رايكم فى الفيرنا لمبتدأ سواقة

[7awadeet]

بسم الله الرحمن الرحيم

الموضوع بدا انى قررت اتعلم السواقة واشترى سيارة رغم عدم شغفى طول عمرى بالقيادة ولكن ظروف الحياة اضرتنى لدة وبدات فعلا اخد كورس لتعليم القيادة وان شاء الله واحدة واحدة ابدا اتعلم رغم ان عندى تلاتين سنة يعنى بتعلم كبير... المشكلة هنا فى اختيار السيارة المناسبة انا كنت ناوى على اد المبلغ اللى معايا وهو من تلاتين لاربعين الف اجيب حاجة مناسبة وكانت فى دماغى اوى الدايو لانوس لانها عربية زى ما سمعت اقتصادية جدا ومريحة وتنفعنى فى السفر لانى بسافر كتير ... لكن المشكلة انها نادرة ( محدش راضى يبيع ) ومش عارف الاقى واحدة كويسة وبالسعر دة .

ناس تانية نصحتنى بالاكسنت موديل 2000 او 99 وبردو نفس المشكلة

الفكرة ان دلوقتى قدامى عربية فيرنا 2006 1500 سى سى فابريكة برة وجوة وواحد مهندس فى التوكيل حبيبى قالى عليها وبيشكر فيها جدا قالى هى محتاجة بس تغير كبوت ودة انا هجبهولك من برة واغيرهولك هنا فى التوكيل لكن موتور وعفشة وخلافة متتكلمش فيها وصاحبها طالب فيها 47500 مش هينزلو ... المشكلة انى سمعت ان الفيرنا جراية وخفيفة وغير مناسبة للى بيتعلم جديد زى حالاتى مع انى باخد كورس القيادة على فيرنا ...

فانتو ايه رايكو ... وتنصحونى بايه ... اجى على نفسى وازود فى الفلوس شوية مع ان دة هياثر عليه ماديا واجيب الفيرنا ولا اصبر وادور على حاجة فى حدود التلاتين اربعين ...

وشكرا مقدما على النصيحة وتحيتى لكل واحد فى المنتدى الجامد دة ...

[dem0]

الفيرنا كويسة

[rahmanboud]

الفيرنا ممتازه بالنسبه لك مع تأكيدى لك بأنها خفيفه على السرعات العاليه وموتورها شديد جدا على جسم السيارة لكنك فى البدايه قيادتك للسيارة محسوبه دون تهور أو إسراع أو أمريكانى وخلافه وفى السفر 120 كيلو متر فى الساعه مش وحش وهى لحد كبير ثابته فى الحدود دى لكنى لى تعليق على صعوبة وجود لانوس أو أكسنت فى حدود المبلغ الموجود معاك لأنها موجوده فى السوق وبكثره لكن عايزه منك شوية جهد ومواقع البيع على النت كتير جدا وربنا يوفقك لما فيه الخير لك

[7awadeet]

شكرا للاهتمام .... والرد السريع .... يعنى افهم من الرد ان حضرتك بترشح الفيرنا ولونى كنت عاوز اعرف ايه اللى يميز الفيرنا عن اى عربية تانية فى حدود المبلغ اللى معايا زى اللانوس 99 او اكسنت ...

وشكرا مرة تانية

[hugan]

اوعي تتشتري الفيرنا 1500 اسمها فيفا
عربيه تعبانه جدا
خليك في الفيرنا 1600

[kimoroad]

انا واحد قريبي معاه فيرنا 2006 او 2007 مش فاكر
و هي 1500 و مش كاملة يعني مش هتلاقي ار بي ام ولا هتلاقي ازاز كهرباء بتاعها
و هو فعلا في فيرنا 1500 الموديلا المذكورة غير ال فيفا و موتور الفيرنا 1500 بسم الله ما شاء الله مختلف تماما عن الفيفا 1500 و عفي جدا
ولو فعلا العربية فبريكا بره و جوه و الموتور و العفشة 10/10 يبقي اتوكل علي الله
و انصحك انك تاخد معاك ميكانيكي و سمكري و لو حضرتك قولتيلي ان هي جاية من طرف واحد معرفه مش عيب انك تتأكد من الحاجة ال هتاخدها لأن بكل بساطة عمرها ما هترجع تاني لو لقدر الله فيها حاجة و الحق مبيزعلش و بالتوفيق ان شاء الله

[7awadeet]

