برجاء المساعدة فى هذا العطل الغريب والمفاجىء

[عماد]

السلام عليكم ورحمة الله وبركاته
السيارة هيونداى اكسنت 1500 cc موديل 2000
كاملة مانيوال انجيكشن
المشكلة انى بقالى يومين وانا بشغل العربية الصبح علشان اروح الشغل مش بدور على طول وللعلم المارش شغال كويس جدا والبطارية جيدة جداً ومع ذلك مش بتقوم والغريب انها بدور لما ازود بنزين تدورعلطول مش فاهم ليه
( والكلام ده أول يحصل معايا منذ شراء السيارة من سنتين من يوم ماشترتها وانا بدور العربية وانا من الخارج لأنها انجيكشن )
- للعلم انى لسه مغير طقم بوجيهات ( NGK ) + ( فلتر بنزين ) + ( فلتر هواء ) وتم شراء منظف كربراتير كل ده من اسبوع
ارجوكم افيدونى انا فى انتظار ردكم المشكلة فين علشان مش عايز الصنيعية يشتغلونى

[Abo_Mazen]

الإنجيكشن لما بتدوس على دواسة البنزين وهي مطفيه ..ففي حقيقة الأمر إنت مش هتدخل بنزين ..لإن طرمبة البنزين كهرباء ..لكن اللي بيحصل إنك بتزود نسبة الهوا ..عشان كده حاول تنضف بوابة ..وشوف إيه اللي هيتم

[safwat1100]

شوف طلمبة البنزين ممكن تكون مبتحضرش كويس و اكشف على الفيوز و الكتاوت بتوعها

[عماد]

الإنجيكشن لما بتدوس على دواسة البنزين وهي مطفيه ..ففي حقيقة الأمر إنت مش هتدخل بنزين ..لإن طرمبة البنزين كهرباء ..لكن اللي بيحصل إنك بتزود نسبة الهوا ..عشان كده حاول تنضف بوابة ..وشوف إيه اللي هيتم

اولا بشكرك على المشاركة
فعلا لمبة الانجيكشن منورة مافيهاش مشكلة
انظف البوابة ازاى ( ايه طريقة التنظيف وانا اعملها ) مع العلم انى لسه منظف البوابة من اسبوع وانا بغير الفلاتر
وعايز اقول لك على حاجة ان المشكلة دى بتحصل معايا بس لما العربية تتركن من 8 ساعات فأكثر لكن لما اركن وارجع اشغل بعد ساعة او اقل بتشتغل علطول مفيش مشكلة

[shake]

متا بع

[عماد]

شوف طلمبة البنزين ممكن تكون مبتحضرش كويس و اكشف على الفيوز و الكتاوت بتوعها

شكرا على المشاركة
ممكن تكون طلمبة البنزين مع العلم ان العربية بعد ماشتغلت روحت الشغل 25 كم وركنت 1 ساعة ورجعت شغلتها اشتغلت علطول
ولو كانت الطلمبة هل ممكن العربية تشتغل اوقات واوقات ماتشتغلش ولو الطلمبة فيها مشكلة مش المفروض تقطع معايا وانا ماشى ولا كلامى مش مظبوط

[MOTOR HEAD]

انجكشن و منظف كربراتيير ازاى !!!!

[safwat1100]

و الله العربيات عودتنا على كل ما هو جديد
متنساش برضه تبص على فيشة الطلمبه

[Abo_Mazen]

هي العربيه دي فيها موبينه ولا كويلات؟؟؟

[عماد]

هي العربيه دي فيها موبينه ولا كويلات؟؟؟

موبينه

[Abo_Mazen]

موبينه

لو الموبينه كهربا ..تبقى مليون في الميه العيب منها ..حصلت معايا وصرفت قد كده ..تغيير فلاتر وبوجيهات ومنظفات وفي الآخر طلعت موبينه ..لو الموبينه كهربا هتلاقي مقاومه في أول الموبينه ..إعمل عليها كوبري ..وجرب وشوف

[عماد]

نزلت الصبح شغلت العربية اشتغلت علطول من غير ماتغيب ومن اول مرة بس إتأخرت 3 ثوانى ودارت
ده يبقى ايه معناه ( وساخة فى الدورة ولا مشلكة فى الموبينة )
وبردوا ها تابع اللى بيحصل اول بأول وأقولكم والعربية دلوقتى مركونة من ساعة ماجيت الشغل الساعة 8 ص هاشوف اللى هايحصل لما امشى الساعة 4 م وتفيدونى ده معناة ايه
تاعبكم معايا بس علشان نستفيد

[Abo_Mazen]

نزلت الصبح شغلت العربية اشتغلت علطول من غير ماتغيب ومن اول مرة بس إتأخرت 3 ثوانى ودارت
ده يبقى ايه معناه ( وساخة فى الدورة ولا مشلكة فى الموبينة )
وبردوا ها تابع اللى بيحصل اول بأول وأقولكم والعربية دلوقتى مركونة من ساعة ماجيت الشغل الساعة 8 ص هاشوف اللى هايحصل لما امشى الساعة 4 م وتفيدونى ده معناة ايه
تاعبكم معايا بس علشان نستفيد

مقولتليش ..الموبينه اللي فيها كهربا ولا

[عماد]

مقولتليش ..الموبينه اللي فيها كهربا ولا

بص ياباشا الموبينة الكترونى شكلها عبارة عن مجموعة مستطيلة متوزعة عليها خرج البوجيهات وبها حساس مع المجموعة

[عماد]

اللى حصل النهاردة
نزلت اشغل العربية بردوا غابت فى الدوارة
قولت ان شاء الله اروح للميكانيكى والكهرباءي يشوفوا المشكلة
قابلنى الكهرباءي الاول
كشف على العربية وقالى الموبينة كويسة والكتاوت والفيوز تمام
وقالى روح شوف الميكانيكى قلتله يعنى مافيش حاجة قالى اللى عندك مش فى الكهرباء قالى اكشف على البوجيهات او طلمبة البنزين
روحت للميكانيكى
مسك العربية من اول البوابة وراجع على كل الشغل اللى عمله من اسبوعين ورحت جبت بوجيهات تانى جديدة وركب ودور العربية وبردوا مش عجباه دوارة العربية
قالى انا راجعت على كل الشغل اللى يخصنى فى الميكانيكا وطلب منى اروح اكشف على العربية بالجهاز لأنى شاكك فى حساس الكرنك والايدل
روحت لواحد عنده جهاز كشف والنور كان قاطع ف المنطقة
قولته الموضوع من اوله
قام بص على العربية وشغل العربية وبص على ال rbm لقاه ثابت ومظبوط قالى شغل التكييف شغلت ال rbm مبقاش ثابت يجى على 10 وينزل على اقل من 8 قالى المشلة بشكل كبير من الأيدل قالى لازم نفكه ونظفه ونحط العربية على الجهاز قلتله وده يأخر الدوارة فى الصبح قالى طبعا
و النور مجاش قلتله هاعدى عليك بكرة
مشيت والسحب اخلتف بعد تغير البوجيهات زاد لدرجة انى مشيت على سرعة 120 كم وانا رايح القاهرة الجديدة وصوت الموتور بقى ناعم
ايه رأيكم فى اللى قلته