الفيرنا واستهلاك البنزين

[Hamada hozein]

بسم الله الرحمن الرحيم
السلام عليكم ورحمه الله وبركاته

يا شباب عندي استفسار لاني حاسس ان العربيه بتسحب بنزين جامد
من كام يوم سافرت العين السخنه
وطبعا الطريق زي الفل وفاضي
عملت موضوع استفسر فيه عن الردارات ومحدش عبرني

http://www.nilemotors.net/Nile/434505-a.html

المهم وانا علي اول الطريق في بنزينه وطنيه فولت التانيك واتكلت علي الله المهم الطريق عمل معايا ١٨٦ كيلو بالظبط
من اول بنزينه وطنيه لاول طريق الزعفرانه ماشي ١٢٠ و ١٣٠
من اول طريق الزعفرانه حتي بورتو مارينا ماشي ٨٠ ل ١٠٠ بالكتير علشان الملفات بعد كده جريت شويه وكنت ماشي من ١٣٠ ل ١٦٠ لاني للاسف كنت بشد مع بي ام الفئه التالته ومحدش يقولي ازاي عملت كده اهو ده اللي حصل وخلاص وطبعا مش عايز اقولكوا كان بيعمل فيا ايه في الملفات
اينعم عديته في الاخر اول ما عدينا بورتو لانه اتزنق في ماتوره وفتحت انا علي ١٦٠ ومشفتوش تاني مش عارف ازاي تقريبا هو زهق :)
وصلت والحمد لله
وانا راجع مشيت علي طريق الزعفرانه حوالي ١٣٠ متوسط علي طريق القطاميه حوالي ١٠٠ متوسط وساعات ٨٠ كمان لاني كنت مرتبط بميعاد وكنت رايح بدري فقولت امشي علي راحتي
العداد عمل معايا في الرجوع ١٩٠ كيلو
يبقي نقول ٣٨٠ كيلو ببص علي التانك لقيته خلاص قرب من ال E
ملاحظه اغلبيه طريق الذهاب ١٣٠ وحوالي ٤٠ كيلو فوق ال ١٤٠
الرجوع اغلبيه الطريق ١٢٠ وحوالي ٨٠ كيلو ماشي ٨٠
المفروض ان غبور بيقول ان الفيرنا بتعمل علي ما اتذكر ٦.٥ لتر في كل ١٠٠ كيلو يعني لو علي حسبه غبور يبقي المفروض ٤٠ لتر اجمالي التانك ( بعيد عن الاحتياطي ) هنقسمهم علي ٦،٥ لتر اللي هما ارقام غبور هيدينا ٦.١ هنضربهم في ١٠٠ كيلو يبقي المفروض علي كلام غبور ٤٠ لتر بنزين يعملوا ٦١٥ كيلو وده في الطرق السريعه
قول علشان انا شديت واستهبلت شويه المفروض تنزل حوالي ١٠٠ كيلو يبقي ٥٠٠ كيلو في ال ٤٠ لتر
انما العربيه عامله ٣٨٠ لتر بالعافيه
ياريت اللي عربيته بتعمل ارقام احسن من كده يقول
ملحوظه : العربيه موديل ٢٠١٤ عامله ٩٠٠٠ كيلو والحمد لله مفيهاش اي مشاكل

[ARKOON]

طبعا الرقم الموجود في البروشور دا بيكون متوسط استهبال مش استهلاك بمعنى أن الرقم غير حقيقي بالمرة لانه بيكون من غير حمولة ولا تأثير مقاومة وحساب سرعة الرياح فالطبيعي انك بتزود علية كمان رقمين بمعى ان اغلب العربيات المحركات سعة 1600 االمتوسط في استهلاكها من 8.5 الى 11 ودا طبعا حسب وزن العربية وتقنية المحركات ونظام ضخ الوقود ولازم عشان تحسب الاستهلاك الصحيح ما تعديش سرعة 100 كم/س .
وربنا يسترها معاك وخلي بالك من الفيرنا عشان هيا غدارة في السرعات العالية ومبروك لفوزك في السباق :) تحياتي.

[ahmedfouad]

كتيير فعلاً
بس كدة كدة
المعدل بيتظبط بعد ال10.000 كم
انت لسة بتلين .. ماتقلقش

[Dr . Mohamed]

طالما عديت سرعة 80 انسى الاستهلاك المثالى اللى هو 6.1 أو 5.4
دا كلام فاضى لأن الاستهلاك بيتضاعف بعد السرعة دى
على 80 بيكون استهلاك رائع بعد 80 و مع الحرق و كدا بيرجع للمعدل الطبيعى 10 ل / 100 كم
و الله أعلى و أعلم

[Adnfalcon]

ارقام الكتالوج لسرعه 100 مش 140 و 160 وسباق مع بي ام

[Hamada hozein]

طبعا الرقم الموجود في البروشور دا بيكون متوسط استهبال مش استهلاك بمعنى أن الرقم غير حقيقي بالمرة لانه بيكون من غير حمولة ولا تأثير مقاومة وحساب سرعة الرياح فالطبيعي انك بتزود علية كمان رقمين بمعى ان اغلب العربيات المحركات سعة 1600 االمتوسط في استهلاكها من 8.5 الى 11 ودا طبعا حسب وزن العربية وتقنية المحركات ونظام ضخ الوقود ولازم عشان تحسب الاستهلاك الصحيح ما تعديش سرعة 100 كم/س .
وربنا يسترها معاك وخلي بالك من الفيرنا عشان هيا غدارة في السرعات العالية ومبروك لفوزك في السباق :) تحياتي.

يا عم انا مكسبتش :) :) :)
والله يا صديقي هو حاجه من اتنين
يا هو فعلا نفضلي وقال عليا مجنون
يا هو كان داخل بورتو مارينا لاني عديته قدامها :)

[Hamada hozein]

كتيير فعلاً
بس كدة كدة
المعدل بيتظبط بعد ال10.000 كم
انت لسة بتلين .. ماتقلقش

هما كانوا قالولي ان استهلاك البنزين بيقل بعد ٥٠٠٠ كيلو اول مره اعرف موضوع ال ١٠ ده
عموما ربنا يسمع من بقك

[Hamada hozein]

طالما عديت سرعة 80 انسى الاستهلاك المثالى اللى هو 6.1 أو 5.4
دا كلام فاضى لأن الاستهلاك بيتضاعف بعد السرعة دى
على 80 بيكون استهلاك رائع بعد 80 و مع الحرق و كدا بيرجع للمعدل الطبيعى 10 ل / 100 كم
و الله أعلى و أعلم

كلامك مقنع وصحيح
بس انت يرضيك يعني الواحد يمشي علي طريق السخنه ٨٠ دا حته حرام يا جدع دا الواحد بيبقي شايف قدامه ١٠ كيلو علي الاقل

[Hamada hozein]

ارقام الكتالوج لسرعه 100 مش 140 و 160 وسباق مع بي ام

والله ما بحب الشد يا جدع بس هو اللي استفزني
دا كان بياخد الملفات علي حوالي ١٢٠ عادي يا جدع وانا باخد الملف علي ٨٠ بالعافيه

[haysam2000]

انا معايا فيرنا اتوماتيك و طول ما انت ماشى 100 فعلا الأستهلاك 5.6 بس لو انت لوحدك و الريح مش عكسك , انا بسافر على طول القاهرة و الأستهلاك كده بس لما برجع باليل و ادوس 160 -170 برجع بنص التانك بس :(