تقييم شامللــ النترا 2015 .

[Hassan Khalil]

السلام عليكم أهل المنتدي الكرام ..
أحاول في هذا الموضوع تقديم تجربة و تقييم للالنترا 2015 بعد 6500 كم .
*العربية النترا 2015 ..استلام 11/2014 .. الفئة الاولي بدون اير باج او ايبي اس او فتحة سقف .
* سوف اعرض الموضوع في شكل نقاط .. المقارنة في الموضوع ستكون مع النترا 2011 الشكل القديم "" سيارتي السابقة " و من الممكن وضع مقارنات بسيطة مع سيارات اخري وفقا لخط سير الموضوع .
** الشكل :
واحد من الأسباب اللي خلتني مقبل علي العربية .. فيه ناس كتير كانت متخوفة من الشكل او مستغرباه .. لكني شايفه نقطة تميز للعربية
* شكل الفوانيس الجديدة في الامام .. و تصميم الفوانيس الجديدة في الخلف أيضا ميزة للعربية " الفوانيس الخلفية تضيئ بالكامل شاملة الجزء المدمج في شنطة العربية " .
* العربية ابعادها صعبة شوية خاصة من الخلف و حتحتاج وقت للتعود عليها في الركن و الأماكن الضيقة .

** الصالون :
* الصالون القعدة فيه " منخفضة " عن الالنترا الشكل القديم .. بيفكرك شوية بقعدة اللانسر الكريستالة
*كرسي السائق قابل للارتفاع و الانخفاض
*الكنبة الخلفية فيها مسند وسطي للذراع مدمج به حامل اكواب
* فتحات التكييف الوسطي تم تغيير مكانها و ارتفعت قليلا لتصبح علي يمين و يسار الكاسيت
* أماكن التخزين اقل من الشكل القديم و تفتقر الي الغطاء في حامل الاكواب الوسطي و مكان التخزين اسفل الكاسيت .. و كلها كانت مغطاة في الشكل القديم ..
*بشكل عام .. المساحة المتاحة للارجل و الاقدام افضل من الشكل القديم .. المساحة المتاحة للرأس خاصة بالنسبة للأشخاص طويلي القامة اسوأمن الشكل القديم نظرا للانحناء الشديد في زاوبة البربريز الامامي و الزجاج الخلفي
*يوجد حامل نظارة و لمبتين في السقف بين الشماسات بخلاف لمبة الصالون العادية ..
*الشماسات بها لمبات صغيرة للإضاءة
*المرايات طي كهرباء
*راحة الجلوس في الشكل القديم افضل من الشكل الحديث.

** الأداء
*ككل العربيات الجديدة .. الأداء مش حتظهر ملامحه كويس الا بعد 5000 كم .. العفشة بعدها بتكون انعم و السحب بيتحسن كتير .
* بوجه عام : الفروق بينها و بين الالنترا القديمة طفيفة يمكن ايجازها كالتالي
- النعومة افضل قليلا في الشكل الجديد
- الأداء علي السرعات المنخفضة افضل في الشكل الجديد نظرا لنقل السرعات عند مستوي ار بي ام منخفض " الفتيس 6 سرعات "
- الثبات و التوازن : مفيش فرق كبير .. و دي كانت علامة تعجب بالنسبة لي شخصيا .. توقعت ان الاتزان حيكون افضل كتير عن القديمة ...لم أزد عن 130 كم للتجربة .. و في الغالب لا ازيد عن 110 - 120 كم
- الفرامل .. تجميعها كويس جدا
-استهلاك الوقود : جيد و افضل قليلا من القديمة .. ممكن يعمل حوالي 500 كم في ال44-45 لتر.... مع التكييف الموضوع بيختلف تماما .
-ارتفاع السيارة عن الأرض .. لأول وهلة تعطيك إحساس انها منخفضة عن الشكل القديم .. لكني لم اقابل مشاكل مع المطبات حتي الان و لله الحمد ..

