تغيير جنوط النترا 2009

[ahmahm1981]

عربيتى النترا 2009 أوتوماتيك
راكب فيها جنط 15 سبور الأصلى بتاعها عايز أغير وأركب جنط 16 أو 17 إيه رأيكم أيهما أفضل ؟
وياريت لو حد عنده خبره فى أنواع الجنوط وأسعارها يفيدنا .

[Kareem.ElAraby]

16
205/55/16
ال 17 هيبقي مقاس 215/45/17 ====> و طبعا انت عارف السيراتو و مشاكل الجنط ال 17 مع الحفر و المطبات و النقر
الكاوتش.=====> ركب حاجه نضيفه ليها تقييم عالي علي النت بلاش الكوري و الرخيص و ما تركبش الكاوتش عشان عاجباك النقشه , النقشه خداعه جدا !
الجنط====== > ركب يا لينزو يا hrs و ده الطقم عامل 3000-3500 عند ارابكوم في مدينه نصر عند النادي الاهلي , و ابعد عن الصيني و الرخيص و ركز في التايلندي و الاندونيسي

[msobhy]

حضرتك لو هتبيع الجنوط القديمه - ممكن اشتريها منك

[mahmoud_afifi]

الالنترا HD مش recommended ليها المقاس ال17. خليك في ال16 ونصيحه هاته استيراد بس حاله كويسه. هتعمل نفس سعر الجنوط السبور بتاعت ارابكوم بس هتكون أخف عشان المونيوم.
ومقاس الكاوتش فعلا زي ما قال كريم العربي.

[Silent~Dream]

متزودش عن الجنط ال 16 عشان مشاكل العفشه و هات كاوتش نضيف و جنوط اصليه بلاش الصينى او الكلام ده بيعمل مشاكل

[Kareem.ElAraby]

عفيفي : أومال الجنوط اللي عند ارابكوم مصنوع من ايه
لعلمك الجنط الاصلي مش خفيفي و كان ب3000 بس بردو عندك هسهس الكشف علي الجنط و الرفه و متني أو كان واخد خبطه أو ملحوم
قابل بقي

[S O P H O S]

لو هتبيع ال 15 قولنا
واذا اخويا الكريم الي طلبهم الاول مخدهمش اخدهم انا
ان شاء الله ..

[mahmoud_afifi]

عفيفي : أومال الجنوط اللي عند ارابكوم مصنوع من ايه
لعلمك الجنط الاصلي مش خفيفي و كان ب3000 بس بردو عندك هسهس الكشف علي الجنط و الرفه و متني أو كان واخد خبطه أو ملحوم
قابل بقي

الجنوط الي في أرابكوم كروم وده أتقل بكتير من الألمونيوم.
وفعلا معاك حق في موضوع الجنوط الاستيراد. لازم تفحصه كويس بس لو ربنا كرمك في جنط حالته كويسه يبقى حظك من السما احسن بكتير من السبور

[ahmahm1981]

16
205/55/16
ال 17 هيبقي مقاس 215/45/17 ====> و طبعا انت عارف السيراتو و مشاكل الجنط ال 17 مع الحفر و المطبات و النقر
الكاوتش.=====> ركب حاجه نضيفه ليها تقييم عالي علي النت بلاش الكوري و الرخيص و ما تركبش الكاوتش عشان عاجباك النقشه , النقشه خداعه جدا !

هو فعلا ال 17 هيعمل مشاكل مع العفشة لكن الـ 16 هيكون كويس .

الجنط====== > ركب يا لينزو يا hrs و ده الطقم عامل 3000-3500 عند ارابكوم في مدينه نصر عند النادي الاهلي , و ابعد عن الصيني و الرخيص و ركز في التايلندي و الاندونيسي

يعنى التايلندى والاندونيسي نوع نضيف ولا فى أحسن منه .

حضرتك لو هتبيع الجنوط القديمه - ممكن اشتريها منك

للأسف مش ناوى أبيع لأنى إحتمال أحتاجهم

الالنترا hd مش recommended ليها المقاس ال17. خليك في ال16 ونصيحه هاته استيراد بس حاله كويسه. هتعمل نفس سعر الجنوط السبور بتاعت ارابكوم بس هتكون أخف عشان المونيوم.
ومقاس الكاوتش فعلا زي ما قال كريم العربي.

