تجربة سيئة للغاية مع مركز صيانة غبور ابو رواش.. و قمة الاهمال

[Ahmad Allawy]

السلام عليكم..
انا المرة دي باتكلم بجد.. مش هزار زي الموضوع السابق..
يوم السبت اللي فات.. روحت مع صديق ليا لسة شاري فيرنا في نص رمضان.. و كان رايح يعمل بيها صيانة ال1000 كم.. و لأنه اشتكي من كام حاجة فيها كده و كان مستني تتعمل ف التوكيل.. و ابن خالي اللي كان رايح يشوف مشكلة في علبة الدركسيون..
شكوي صديقي كانت ان فرامل العربية ف الضياع.. و العربية بتحدف يمين حدفة غريبة جدا جدا.. و كان هيعمل بيها حادثة وهو راجع من السفر للأسباب دي..
المهم.. كنا هناك الساعة 9 ونص الصبح.. دخلنا العربيات و قالولنا نيجي نستلم الساعة 2 الضهر.. كويس.. مش كتير..
المهم كنا هناك الساعه 2.30 نستلم العربيات..
المهم سألنا ايه اللي اتعمل..
في عربية قريبي قالوا انهم غيروا علبة الدركسيون.. عشان كان فيها طقة كده غريبة وانت بتلف الدركسيبون وهي واقفة..
استغربت جدا عشان العربية ماشية 35 الف كم بس.. في سنتين.. بس قولت الحمد لله انها اتغيرت ف الضمان..
و الحد لله محدش قال حاجة و غيروها من سكات طالما فيها عيب.. و دي نقطة تحترم بصراحة..
طيب عربية صاحبي.. قال ظبطنا زوايا و ظبطنا الفرامل.. و اتعملت صيانة الالف..

