استسفار عن قطع غيار النترا 2010

[Medo4Vod]

معلش يا شباب كنت عايز اعرف قطع الغيار اللي تحت في حدود كام . الاصلي


- فلتر هواء و بنزين
- بوجيهات
- ايه نوع الزيت الكويس للماتور و للفيتس الاتوماتيك و بكام
- فلتر الزيت
- سير المجموعه
- كنت عايز اعرف هيا فيها سير كاتينه و لو فيه بكام

معلش يا جماعه لسه شاري العربيه و خايف من المالك السابق فعايز اغير كل حاجه عشان ابيداء صياناتها علي نضيف و احافظ عليها

[Medo4Vod]

و لو فيه حاجه مهمه اني اغيرها قولولي

[aymanshebl]

متابع

[shiko85]

معلش يا شباب كنت عايز اعرف قطع الغيار اللي تحت في حدود كام . الاصلي
الأسعار كل شويه بتتغير فالأفضل تنزل التوفقيه و تشترى الحاجه من هناك (mobis) اعتقد البنا افضلهم
بس خلى بالك البوجيهات اشترى ngk بس تقول للبائع ان العربيه 2010 لان فيه طويل و قصير و زيت الماتور لازم تعرف المالك الأصلى كان بيستخدم نوع ايه تخليقى او معدنى

معلش يا جماعه لسه شاري العربيه و خايف من المالك السابق فعايز اغير كل حاجه عشان ابيداء صياناتها علي نضيف و احافظ عليها
الف مبروك و ربنا يديلك خيرها و يكفيك شرها
اكشف على العفشه و شوف لو فيه حاجه محتاجه تغيير
شوف حاله الكاوتش ايه
لو قريب من فيصل انا ممكن اوصفلك ميكانيكى ممتاز و محترم جدا و امين و شغال فمركز خدمه معتمد هيونداى يعملك صيانه كامله للعربيه

[hsemam]

هي فعلا الاسعار بتتغير كل فتره بس انا هاقولك اخر مره جبت الحاجات دي بكام وانا جبتها فبل رمضان



- فلتر هواء 70 و فلتر بنزين 145
- بوجيهات 155
- نوع الزيت الكويس للماتور مش هافدر افيدك عشان بيتوقف علي حاله الموتور و الزيت المستخدم في الفتره السابقع
الفيتس الاتوماتيك الزيت موبيل atf 320 و ده اللتر ب 55 و العربيه بتاخد 4 لتر لو مغيرتش الفلتر وبالفلتر تاخد نصف كيلو زياده و علي فكره الفلتر بيتغير كل 80 الف كيلو و سعره 160 بس ده سعره من سنتين
- فلتر الزيت 30
- سير المجموعه 160
- هيا فيها سير كاتينه طبعا بس مبيتغبرش

و الف مبروك يا باشا

[hsemam]

و متنساش تغير فلتر التكييف و ده سعره 220 جنيه الاصلي و اوعي تجيب غيره عشان بيكتم هوا التكييف

[Medo4Vod]

الف شكر .. هو انا من وسط البلد فكنت هروح اتو ماجد اللي في مصر الجديده او سبيد كار اللي في جسر السويس.. فلو انت اتعملت مع الميكانيكي ده و واثق فيه انا ممكن اروحله مخصوص بس يا ريت توصفلي الطريق من الدائري لو نزلت نزله الليبني و عديت نفق الهرم بعد كده ازاي ؟


معلش يا جماعه هوا التوفقيه ده اللي في رمسيس ؟؟؟ :d

و معرفش الراجل اللي قبلي كان بيستخدم نوع زيت ايه ؟ و حولت اكلمه مش بيرد هفضل وراه لحد ميرد .. بس فيش طريقه اقدر اعرف الزيت ده ايه ؟؟؟ او احط اي حاجه ... اه هي العربيه خليجي

[Medo4Vod]

