الحقوني ... هاغير طقم سيور نيو أكسنت 2010

[m6r1282]

عندي سيارة نيو أكسنت 2010 عاملة 61000 كيلومتر

ببص على الحوض كده قبل السفر الاسبوع الماضي، فوجدت سير الباور مشقق "عرفت إنه سير الباور من الميكانيكي"

طبعا أنا اترعبت فلما روحت للميكانيكي نصحني بأن أغير طقم السيرفيز كله.

والآن الأسئلة (كلها إجباري):

1- هو سعر الأصلي بكام وهو إيه أصلا، ولم مافيش أصلي الأفضل بعده إيه وبكام ؟
2- هل فيه أي نصيحة في الموضوع ده لأني خاااااااام ؟

أنا رايح للميكانيكي الخميس 17-04-2014 فلو تفيدوني في أسرع وقت مشكوريييييييين مقدما.

[tameem2010]

الاصلي في حدود 750 من التوكيل
سير باور + سير دينامو + سير كمبروسور تكييف + كاتينه +بليه ثابته +بليه متحركة
دول بيتغيروا كل 60000 حد اقصى او 3 سنوات حد اقصى واهمالهم فيه خطورة شديده جداااا واعتقد ان العربيه معاك بيكون صوتها عالى عن الطبيعي لما تدوس فيها نتيجة خشونة بلي الكاتينه
متجيبش الا الاصلى من التوكيل لان العادي هتلاقيه بنص السعر انما بكتيره هيقعد 25 الف كم ده لو قعد اصلا وممكن يقطع منك قبل كده ووقتها لو حصل لاقدر الله هتخسر كتير قوووووي ده غير مصنعيات فك وتركيب

[Amro_ON]

ممكن أفتي :)

انت كده كده ده وقت تغيير مجموعة سيور العربيه على 60 ألف...ويفضل وبشده تعملها في التوكيل او مركز خدمه محترم...وسيبك من الميكانيكيه

الموضوع مهم جدا

[m6r1282]

شكرا للكل ومتابع ...

أنا بشكر الجميع على الردود السريعة دي

أحب أوضح إن الميكانيكي قالي إنه فيه الإيطالي وده رخيص بس آآآآآآآخره 30000 ويتغير

ثانيا سعر الـ 750 ده كتير أوي دا الراجل قالي النوع gm أو gn مش فاكر، هو الأصلي وده بيقول في حدود 250 جنيه للكاتينة والباور والدينامو. وموصيني ماجيبش إلا الأصلي فعلا.

بالنسبة للبلي لما اتصلت بيه قالي حسب الخشونه والعربية مابسمعش فيها خشونه خالص، هو في الأول بس لما بتكون مركونه اسبوع وآجي ادور بحس ان الصوت عالي، لكن بعد دقيقة بالضبط الدنيا بتكون تمام.

بالنسبة للميكانيكي، الناس عندنا بتشكر فيه جدا.


ومتابع ...

[johnior]

باشا انا لسه مغير الطقم ( 4 سيور ) ده وجيبته من محل اسمه الشرق فى شارع شبرا بيبع حاجات مضمونه واصليه عن تجربة وكان السعر على ما اتذكر حوالى 330 جنية,. ورحت غيرته عند مركز سبيد سيرفيس عمل صيانه كاملة للعربية ولو عايز مكانه هو عند حديقىة بدر - جسر السويس . لو محتاج اى تفاصيل تانية قولى.
بالنسبة لبلية الكاتينه المركز قالى مش دلوقتى عند ال 60000 انا غيرتهم لانه عدى عليهم 3 سنيين.
ما تهملش فى الموضوع ده.

[OMAR11112010]

طقم السيور الاصلي لنيو اكسنت ب 330
السيور والبلي ب 550
غيرتهم من فترة بسيطة عند مركز محترم جدا روح هتتبسط والاسعار ممتازة هبعتلك اسم المركز ع الخاص

[m6r1282]

متااااااااااااااابع ...

أنا والله بشكركم على الردود السريعة دي للمره التانيه

بالنسبة للأسعار كده في التمام، وحسب ما قيل لي.

