هيونداي أكسيل : تستاهل و لا لأ ؟؟

[abosharbat]

مساء الخير
انا معروض على هيواندى اكسيل
موديل 1998
رخصة حتى نوفمبر القادم اى حوالى 9 اشهر
ومن المالك الاول يعنى انا هاكون تانى مالك ليها
الموتور عامل 80000 الف كيلو
وهى 1300 سى سى
فاضية بالكامل لا تكييف والا زجاج كهرباء ولا باور
الموتور اكثر من رائع والعربية مركونة
انما فى حاجة الى الاتى :
1- كبوت امامى .
2- عدد 2 اكصدام امامى وخلفى.
3- رفرف شمال.
4-وطبعا بعض السمكرة والدكو .
5- وفرش داخلى او كسوة.
6-واحتمال شغل عفشة - لسة مش عارف.
7-ومراة جنب شمال مهشمة.
يعنى تقريبا مصروف فى حدود من 3500 الى 4000 ،على ما اظن وياريت الخبراء يقول لى التكلفة هتكون كام.

والمالك عاوز 28000
هل تسوى هذا المبلغ ام لا
ارجو افادتى سريعا
وجزاءكم الله كل خير
وشكرا

[ahmedsrs]

متستاهلش كانها عربية 128 بس متنكرة

[hugan]

مش شرط كيلو متر قليل
علشان تكون العربيه سليمه
من كلامك العربيه عدمانه العافيه

[abosharbat]

مش شرط كيلو متر قليل
علشان تكون العربيه سليمه
من كلامك العربيه عدمانه العافيه

هى على حسب كلام المالك
مركونة ومش بتتحرك ومتبهدلة من الركنة
يعنى الكبوت من الناس اللى بتقعد عليه
وفابريقة بالكامل من الداخل

[كريم kok]

بص كلمو 24 الف واخرها لو عجباك 25 الف ومتزودش علي كده لنها ياصديقي فاضيه ﻻ بور وﻻ حته تكيف وبعدين 28 الف دول يجيبو فيلشيا نضيفه ااو فيلشيا الكومبي تكيف ودلع يعني

[ahmedalaahosny]

خليهاله تتربي ف عزو ليه بقي ؟ طالما مركونة من فتره يبقي اي حاجة كاوتش هتتغير سواء جوانات او حتي الكاوتشات ده اولا ثانيا طالما مركونة يبقي متدمره سمكره ودوكو وطبعا مع ميه الشتا اكيد فيها بارومه كمان الاكسيل شهيره بشروخ ف الركبة ثالثا حالة الموتور والفتيس لو حتي ممتازين وبالذات المكنة لو تمام ومافيش دخنة ولا تسريب زيت فطبعا اقل واجب لو مامشتش من فتره طويله هتعمله طقم شنبر عشان تكون ف الامان احنا كده مااتكلمناش لسة بقي لا في رادياتير ولا شغل عفشة وطرمبات ولا سيور ولا كاربراتير ولا الاكسسورات الخارجية اللي اكيد متدمره من فوانيس ومرايات وازاز وف الاخر العربية فاضية بعد كل المصروف ده ده غير ان حضرتك لو مااخترتش الصنايعي الصح الامين هيعكلك ف العربية وهتدفع قد تمن العربية تصليح

[J A G U A R]

ابعد عنها

[jojojojo]

عربيه تعتبر معدمه وع فكره العربيه المركونه بتصرف مصاريف ملهاش اخر انصحك ابعد تماما الا في حاله لو هتخلص ب22 الف عشان انت هتصرف عليها عشان تبقي عربيه مش اقل من 15 الف من سمكره لدوكو لعفشه لكاوتشات لرداتير لزيوت وماخفي كان اعظم وكل الحاجت ديه بتتكلف كتير

[saddam]

صديقي المواطن
العربية اﻷكسل عربية كئيبة ومش محترمة ومش وطنية وتقل من صاحبها ولفيت بلاد كتير من الدنيا مشفتش حد بيحترمها ولا بيحسبها على العربيات غير شعبنا المصري البسيط الطيب المسكين فسيبك منها يا مواطن وإرفع راسك فوق إنت مصري
وهذا ما لزم بيانه ودمتم
وبالتوفيق وإلى اﻷمام ومن نصر إلى نصر
ودمتم للنضال

[abosharbat]

انا شايف ان راى الكل شبة اجماع على عدم شراء السيارة لما بها من مشاكل
احب بس الفت النظر ان السيارة مش مركونة بصفة دائما وهى خاصة برجل كبير
وبيخرج مشاوير قليلة يعنى تقريبا مرة فى الاسبوع

ومدام كدة يبقى انتم لازم تتصرفوا بقى وتشوف لى عربية
انا معاى 30 الف
اسيب ليكم المهمة دها
وشكرا لكل اعضاء المنتدى

[ahmedyousryk]

ممكن تجيب واحدة هى هى 1500 سى سى وباور وتكييف وكل حاجة من 35 ال 40 الف ومواصفات خليجى اصبر شوية وحوش العربية ليها مميزات ان قطع غيارها سهلة ورخيصة جدا وباور وتكييف الى بتتكلم فية دة كدة ملهاش اى لازمة . معلش هتدفع برضة فى الاخر حوالى 35 الف ومش هيبقى عندك ولا باور ولا تكييف وتقعد تصلح فيها على الفاضى ..

[ahmedsrs]

ممكن تلاقى بالمبلغ ده كيا برايد سيدان موديلات من 2000 الى 2003 وحالة شاذة كمان وممكن نفس الموديل اتوماتك من 2000 الى 2001 حالة جيدة جدا