** متفرقات ..
* اضاءة الفوانيس الامامية جيدة و فارشة كويس علي الأرض و معتقدش انها مزعجة لعين القادم في الاتجاه المعاكس
*اضاءة الفوانيس الخلفية ممتازة .. و الفوانيس المدمجة في الشنطة تكون مضائة مع الفوانيس الخلفية الاساساية .. و النتيجة اضائة عريضة واضحة للقادم من الخلف حتي لو كان الطريق مظلم تماما .
* صوت الكاسيت عادي .. مش بطال .. و مش مميز
* التكييف كويس .. و لم استخدمه حتي الان في حرارة مرتفعة للوقوف علي أدائه الحقيقي .. التحويل بين أوضاع التكييف عن طريق زراير مش بكره .
شكل التابلوه و العدادات مريح للعين .. مضاء نهارا و ليلا .. يتوسطه شاشة صغيره لعرض الكم .. و استهلاك البنزين ..و التريب 1 و 2 .. و احاجات تانية لسه مخدتش بالي منها :)
*يوجد مقياس لدرجة الحرارة خارج السيارة مع الساعة اعلي الكاسيت ..
* خامات التابلوه و الأبواب جيدة جدا .
* مساحة درج التابلوه جيدة جدا و افضل من الشكل القديم .
* يوجد انذر للتنبيه بحزام الأمان للسائق ..يستمر في الــ " زن " بشكل مزعج لــ 3 او 4 دقائق تقريبا و بعدين بيفصل
* لا يوجد انذار للسرعات فوق 120كم
*ريموت العربية مبيعملش صوت عند القفل و الفتح .. مجرد اضاءة فقط للفوانيس الامامية و الخلفية و المرايات .. الموضوع مزعج قليلا خصوصا لو متعود علي التأكد من غلق العربية و انت في البيت بسماع صوتها .. كنت في الأول فاكر ان مفيهاش انذار .. جربت افتح الباب في مرة بالمفتاح من غير الريموت راحت صوتت و فضحتني .. و بكده عرفت ان فيها انذار .

** نقطة هامة ..
و دي باعتبرها عيب هام جدا في العربية .. القوائم الامامية منحنية بدرجة حادة .. الانحنائة دي بتخليك احيانا لو داخل علي تقاطع او شارع جانبي بتحجب عنك الرؤية تماما للقادم في الجانب .. حصلت معايا عدة مرات و ممكن ان تؤدي لمشاكل خصوصا لو القادم من الجانب مركبة ذات حجم صغير او موتسيكل .. ربنا يعافي الجميع من كل سوء
.* ارتفاع مساحة الصاج في الأبواب و صغر حجم الشباك بيخلي الرؤية السفلية صعبة للسائق عند الركن او عند الدوران بالقرب من الأرصفة .. ده ممكن يؤدي لخبطات ا و حكات في عتب العربية .
------------------

دي كانت محاولة مني لتقييم السيارة في الفترة اللي قعدتها معايا .. اتمني ان يكون في الموضوع فائدة للجميع و تحت الامر في أي استفسار .
تحياتي

[samihanwar]

الف مبرووك على الالنترا
ربنا يديك خيرها ويكفيك شر الطريق والناس

[Hassan Khalil]

الف مبرووك على الالنترا
ربنا يديك خيرها ويكفيك شر الطريق والناس

الله يبارك فيك .. ربنا يتقبل دعائك و تسلم علي ذوقك

[ahmed.Elashy]

تقرير جميل والف مبروك للعربيه
واضح انك بتحب الالنترا عشان ضحيت بالاير باج واي بي اس عشان خاطرها

[Hassan Khalil]

تقرير جميل والف مبروك للعربيه
واضح انك بتحب الالنترا عشان ضحيت بالاير باج واي بي اس عشان خاطرها

الله يبارك فيك .. :)
الموضع مش حب للالنترا علي قد ما هو محاولة الحصول علي عربية حديثة السوق بيحبها و في نفس الوقت في حدود الإمكانات المتاحة .. الايرباج و الاي بي اس موجودين فيها في الفئة الاعلي بفارق حوالي 14000 ج عن عربيتي .. و بصراحة انا كنت وصلت لمرحلة لو العربية كانت زادت نص جنيه مكنتش حجيبها :)
تحياتي

[adel1212]

مبروك على الالنترا
يارب تشوف فيها ايام سعيدة
تقريبا اتفق معك في كل ما كتبته الا نقطة النعومة فهي افضل بكثير في الـ hd
تحياتي

[Hassan Khalil]

مبروك على الالنترا
يارب تشوف فيها ايام سعيدة
تقريبا اتفق معك في كل ما كتبته الا نقطة النعومة فهي افضل بكثير في الـ hd
تحياتي

الله يبارك فيك ..
و مأظنش اننا حنختلف .. و اذا جينا للتفصيل فاعتقد ان الــ hb اخف و اكثر سلاسة في الانطلاق من الــ md .. الــ md اثقل قليلا في الانطلاق من الثبات و بشكل ما بتفكرني بأداء العربيات الأوروبي علي النقلتين الاولي و الثانية .. لكن بعد زيادة السرعة اعتقد انها بتكون افضل من الـ hb

[owsha]

الف مبروك وربنا يديك خيرها ويكفيك شرها
تقييم ممتاز

[soltanfriend]

