صيانه 1000 للالنترا بالاسكندريه

[fooz843]

كل سنه وانتوا طيبين ويعيد الايام عليكما بخير
النهارده رحت للالنترا صيانه 1000 ك وطبعا كنت اول مره اتعامل مع غبور ورايح وبقول اخبارهم في الصيانه ايه وحاحكيلكوا اللي حصل بالتفصيل
اولا حجزت اول امبارح عن طريق التيلفون وقاللي معادك 9 وربع ولو اتاخرت اكتر من ربع ساعه حيتلغي الميعاد (ده علي اساس انهم مضبوطين اوي في مواعيدهم) ورحت النهارده في ميعادي بالضبط لقيت ان في ناس رايحه من بدري بس مش حاجزين وطبعا هم استقبلوهم وقالولهم بعد الناس اللي حاجزين حيخشوا وده شئ كويس وياريت الناس كلها تكون حاجزه بالتيلفون علي 16101 من الموبايل افضل عشان متنتظرش كتير وعشان في ناس رايحه هناك وعايزه تخش وخلاص
المهم ادوا العربيه رقم واول حاجه مؤرفه انا رايح السعه 9 في ميعادي وعلي بال مهندس الصيانه مايجي عشان يبص علي العربيه كانت الساعه 10 بطء غير طبيعي والمهم جم بعديها ودخلوا العربيه بحوالي تلت ساعه و عايز اقولكوا ان العربيات مكنتش كتير ولا حاجه ولا انا باعمل حاجه غير صيانه الالف يعني تغيير زيت وفلتر بس كل حاجه ببطء مش عارف ليه
وبعدين ياخدوا العربيه كانهم واخدينها اوضه العمليات كل واحد يقولك ممنوع تبص علي العربيه وممنوع تعرف اللي بيحصل في النهايه كل شئ
المهم الباشا قعد في تغيير الزيت والفلتر قد ايه با جدعان تلات ساعات ونص في رمضان ليه مش عارف وبعدين بعد ما خلصوا السياره بعد الصيانه قال ايه ممنوع تبص علي العربيه الا بعد دفع الفلوس ومع المهندس وطبعا صوتي بدأ يعلي يعني ايه عايز ابص علي عربيتي ممنوع دي عربيتي يا جدعان هو انا حابوظها انا عايز اشوف حصل فيها ايه واشيك عليها بعد 3 ساعات ونص من الانتظار مش عارف ليه الناس هناك عندها برود غير طبيعي وبيقولوا حاجات غريبه
المهم رحت دفعت ورحت للمهندس وفوجئت ان كتيب الضمان 3 سنين و60 الف ك بس فتوجهت للاستفسار من الاخ المهندس ومدير الصيانه ازاي تبقي العربيه ضمانها 5 سنين و100 الف ك و الكتيب بيقول حاجه تانيه قاللي ده كتيب قديم بس احنا وحمايه المستهلك عارفين انها 5 سنين طب وانا عايز اعرف بقي حد يكتبلي في الكتيب الناس في التوكيل المحترم بيعملوا كده الا ان كل محاولاتي في هذا الموضوع جائت بالفشل لا المهندس عايز يسجلي ان الصيانه 5 سنين ولا اي حاجه
في النهايه اليكم الملاحظات في التعامل مع التوكيل غبور بيه
المميزات مش لاقي لحد دلوقت
العيوب
بطئ غير طبيعي 3 ساعات ونص اغير زيت وفلتر
عدم اهتمام بالناس ولا العملاء
صاله انتظار مش كويسه
تعقيد في كل شئ مش عارف ليه وتسألهم عن اي حاجه ممكن تركبها في العربيه يقوللك لا العربيه حتطلع من الضمان
الخلاصه من المواضيع في المنتدي وكلام الناس اللي قابلتهم التهارده التوكيل ملوش اي لازمه لكن الناس خايفه من اي عيوب في التصنيع خصيصا ان قطع الغيار عند غبور بيه نار واحد النهارده بيقوللي مغير باب ورا صاج بس ب 4000 ج مش عارف مدي صحه الرقم لو الكلام صحيح الواحد تبقي مصيبه الواحد يتعامل بره احسن عشان كده الناس بتستمر في الصيانه لحد 10000 او 15000 ك لان بصراحه الاسعار غريبه وعدم اهتمام بالناس ولا وقتهم وبطئ شديد جدا وتعامل غير جيد بالمره وبافكر بصراحه اقدم شكوي عشان مشوار الضمان ده ايه رأيكوا