و متنساش تغير فلتر التكييف و ده سعره 220 جنيه الاصلي و اوعي تجيب غيره عشان بيكتم هوا التكييف

التكيف دلوقتي شغال حلو الحمد لله .. هغيره علي الصيف اللي جاي ان شاء الله

[shiko85]

الف شكر .. هو انا من وسط البلد فكنت هروح اتو ماجد اللي في مصر الجديده او سبيد كار اللي في جسر السويس.. فلو انت اتعملت مع الميكانيكي ده و واثق فيه انا ممكن اروحله مخصوص بس يا ريت توصفلي الطريق من الدائري لو نزلت نزله الليبني و عديت نفق الهرم بعد كده ازاي ؟
انا بتعامل معاه من سنين طويله و اصدقاء ليا كمان و الحمد لله كل الناس بتشكر فيه
الميزه انه امين و شاطر جدا و ان شاء الله هترتاح فالتعامل معاه
انا والله بقول نصيحه لوجه الله و القرار قرارك
هو مكانه فأول فيصل يعنى مش محتاج تنزل المريوطيه الأسهل البحر الأعظم و تكمل لشارع الهرم و بعد كده شارع فيصل
او ممكن بدل ما تروح الليبنى و النفق تطلع الوصله بتاعت المريوطيه للأخر يمين اتجاه صفط و بعد كده كبرى صفط الجامعه كوبرى فيصل اول فيصل (بس لفه طويله شويه)
و ممكن من غير الدائرى خالص تمشى فالشوارع الداخليه لحد ميدان الجيزه و بعد كده فيصل
يعنى شوف الأسهل لك ايه
هبعتلك اسمه و رقم الموبايل بتاعه فرساله على الخاص كلمه و حدد معاه الميعاد المناسب بس خلى بالك اهم حاجه تكون مجهز قطع الغيار و الزيوت و كل حاجه علشان توفر وقت و تخلص الشغل اللى فالعربيه بدرى

معلش يا جماعه هى التوفقيه دى اللي في رمسيس ؟؟؟ :d
بالظبط كده

[shiko85]

متنساش تشترى تيل فرامل حتى لو الفرامل كويسه الأفضل تغيره بالمره امان لك

[Medo4Vod]

الف شكر يا شيكو معلش سوال هنا عشان مش عارف ابعت رساله خاصه "لازم اكون كتبت 50 مشاركه"

الفرامل عندي كويسه اوي الحمد لله بس العجله اليمين بتسخن جامد جدا ده ممكن يكون من ايه ؟
اه و عندي سوست الشنطه مكسوره ممكن الميكانيكي يعملها ؟

[shiko85]

الف شكر يا شيكو معلش سوال هنا عشان مش عارف ابعت رساله خاصه "لازم اكون كتبت 50 مشاركه"
انا بعتلك رساله فيها اسم الميكانيكى و رقم الموبايل وصلت ولا لأ ؟؟
الفرامل عندي كويسه اوي الحمد لله بس العجله اليمين بتسخن جامد جدا ده ممكن يكون من ايه ؟
ممكن مشكله فالطنابير او السخونه العاديه بتاعت الموتور بس انت مش متعود
اه و عندي سوست الشنطه مكسوره ممكن الميكانيكي يعملها ؟
اعتقد لا

[Medo4Vod]

اه الرساله وصلت بس مش بعرف ابعت رسائل عشان كده بشكرك هنا

[shiko85]

اه الرساله وصلت بس مش بعرف ابعت رسائل عشان كده بشكرك هنا

الشكر لله وحده
حاول تغير الريموت اللى فيها و ركب وحده انذار بفصل الماتور و طلمبة البنزين

[Mohamedjetta]

فلتر فتيس ب 160 جنيه من عند اونكل غبور d: وفلتر موبيس من شارع صلاح الدين في الاسكندريه ب 20 جنيه
بقيه الاسعار لسه معرفش انا لسه مجمرك العربيه بقالها شهرين