تسخين الالنترا قبل ما تمشي بيها

[KamalShawqi]

السلام عليكم،،،

انا متعود اتخرك بالعربية بعد ما لمبة الزيت تطفي، الانترا ٢٠١١ ما بتاهدش ثانية واللمبة تطفي، والصيح بدري في الشتا بتاخد ثانيتين او تلاتة بالكتير وتطفي

لكن في النيسان تيدا ٢٠٠٩ كانت اللمبة ممكن فعلا تاخد دقيقة بحالها علي ما تطفي

وانا قريت مقالات على ان الكلام ده صح وتقدر تمشي بالعربية بعد اللمبة ما تطفي، زي المقالة دي مثلا:

هل يهم تسخين السيارة قبل قيادتها مع الجواب المقنع والدليل - تمت الإجابة عنه - Google إجابات

لكن واحد صحبي (بيسوق من عشر سنين وكان معاه النترا الجديدة والقديمة والاكسنت وفيات واوبل وكل اللي انت عاوزه جابه)، اول ما شافني طلعت بالعربية كلمني كأني عملت جريمة في حق الموتور وان لازم استني حتى ١٠ دقايق قبل ما اتحرك

حيرني لأنه فاهم في العربيات، ايه رأيكوا؟؟؟

[Silent~Dream]

10 دقايق ده مع احترامى اسمه تهريج حضرتك شوف الكتالوج بيقول فيه تسخين ولا تمشى على طول ولو هتسخن يبقى قد ايه و امشى على كلامه بالضبط لا اكثر ولا اقل و لو مش معاك الكتالوج استنى من 30 ثانيه الى دقيقه لحد ما تظبط قعدتك و تمسح تراب لو فيه على الدركسيون و تربط حزام الامان و تتوكل على الله

[islamnasser10]

ده انت لو عايش في روسيا مش هتسخن 10 دقايق
انا بسخن نص دقيقه او دقيقة وبتحرك بالعربية علي ار بي ام قليل لحد مامؤشر الحرارة يوصل قبل النص بشوية وبراحتك بعد كدة

[Hunting_Eagle]

المفروض انك تنتظر حوالي 30 ثانية لحد ما الزيت يبدأ ياخد دورته جوه الموتور و بعدها تتحرك بالعربية بسرعة متوسطة لحد ما العربية تسخن .. اساسا كده العربية هتسخن معاك بسرعة اكتر من لو سخنتها وانت واقف

كتالوجات عربيات كتير بتقول نفس الكلام .. مش كده وبس دي بتحذر من التسخين المفرط فيه

[mk3]

كنت الاول بستنى اما الامبير يتحرك حوالى 5 دقائق لكن دلوقتى 1 الى 2 دقيقه وبتحرك على سلانسيه واطى وبنقل بدرى بجيب الرابع على 40 مفيش 5 دقائق والعربيه بتسخن

[hossamalsadik]

أنتظر وسخن من 2 الى 3 دقائق
لأن فى الفتره ديه الزيت بيكون وصل لجميع أجزاء الماتور ورتفعت درجة حرارته نسبيا مما يساعد على اداء افضل لحركة ولزوجة الزيت داخل اجزاء الماتور وبالتالى المحافظه على التقليل من التاكل داخل الماتور مع اعطاء اداء افضل لتسارع الماتور

[lanos2004]

شوف كلام من رجل مطور للمحركات مصرى ويعمل فى بى ام المانيا
تسخين لمدة 30 ثانيه---تتحرك ببطء حتى تترفع حرارة المحرك وتقترب من الطبيعى بعدها اعمل الى انته عاوزة
ودة فى اى سيارة حديثه

[mahmoud_afifi]

بقعد من 3-5 دقايق ولما بكون مستعجل بستنى دقيقه وبعدين اتحرك هادي ولما العربيه بتسخن بقرص عليها.