بالنسبة للميكانيكي هو انتوا مجمعين على إنه بلاش عنده حتى ولو كان سمعته كويسه ولا إيه؟؟

لأن أنا في المنوفية وأقرب حاجة لي في شبين الكوم، وأنا مابجيب بالعربية مصر كتير. ومن الآخر مش صايع في طرق مصر أصلا. أنا خاااااااااااااام معرفش غير في الكمبيوتر فقط

[tameem2010]

البلي بتاع الكاتينه حتى لو كويس لازم يتغير ليه ؟
لانه عمل 60 الف
والمفروض انه لسه هيعمل 60 الف كمان مع طقم السيور الجديد
يعنى مش هيتحمل
البلي لازم يتغير حتى لو مش خشن
الاسعار اللى بقول لك عليها ديه اسعار غبور
اما الناس اللى برا دول متصدقش انها اصليه وكلها صيني وبتنضرب ببادجات كوري وايطالى والماني الخ الخ
الاطقم الاصليه مش موجوده غير في غبور او موزعينه المعتمدين
انا بتكلم عن تجربه مش كلام وخلاص
تحياتى

[m6r1282]

البلي بتاع الكاتينه حتى لو كويس لازم يتغير ليه ؟
لانه عمل 60 الف
والمفروض انه لسه هيعمل 60 الف كمان مع طقم السيور الجديد
يعنى مش هيتحمل
البلي لازم يتغير حتى لو مش خشن
الاسعار اللى بقول لك عليها ديه اسعار غبور
اما الناس اللى برا دول متصدقش انها اصليه وكلها صيني وبتنضرب ببادجات كوري وايطالى والماني الخ الخ
الاطقم الاصليه مش موجوده غير في غبور او موزعينه المعتمدين
انا بتكلم عن تجربه مش كلام وخلاص
تحياتى

طيب أنا مع احترامي الشديد لمتابعة حضرتك

بس فيه ناس مجربه وبتقول الدنيا تمام وبـ 330 وحاجات من كده، فأكيد فيه حاجات أصلي بره برده ولا إيه، وأنا ماوجدت غير واحد معتمد في شبين الكوم واتصلت بيه وللأسف قالي التوكيل قفل.

فما الحل ؟ أنا شغال في مصر في الدراسة، فلو الحاجات دي مش تقيله ممكن أشتريها وأروحها معايا وأريح دماغي ولا إيه ؟

أرجو المشاركة من الكل في ذلك، أنا على فكره بحب الأصلي حتى لو غالي عشان أنا بوسوس بسرعة. فأنا حريص إني أشتغل صح.

[OMAR11112010]

طقم السيور الاصلي لنيو اكسنت ب 330
السيور والبلي ب 550
غيرتهم من فترة بسيطة عند مركز محترم جدا روح هتتبسط والاسعار ممتازة هبعتلك اسم المركز ع الخاص

الاسعار دي لقطع غيار اصلية من التوكيل نفسه بعد الخصم للمركز اللي بعتلك اسمه ع الخاص وفيه كمان باركود علي السيور بتخش ع النت وتتاكد انهم اصلي والمركز كمان بيوفرها بس اتصل الاول قبل ما تروح

[Amro_ON]

اسم المركز ايه :)
لازم لازم لازم يكون أصلي لان الصيانه دي من اهم الصيانات اللي بتفرق قوي

[m6r1282]

الاسعار دي لقطع غيار اصلية من التوكيل نفسه بعد الخصم للمركز اللي بعتلك اسمه ع الخاص وفيه كمان باركود علي السيور بتخش ع النت وتتاكد انهم اصلي والمركز كمان بيوفرها بس اتصل الاول قبل ما تروح

تمام تمام، أنا هاتصل بيه إن شاء الله، وعلى الأقل أشتريه منهم.
وأشكرك وأشكركم جميعا على المتابعة.

[m6r1282]

سؤال أخير ...

سؤال آخير يا جماعة:

الميكانيكي لأ قولا واحدا، ولازم مركز خدمة ولا طالما الراجل موثوق فيه أظبط عنده وخلاص؟

[lad]

السيور من غبور و التغيير فى مركز معتمد متعملش الا كدا

[MEMODINA1]

ارجوك بلاش تجيب من برة السيور تجيبها من غبور والتركيب لازم يكون مركز معتمد او التوكيل .. نصيحتى لك ارجوك ارجوك بلاش اللى فى السوق هات الاصلى ومن التوكيل لان فى اصلى برة ودا بيبقى مش اصلى حط فى دماغك مستحيل تجيب قطعة غيار اصلية الا من التوكيل كل دا مضروب .. بيشتغل اة مفيش مشكلة ولكن اخطارة كبيرة واسال مجرب