رأيكم هيخليني أتخذ قرار

[inspiron]

السلام عليكم معشر هيونداي الفخمين

بدون ما أرغي

المفروض أشتري عربية خلال 5 أيام وبفكر أوي في ix35
والمفروض إني هنزل من باسات 2014 والحمد لله جابت فتيس بعد 45000 كم

الإستفسارات :-
- أخبار نعومة العربية دي إيه ؟
- أخبار تسارع العربية دي إيه ؟
- أخبار العفشة إيه ؟
- أخبار الثبات إيه علي متوسط سرعة 140 كم ؟
- لو حبيت أجرب السرعة القصوي للعربية دي عشان أشوف إمكانيات موتورها .. آخرها كام ؟
شكر مقدما ومنتظر الردود

[Omar Sarray]

حجاوبك باختصار شديد وبكل انحياديه وصراحه مع احترامى للجميع وليك لو قارنتها مع كيا سبورتاج 2015 سبورتاج تتفوق عليها بشكل وقوه المحرك 140 حصان والعلو التوسان اعلا شويه من السبورتاج والاوبشنز فى سبورتاج احلا لان سماعات فى توسان سماعات عاديه وفى سبورتاج 6 سماعات انفينتى ده راى الشخصى مع احترامى للجميع وليك وليست كلمه او مجامله لان العربيه كانت عند اخويه وباعها لان سرعتها محدود لغايه 140 او كتيرها 150 وكل شويه تسمع صوت موتور شويه عالى والوابشنز مش حنقول ممتاز او جيد جدا زى السبورتاج النعوميه والعفشه تقريبا العفشه فى توسان احسن شويه من سبورتاج بس نعوميه وقوه محرك سبورتاج تكسب وربك المستعان والقرار قرارك وفكر قبل ما تشترى

[ali ashraf]

ممكن نضيف السوبارو اكس فى

حجاوبك باختصار شديد وبكل انحياديه وصراحه مع احترامى للجميع وليك لو قارنتها مع كيا سبورتاج 2015 سبورتاج تتفوق عليها بشكل وقوه المحرك 140 حصان والعلو التوسان اعلا شويه من السبورتاج والاوبشنز فى سبورتاج احلا لان سماعات فى توسان سماعات عاديه وفى سبورتاج 6 سماعات انفينتى ده راى الشخصى مع احترامى للجميع وليك وليست كلمه او مجامله لان العربيه كانت عند اخويه وباعها لان سرعتها محدود لغايه 140 او كتيرها 150 وكل شويه تسمع صوت موتور شويه عالى والوابشنز مش حنقول ممتاز او جيد جدا زى السبورتاج النعوميه والعفشه تقريبا العفشه فى توسان احسن شويه من سبورتاج بس نعوميه وقوه محرك سبورتاج تكسب وربك المستعان والقرار قرارك وفكر قبل ما تشترى

وممكن بعد اذنكم تضيفوا السوبارو أكس فى و لها من المميزات الكثير

[mado-301]

معلش ان ح اسال سؤال تاني يمكن بعيد عن الموضوع

بالنسبة للضمان ايه الوضع ؟؟؟ عربية 2014 و45 الف كيلو عملت معاهم ايه

[inspiron]

شكراً للردود ولكن بعد إذن السادة الأفاضل..سؤالي عن الـ ix35 فقط لا غير ويا ريت ملاك السيارة لا يبخلوا عليا بالرد

[adel1212]

السلام عليكم معشر هيونداي الفخمين

بدون ما أرغي

المفروض أشتري عربية خلال 5 أيام وبفكر أوي في ix35 ( ربنا يهديك لاسعد سبيل)
والمفروض إني هنزل من باسات 2014 والحمد لله جابت فتيس بعد 45000 كم (ربنا يعوض عليك)

الإستفسارات :-
- أخبار نعومة العربية دي إيه ؟ (كعادة الكوري نعمة جدا)
- أخبار تسارع العربية دي إيه ؟ (ممتاز نسبة لحجم السيارة)
- أخبار العفشة إيه ؟ (قوية مش ناشفة نظرا لارتفاع السيارة)
- أخبار الثبات إيه علي متوسط سرعة 140 كم ؟ (جربت لغاية 160 كم على الدائري جيدة جدا)
- لو حبيت أجرب السرعة القصوي للعربية دي عشان أشوف إمكانيات موتورها .. آخرها كام ؟
شكر مقدما ومنتظر الردود

