لو عرضت عربيتي الألنترا للبيع بعد الحادثة هتجيب كام والأفضل أصلح ولا أبيع

[ahmedokasha198]

لو انت فاضى و عندك وقت تقف فيه على راس كل صنايعى هيمد ايده فيها يبقى صلحها و بيعها على طول بعد التصليح، اما لو مشغول و مش هتقدر تتابعها (تفضى نفسك ليها شهر على الاقل) يبقى تبيعها على حالتها كده على طول ، صدقنى لو حسبت الفرق بين الامرين مش هتلاقى الفرق كبير و تعتبر انك اشتريت وقتك و ريحت دماغك.
و فى الاخر لازم تبيعها و ده رايى لانها عمرها ما هترجع زى الاول ابدا و هتفضل العربيه دايما موصومة بوصمة عار اللى هيه( دى رشه دواخل يا بيه أو دى مغيرة نص)

[AshTurbo]

متشكر على كل الأراء الجميلة دي بجد حاسس أن أخواتي بينصحوني ربنا يكرمك جميعاً ويبعد عنكم شر الحوادث ...

أنا عملت مقايسة للعربية هتتكلف تصليح حوالي 30 ألف جنيه قطع غيار (أستعمال خارج) ومصنعيات (عند صنايعية بريمو) مابين جير بوكس اللي هو أغلى حاجة هتتغير - ودة للأسف واخد خبطة من تحت كسرت الفارغة بتاعته - وعاوزة مقص ومساعد وأكصدام أمامي ونظام تبريد وكبوت الماكنة متلمستش الحمد لله ولا هي ولا الكومبريسور والمدادات أتعوجت وجنوط امامية عاوزة تتغير لانها اتعوجت وكدة كل اللي فيها لو فكرت أبيعها هتعمل كام عالوضع دي هي كانت ماشية 40 الف كيلو تاني فئة ايه بي اس واتنين ايرباج - الله يرحمها - تمن الفئة دي دلوقتي 162 الف تقريباً بعد خصم الاستعمال وخصم الحادث العربية هتعمل كام .

[blazer]

صلحها ومتبيعهاش
هى العربيه هيترش فيها حاجه فى الدواخل؟؟؟
كل الى بتقول عليه لو مفيش رش فى الحوض يبقى العربيه هتفضل بحالتها بعد تغيير التالف ان شاء الله

[SAMEH_FOUAD]

قدر الله وماشاء فعل , وفداك اى حاجة طالما انت طلعت سليم

من وجهة نظرى اللى يتم كالاتى :

1- لو الفتيس نفسة سليم , يبقى تدور على فارغة فقط او فتيس بايظ وتاخد منة الفارغة بتاعتة دة هيوفر عليك كتير

2- مقص ومساعد وجنطين امامى استيراد هتوفر معاك جامد

3- تشترى ربع امامى كامل من غير رفارف بنفس لون السيارة هيوفر معاك فى الرش هيوفر معاك جداا بردة عن ماهتشترى كل حاجة لوحدها

بس كدة , دية الحاجات اللى انت كاتبها , وان شاء الله مش هتعمل 10 الاف جنية او بالكتير 13 الف

وتروح توديها لسمكرى محترم وطالما العربية مافيش فيها زراجين او فيها لحامات خلاص الموضوع منتهى , هيكون سهل فقط فك وتركيب وظبط وشكرا على كدة

[memo_p910]

فتيسك جديد غير الجزء المكسور فقط والموضوع كله هايتلم زي ما الأخ الفاضل كتب في المشاركه اعلاه

[ahmed_moeaz]

من وجهة نظرى الحادث بسيط جدا كل المشكلة ف الفتيس ومش الفتيس كله الفارغة نفسها انا اعرف ناس لاحمة فارغة الفتيس بس مش عارف ده هينفع عندك ولا لأ ، المهم قبل كل شىء حمد الله على سلامتك وهتخسر كتير كتير جدا لو بعتها على حالتها انا شايفها حادثة بسيطة والموضوع يتلم

[muhmado_furp]

انا شايف ان معظم العربية سليم والشغل الي قدام لو سمكري شاطر هيعرف يظبط وش العربية
الفكره في امكانيات حضرتك المادية لان اكيد سعر الفتيس ودورة التبريد والكابوت والاكصدام والرفرف والفوانيس ومصنعية سمكري وبوهيجية يعني حضرتك بتتكلم في 13-15 ألف تقريبا
لو معاك اتوكل علي الله