المهم دفعنا و خلصنا و مشينا.. قولنا نجرب ف الطريق.. ولو فيها حاجة نرجع تاني..
وخاصة ان في واحد كان معانا.. (احمد كار اللي معانا هنا ف المنتدي و هو معاه فيرنا من زمان.. و خليناه جرب العربية قال لسة الحدفة موجوده.. بس اظبط زوايا برة عشان دايما ظبط الزوايا في غبور وحش..!!! و الفرامل اتحسنت..)
المهم مشينا و احنا علي الطريق بنجرب العربية علي الصخراوي.. صاحبي قالي انا راجع تاني.. العربةي زي ما هي.. مفيبش حاجة اتعملت..
رجعنا.. و من هنا بقي من الساعة 3.30 لحد 7.30 في جدل و كلام كتير و محاولات فاشلة ان العربية تتظبط مفيش فايدة..
شوية يقولك هنظبط زوايا و نجرب.. مفيش فايدة.. زي ما هي.. شوية يقولك هنبدل الكاوتش و يتبدل اللي ورا قدام و اللي قدام ورا مفيش فايدة.. شوية يبدل الاتنين اللي قدام مكان بعض.. مفيش.. شوية يربط العفشة مفيش
و كل حاجة من دول بنطلع ندجرب العربية احنا و فنيين و مهندسين من التوكيل.. و مفيش فايدة.. و هنا بقي نيجي لحاجة في منتهي السوء
لما الناس تجرب العربية بيقولوا كلام اهبل.. و انا مصر علي كلمة اهبل..
بنجرب العربية بتحدف يمين جامد جدا و باينة قوي.. يقولك العربية مش بتحدف.. طيب وده ايه..؟؟ يقولك الطريق مايل.. طيب نلف و نرجع ف الطريق نفسه الاتجاه المعاكي يقولك الطريق مايل برضه.. طيب هل يعقل ان الطريق مايل من الناحيتين يمين..؟؟!!!!!!!!!!!
طيب مرة يمين ومرة شمال.؟.!!!.!؟!. مفيش..
ييجي واحد تاني يقولك انت اللي بتنقل و ات سايب ايدك من علي الدركسيون..؟؟!! وهل ده ليه اي علاقة..؟؟!!!!!!
وواحد يقولك انت مش بتعرف تدوس فرامل كويس.. و اللي بيقول كده ناس خبرة ف التوكيل.. مش عيال صغيرين.. ولا ناس جديدة..
دي المفروض ناس بتفهم و اسطوات كبار.. و العيب التاني.. الفرامل بتصفر ف الارض.ز مش ثفارة تيل.. لأ
صفارة كاوتش.. لما بتكبس فرامل الكاوتش مش بيمسك.. بيزحف ف الارض و بتعمل صوت صفارة علي الاسفلت..
ونفس الكلام مع الصنايعية و نفيش فايدة..العربية لفت علي حوالي 2 صنايعية.. او اللي هما اسطوات يعني.. غير المهندس اللي كان ماسكها..
و بصراحة احنا كنا بدأنا نفقد صبرنا.. و جه معاد تغيير ورديات..و في لحظة.. ودي الحاجة الوحيدة اللي عملها وحشة المهندجس بصراحة.. انه سابنا و اختفي..
مش المفروض ان معهاك عربية تفضل متابعها لحد ما تمشي..؟؟ ولا تسيب الناس تخبط دماغها ف الحيط..؟؟
طيب احنا بقي عايزين حد نشتكي. عشان كده تهريج.. قالوا ادخل لمدير الورشة المهندس وهبة..
دخلنا قالنا انتو مش استلمتوها الساعة 1.30 و كانت كويسة..؟؟ المهم اتكلم معانا بقرف.. و مش عايز يعمل حاجة..
و قالنا استنوني برة ف الاستراحة.. و احنا مخرجناش..فضلنا ف الورشة متابعين العربية.. محدش عمل فيها اي حاجة.. خالص.. و رايح جاسي يبصلنا من فوق لتحت و يمشي.. حاجة في منتهي الاستخفاف و التهريج..
اتصلنا بالمهندس عاطف عبد السمبع..اكتر من مرة.. و حكيناله.. و قالنا انا هاتصرف.. متقلقوش..
وهو عن نفسه مقصرش.. بس الصنايعية مش عايزة تشتغل.. او عايزين يخلصوا مننا و خلاص بقي..
هو كلم اكتر من واحد.. اللي مش بيرد و اللي مشي.. و حركات كده مش تمام.. و اللي عرفته انه كان عامل حادثة يومها.. و مكانش رايق خالص.. عموما ربنا يكرمه علي تعبه معانا يوم اجازته..
المهم.. بعد كل العناء ده.. دخلنا لمدير خدمة العملا اللي كان موجود ومش عارف اسمه بصراحة.. مكتبه تحت ف الورشة..
قام كلم الناس و جاب كل الناس عندنا.. و كله بيتهرب و يقولك العربية اتسلمت سسليمة..و مفيعاش حاجة و انت دخلت تاني..
المهم قالنا استنوني برة.. و هتتعمل خالا.. المهم..في اسطي تالت مسك العربية.. و طلع جرب معانا.. و سمع الصوت و شاف الحدفة..
قال بالحرف.. دي زوايا قولنا طيب تمام هتتعمل تاني.. و فضلنا وراهم بقي لخحد ما عملوا الزوايا تاني.. و جت عربيى تانية فيها نفيس العيب.. الحدفةا لغريبة.. و اتجربت العربية اكتر من 3 مرات و صاحبها داخل يتخانق.. عشان المشكلة زي ما هي.. و مفيش فايدة..
قولت الله يصبرنا احنا.. اللي جربناها اكتر من 10 مرات.. و نفس المشكلة موجوده و الناس بتستخف بينا و بعقلنا..
المهم سمعت كلمه خلتني انفجرت.. و قولت هناخد العربية و نمشي.. و خلاص علي كده ولو المشكلة موجوده هنيجي بكرة م الصبخ بقي و نعمل مشكلة كبيرة..
لقيتلك واحد مهندس بيقول اصل مفيش مقاس هوا.. !!!!!!!!!!!!!!!!!!!!!!!!!!!!!!!!!!!!!
يعني الكاوتش اللي اتبدل ورا و قدام ده.. و يمين و شمال.. محدش قاس ضغط الهوا فيه ايه.. و ساعتها قولت هو كده هوا وقتي..
طيب ازاي توكيل زي هيونداي الكبير و المركز الكبير جدا ده في ابو رواش.. مفيهوش مقاس هوا..؟؟!!!!!!!!!!!
طيب و البهوات اللي طلعوا جربوا العربية لوحدهم قبل ما نستلم.. محدش فيهم كلف خاطره انه يظبط هوا..؟؟!!!!!!
طيب بلاش.. عشان ميدفعش جنيه لبتاع الكاوتش اللي ف المحطة اللي ع الصخراوي برة..
طلعنا نجرب معاهم اكتر من 8 مرات محدش اقترح كده ليه طالما عارفين ان مفيش مقاس هوا..؟؟!!!!!!!!
هو انا مودي العربية التوكيل عشانانا اللي اشخص سبب المشكلة و اصلحها..؟؟!!!!!!!!
ازاي المهندس المحترم متخطرش في باله دي..؟؟ دي الف باء زوايا و حدفة و الكلام ده..؟؟!؟!؟!؟!؟!
ازاي الاسطوات المحترمين الكبااار.. محدش يقول كده..؟؟ تهريج..
المهم اخدنا العربية بعد الزوايا و مشينا.. قولنا هنظبط هوا و نشوف ايه النظام.. ولو لسة موجوده نيجي بكرة تاني..
و احنا بنعمل تصريج خروج.. باتكلم مع المهندس.. قولتله ازاي مفيش مثقاس هوا يعني..؟؟ تهريج و كلام فارغ..
قالي في واحد بس في صنايعي قفل عليه في عهدته و مشي..؟؟؟!!!!!!!!!!!!!!!! و كمان قالي نصيحة..
طالما لسة مش ماشي كتير.. غير الكاوتش ده تعبان قوي و هات كاوتش نضيف.. و فرصه دخله في كاوتش تاني..وهو لسة جديبد..
عشان ده كاوتش وحش جدا و ناشف و بيزحف ع الارض.. و بيصفر و مقرف..
خرجنا ظبكنا هوا في محطة الامارات مصر.. علي الطريق برة.. ب2 جنيه.. و العربية اتظبطت زي الفل..
ولا حدفة ولا صوت صفارة.. ولا الهوا..
بصراحة.. و بعد الموقف ده.. انا تراجعت اني انصح اي حد يشتري عربية هيونداي.. انا الاول كنت باقول كده عن الفيرنا عشان التقفيل المصري السيء جدا..و مرحلة ضمان الجوده اللي مش بتتعمل نتيجة للضغط الكبير و الاعتماد ان لو في اي مشكلة تتظبط ف الصيانة الاولي.. لكن الاهمال و الاستخفاف ده كله ممكن يخصل في اي عربية.. عشان ده تهريج..