هو لما الجنط يكون أخف بيكون أحسن للعربية ولا العكس ؟

متزودش عن الجنط ال 16 عشان مشاكل العفشه و هات كاوتش نضيف و جنوط اصليه بلاش الصينى او الكلام ده بيعمل مشاكل

فعلا انا نويت على الـ 16 أحسن

لو هتبيع ال 15 قولنا
واذا اخويا الكريم الي طلبهم الاول مخدهمش اخدهم انا
ان شاء الله ..

للأسف مش ناوى أبيع لأنى إحتمال أحتاجهم

الجنوط الي في أرابكوم كروم وده أتقل بكتير من الألمونيوم.

وهل ده هيفرق مع العربية ؟

وفعلا معاك حق في موضوع الجنوط الاستيراد. لازم تفحصه كويس بس لو ربنا كرمك في جنط حالته كويسه يبقى حظك من السما احسن بكتير من السبور

شكرا للجميع على الرد والاهتمام

[mahmoud_afifi]

يعنى التايلندى والاندونيسي نوع نضيف ولا فى أحسن منه .

الاتنين كويسين احسن من الصيني. وفي الايطالي احسن منهم بس غالي



هو لما الجنط يكون أخف بيكون أحسن للعربية ولا العكس ؟

الخفيف احسن في الطرق الوحشه بتاعت مصر. التقيل حلو في الثبات بس هيتعب العفشه.


وهل ده هيفرق مع العربية ؟

الكروم هيحسسك ان العربيه كلبشت في الارض وهتبقى ناشفه شوية بس مش بنفس نشفان ال17. انما الالمونيوم مش هتحس بنقطة النشفان قوي. بس هتكون انشف حاجه بسيطه من ال15 الي معاك.

شكرا للجميع على الرد والاهتمام

تحت امرك يا باشا ونصيحه ماتستعجلش و لف كويس لغاية ما تلاقي الي انت عاوزه

[abofandy]

نصيحة اخ بلاش تغير الجنط 15
جنط محترم ودة الاصلى الى نازل مع العربية واى جنط غيره بمقاش مختلف هيتعب العفشة ومش هتبقى مستريح في العربية انا من هواه عدم اللعب في العربية خصوصا في المسائل الجنط والكلام دة

[Kareem.ElAraby]

الايطالي أعلي كمان بس ادفع بقي
الكاوتش
نصيحتي ليك
205/55/16
BridgeStone POTENZA ADRENALIN RE002
Mechlin Primacy 3
Yokohama C Drive
BridgeStone Turanza Gr-90
الاوفسيت 38+ أو 43+ و ممكن 35+ بس يفضل بلاش
رينجاتك و قطر الصره بتاعها 67.1 مم و عند ارابكوم بردو بس يفضل الالمونيوم و دول عموله من مكان يخرطهالك يعملوا 150 تقريبا


الجنط HRS من ارابكوم
LENSO و ده التوب براند في التايلندي و التوكيل HIGHLINE CAR STYLING
ممكن بقي تدور علي الاصلي بتاعها ال 16 بس ده استيراد و تدخل بقي في هسهس الكشف عليه

حاجه كمان

فرط في 300 جنيه و هات لك طقم صواميل GORILLA من عند تاير مانيا و ده صاموله بمفتاح مختلف عشان ما يتسرقوش

[Kareem.ElAraby]

السلام عليكم
حضرتك نويت علي ايه ؟!
حاجه كمان جت علي بالي
الجنط ال 17 العربيه مش هتعلي عن الارض نفس ارتفاع ال 185/65/15
لكن الجنط ال 16 بالكاوتش ال 205/55/16
العربيه هتعلي 1 سم هيفرق معاك في المطبات خاصه ان العربيه بتهبط مع التحميل جدا
و في نفس الوقت ال side wall height أو عمود الهوا هيبقي حاجه كبيره مقارنه ب بتاع الجنط ال 17