متشكر جدا للاهتمام يا جماعة وشكل فى اجماع من اللى ردو على الفيرنا مع انها اغلى ولون كان نفسى حد يقولى ايه اللى بيميزها عن الدايو لانوس 99 او 2000 او الاكسنت الشكل القديم واللى يخلينى اضغط على نفسى ماديا عشان اجيبها

[K_E]

الفيرنا كويسة للمبتدئين لان ابعادها واضحة للسواق

[modo88]

بص ياباشا انت بتسال علي الفرق بين الفيرنا والانوس والاكسنت
انا هاقولك الفرق بين الفيرنا والاكسنت :)
وهاتكلم عن الفيرنا والاكسنت1500 زي ماقولت .
الفرق بينهم شكل بس ايوة فرق شكل مختلف والاتنين واحد في العفشه والموتور بمعني الكلمه :)
انما ال 1600 اختلاف شكل وموتور والعفشه واحده :)

[S O P H O S]

هات فيرنا 1600
وهي كويسة كبداية
واي عربية حتي لو خفيفة مش هتجري لوحدها

[ابو لؤى]

اوعى تجيب الفيرنا فيفا دى تقريبا بيقولو عليها هندى

[7awadeet]

اولا شكرا لاهتمام المشرف اللى دخل غير عنوان الموضوع .... متهيالى كدة احسن

ومشكرا لكل اللى رد على الموضوع دة واحب اقولكو ان الفيرنا اللى كنت بتكلم عنها اتباعت :d

وطبعا بعد ما كنت اقتنعت بالفيرنا .... عموما ادعولى الاقى عربية كويسة ورربنا يعينى ...

وشكرا مرة تانية على الاهتمام

[maio_do]

فيه كلام غريب

الانوس ازاى مش موجوده دى مالية البلد السوق كلوا لانوس

وازاى فيرنا فابريكا بره جوة وعايزة تغير كبوت طيب هتغيره ليه

خلى بالك ليتنصب عليكى زى ماللى قبلك ومتاخدش بكلام حد ولا حبيبك ولا حتى قريبك

وربنا يوفقك فى عربية تكون حلوة وجميلة الانوس والفيرنا تقريبا واحد بس انا بميل للشكل الفيرنا بالتوفيق

[7awadeet]

فيه كلام غريب

الانوس ازاى مش موجوده دى مالية البلد السوق كلوا لانوس

وازاى فيرنا فابريكا بره جوة وعايزة تغير كبوت طيب هتغيره ليه

خلى بالك ليتنصب عليكى زى ماللى قبلك ومتاخدش بكلام حد ولا حبيبك ولا حتى قريبك

وربنا يوفقك فى عربية تكون حلوة وجميلة الانوس والفيرنا تقريبا واحد بس انا بميل للشكل الفيرنا بالتوفيق

جايز انا عشان معنديش خبرة مش عارف ادور صح ... وتايه شوية وتفسير موضوع الفيرنا انها واقع على الكبوت مطرقة فطبقته فصاحبها فى نفس الوقت كان عاوز يجدد واضايق منها فكل حاجة فيها كانت سليمة ما عدا دة ... وعموما هى كدة كدة اتباعت خلاص ... مقعدتش 24 ساعة

وياريت لو حد يقولى ايه انسب طريقة ادور بيها تعلى عربية مستعملة

[maio_do]

جايز انا عشان معنديش خبرة مش عارف ادور صح ... وتايه شوية وتفسير موضوع الفيرنا انها واقع على الكبوت مطرقة فطبقته فصاحبها فى نفس الوقت كان عاوز يجدد واضايق منها فكل حاجة فيها كانت سليمة ما عدا دة ... وعموما هى كدة كدة اتباعت خلاص ... مقعدتش 24 ساعة

وياريت لو حد يقولى ايه انسب طريقة ادور بيها تعلى عربية مستعملة

خيرها فى غيرها مع انى مش مقتنع مطرقة اية اللى وقعت على الكبوت ووقعت منين


المهم علشان تدور على عربية احسن مواقع عربيات ده كونتكت كارز

وطبعا لازم يبقى معاك حد فاهم فى العربية بره وجوة علشان ميتنصبش عليك

وبالنسبة للاسعار لما تلاقى حاجة مناسبة تدخل تعمل موضوع هنا بمواصفات العربية وسعرها

وربنا يوفقك فى شراء العربية اهم حاجة الاستخارة قبلها