معروض عليا اكسنت Rb 2011 ايه رايكم فيها؟؟

[draboeyad]

السلام عليكم
انا معروض عليا اكسنت Rb مانوال ٢٠١١ بس ليها قصه غريبه.....
هي كانت عليها اقساط للبنك وباعها بتفويض لشخص تاني لغايه لما يخلص اقساطها
المهم حصل تعثر في السداد وباقي في اقساطها ٣٥ الف وبعد شهر البنك هيحجز عليها
فصاحبها الحالي اللي معاه تفويض ده عارضها للبيع علشان يسد باقي الاقساط
فانا روحت اشوف العربيه لقيتها مانوال فابريكه بالكامل وحالتها ممتازه ماعدا شرخ صغير وملحوم في الاكصدام الامامي وجزءصغير في احد الابواب مردور علي البارد فقط وماشيه ٦٠ الف
فانا بالتفوض وصلت معاه ل ٧٠ الف جنيه
ايه رايكم
وايه نصايحكم بالنسبه لموضوع البنك ده هل فيه اي مشاكل وهل كره سعرها كويس

[x_gomgom]

بلاش منها لسبب بسيط العربيه عليها حظر بيع و عشان يترفع لازم مخالصة البنك ولا يجوز بيعها قبل المخالصه ... الاول اعرف عليها كام في البنك بالفوائد بدل ما تخش في دوامه معاهم علشان تاخد المخالصه....
يا رب اكون افدت

[draboeyad]

انا قولت لصاحبها اني هدفع القساط اللي عليها بايدي في البنك وهعمل عقد بيع من صاحب العربيه ليا ومكتوب فيه ان هيتبقي عليا ٣٥ الف هدفعهم حين الحصول علي المخالصه النهائيه من البنك وهستلم منه العربيه وبعد اسبوعين اول مالمخالصه النهائيه توصل هنقل ملكيتها ليا وادفعله باقي الفلوس .....فقال ماشي مفيش مشاكل!!!!!!!""""

[x_gomgom]

الملكية لا تنتقل الا بالتسجيل ..... و مش هتعرف تعمل توكيل لان عليها حظر....
نصيحه من اخ متدفعش فلوس الا لما تمسك المخالصه في ايدك و تتطلع شهاده بيانات فاكه حظر. علشان اللي انت بتقوله دا خطر الا اذا كانوا ناس ثقة

[msobhy]

باشا العربيه ديه مينفعش تشتريها غير بطريقتين والله اعلم
الطريقه الاولى تروح تشتريه من البنك وتتنقل الاقساط بأسمك وده اللى متعارف عليه - تدفع لصاحب العربيه الاصلى المبلغ اللى هو عايزه والاقساط تبقى بأسمك ومينفعش فى الوقت ده توكيل - لازم صاحب العربيه أو توكيل عااااااااام
الطريقه التانيه ان كل فلوس البنك تتدفع وبعدها تروح المرور بالمخالصه تشيل الحظر وبعدها العربيه تتباع
غير كده لا قدر الله ممكن الموضوع يكون فيه مشكله
والله اعلم

[draboeyad]

فيه ناس على علم بموضوع البنوك ده نصحونى بعمل توكيل عام سياره بنوع وموديل السياره فقط يشمل البيع لنفسى والغير والتعامل مع جميع خدمات المرور ولايلغى الا فى حضور الطرفين

كده اول مالمخالصه توصل ابيع لنفسى على طول
ايه رايكم

[Hacker5]

فيه ناس على علم بموضوع البنوك ده نصحونى بعمل توكيل عام سياره بنوع وموديل السياره فقط يشمل البيع لنفسى والغير والتعامل مع جميع خدمات المرور ولايلغى الا فى حضور الطرفين

كده اول مالمخالصه توصل ابيع لنفسى على طول
ايه رايكم

العربية كدة هاتقف عليك بكام ؟

[J A G U A R]

خليك يا باشا فى خالصو وشوف عربيه تانيه عشان متوجعش دماغك .. كرأى

[draboeyad]

هتقف عليا ب 70 الف

[Hacker5]

هتقف عليا ب 70 الف

هو السعر كويس
لو ضامن صاحب العربية اشتريها
اديله فلوس يكيش العربية فى البنك و بعد اسبوع او 10 ايام بياخد جواب يرخص بيه و المخالصة بتطلع من البنك للمرور و تدخل فى ملف العربية
طبعا دة كله و العربية معاك و معاك المفتاحين

[draboeyad]

ان شاء الله وكمان هاخد عليه وصل امانه بالمبلغ اللى هعطيهوله باذن الله لغايه مايجيبلى جواب التخليص
بالاضافه للتوكيل العام للسياره بنوع وموديل السياره فقط يشمل البيع لنفسى والغير والتعامل مع جميع خدمات المرور ولايلغى الا فى حضور الطرفين
وهاخد العربيه والمفتاحين
حاجه تانيه ولا كده تمام
ومعلش سؤال تانى هى العربيه بحالتها كده لو بشتريها عادى من غير حكايه البنك والحوارات دى فى سوق المستعمل تعمل فى حدود كام

[msobhy]

متهيألى توبها فى حدود 80.000
مش عارف ليه حاسس ان العربيه فيها حاجه مش صح ولا انا اللى بقيت قلوق زياده عن اللزوم
للمره الاخيره بأكد لحضرتك مش هاينفع تشترى عربيه عليها حظر غير من واحد معاه توكيل عااااام أو صاحب العربيه
ياريت تفتكر النقطه ديه كويس جدا