عاجل و هام بخصوص الفيرنا !!

[Ahmed_Ezz]

انا معايا فيرنا 1600 كاملة 2007 مانيول و عندى بعض الاستفسارات
اولا الزجاج الكهرباء لما بعمل لوك اللى هو الزرار اللى بيخلى محدش يتحكم فى الزجاج غير الساءق بلاءى كمان ان الساءق لا يستطيع فتح باقى ال3 زجاج لما بيبقى لوك!!!
حاجة كمان هو الكاسيت بيفضل مطفى طول منا ماشى يعنى مش منور هل ينفع يبقى ظاهر ساعة مثلا ؟
حاجة كمان لو عايز اركب فرش فيه فى كرسى الساءق فى الجنب العصا اللى بتخلى الضهر يتنفخ او كده و الزراع اللى فى كرسى الساءق برده هل بتوع الفرش بيعرفو يخلو كل ده ظاهر و سليم و يبقى كله تمام؟؟
حاجة بءى غريبة فى ناس قالت لي انى لازم وانا بدور اكون دايس دبرياج و ادور اول مرة اسمع كده !!!!!!
ارجو الافادة وشكرا.

[Nader]

حاجة بءى غريبة فى ناس قالت لي انى لازم وانا بدور اكون دايس دبرياج و ادور اول مرة اسمع كده !!!!!!

امال انت بتدورها ازاي؟؟ انا عربيتي بتفصل كهربة لو حاولت ادور منغير ما ادوس دبرياج كوسيلة للامان. بس انا عربيتي اقدم من عربيتك بكتير.

الزجاج الكهرباء لما بعمل لوك اللى هو الزرار اللى بيخلى محدش يتحكم فى الزجاج غير الساءق بلاءى كمان ان الساءق لا يستطيع فتح باقى ال3 زجاج لما بيبقى لوك!!!

عادي كدة طبيعي

حاجة كمان هو الكاسيت بيفضل مطفى طول منا ماشى يعنى مش منور هل ينفع يبقى ظاهر ساعة مثلا ؟

الكلام دة لو الكاسيت اصلاً فية الخاصية دية.

عايز اركب فرش فيه فى كرسى الساءق فى الجنب العصا اللى بتخلى الضهر يتنفخ او كده و الزراع اللى فى كرسى الساءق برده هل بتوع الفرش بيعرفو يخلو كل ده ظاهر و سليم و يبقى كله تمام؟؟

إن شاء الله هيبقى سليم، العربية قديمة في السوق ومعروفة كويس، بس انت استنضف سروجي كويس كدة وكلة هيبقى تمام.

[Ahmed_Ezz]

انا بدور عادى ياريت يا جماعة حد يقولى ايه الصح لان عمرى ماسمعت عن ده؟؟؟؟؟؟

[bassam nagy]

بالنسبة للوك بتاع الزجاج دة عادى لم تعمل لوك يقفل التحكم فى الابواب وفى الرئيسى اما لحكاية الدباريج ادوس علية لما ادور ماسمعتش عن الموضوع دة وعادى دور عادى

[Eng.Ahmed]

انا كمان بدور عادى و عمرى ما دوست ديبرياج

[Ahmed_Ezz]

شكرا ليكو كلكو طمنتونى :D

[hero]

بالنسبة للوك بتاع الزجاج دة عادى لم تعمل لوك يقفل التحكم فى الابواب وفى الرئيسى

غريبة قوي الحكاية دي ....انا اعرف ان المفروض اللوك دة علشان السائق يمنع اي اطفال من فتح وقفل الزجاج بس في نفس الوقت بيسمح للسائق انة يتحكم من عندة....

الخاصية دي مجودة في العربية الشيفورلية ايلي معايا ...(ايبيكا)...ومتهيألي انها موجودة في الاوبترا...

[مهندس محمد صلاح]

طبيعى

طبيعى انك تلاقى اللوك بالنسبة للسائق كمان علشان حتى السائق مايغلطش ويفتح الزجاج الخلفى الا اذا كان عارف فعلا هو بيعمل ايه وعاوز فعلا يفتح الزجاج .. زيادة امان يعنى

[محمد ابراهيم 1]

بالنسبه للتدوير هيونداى اكسيل كانت عشان المارش يلقط معاك لازم تكون دايس دبرياج ويمكن ده اللى عامل الذكرى دى عند الناس

[hassan aly hassan]

السلام عليكم ورحمه الله
أولأ : ألف مبروك على السيارة وربنا يباركلك فيها
ثانيأ : بالنسبة لموضوع الزجاج فده شى طبيعى جدأ نوع من أنواع زيادة الامان 0
ثالثأ : هوالكاسيت أما بيكون أنا مش مشغله يوجد به شاشة ساعة ، هيه هيه نفس الشاشة اللى بتوضح رقم المحطة ودرجة الصوت 0
رابعأ : بالنسبة للفرش أنا كنت فاكر زيك كده بس لاتقلق جميع بتوع الفرش عندهم نوعين لفرش الفيرنا 1500 ، 1600 عشان الذراع والمساند الخلفية 0
خامسأ : بالنسبة للدوران دور عادى جدأ بدون أى ضغط على البنزين أو الدبرياج ، بس هو مكتوب فى الكتالوج أنك تدوس على البنزين قبل أن تدور بس أنا لا أعمل كده

[Ahmed_Ezz]

شكرا جدا ليك :)

[Ahmed_Ezz]

بس الكاسيت ده غريبة هية ليها تظبيت او حاجة ؟

[hassan aly hassan]

السلام عليكم
أيوه ، هو الكتالوج بتاع الكاسيت موضح كيف تظبط الساعة ، لو أنت مش عندك قولى وأنا أوضح لك أى حاجه تعوزها 0
بس سؤال هو ظاهر عندك أيه وأنت مش مشغل الكاسيت ، المفروض ساعة ولو مش موجوده أرجع للضمان 0
وأنا تحت أمرك فى أى حاجة تعوزها .

[Ahmed_Ezz]

وانا مش مشغله بيبقى مطفى خالص على فكره ده الرودستار ال CD صح
فا ايه الحل؟

[mohamed yousry]

حاجة بءى غريبة فى ناس قالت لي انى لازم وانا بدور اكون دايس دبرياج و ادور اول مرة اسمع كده !!!!!!

الموضوع دة فى بعض العربيات الهيونداى المستوردة من كوريا.... كان عندى اكسنت كورى اصلى مكنتش تدور الا لما تدوس دبرياج كنوع من الامان انك معشق العربية وناسى وانت بتدور....لكن هنا فى مصر غبور بيشيل الاوبشن دة...هتلاقى عربيات اكسيل كتير هنا فى مصر فيها الاوبشن دة خاصة مو 95 كانت كورى اصلى......