سيدي بارك الله لك فيما مضى و يوفقك فيما هو قادم
- العربية مش عربية سرعات عاليا رغم ان العربية تجيب معاك سرعات عاليا بسهولة بس صوت انين الموتور المحتج مش يعجبك خالص(وزن العربية عايز علي الأقل 2000 cc)
أي استفسار اخر تحت امرك
تمنياتي بحسن الاختيار

[NourElmansy]

العربيات الكوري عموما حصان رابح في السوق المصري ... سيارات اعتمادية ( لا يوجد اعطال شائعة ) سعر اعادة بيع ممتاز


آسف لما حدث لسيارتك الباسات ... بالنسبة لل ix35 فهي سياره ممتازه .. يعيبها فقط عدم اتساع الصالون ليتلائم مع الحجم الخارجي للسياره ... و هي غير مخصصة للسرعات العالية بالمناسبة فلا تحاول الاسراع بها

تحياتي

[Omar Sarray]

تمام انت ليه متستناش 2016 شكل الجديد احلا فيها لمسات الفخامه وحتنزل مصر فى 2016 وله انت مستعجل عاوز عربيه دلوقتى ال ix35 fully loaded

[semsem7222]

العربية جميلة جدا بس يعيبها صوت الماتور على السرعات العالية كنت ماشى 150 على طريق السخنة بالتكييف بس صوت الموتور كان عالى بس صراحة مزوتش عن كدة

[Omar Sarray]

انت استنى ال2016 اهى قربت تنزل مصر انا كمان مستبعد الموجوده دلوقتى توسون مش عارف ليه صوته الموتور مش عارف ليه كده عالى اوى عند ناس كتير بعد ال120

[mfm_tantawi]

العربية معايا من 2013 أعلى فئة، وبصراحة معملتش أى موقف يزعلنى من ساعة ماجبتها، التسارع بتاعها ممتاز بالنسبة للفئة بتاعتها والعربية ناعمة جدا وفراملها حساسة أنا شايف إنها أوسع صالون للفئة بتاعتها ودا بالمعينات الفعلية وأبعاد مساحات الصالون لكذا عربية فى نفس الفئة زى سبورتاج قشقاى XV، بالنسبة لموضوع الثبات والسرعة القصوى: مع إحترامى لجميع السيارات من نفس الفئة، ماينفعش أقارن ثبات أو أقصى سرعة للعربيات من الفئة دى بعربيات سيدان، مع العلم إن العربية أنا جبت بيها 170على طريق العلمين وكانت ثابتة ومحاولتش أزود عشان الطريق مكانش كويس.
فلو هاتركز على موضوع الثبات والسرعة نصحيتى المتواضعة إبعد عن الفئة دى عموما، وأنا تحت أمرك لو فى إستفسار فى أى شىء يخص العربية، وربنا يعوضك خير فى خسارتك فى الباسات وعلى فكرة أنا قريت الموضوع بتاعك على الفيس من فترة.
http://www.nilemotors.net/Nile/372621-ix35.html دا تقرير كنت عاملة عن العربية من 2013 ياريت تبص عليه بالاضافة الى إفادة السادة ملاك العربية، وكمان فيه صفحة على الفيس لملاك العربية عليها مناقشات مفيدة عنها.
ويارب أكون أفادتك.

[yasser100]

اولا لازم تكون مجهز نفسك لتقبل خامات و تقفيل ال ix35 بالنسبه للباسات و فولكس فاجن عموما , انا ركبت ال ix35 كتير لانها مع اصحابى و كانت الفئه التانيه اللى ب 220 الف تقريبا .

انا فى رأيي ما تستهلش المبلغ ده , العفشه ناشفه و كنبة العربيه الخلفيه ضيقه غير احساس الفخامه و القعده فى الداخل و الخامات مفقود . مش لعربيه بالمبلغ ده .

سحبها كويس و موتورها ناعم و نقلات الفتيس معقوله , العزل الداخلى مش قوى و لكن هيه عربيه ناجحه بالنسبه لفئة ال suv .

فقط هاتعانى من موضوع الفخامه الداخليه و شوية حاجات تانيه هاتفتقدها زى الاحساس بالامان بالنسبه للاوروبى و الالمانى .