اولا احييك على الموضوع الجميل والعربية الاجمل
ثانيا انا معايا العربية استلام 17/10/2014 ثانى فئة فتحة سقف وماشية لغاية دلوقتى 3400 كيلو فقط وليا استفسارات
1- العفشة حاسسها بتدبدب فى النقر البسيطة
2- الماكينة من بعد صيانة ال1000 وصوتها بقى مسموع خصوصا مع التسخين الصبح وقبل تغيير الزيت فى الصيانة ماكنش فيه صوت تماما
3- استهلاك البنزين جيد ولكن مش زى الارقام اللى بسمعها تماما يعنى انا لغاية دلوقتى الاستهلاك على الشاشة عندى 10.7 لكل 100 كيلو
4- الفرامل لازم ارجلشها كل شوية غير كدا العربية بتزحف جامد جدا
5-فتحة السقف من بعد يومين الرمل اللى فاتو بقت بتطقطق خفيف وانا بفتحها لفوق ومش عارف اشحمها او اعملها صيانة عند مين
اخيرا الحمد لله العربية جميلة جدا وشيك جدا جدا جدا بس هو كل اللى مضايقنى صوت العفشة خصوصا انى ناوى اركب جنط وخايف ليعمل صوت اكتر من اللى موجود ثانيا الفرامل بتقلل ثقتى فى العربية خصوصا انها فى الجري مابتتوصاش ما شاء الله طيارة
فكنت عايز اعرف ايه الحاجات اللى هاتتغير بعد ال5000 كيلو وهاتتغير لواحدها ولا فى صيانة التوكيل
وكمان عايز اعرف صيانة ال5000 بتتكلف كام تقريبا واعملها فين خصوصا ان فرع العبور حاسسهم ناس كفته على الاخر
وجزاك الله كل خير

[Hassan Khalil]

الف مبروك وربنا يديك خيرها ويكفيك شرها
تقييم ممتاز

ربنا يبارك فيك .. شكرا لذوقك :)

[omaranes77]

الف مبروك
ربنا يباركلك فيها
هي فيها ايمبوليزر

[Hassan Khalil]

اولا احييك على الموضوع الجميل والعربية الاجمل
ثانيا انا معايا العربية استلام 17/10/2014 ثانى فئة فتحة سقف وماشية لغاية دلوقتى 3400 كيلو فقط وليا استفسارات
1- العفشة حاسسها بتدبدب فى النقر البسيطة
2- الماكينة من بعد صيانة ال1000 وصوتها بقى مسموع خصوصا مع التسخين الصبح وقبل تغيير الزيت فى الصيانة ماكنش فيه صوت تماما
3- استهلاك البنزين جيد ولكن مش زى الارقام اللى بسمعها تماما يعنى انا لغاية دلوقتى الاستهلاك على الشاشة عندى 10.7 لكل 100 كيلو
4- الفرامل لازم ارجلشها كل شوية غير كدا العربية بتزحف جامد جدا
5-فتحة السقف من بعد يومين الرمل اللى فاتو بقت بتطقطق خفيف وانا بفتحها لفوق ومش عارف اشحمها او اعملها صيانة عند مين
اخيرا الحمد لله العربية جميلة جدا وشيك جدا جدا جدا بس هو كل اللى مضايقنى صوت العفشة خصوصا انى ناوى اركب جنط وخايف ليعمل صوت اكتر من اللى موجود ثانيا الفرامل بتقلل ثقتى فى العربية خصوصا انها فى الجري مابتتوصاش ما شاء الله طيارة
فكنت عايز اعرف ايه الحاجات اللى هاتتغير بعد ال5000 كيلو وهاتتغير لواحدها ولا فى صيانة التوكيل
وكمان عايز اعرف صيانة ال5000 بتتكلف كام تقريبا واعملها فين خصوصا ان فرع العبور حاسسهم ناس كفته على الاخر
وجزاك الله كل خير