و انا باحب اني اقول اسامي الناس دي عشان يتاخد معاها اجراء قاسي.. عشان دي ناس مش بتفهم.. يا اما بتكبر دماغها و دي مصيبة.. و عيب جدا انها تحصل في غبور اللي هو اكبر مجمع سيارات في مصر.. و بيقولك 30% من السوق و بتاع.. كلام فارغ.. و مش في ابو رواش اللي هو من اكبر مراكز صيانة غبور..
المهندس اسمه امير..(الراجل مقصرش و كان بيتعامل بمنتهي الاحترام بس لما الشيفت خلص.. هوووب.. اختفي في لحظة.. و سابنا ف الهوا)
الفني و اللي كانوا بيقولوله باشمهندس.. اسمه محمد عبد الفتاح اللي ماسك الزوايا باين و العفشة حاجة كده..
و اللي عايز يترفد بقي.. احمد الغنام.. ده بجد حسبي الله و نعم الوكيل فيه..علي الاهمال و الاستخفاف.. قف الشغل و ف التعامل مع العميل.. و احترام دماغه و عقله..

شايفين كل الكلام اللي انا قولته ده..؟؟ و انا مش مالك العربية.. بس كنت مع صاحبها لمده 10 ساعات ف التوكيل ف الشارع برة البيت..
امال كان ايه حال الراجل بقي..؟؟ كان هيجيله الضغط والله.. كان ممكن يقوم يشتم فيهم او يمسك حد يضربه ..

قولولي بقي..؟؟ لو كان في حد فيكم مكاني كان هيعمل ايه..؟؟
بالذمة ممكن انصح حد يشتري هيونداي تاني..؟؟!!! مستحيل..
بالذمة ممكن اشتري عربية هيونداي ؟؟؟ مستحيل برضه..
انا لو العربية دي بتاعتي اقسم بالله كنت عرضتها للبيع..

