تركيب اريال كهربا لفيرنا هاف اوبشن

[Ashraf_Ibrahim]

ازيكم يا جدعان اخباركم ايه
طبعا بقالي يومين تلاتة اربعة كدة بسأل على الاريال الكهربا وانواعه والكلام دا
النهردة الحمد لله جبت اريال تايواني من التوفيقية بسعر 130 جنيه
طبعا انا قلت تركيبه مش هياخد 10 دقايق وهنجز في الوقت وأركبه انا
وفعلا لما رجعت الجراج فكيت الفبر الي في الجنب ناحية الاريال وشلت الاريال المانيوال وبدأت اشوف هوصل الكهربا دا ازاي !
هو فيه 3 سلوك
أسود وأحمر وأخضر -دا بالنسبة للاريال - الاسود دا أرضي والاحمر دا كهربا والاخضر دا اوديو
المفروض اني الاقي الوان مشابهة في العربية
لقيت فيشة واصل ليها 3 سلوك أحمر ورمادي وأسود
بعد تتبع السلوك وكدة تأكدت ان دي الخاصة بالاريال ولكن الفيشة دي متركبش على سلوك الاريال !
طب اعمل ايه ممممممممممممممممممممممممم
قلت خلاص مبدهاش أقطع الفيشة دي مش مشكلة يعني
وكان تفكيري المنطقي ان سلوك العربية الاحمر دا كهربا والرمادي دا اوديو والاسود دا ارضي
ووصلت السلوك على هذا الاساس
ياعم الحج انطق واطلع حالف يمين بعظيم مهو طالع
وانا وقفت وبلمت ومش فاهم فيه ايه
بالخطأ لمست السلكين الاسود والرمادي ودا عمل قفلة مع الكاسيت وهنا قلبي وقع في رجليا بصراحة
قلت الكاسيت طار وبعد شوية من الهدوء قلت اكيد فيوز فتحت علبة الفيوزات وقعدت ادعبس على الفيوز لحد ما لقيت فيوز الكاسيت وفعلا كان ضرب فقمت جايب فيوز الاير باج من جوا -فيوزات اضافية- وقمت مركبه مكان فيوز الكاسيت واشتغل زي الفل
بعد دعبسة قاربت من 3 ساعات تقريبا وتجربة السلوك وما شابه اكتشفت مدى عبقرية العم غبور الله يحرقه
هو عامل الرمادي كهربا والاحمر اوديو والاسود دا ملهوش اي لزمة في الحياة اساسا !
وصلت احمر الاريال برمادي العربية
وأخضر الاريال بأحمر العربية
والاسود بتاع الاريال قمت رابطه بمسمار في جسم العربية زي الاريال المانيوال بالضبط
شغل الكاسيت يا عم الحج
هييييييييييييييييييييييييييييييييييييييييييييييه الاريال طلع
كان التحدي التاني !
هثبته ازاي خصوصا انه جاي بدون هولدر ليه وانا برده وقفت مبلم تاني بس اللي خلانا نعرف نوصله مش هنعرف نثبته يعني
قلت طب ما تبتكر يا واد يا اشرف
هو جاي معاه حديدة طويلة كدة معرفش طريقة تركيبها ايه
ولكن قمت فاكك الهولدر بتاع الاريال القديم وقمت موسعه على قد الجديد وقمت مركبه وبعدين قمت عامل وصلة بالحديدة اللي جاية مع الجديد وقمت رابطهم في بعض وقمت مثبته في جسم العربية
بعد التركيب لقيته مايل لقدام شوية وانا ميعجبنيش الحال المايل
قمت فاكك تاني وعدلت وضعه بحيث يبقا فيه ميل بس لورا
وقفلت على كدة وقبل ماقفل الفبرة تاني قمت مشغل وقافل كذا مرة -بطمن بقا -
لقيت كله زي الفل فقمت مقفل على كدة
للأسف القصة اللي كان المفروض تاخد 10 دقايق خدت 3 ساعات بسبب لخبطة السلوك وبسبب اني مش متمكن اوي في قصة الكهربا دي
بس بيني وبينكم بعد التركيب ونقاء الصوت وخصوصا اني لسة مغير السماعات فانبسطت بصراحة وقلت مبروك عليا
معذرة معرفتش أصور لأني كنت لوحدي والدنيا كانت ضلمة وكنت شغال بكشاف
بس التجربة تستحق بصراحة

[saddam]

