غبور التوكيل المعفن

[sonybony]

كالعاده لم اصدم في توكيل بمصر يملك اخ لي هيونداي i10 وبقالها سنه معاه وعامله خمسه الاف كيلو المهم العربيه فجاءه فصلت ميه ونور واتصلنا بالتوكيل مشكورين بعتوا عربيه وخدوها علي التوكيل وفات يوم العيب ايه يا جماعه قالو بطاريه طيب نستلم امتي لسه بكره بعده المهم بعد خمس ايام روحنا كبسنا عليهم طبعا مش هقولكم علي قرف المكالمات والمهندسين وكدبهم من حيث مفيش بطاريات اصل فصل ولازم تدفع تمنها علما ان البطاريه ليها سنتين ضمان المهم روحنا الصبح في ابورواش الساعه عشره الصبح واستلمنها بعد طلوع الروح اربعه ونص حاجه عجب المهم البطاريه طبعا لا ليها ماركه ولا باين لها وش من قفا المهم وصلنا بيها وتاني يوم ندور نلاقي نفس العيب هوهو ودلوقتي تكلم التوكيل يقولك معرفكش وشكل كده البطاريه اللي ركبوها بايظه وهنشتري من بره بطاريه محترمه لاني كشفت علي الدينامو بره قالي شغال كويس وشكلها عيب البطاريه وحسبنا الله ونعم الوكيل

[eng wael]

هيا دى مصر
وفى الاخر عايزين حالنا يتصلح ازاى واحنا شعب غير محترم
ربنا يعوض عليك

[Khaled Lanos]

عليك وعلى جهاز حماية المستهلك ياباشا دي نصيحتي وأهو تبقى عملت اللي عليك.

[Silent~Dream]

زى العضو الفاضل ما اشار و روح حمايه المستهلك و بلاش تسيب حقك ده اسمه اسهبال و طمع ايه التوكيلات دى ؟؟؟؟

[EngAhmedSayed]

منا قولت زمان
تغووووووووور من وش غبووووووووووور

[د.عماد صلاح]

بيتعمدوا يقرفوا اللي قدامهم ؟...
غبور ليه سوابق كتير عشان كده انا كاره اشتري اي عربيه هيومداي

[svneleven]

مصر كلها كدا من أول توكيل العربيات لمحلات قطع الغيار لمحلات الأكل للهدوم لتجار الجملة لكلة. البلد خربانة و ما فيش توكيل في مصر بتاع أي عربية الناس ما اشتكتش منه. المهم حاول ما تسيبش حقك. حماية المستهلك علي الأقل لو أنت من الناس اللي مش بتعرف تعلي صوتها.

[Haitham Basha]

حسبي الله و نعم الوكيل مش عارف إمته هنحترم بعض و نحترم نفسنا و نخاف ربنا و ندي كل واحد حقة ... حسبي الله و النعم الوكيل في كل تاجر و في كل واحد مبيراعيش ربنا في حقوق الناس ...

[adelghanem]

ﻭﺍﻟﻠﻪ ﻏﺒﻮﺭ ﻧﻬﺎﻳﺘﻪ ﻭﺣﺸﻪ.ﻭﺑﻜﺮﻩ ﻳﻨﺪﻡ ﻋﻠﻰ ﺍﻟﻠﻰ ﺑﻴﻌﻤﻠﻪ ﻓﻰ المصريين

[2CODE]

خليه خليه لغاية ما ربنا هينتقم منه شر انتقام هو بيفرح بالـ300 او الـ400 جنية اللي بيسرقها من كل واحد ومش بيخاف من رب العالمين

يذل من يشاء وهنشوف بأذن الله

[M I D O]

طبعا دة استهتار رسمي لاكن معلش اعذرني العربية بقالها سنة وعاملة 5 الاف كيلو ومتابع الصيانات في التوكيل ولا خرجت برة الضمان ؟؟

[Samir Elshahawy]

أخي الفاضل صاحب الموضوع

ياريت حضرتك تكتب لنا بيانات العربية التالية :
- رقم الشاسيه
- رقم الموتور
- تاريخ الشراء
- عدد الكيلومترات المقطوعة
- تاريخ دخول التوكيل لأصلاح العطل
- اسم الفرع المشكو بحقه

و ربنا يقدرني و اقدر أتواصل مع التوكيل لحل مشكلتك

[sonybony]

هيا دى مصر
وفى الاخر عايزين حالنا يتصلح ازاى واحنا شعب غير محترم
ربنا يعوض عليك

اديك شوفت وعندك حق والحمدلله علي كل شئ واشتريت بطاريه جافه من بره وريحنا دمغنا

[sonybony]

عليك وعلى جهاز حماية المستهلك ياباشا دي نصيحتي وأهو تبقى عملت اللي عليك.

ربنا يقدرني علي رد جمايلهم

[sonybony]

منا قولت زمان
تغووووووووور من وش غبووووووووووور

حقيقه قال ومضايقين اوي ان الناس بتشتري خليجي ده من الضحك ان المهندس بيقولي تلاقيك بتمشي بيها كتير وهيه في سنه عامله خمسه الاف