هيونداي سوانتامو

[RHMA351]

يا جماعة محتاجة استشارة سريعة
ممكن اعرف عيوب السيارة هيونداي سوانتامو مو٢٠٠٠ضروري ولما ارو اكشف عليها اركز على ايه بالضبط
ولو قارنتها بكرولا استيشن بردو بس اغلى منها ب٢٠٠٠جنيه وعاوزة شغل في التكييف والكاوتش
مع العلم ان الكورولا ١٦٠٠ cc وكمان اتوماتيك والهيونداي ٢٠٠٠ccومانيوال

[جيتزاوي55]

أولا لضمان ان ميحصلش اي مشكلة في الكشف علي العربية , حضتك تروحي التوكيل يكشفوا عليها كشف عام دة بيبين اي اعطال أو حاجات محتاجة لأصلاح , وأعتقد في هيونداي فية حاجة اساسا اسمها كشف أعادة بيع أو حاجة كدة وتمنة تقريبا 500 جنية علي ما أتذكر دة هيوضح لحضرتك كل حاجة بشكل مفيهوش قلق وتبقي مطمئنة زيادة عن لو كشفتي عليها برة وكدة .
تاني حاجة بالنسبة للفرق بين العربيتين ف أنا عاوز حضرتك بس تحطي الأول ايدك علي أحتياجاتك اية من العربية :
يعني دلوقتي السانتامو 7 راكب ف هل حضرتك عائلتك كبيرة وهتبقي محتاجة عربية 7 راكب ولا لأ , العربية مانيوال ف هل حضرتك بتفضلي المانيوال ولا الأوتوماتيك في السواقة , ممكن تكون قطع غيارها مش منتشرة قوي مقارنة بالكورولا خصوصا انها مكانتش منتشرة أوي كعربية وفي نفس الوقت موديلاتها محدودة.
نيجي للكورولا الأستيشن , الفكر من أستيشن انها مساحة شنطة أكبر مش 7 راكب زي الهيونداي , اتوماتيك ف حضرتك زي ما قلنا تحددي انتي عاوزة مانيوال ولا أوتو , الكورولا قطع غيارها ممكن تبقي أغلي شوية بس اعتقد مدي توافرها هيبقي أكبر بكتير .
ملحوظة أخيرة , الموتور ال 2000 هيبقي استهلاكة أعلي في البنزين , وهيبقي تكلفة الترخيص بتاعتة أعلي من ال 1600
أتمني أكون ساعدت حضرتك قدر الأمكان

[Abo Hamed]

بعد التحية والسلام لكل أعضاء ومتابعين nilemotors
أود من مشاركتى في الموضوع هو تعريف بعض المتابعين بالسيارة هيونداى سنتامو خاصة الأتوماتيك لأنى أمتلك سيارة هيونداى سنتامو أتوماتيك 2002 وتعتبر من أجمل وأروع وأحلى وأوسع سيارة عائلية أمتلكها بعد 10 سيارات سابقين من عدة نقاط عملية وسريعة تهم كل واحد بيدور على عربية عائلية واسعة ومريحة :-
أولاً المميزات :
1- موتور 2000 cc قوى وسحب ممتاز وناعم ومناسب لحجم السيارة ومناسب مع العدد اللى ممكن يركب فيها لا هتحس برجه في الطلعه ولا نخعه في الموتور ولا رعشه بسبب إنك مشغل التكييف ولا الهوا بس شرط المحافظة على دورة الصيانة في مواعيدها .
2- العربية عالية عن الأرض بالشكل اللى بيحمى العربية من الجبال اللى في الشوارع ومسمينها مطبات حتى لو فيها 7 ركاب أو 8 عدد أسرتى ورغم علوها عن الأرض ثابته جداً في السرعات نظراً لتصميمها الجميل اللى بيساعد في ثبتها .
3- مساحتها من جوه بتاخد لحد 8 أشخاص من الحجم الطبيعى وكمان فيه مساحة ورا الكراسى ممكن تشيل شنط أو حاجات معقوله أو تحط فيها شخصين كمان لو الأمر حكم ولو محتاج مساحة شنطه كبيرة ممكن أطوى الكراسى اللى ورا هتديك مساحة محترمة جداً تناسب شنط ومتطلبات المصايف وفيه جرايد على السقف ممكن تحط عليهم شنط السفر أو تركب شبكة عليها .
4- كل ما فيها من كماليات حاجة الفبريكة 4 زجاج كهربا سنتر لوك مرايات كهربا مانع إنزلاق وباور بتاعها ناعم جداً .
5- الصيانة الدورية بتاعتها زيها زى أي عربية في فئتها نيجى بقى للمهم وهو إستهلاك البنزين بتعمل في الـ 100 كيلوا 9.7 لتر هنقول الـ 100 كيلوا بـ 10 لتر وبيزيد شوية مع التكييف بمعدل 3 لتر في عز الحر مشوار من القاهرة لطنطا وفى زحمة الطريق السريع .
6- ترخيص العربية ما فرقش معايا شيء عن العربية الدايو ليجانزا المانيوال اللى كانت معايا قبلها يعنى ترخيص بنقل ملكية بطفاية وشنطة ومثلث كلف تقريباً 1700 للثلاث سنوات الكلام ده كان شهر 6 _2017 .
ثانياً العيوب :-
1- السيارة عائلية في المقام الأول بالنسبة للفتيس الأتوماتيك مش بتاع غُرز ودوس بنزين وأمركه لأ الغيار بينقل على RPM 2500 مهما إتسرعت في دوسة البنزين مش هينقل بالسرعة بتاعة الغُرز هياخد عدد لفات الموتور وهينقل .
2- الفرامل بتاعتها بتحتاج الصيانة بشكل دورى ومستمر كونها سيارة ثقيلة الوزن وكمان أتوماتيك فاتيل الفرامل بيحتاج الكشف كل 6شهور .
3- توزيع التكييف أمامى فقط مفيش هوايات للتكييف بالخلف بس ماشى الحال مع الوقت بتحس ببرودة التكييف .
3- أهم حاجه بقى قطع الغيار كانت صعبه جداً أول ما إشترتها لأنها من النوادر ومش رخيصه بس بعد فترة من السؤال عرفت قطع غيارها فين وعند مين وإيه موجود وإيه إنسى مش موجود ... بالمجل لو لقيت حد معاه سنتامو تانيه تجرى عليه وتاخد رقم تليفونه وتضرب معاه صحوبية هتحتاجوا بعض .

خلاصة القول السيارة هيونداى سنتامو تعتبر سيارة العشق الممنوع عمليه جداً وممتعه ومريحه لكن قطع غيرها قليل بس موجوده بالإضافة إنها مُكلفة بس مُعمره الشئ ونقيضه .... وللقول بقية