مجرد سؤل .. أزاي أحسب أستهلاك البنزين ؟

[تامر راغب]

عايز أحسب حجم البنزين مع كيلوات السيارة
أعمل ايه ؟؟
بمعنى انى عايز أعرف العربية بتاكل بنزين والا لأ ؟؟؟

ممكن حد يفيدنى ...

ياترى أفضيها خالص وأبدأ أحسب والا ايه؟؟؟

[khalid_adel]

فول عربيتك اول تكه صفر عداد الرحلات
روح بيها العين السخنه مثلا ولا اسكندريه (مش اقل من 100 كيلو مشي) وثبت سرعتك مابين 100 ل 120 كم ولما تخلص مشوارك اقرب محطه وقوله فول اول تكه
شوف هي مشيت كام كيلو واقسمه علي عدد اللترات المستهلكه

[MEMODINA1]

قولى نوع العربية وانا اقولك المعدل الطبيعى بتاعها .. لو ماتريكس اللى مكتوبة فى المعلومات يبقى فى الطريق الطوالى هتعمل كل 20 لتر حوالى 220 الى 250 دا لو انت مش حارق لحد 100 الى 110 ك لكن لو ماشى على 140 وتكييف هتعمل 200 كيلو فقط لا غير اما فى المدينة فدا بقى مش معروف نسبى لان ساعات بتحرق واشارة وطلوع على الاول كتييييييييييييييييييير ولكن لو هنحسبها هتبقى 150 كيلو لكل 20 لتر تقريبا

[تامر راغب]

شكرا ياأ/ خالد على اهتمامك
هجرب كلامك وأقولك
شكرااااا

[تامر راغب]

هى فعلا ماتريكس يا أ/ ميمو
ﻷ أنأ مش بسافر وأقصى سرعة جبتها داخل المدينة
فى اسكندرية على البحر 110بس
أنا الحقيقة أول ماالمؤشر ينزل للنص بفول على طول وتقريبا كدة كل 3أيام بفول 92
مابين 42 جنيه و 54 جنيه يعنى تقريبا فى المتوسط 20 لتر

[MEMODINA1]

تمام انت بتمشى اد كام كيلو تقريبا لنص التانك

[تامر راغب]

والله ياأخى ماحسبتها من يوم ماجبت العربية
لكن هاخد بالى من بكرة وأقولك
ومتشكر جدا لمساعدتك

[Samir Elshahawy]

عايز أحسب حجم البنزين مع كيلوات السيارة
أعمل ايه ؟؟
بمعنى انى عايز أعرف العربية بتاكل بنزين والا لأ ؟؟؟

ممكن حد يفيدنى ...

ياترى أفضيها خالص وأبدأ أحسب والا ايه؟؟؟

يجب أتباع الاتي لحساب معدل أستهلاك البنزين بشكل صحيح :

1- أختار محطة بنزين و أدخل و أملأ التانك
2- عدم ملء التانك حتي الزور و لكن مع توقف مضخة البنزين عن الضخ بشكل أوتوماتيكي (أول تكة في المسدس)
3- تصفير عداد الرحلات أو أخذ قراءة الكيلومترات
4- السير لمسافة محددة (يفضل أن تكون 100 كم أن أمكن)
5- الالتزام بسرعات محددة , بمعني أنك لو طالع طرق سريعة تكون السرعة أقتصادية يعني في حدود ال 90 كم/س الي 110 كم/س
6- أعادة التزود بالوقود من نفس المحطة و بنفس الكيفية (حتي أول تكة في المسدس)
7- أخذ قراءة عداد المضخة
8- حساب الكيلومترات المقطوعة سواء من خلال عداد الرحلات أو من خلال طرح الكيلومترات المقطوعة سابقا قبل التموين الاول من الكيلومترات المقطوعة قبل التموين الثاني
9- قسمة الكيلومترات المقطوعة علي كمية البنزين في المرة الثانية

و يتم تكرتر تلك العملية مرتين أو ثلاثة علي سرعات مختلفة

[تامر راغب]

شكرا ياأستاذ سمير على التوضيح
ربنا يخليك يارب
أنا بس جربت وفولت التانك ومشيت ب 3 أرباعه بالظبط
مسافة 197 كم تقريبا على سرعات تتراوح مابين 60 ل 100
كدة يبقى ايه المعدل ؟

وبرضه هجرب كلام حضرتك من بكره ان شاء الله

بس حابب أعرف لو فيه مشكلة والعربيه بتاكل بنزين
يبقى ايه الحل ؟؟؟؟

وشكرا لحضرتك

[Samir Elshahawy]

شكرا ياأستاذ سمير على التوضيح
ربنا يخليك يارب
أنا بس جربت وفولت التانك ومشيت ب 3 أرباعه بالظبط
مسافة 197 كم تقريبا على سرعات تتراوح مابين 60 ل 100
كدة يبقى ايه المعدل ؟

وبرضه هجرب كلام حضرتك من بكره ان شاء الله

بس حابب أعرف لو فيه مشكلة والعربيه بتاكل بنزين
يبقى ايه الحل ؟؟؟؟

وشكرا لحضرتك

خلينا نجرب الاول زي ما أنا قولت لك و نحسبها مع بعض و بعد كده لو فيه أستهلاك زيادة نشوف أيه سببه واحدة واحدة و أن شاء الله يطلع معدل الاستهلاك معقول

و خلي بالك أن السرعات المنخفضة (تحت ال 60 كم/س) بيكون الاستهلاك غير اقتصادي و برضه النقلات الكتير و التغيير في السرعة بيسبب زيادة في الاستهلاك

عايزك قبل ماتبدأ تحسب تعمل الخطوات التالية :
1- أتأكد من ضغط الهوا بالاطارات (أظبطه زي ماهو مكتوب علي قائم السيارة)
2- نظف فلتر الهوا بالهواء
3- أزالة أي أوزان زائدة بشنطة العربية
4- خد بالك أثناء تجربة الحساب من وجود هواء علي الطريق (سواء مضاد لحركة السيارة أو معاها)
5- خد بالك من حالة الطريق (اسفلت ناعم - خشن - ممهد - غير ممهد )

و في أنتظار قراءاتك التالية :
1- عداد الكيلومتر قبل التموينة الاولي
2- عداد الكيلومتر قبل التموينة الثانية
3- المسافة المقطوعة (2-1)
4- كمية البنزين المسحوبة باللتر من مضخة المحطة
5- الاستهلاك = (3 / 4) * 100 = لتر / 100 كم

[تامر راغب]

علم وسينفذ يافندم
ربنا يخليك يارب
هجرب وأقول لحضرتك فورا
شكرا جزيلااااااا
آه صحيح أنا بمر على مختلف الطرق ممهدة وغير ممهدة
مرصوفه وترابية