كل يوم هجوم علي الفيرنا

[alpoka779]

انا مش هقارن انا هعتبر انها خسرانه امام (الفرنساوي والامريكاني والياباني ) بس في حاجه مهمه اوي بالنسبه لينا الطبقه المتوسطه مينفعش معانا الانواع ديه ليه بقي شوف اسعار قطع الغيار +الصنايعيه + ندره بعض الاشياء من اكسسوار او قطع غيار --انا بشوف ناس راكبه فورد بدون اكصدام او بدون فانوس ده عشان مش موجود ناس تانيه بتلعن ام الفرنساوي عشان اسعار قطع الغيار (تبقي الفيرنا تكسب) انا مبتكلمش عن عربيه بحارب بيها انا بتكلم عن استخدام شخص طبيعي او اسره -- ب10 جنيه بتتظبط عند الميكانيكي --- وانا اسف لغير الفيرناويه

[MOTOR HEAD]

طب مقارنه مع اللوجن ايه رايك :)

[Adnfalcon]

الفيرنا عربيه نجحت كسياره داخل مدينه بإمتياز وشوفوا انتشارها ملاكي وتاكسي بموتور قوي جدا بالنسبه لوزنها بس عيبها انها منخفضه الارتفاع عن الأرض و طبعا مش مجهزه للثبات والمناوره وبدون وسائل أمان للأسف
بس انا مره سافرت بيها من الأقصر للقاهره مباشره ومحمل 5 اشخاص وشنط كتير مكسفتنيش . . . طول الطريق 140 بس عند ال 150 حسيت بهزه يعني اخرها بدون خوف 140 ودا حلو أوووي عليها

[Mohamedjetta]

الفيرنا عربية جميله ومحترمه والناس قاعده تهاجمها عشان اللوجان ..... لوجان اعتقد لو طلعت بره التوكيل مش هترجع عربيه طبيعيه
وكنت اعرف واحد معاه سيتروين c4 طلعت عينه في الكهربا وبعها بخساره كبيره وكانت عربيه تكسف وكانت المساحات بتشتغل لوحدها و لما تكون مقفوله بليل بتشتغل الانوار لوحدها.... ( يعني جنان الفرنساوي) وعلي فكره موديلها كان 2008 والكلام ده حصل معاه من سنتين يعني عربيه تعتبر جديده

[midooo_119]

الفيرنا عربيه اعتماديه بالدرجه الاولى والى يقول غير كده يبقى ظالمها الفكرة كلها فالسعر غالى عليها

[Zing0]

كان واحد واصفها بوصف جميل أوى
بيقول الفيرنا هيل التطور بتاع اللانوس و النوبيرا و الأكسنت القديمة

يعنى شعبية و قطع غيار و صيانه رخيصة
عربية موظف و متوسط الدخل

ده ميقلش من سمعة الفرنساوى و اليابانى
بس على قد لحافك مدّ رجليك

[merosss]

مش عارف بتتقارن ازاى باللوجان الى فانوس قدام ب 950 جنية

[OmarAdel98]

الأفضل في فئتها كإعادة بيع و انتشار و قطع غيار و اي ميكانيكي بشتغل فيها
و موتور طبعا لكن يعيبها عدم الثبات و ضيق المساحات الداخلية مع ان شنطتها ملعب

[ahmed.ameen]

اناعندي مشكله
انا كونت رايح احجزها ونا رايح عديت علي معرض كان فيه لانوس ومعندوش فرنا معروض بس قلي اجبها لقيت ان الانوس فيها كسيت كينوود و فناويس شبوره و مرايه كهربه و اوسع وارخص 1500 جنيه بس تقفيلها زباله بس عربيات عربيات يعني فرجني علي وحده كانت كويسه و لما سبني رحت بصيت علي وحده تانيه لقيت اكرة الباب خشنه جدا لدرجة انك لما تفتح الباب مبترجعش مكنها تاني وكسوة الفتيس بتطلع من مكنها مع النقل مش عايز اقلك ان الراجل لما عرف انيعاوز فيرنا هاج و قلي الانوس احسن و اوفر واعلي علي الارض مش عارف قلتو متروها ضعيف و التكيف بيكسحها والتوكيل زباله قلي متمشيش ورا كلام الناس
سيبتو ورحت غبور و بتاديت اساله عن انها بتحك و الفرامل ضيعه قلي متسمعش كلام الناس
انا دلوقتي محتاس ومش عارف اعمل ايه ولما تتكلم مع ناس و تسألهم فيرنا ولا لانوس تلقيها قلبت ضلمه زي الاهلي والزمالك كدا وبرضك مبتخدش عقاد نافع
رجا اي معلومه بما يرضي الله

[Hamada hozein]

الفيرنا عربيه ممتاااااااازه واحسن عربيه في فئتها

[tameem2010]

الفيرنا انجح عربية في فئتها
كلها مميزات بالنسبه لفئتها
واحد هيتكلم عن الثبات والغرز والفرامل اللى مش عاجباهم
هقول له اولا انت بتشتري عربيه بكام والاهم هو انت فاكر نفسك في سابق ولاحق
عاوز عربيه سبور شخلل جيبك
بالعكس ديه عربيه اقتصاديه جدا وعاليه الاعتماديه اثناء التشغيل
بصراحة بالنسيه للفئة بتاعتها وبالنسبه لسعرها انا شايف انها افضل الموجود في فئتها
عاوز اوربي يبقى تشخلل جيبك وهات الاوربي
وانا مش مقتنع بالاوربي في مصر ابدااا
الاوربي مش ملائم للسوق المصري خالص
لا سعره ولا اسعار قطع غياره ولا تعقيداته الميكانيكه والكهربائيه ومشاكل الصيانة بتاعته التى لا تنتهي
ده غير مشاكل الحرارة اول ما العربيه تعدى سنتين وتبدا مشاكل الحرارة خاصة في اجوائنا
رايي الشخصي ان انسب سيارة لمصر هي الكوري والياباني في الاجمالي
وعلى حسب الفئة والفلوس اللى معاك شوف ايه المناسب ليك

[D.Ahmed Ismail]

مالها القيرنا علي قد فلوسها
لا يعيبها سوي الثبات بعد 120 و بتتحل بجنط 15
انا بعتها 2008 و جبتها 2014 عادي يعني صحيح قالو عليا مجنون بس ال 75 الف يجيبوا عربية وموديل ماتعطلش ازاي دوخت و ملقيتش . جبت كسر زيرو

[alpoka779]

الحمد لله( انا حاسس ان الموضوع رد للفيرنا اعتبارها) وبالنسبه لفانوس اللوجان لو اتكسرت هوقف العربيه لاني مش هقدر اجيبه وسعره كفيل بترويش العربيه الفيرنا

[Mohamedjetta]

الحمد لله( انا حاسس ان الموضوع رد للفيرنا اعتبارها) وبالنسبه لفانوس اللوجان لو اتكسرت هوقف العربيه لاني مش هقدر اجيبه وسعره كفيل بترويش العربيه الفيرنا

حضرتك اللوجان لو طلعت بره التوكيل هيجلها حساسيه :d

[S O P H O S]

العربية ناجحة طبعا فالفئة دي
وشايفها استخدام عائلي كويسة جدا بردوا