[AHMEDCAR]

تعرف يا احمد انت لو بتكتب عصيده شعر فى خطيبتك مش هاتعمل كده بجد انا تعبت من كتر القرايه و لولا انى كنت موجد ماكنتش صدقت و بصراحه الحكايه دى غريبه اوى انا كل مابروح هناك (عايز الصراحه ) بنزل الورشه و اقف مع الصنيعى و بعد كده العربيه بتبقى تمام التمام

بس بجد انا احيك على انك فى حاجات انت قولت عليها ايجابيه و السلبيه تقرير بجد محترم جدا جدا

[mahamedaraby]

هيواندى عربيه محترمه مع توكيل غير محترم اطلاقا

بجد لازم يبقى للناس وقفه للى بيحصل ده

ده اسمه تهريج عشر ساعات فى صيانه

بجد حسبى الله ونعم الوكيل فى غبور

بس هو ليه مشغل ناس مش فاهمه ؟ عنده هو عارف ده وبيستعبط ولا ايه انا مش فاهم ؟

[AHMEDCAR]

و الله يا استاذ محمد انت قولت كلمه حق العربيه فعلا محترمه لكن الوكيل ابن تييت و كمان المهندس عاطف راجل محترم جدا بس مكانه مش هناك على رائى الاخ حسام حمدى

[elpasha009]

مش لاقي حاجة أقولها غير حسبي الله ونعم الوكيل.
والله العظيم يا أستاذ أحمد أقسم بالله أنا عربية حماتي معايا بقالها إسبوعين علشان أوديها الصيانة وكل يوم بأجل وأتحجج لحماتي علشان خايف أروح بيها سليمة وأرجع بيها معيوبة من كتر اللي بسمعه عن الصيانة في غبور .
ربنا يكون في العون والله.

[AHMEDCAR]

هتهالى و انا اوديهالك الصيانه و لو طلعت فيها عيب واحد خد عربيتى

[Ahmad Allawy]

مش لاقي حاجة أقولها غير حسبي الله ونعم الوكيل.
والله العظيم يا أستاذ أحمد أقسم بالله أنا عربية حماتي معايا بقالها إسبوعين علشان أوديها الصيانة وكل يوم بأجل وأتحجج لحماتي علشان خايف أروح بيها سليمة وأرجع بيها معيوبة من كتر اللي بسمعه عن الصيانة في غبور .
ربنا يكون في العون والله.

لأ كده اتقل بيها شوية بقي..
لما الدنيا هناك تتظبط شوية..و شوف ايه اللي هيحصل..
و كده تبقي عارف من اولها.. و انت داخل هناك,, تظبط هوا عند محطة الامارات علي الطريق..
علي ناصية المدخل بتاعهم.. علي الصحراوي.. عشان الزوايا و الفرامل.. ولو العيب لسة موجود ابقي اشتكي بقي و زهق بجد. عشان كمده هيبقي عيب بجد.. مش عدم قدرة علي تحديد سبب المشكلة..

[elpasha009]

هتهالى و انا اوديهالك الصيانه و لو طلعت فيها عيب واحد خد عربيتى

شكلك دبست نفسك وإنت مش عارف:)
تصدق بقى إني مش هسيبك وهعتبرها عزومة بجد مش عزومة مراكبية ههههههههههههههههههههههههههههههه
ده إنت جتلي من السما.
لأ بجد الله يكرمك ويوفقك بجد أنا متشكر جداااااا على عرض حضرتك وعلى كرم أخلاقك وجزاك الله خيرا.

[thegreatnileman]

حاجة زبالة اسف مش لاقى تعبير تانى

[AHMEDCAR]

شكلك دبست نفسك وإنت مش عارف:)
تصدق بقى إني مش هسيبك وهعتبرها عزومة بجد مش عزومة مراكبية ههههههههههههههههههههههههههههههه
ده إنت جتلي من السما.
لأ بجد الله يكرمك ويوفقك بجد أنا متشكر جداااااا على عرض حضرتك وعلى كرم أخلاقك وجزاك الله خيرا.