[2CODE]

بصراحة معروف توكيل هيونداي غبور في مصر من سئ لأسوء وتعاملت معاهم في عربية ابن خالتي النترا فيراني برضه تعاملهم زباله جداً كأنهم بيتفضلوا عليك بشئ من عندهم او انت رايح تشحت منهم مش عارف بصراحة

وحقك انك تشتكي في موضوع الضمان يعني ايه كتاب قديم ؟؟؟؟؟ هو احنا في المدرسة هنا دي طبعة 2010 ودي طبعة 2014 ؟؟؟؟؟ دي عربية بأكتر من 150 الف جنية هي لعبة ؟؟؟؟؟؟

ويعني ايه ممنوع تبص علي عربيتك وهي بتعمل صيانة ؟؟؟؟ هههههههههههههه
طيب والمصحف انا كنت واقف جنب العربية الريو بتاعتي في توكيل كيا وهي بتعمل كل حاجة من اول ما بدأ يصفي الزيت ورفعها لغاية ما خليته يبص لي على العفشة علشان المطبات بتاعة المنطقة اللي ساكن فيها

ومدفعتش الا لما مهندس الاستقبال جربها بنفسه قبل ما يديني المفتاح وجرب الكهربا وكل شئ وبعدين استلمت المفتاح وروحت دفعت الصيانة

بصراحة توكيلات غبور دون المستوى في كل شئ مهندسين وقطع غيار وتعامل ومتسيبش حقك

العربية ضمانها 5 سنين يبقى حتى يكتبوها بالقلم الازرق ويختموها بختم الشركة تحت الكلام وخلاص انما كده لأ والف لأ

[sayco100]

المميزات مش لاقي لحد دلوقت :d

!!! هههههههههههههه بجد انت فسرت وافدت فوفيت
جملتك دى طالعة من القلب مع انى متعاملتش معاهم
بس من خبرات صحابى
واهو كلامك انت قولت اللى تقريبا صحابى بيشتكوا منهم فيه

[fooz843]

اللي صعبان عليا والله ان العربيه مش مضايقاني المشكله اني حاسس ان الناس دي بتتعامل معانا معامله ساذجه وغريبه تشتري عربيه منهم وبعدين البس يا معلم تكلمهم في اي حاجه لازم يعقدوها ممنوع تركيب اي شئ في العربيه عشان الضمان ميترفعش-اي شئ يتغير سوء استعمال -اسعار نار-معامله زفت-احساس داخلك ان الناس دي بتستعبط وبتشتغلك ولما تتكلم معاهم يحسسوك ان المشكله فيك انت انت غبي ولا ايه هو لازم يعني تركب اي شئ لرفاهيه العربيه وسوء الاستخدام عشان انت مابتعرفش تسوق ودي اسعار قطع غيار اي عربيه جديده انت مش في الدنيا ولا ايه وانت بتدقق في كل حاجه ليه عندنا عملاء غيرك عندهم مشاكل اكبر منك

[toty_305]

-يا جدعان ما أحنا بنروح توكيل العبور و الدنيا زي الفل و الحاجة لو في الضمان بتتغير بسهولة جدا

-الاستاذ صاحب الموضوع عندك حق في أنهم عندهم بطئ زي آخر نص ساعه قبل الفطار

[fooz843]

-يا جدعان ما أحنا بنروح توكيل العبور و الدنيا زي الفل و الحاجة لو في الضمان بتتغير بسهولة جدا

-الاستاذ صاحب الموضوع عندك حق في أنهم عندهم بطئ زي آخر نص ساعه قبل الفطار :l_bhuhhh[1]:

والله انا باحكي اللي حصل ولو حد شاف غير كده في توكيل اسكندريه يقول

[محمد ابراهيم 1]

المبدأ العام لتوكيل غبور - إخبط راسك فى الحيط

[toty_305]

والله انا باحكي اللي حصل ولو حد شاف غير كده في توكيل اسكندريه يقول

اه معلش مخدتش بالي أن في اسكندريه أصل في العبور,القاهرة عاملين نفسهم ولاد ناس قوي

[mahmoud_afifi]

توكيل زفت وبطء واسعار مولعه
انا بعمل صيانتي بره التوكيل والحمدلله احسن من التوكيل مليون مره