يعني اغير المية ولا ماغيرهاش

[shooda2020]

مساء الخير علي احلي منتدي
انا معايا فيرنا 2009 من التاريخ دا بالظبط25/09/2011 كنت في توكيل سوهاج ال في الكوثر غير مياة الرادياتير
بموبيل كان حتي وقتها ب 65 جنيه ناس قالتلي ماينفعش تستني الوقت دا كله المفروض كل سنه تغير مياة الرادياتير
اتكلت علي الله و جبت الموبيل مع ان بتاع الاكسسوارات وراني انواع كتير وارخص و امريكي اسمه ليون ب 35 جنيه قولت لا خليني في لمضمون ... بكام موبيل يا معلم ؟؟
ب 80 جنيه قولت اجيبه مافيش مشاكل وروحت علي بتاع الرادياتير و فتحت الكابوت وبص عالمياة قالي يا ياعم هاتغيرها ليه
دي جديده وريحتها طبيعيه ولا غيرت قولتله بقالها فتره قالي وايه يعني بس نضيفه جدا
اخدت بعضي ومشيت
المفروض بقي رائي الخبراء اغير مياة الرادياتير ولا لا؟
اســــــــــــــف عالاطاله

[Ayman-Ahmed]

مياه الرياديتر تتغير كل 40,000 كم او سنتين او فى حالة استخدام مياه من الحنفية للتزويد على مدار السنة كتير وده ممكن يسبب صدا فى الدورة .

[hossamalsadik]

للفيرنا ManualService أقصد كأتلوج
ألى اعرفه 40- 60 الف كم كل سنتين أيهما اقرب ولو غيرت قبل كده مافيش مشكله عادى
بس استخدم المياه المعتمده الموصى بها لنوع السياره وده مذكور فى المنوال بتعها

[Habd]

الكتالوج بيقول كل 200 الف كيلو ف دول الشرق الاوسط !!!

[lidosasa]

أحسنت الإختيار فى موضوع المياه موبيل فعلاً حاجة محترمة ومش ميه ملونة وخلاص على الفاضى
ومياه الرادتير لازم تتغير كل 40 ألف كيلو أو سنتين أيهما أقرب وسيبك من فتى الصنياعية حتى لو الميه قدامك شكلها كويس ونضيف لكنها بعد المواعيد اللى قلت ليك عليها بتفقد خواصها وتتحلل المواد الكيماوية الفعالة بداخلها بسبب الحرارة . لو عديت المواعيد دى يبقى خليه ينزلك المياه وينضف ليك دورة المياه كويس بالمياه العادية وبعدين حط المياه الجديدة وبلاش نهائى تزود مياه من الحنفية لأنها كلها املاح بتسد الريداتير وتخليه يصدى ودا حيأثر على كفأة دورة التبريد

[مصطفى-حسن]

نصيحة بسيطة
لو المية اللى موجودة عندك بتاعة الفابريكة
اوعى تغيرها خالص
الا لاسباب طارئة
او اصلاح دورة التبريد

مش هتعرف تعوضها

[shooda2020]

بس انا مش بمشي بالعربيه كتير يعني السنه ال فاتت علي ما اتذكر قعدت 3 شهور الصيف من 6 الي 9 مركونه علشان كنت في شرم
ومش عارف يعني اغيرها ولا بلاش
افيدوني بجد

[lanos2004]

والله طالما اشتريت ميه نوع محترم يبقه اتكل على الله وغيرها
علشان تحافظ على ماتورك من الصدا والسخونه

[Ayman-Ahmed]

طب انت عاوز تغير المياه وخلاص كنضافة ومحافظة على العربية ولا فيه عندك مشاكل فى التبريد ولا زودت مياه من الحنفية فى القربة او الريادتير قبل كدة؟

[shooda2020]

لا خالص علشان نوع من النضافه بس مش اكتر لكن سخونتها الطبيعيه و لونها ماتغيرش و اصلا ال فيها موبيل برضه

[Ayman-Ahmed]

لا خالص علشان نوع من النضافه بس مش اكتر لكن سخونتها الطبيعيه و لونها ماتغيرش و اصلا ال فيها موبيل برضه

لو انا مكانك واشتريت المياه خلاص وميعاد تغيرها مش بعيد اصلا يبقى غيرها .لان على كلامك فى الاول ان فاضل 3 شهور وتغيرها.