بداية الف مبروك علي العربية .. ربنا يحفظهالك و تستعملها في الخير دايما .
* بالنسبة للعفشة .. من المتفق عليه ان العفشة في الهيونداي بيكون فيها نقر او دبدبة علي الطرق المكسرة او غير المستوية .. لكن للتقليل من الوضوع ده حضرتك تتأكد من شوية حاجات ...أولها انك راجعت ضغط هواء الكاوتش بعد الاستلام لانه بيكون في التخزين مظبوط علي 45 .. ثانيها انك تطلب منهم تربيط العفشة في الصيانة القادمة و تقولهم علي موضوع النقر ده كملاحظة مستقلة عشان يهتموا بيها .. ثالثها .. علي 5000 - 6000 حتلاقي موضوع النقر و الدبدبة ده خف كتير عن الأول و حتكون العفشة انعم بفارق ملحوظ عن دلوقتي .
* استهلاك البنزين اللي حضرتك كاتبه تقريبا هو الطبيعي .. ممكن يزيد او ينقص شوية صغيرة .. متعتمدش في قياس الاستهلاك علي قياس العربية لانه بيتغير كل لحظة من إشارة لطريق مفتوح لمطلع لمنزل ..الخ .. لكن اعتمد علي القياس من ساعة ما تفول العربية .. اعرف حطيت كام ليتر و صفر العداد و اعرف مشيت بيهم كام كيلو .
فتحة السقف محتاجة بس شوية تنظيف و إعادة تشحيم و دي يعملوها في الصيانة اللي جاية ..
* بالنسبة للصيانة كنت باعملها في العربية القديمة في أبو رواش .. لكن الموضوع كان تقيل اوي علي قلبي لصعوبة المشوار و بعد المسافة .. العبور اقرب لمنطقة سكني دلوقتي و بتعامل معاهم بقالي اكتر من سنة " في العربية القديمة و حاليا في الجديدة " ..بالنسبة لي مش بطالين .. لكن لازم تركز معاهم كويس جدا و تتأكد من ان كل ملاحظاتك تم التعامل معها و اصلحها .. و خد و ادي معاهم و متعديش حاجة .. و للانصاف "معظم" الناس اللي هناك محترمين و بيستجيبوا لملاحظات العميل .
*صيانة الــ 5000 بالنسبة لي كلفت تقريبا 200 ج أكثر او اقل قليلا.. و هيا كلها عبارة عن تشييك علي العربية بالكامل و رجلشة الفرامل و التشييك علي الانوار و متابعة مستوي الزيوت و السوائل و تربيط العفشة و مراجعة ملاحظات العميل .. وبصراحة مش فاكر مبلغها بالظبط لاني مبفتكرش انا واكل ايه النهارده أساسا .. لكن حوالين الرقم ده لانها بدون تغيير زيت "" انا بغير زيت و فلتر كل 10000 " ..اذا كنت حتغير زيت 10000 ضيف حوالي 400ج
بالتوفيق :)

[Hassan Khalil]

الف مبروك
ربنا يباركلك فيها
هي فيها ايمبوليزر

الله يبارك فيك
اينعم فيها في جميع الفئات من الاولي للهاي لاين

[soltanfriend]

بداية الف مبروك علي العربية .. ربنا يحفظهالك و تستعملها في الخير دايما .
* بالنسبة للعفشة .. من المتفق عليه ان العفشة في الهيونداي بيكون فيها نقر او دبدبة علي الطرق المكسرة او غير المستوية .. لكن للتقليل من الوضوع ده حضرتك تتأكد من شوية حاجات ...أولها انك راجعت ضغط هواء الكاوتش بعد الاستلام لانه بيكون في التخزين مظبوط علي 45 .. ثانيها انك تطلب منهم تربيط العفشة في الصيانة القادمة و تقولهم علي موضوع النقر ده كملاحظة مستقلة عشان يهتموا بيها .. ثالثها .. علي 5000 - 6000 حتلاقي موضوع النقر و الدبدبة ده خف كتير عن الأول و حتكون العفشة انعم بفارق ملحوظ عن دلوقتي .
* استهلاك البنزين اللي حضرتك كاتبه تقريبا هو الطبيعي .. ممكن يزيد او ينقص شوية صغيرة .. متعتمدش في قياس الاستهلاك علي قياس العربية لانه بيتغير كل لحظة من إشارة لطريق مفتوح لمطلع لمنزل ..الخ .. لكن اعتمد علي القياس من ساعة ما تفول العربية .. اعرف حطيت كام ليتر و صفر العداد و اعرف مشيت بيهم كام كيلو .
فتحة السقف محتاجة بس شوية تنظيف و إعادة تشحيم و دي يعملوها في الصيانة اللي جاية ..
* بالنسبة للصيانة كنت باعملها في العربية القديمة في أبو رواش .. لكن الموضوع كان تقيل اوي علي قلبي لصعوبة المشوار و بعد المسافة .. العبور اقرب لمنطقة سكني دلوقتي و بتعامل معاهم بقالي اكتر من سنة " في العربية القديمة و حاليا في الجديدة " ..بالنسبة لي مش بطالين .. لكن لازم تركز معاهم كويس جدا و تتأكد من ان كل ملاحظاتك تم التعامل معها و اصلحها .. و خد و ادي معاهم و متعديش حاجة .. و للانصاف "معظم" الناس اللي هناك محترمين و بيستجيبوا لملاحظات العميل .
*صيانة الــ 5000 بالنسبة لي كلفت تقريبا 200 ج أكثر او اقل قليلا.. و هيا كلها عبارة عن تشييك علي العربية بالكامل و رجلشة الفرامل و التشييك علي الانوار و متابعة مستوي الزيوت و السوائل و تربيط العفشة و مراجعة ملاحظات العميل .. وبصراحة مش فاكر مبلغها بالظبط لاني مبفتكرش انا واكل ايه النهارده أساسا .. لكن حوالين الرقم ده لانها بدون تغيير زيت "" انا بغير زيت و فلتر كل 10000 " ..اذا كنت حتغير زيت 10000 ضيف حوالي 400ج
بالتوفيق :)