و انا عند وعدى بجد والله لو عايز تروح فى يوم انا مستعد اجى معاك بس يكون يوم جمعه او سبت و انا شاء الله كله تمام بس قولى الاول العربيه بتاعتك فيها ايه

[AHMEDCAR]

حاجة زبالة اسف مش لاقى تعبير تانى

ياريت ياباشا تقولى مشكلتك ايه و ان شاء الله اقدر احلهاك


يا جماعه انا مش بدافع عن غبور نفسه انا بدافع عن العلامه فقط

[Hossam.Hamdy]

التوكيل فعلا بيعانى من قلة المهندسين و الاسطوات و الفنيين ذوى الخبره...وده كلام ناس من التوكيل.....وبيحاولو جاهدين انهم يجيبو ناس كويسه....وبيعملو برامج لتدريب الفنين و المهندسين....
انا قابلت اثنين مهندسين محترمين جداااا فى التوكيل ده وناس فاهمه كويس :محمد رمضان فرع قليوب وكان شغال فى مرسيدس اسكندريه ومهندس تانى فى ابورواش محترم ومهندس بجد بس مش فاكر اسمه....

[AHMEDCAR]

هو ده اللى احنا عايزين نقوله ان فى ناس كويسه جدا فى التوكيل ده بس المشكله ان الحسنه بتخص و السيئه بتعم

[Amrrr]

التوكيل فعلا بيعانى من قلة المهندسين و الاسطوات و الفنيين ذوى الخبره...وده كلام ناس من التوكيل.....وبيحاولو جاهدين انهم يجيبو ناس كويسه....وبيعملو برامج لتدريب الفنين و المهندسين....

التغيير الوحيد اللي حاسيت بيه من ساعة ما جبت العربية وبدأت مشوار ابو رواش (7/2007)كانوا الأول معاد الصيانة بعد اسبوعين دلوقتي ممكن اتصل احجز معاد الاقي المعاد بعد يومين تلاتة ولما سألت قالولي زودنا ساعات العمالة
وعموما احسن حل اللي انت عملتة دا من غير حرقة دم واعصاب ان تشتكي في المكتب خدمة العملاء اللي في الورشة دا عين العقل وهما زي الفل وبيهتموا فعلا بشكواك ودا عن تجربة شخصية ومتحلتشي من ساعة ماجبت العربية لحد ما أرسلت شكوى لخدمة العملاء واتصلوا بي ورحت على المكتب دا على طول وفضلت قاعد لحد ما المشكلة اتحلت بس المشكلة كانت بسيطة وكنت بحس انها بسيطة اوي لما بشوف الفيرنا واصحابها واللي حاصل فيهم وفي عربياتهم وفعلا موضوع الحدفة كنت بشوفة في عربيات لسة محطتشي نمر ملاكي ( تجارية او مؤقتة )
وانا مشكلتي كانت اللمبة اليمين قدام (النور العالي مش القلاب ، وكانت بتقلب العالي بس ) بتتحرق على طول وساعات كانت بتبقى سليمة ومش بتنور وطلع حسب كلامهم آخر مرة شحن زيادة في لدينامو بيهرب لاي مصدر كهرباء أو دا اللي انا فهمتة يعني اللمبة بتاخد كهرباء عالية فتتحرق ( انا عامل 59ألف كم) وعامل كل الصيانات في نفس التوكيل من ساعة ماجبتها ، وكل مرة اقولهم على المشكلة وأحكي اللي حصل ويغيروا وتتحرق وانا لسة على المحور واذا طولت معايا شوية تتحرق تاني يوم وارجع تاني يوم واقعد أحكي القصة من أولها وأقضي يوم في التوكيل ( ساندويتش الفول اللي في الكافتيريا عندهم جامد اوي ) وكانوا كل مرة يقولولي : كان في قفلة في ضفيرة الكهرباء وعملناها خلاص !!! وآخر مرة بعد صيانة الخمسين حصلت تاني بعديها بحوالي اسبوعين فرجعت وعملت بقى موضوع الشكوى دا والحمد لله لحد دلوقتي مفيش مشاكل
عربيتي آتوس وانا شايف ان اي تقفيل انظف من المصري حتى لو كان هندي !!!

[MOHAMED ABD EL SHAFY]

مش لاقي حاجة أقولها غير حسبي الله ونعم الوكيل