[hugan]

عربيه جديده قديمه
ب مليون جنيه او بربع جنيه
اقل واجب دقيقتين تسخين

[mhkorayem]

طيب ما الحل بسيط
أنت أول ما بتدور العربيه الأر بي أم هتلاقيه فوق الواحد
أستنى شويه لحد ما المؤشر ينزل تحت أول شرطه حاجه بسيطه وبعدين توكل على الله وأتحرك

[Ashraf_Ibrahim]

في مانيوال هيونداي هتلاقي انه كاتب ان تسخين السيارة 30 ثانية وانها لا تحتاج لتسخين
عموما بداية حركتك بالعربية هتخليها تسخن اسرع
انت اركب عربيتك وشغلها
وعلى ما تربط حزامك وتراجع مراياتك وتشغل الكاسيت وتظبط قعدتك هتلاقي ان تقريبا نصف دقيقة او اكتر عدا فتتحرك بالعربية على السلانسيه لمسافة 300 او 400 متر ومن ثم تتوكل على الله بس تخليك حنين لحد ما حرارة الموتور تطلع وهتلاقيها بتطلع معاك بسرعة :]
وطبعا لما تستخدم زيت معدني غير لما تستخدم زيت تخليقي !

[ayam7]

اول ما مؤشر الحرارة يبدأ يعلم معاك توكل على الله ومتقلقش من حاجة

[KamalShawqi]

اولا تشكروا يا رجالة على الردود السريعة والجميلة دي

مشكلة الالنترا 2010 و2011 مافيهمش مؤشر للحرارة (كنت لسة هاشتم غبور على انه شايل مؤشر الحرارة، بس الكتالوج الاصلي بتاع العربية ما فيهوش مؤشر الحرارة، براءة ياعم غبور المرادي)، ولو كان فيها كان الواحد شك من زمان ان اللمبة طفت انما الحرارة لسة قليلة

بعد التدوير على النت وتجربة دلوقتي في العربية وبمناقشتكم الجميلة دي نقدر نقول الآتي:

1) العلامة دي واللي فيه ناس فاكراها لما تطفي تبقي الدنيا لوز، معناها: وجود مشكلة فى تبريد المحرك وتتطلب اطفاء المحرك
(بصراحة مش عارف ليه بتطول دقيقة او دقيقة ونص في النيسان تيدا على ما تطفي؟)



2) أحسن طريقة تعرف بيها العربية سخنت ولا لأة، هي زي ما قولتوا بمراقبة الار بي إم، هو في الاول بيكون عالي عشان يساعد على تسخين العربية، ولما تسخن يرجع ينزل عن الواحد، وجربتها في الالنترا 2011 خدت دقيتقتين تقريبا

3) في حالة الاستعجال، شغل، ونص دقيقة وامشي 300 - 400 متر بهدووووووء (يعني مثلا على ما توصل للطريق الرئيسي مثلا)، وبعد كده تقدر تسرع براحتك

4) التسخين الزيادة ضرر على الموتور، يعني 3، 4 دقايق كافيين بالمهمة كلها

تسلموا يا شباب، مش عارف اللي الواحد كان بيعمله ده يأثر على الموتور ولا لأة، بس الواحد بيتعلم

[john55]

انا بدور العربيه وبمشي بعديها علي طول يعني حوالي 30 /40 ثانيه

[dr.hazem]

كل العربيات الجديدة المفروض بتحط زيوت تخليقيه وبالتالي مبتحتاجش تسخين وبالكتير نص دقيقه!!
فكرة التسخين ان الزيت اول الدواره بيكون تقيل ولسا موصلش لكل الاماكن المحتاجة تزييت فالضرر كبير لو اتحركت وحرقت وعشان كده اخترعو الزيوت التخليقيه اللي بتمتاز بانها خفيفه وبتؤدي مهمتها بسرعه وبالتالي انلغى فكر التسخين،،،

بالنسبة للي بيحطو زيت معدني فعربيه جديدة فبرضو التسخين لا يزيد عن دقيقتين،،،
العربيات القديمه بالذات الكربيراتير بتحتاج اكتر من كده شويه بس برضو مبيعديش ال5 دقايق،،،،

تحياتي

Sent from my Xperia Arc S using Forum Runner