيات 2008 الباور بتاعها مابقاش كهربا..باور زيت عادي .. لكن اداؤه جيد جدا في الزحمة و علي الطوالي

[limo]

اود فقط ان اضيف ان عربيات 2008 الباور بتاعها مابقاش كهربا..باور زيت عادي .. لكن اداؤه جيد جدا في الزحمة و علي الطوالي

ده البور بتاعها ناعم جدا جدا
انا لما ركبتها حسيت انه فى نعومه البور الكهرباء مش البور العادى لان الباور العادى مهما كان ناعم عمره ما يوصل لنعومه الباور الكهرباء
وركبت اللنترا برضو كان نفس الباور هوه هوه ألى فى النيو اكسنت

[Hassan Khalil]

الباور فعلا ناعم ..و اداؤه ظريف جدا .. بس الباور الكهرباء القديم قيل عنه انه كان فيه مشاكل فنية .. و علشان كده غيروه في 2008 .. انا خدت بالي من الموضوع ده و انا باستلم .. لما لقيت علبة زيت الباور ...
----
انا ركبت النيو اكسنت 2006 .. و ساعتها ماكنتش لسه انتشرت .. و كان الباور بتاعها كهربا .. و كنت رايح جاي من طنطا.. يمكن انا مكنتش متعود علي نعومته الزائدة .. بس عايز اقوللك انه تعبني جدا جدا مع بعض التعرجات في الطريق الزراعي .. و كذا مرة كنت باحس انه حيفلت مني ..
-----
كذلك فان عربيات 2008 تزيد عن 2007 بكاسيت سي دي ام بي 3 .. و USB

[Bubbles]

الف مبروك ربنا يديك خيرها و يكفيك شرها
انا لسه شاري النيو أكسنت العربيه ممتازه بالنسبه للسعر
بس في شوية حجات كده ناقصه او بمعنى عمو غبور شايف لن ليس لها اهميه
زراير النوافذ مش منوره بليل عدا زرار السائق فقط قصدي مش بتنور مع نور التابلو
اه في حاجه مهمه احب الفت نظرك ليها
جهاز الأنذار و انا في المعرض بشتري جيه الراجل دور العربيه و شغل التكييف و بيفتح الكابوت عشان يفرجني قمت قافل الباب عشان التكييف شغال
قامت هوب مامنه و قفلت 4 ابواب و دور بقى على حد يفتحها
و المفتاحين ف الكونتاكت
ف بقوله ازاي تقفل و هي دايره مستحيل قالي كله كده حت النترا كده
المهم عملو اراجوزات عشان يفتحوها
الأنذار متركب غلط غلط
المفروض تقفل مع اول دوسة فرامل عماتها عند نور ف ش دمشق
انا تحت امرك ف اي استفسار

[El Prince]

يا ريت حد يعمل تقييم شامل و يذكر ده بعد كام كم
و خصوصاً قطع الغيار علشان سمعت انها ناااار

[tito2020]

الف شكر للاعضاء بس ممكن بصراحه كدة تقوقولى اجيب انه احسن النيو اكسنت 2008 ولا الافيو 2009 انا بتكلم على الفول اوبشن مانيوال

[tito2020]

فين الردود يا جماعه

[حماده المصري]

الاكسنت افضل بس تتجنط جنط 15 هتبقى باشا

انا كنت عامل تقييم عنها هتلاقي في القسم ده

قطع الغيااااار نااااااااااااااااااار

انا لسه سال على البليه الي ورابالسره في غبور ب 1400 جنييه ومش موجوده برا

وانا جبتها من دبي بحوالي 300 جنيه فقط يعني 150 درهم تقريبا

مصيبه العربيه قطع غيارها

[momenhamdy]

شكراً الي كل الاراء المحترمة من الاعضاء الكرام .... و رمضان كريم