صديقي المواطن
ما همني في الموضوع هو أنك سعيد ومبسوط من النتيجة ولكن أولا غلبوك في التوفيقية ب خمسة جنيهات مصرية فقط لا غير بسعر اﻹريل ﻷن أنا لسه شاري واحد أول إمبارح من هناك ودي مؤامرة ضدك في حد ذاتها تستهدف تعوق مسيرتك وحتأخرك في إنك تكون نفسك
تاني هم اﻷريل نفسه وهو هو عند أدريان وبالتركيب وبالتخريم بالصاج بصورة دائرية ب 180 جنيه وزمن النركيب 35 دقيقة وأنا مبحبش تغامر في عربيتك في حاجة أول مرة تعملها أنا بحب أشوف بيعملوها إزاي ثم أعيش اللحظة بعدين براحتي وأنا لو منك كنت طورت نفسي وعربيتي وجبت أريلين وآخرملهم في آخر الرفارف الخلفية بميلان ألى الوراء قف أرجوك منظرها حيتغير جملة وتفصيلا
متحرمناش من جهودك الجبارة ومواضيعك الجميلة
وهذا ما لزم بيانه ودمتم
وبالتوفيق وإلى اﻷمام ومن نصر إلى نصر
ودمتم للنضال

[husseinthemaster]

اولا مبروك علي الاريال ثانيا هل الكاسيت لازم يكون مجهز للاريال الكهرباء ولا اي كاسيت ممكن يشغلة وشكرا

[Ashraf_Ibrahim]

صديقي المواطن
ما همني في الموضوع هو أنك سعيد ومبسوط من النتيجة ولكن أولا غلبوك في التوفيقية ب خمسة جنيهات مصرية فقط لا غير بسعر اﻹريل ﻷن أنا لسه شاري واحد أول إمبارح من هناك ودي مؤامرة ضدك في حد ذاتها تستهدف تعوق مسيرتك وحتأخرك في إنك تكون نفسك
تاني هم اﻷريل نفسه وهو هو عند أدريان وبالتركيب وبالتخريم بالصاج بصورة دائرية ب 180 جنيه وزمن النركيب 35 دقيقة وأنا مبحبش تغامر في عربيتك في حاجة أول مرة تعملها أنا بحب أشوف بيعملوها إزاي ثم أعيش اللحظة بعدين براحتي وأنا لو منك كنت طورت نفسي وعربيتي وجبت أريلين وآخرملهم في آخر الرفارف الخلفية بميلان ألى الوراء قف أرجوك منظرها حيتغير جملة وتفصيلا
متحرمناش من جهودك الجبارة ومواضيعك الجميلة
وهذا ما لزم بيانه ودمتم
وبالتوفيق وإلى اﻷمام ومن نصر إلى نصر
ودمتم للنضال

ياللهول !
5 جنيهات مصرية كاملة !
دي مؤامرة واضحة جدا لاعاقة مسيرتي التنموية الرهيبة وايقاف مسيرة بنائي لنفسي :d
هو انا سألت عليه في شارع شبرا تراوح سعره ما بين 140 و 150 للتايواني اما الكوري فسعره 225 جنيه
انا كنت في مشوار جنب التوفيقية والتوقيت كان متأخر وتقريبا كل المحلات قفلت فأول محل دخلته ولقيته فيه جبته بدون فصال الحقيقة :d
اما عن تخريم الصاج فبصراحة انا مبحبش اخرم حاجة زيادة خليها يا عم مصلبة نفسها
هههههههههههههههههههههه
بصراحة انا عجبني اني ركبت وعملت بنفسي
هو انا مشفتش تركيب الاريال الكهربا ولا يوتيوب ولا حد ركبه قدامي !
ولكن بما ان اكتر من واحد أكدلي ان السلوك موجودة فقلت اخوض التجربة بنفسي وربنا سترها الحمد لله
بس بصراحة بعد التوهان اللي كنت فيه انا كنت روحت لأي كهربائي ركبه ب 20 جنيه وريحت نفسي :d

اولا مبروك علي الاريال ثانيا هل الكاسيت لازم يكون مجهز للاريال الكهرباء ولا اي كاسيت ممكن يشغلة وشكرا

ما دام السلوك بتاعته واصله للاريال يشغله عادي
اصل هي الفكرة كلها سلك كهربا وسلك اوديو من الكاسيت نفسه والارضي بتوصله في جسم العربية وكله بيبقا تمام معاك

[samooh2010]

الف الف مبروك يا استاذ اشرف
و كان بدل التعب اللى انت عملته لنفسك كنت ركبته عند نفس الراجل اللى اشتريته منه بس مش مهم
المهم ان انت بتحب تركب بنفسك و تكتشف

[Ashraf_Ibrahim]

الف الف مبروك يا استاذ اشرف
و كان بدل التعب اللى انت عملته لنفسك كنت ركبته عند نفس الراجل اللى اشتريته منه بس مش مهم
المهم ان انت بتحب تركب بنفسك و تكتشف

الله يبارك فيك يا عزيزي
انا فعلا بحب اركب الحاجة بنفسي حتى لو هاخد فيها اضعاف الوقت اللي هياخده الصنايعي
يعني بحس باحساس مختلف :d

[Hamada hozein]

الف مبروك علي الاريال الجديد وكمان الاجمل انك مبسوط
بس انا مختلف مع الاعضاء الكرام ومؤيد انك عملتة بنفسك
علي الاقل انك اكتسبت خبرة