اشكرك جدا يا استاذ حسن وان شاء الله ربنا يستر طريقنا

[dadapharma]

اولا احييك على الموضوع الجميل والعربية الاجمل
ثانيا انا معايا العربية استلام 17/10/2014 ثانى فئة فتحة سقف وماشية لغاية دلوقتى 3400 كيلو فقط وليا استفسارات
1- العفشة حاسسها بتدبدب فى النقر البسيطة
2- الماكينة من بعد صيانة ال1000 وصوتها بقى مسموع خصوصا مع التسخين الصبح وقبل تغيير الزيت فى الصيانة ماكنش فيه صوت تماما
3- استهلاك البنزين جيد ولكن مش زى الارقام اللى بسمعها تماما يعنى انا لغاية دلوقتى الاستهلاك على الشاشة عندى 10.7 لكل 100 كيلو
4- الفرامل لازم ارجلشها كل شوية غير كدا العربية بتزحف جامد جدا
5-فتحة السقف من بعد يومين الرمل اللى فاتو بقت بتطقطق خفيف وانا بفتحها لفوق ومش عارف اشحمها او اعملها صيانة عند مين
اخيرا الحمد لله العربية جميلة جدا وشيك جدا جدا جدا بس هو كل اللى مضايقنى صوت العفشة خصوصا انى ناوى اركب جنط وخايف ليعمل صوت اكتر من اللى موجود ثانيا الفرامل بتقلل ثقتى فى العربية خصوصا انها فى الجري مابتتوصاش ما شاء الله طيارة
فكنت عايز اعرف ايه الحاجات اللى هاتتغير بعد ال5000 كيلو وهاتتغير لواحدها ولا فى صيانة التوكيل
وكمان عايز اعرف صيانة ال5000 بتتكلف كام تقريبا واعملها فين خصوصا ان فرع العبور حاسسهم ناس كفته على الاخر
وجزاك الله كل خير

صديقي العزيز، بخصوص صوت الماتور هو بيبقي عالي أول ما تدور و لحد لما العربية تسخن.. الrpm بيقل لحد 700 و الصوت المفروض مابيقاش مسموع تماما..
بخصوص الاحساس بالنقر و بعد تجربة تغيير الكاوتش لبريدجستون.. الفرق رهيب بينه و بين الكاوتش الاصلي الهانكوك.. صوت الكاوتش بيختفي تماما و الاحساس بالنقر و فواصل الكباري بيقل جدا.. لكن المطبات و الحفر تظل مشكلة العفشة الناشفة شوية مشكلة....
بالنسبة للفرامل و بالرغم ان عندي ABS لكن أدائها جيد جدا (بدون ما الABS يشتغل) و مش طبيعي ترجلش كل شوية.. إعمل صيانة ال5000 في العبور في يوم نص الاأسبوع مايبقاش زحمة و بلغ المهندس يشيك علي كل المشاكل الي ذكرتها.. في حدود 200 جنيه.. إنت في الضمان و هتحتاج تروح التوكيل علي الأقل صيانات ال10000 عشان الضمان.. قدام شوية ممكن تعمل صيانات ال5000 في أي مركز خدمة بربع السعر.. العملية كلها تشييك و تربيط للعفشة لكنها بتفرق جدا في صوت و أداء العفشة..
بخصوص تغيير الجنط.. يا ريت تاخد رأي أهل الخبرة في المنتدي الكريم.. خاصة لو هتغيير مقاس الجنط.. الي راكب عندي 15 و اعتقد ال16 مقبول لكن ال17 بيددب و مش مريح علي حد علمي و الكاوتش الي هيكب عليه أغلي.. و إستشير كمان لو ينفع تعرض الكرتش شوية ( من غير مايحك فالرفارف) لأنه أكيد هيحسن أداء الفرامل... بالتوفيق..