حصريا :هيونداى سولاريس 2016 الجديدة من هيونداى

[Samah AbdAllah]

هيونداى سولاريس 2016

شكر خاص للمتميز AHMEDCAR

هيونداى سولاريس بديلة اكسنت ار بى
وتم تصنيعها في مصنع هيونداى بروسيا

مواصفات السيارة

تتميز السيارة بمحرك رباعي الاسطوانات سعة 1.4 لتر بقوة 107 حصان

ومحرك السيارة متصل بناقل حركة أوتوماتيكي رباعي السرعات كتجهيز أساسي لكل فئات السيارة

أما بالنسبة لعناصر الأمان في السيارة، فتأتي سيارة هيونداي سولاريس الجديدة مزودة بنظام فرامل مانعة للانغلاق ABS ووسادتين هوائيتين للسائق والراكب الأمامي بالسيارة كتجهيز أساسي لكل فئات السيارة.

العربية نازلة بفئتين الاولى بـ 145 الف جنيه
والثانية بـ 150 الف جنيه

[osama_ruan]

سعرها يجنن وهية هية الاكسنت مع فيس ليفت وماتور اقل هيونداي عدت خلاص مابقتش بتاعة الفئة الوسط ودة كان اهم حاجة بتميزها

[bassemali]

يعني أكسنت بس بموتور أصغر ومتجمعه ف روسيا مش كوري اصلي وب 145 الف !!!!!!!!!!
السياز والأوبترا الجديده والبيجو 301 جننوا غبور

[midoegypt2016]

موضوع جميل ومجهود رائع تسلم عليه اخى العزيز وانا كنت ناوى ان شاء الله على العربيه دى بس النسخه الهاتشباك بس بعد اما شوفت الموضوع بقيت محتار بين السيدان والهاتشباك ؟
وفى حاجه انا لحظت انهم كاتبين ان الزجاج ملون وفى الحقيقه هو عادى يعنى دى بتفرق فى السعر وكده ولا لا
ويهمنى اعرف رائيك فى العربيه هل تعتبر صفقه كويسه وكمان موضوع انها لسه جديده على مصر

[ابو ياسمين]

شكرا للتقرير الجميل وفى انتظار المزيد من التقارير الجميلة

[eljafari]

هي الصور دي من مصر وجديدة؟ اكيد!!

على فكرة السوليروس ماهي الا الاكسنت مصنع روسيا وشغال من 2010

المكنة دي بطلت تنزل في الاكسنت الكوري ال 1.4 من اول موديل 2015 وغيروها بواحدة تانية هي والجير بتاعها (كان جاما 1.4 وبقا كابا 1.4)
لو مش مصدقني ادخل على موقع هونداي worldwide وشوف مواصفات الاكسنت

بس دي نفس مكنة الريو ولسه بتنزل بيها

صراحة السعر مبالغ فيه جدا جدا خاصة ان العربية ارخص من الاكسنت الكوري في بلدها وبما انها اوروبي فجمركها اقل بكتير من الكوري

مش هقول حاجة على العربية لانها اكيد كويسة بس سعرها مبالغ فيه جدا جدا جدا

[mohamed yehia8]

العربية معايا وما شاء الله ممتازة وماشي بيها 3100 كيلو وكل اللي جابوها بيشكروا فيها

[mohamed yehia8]

تقرير بعد تجربة 3000 كيلو سولاريس اول فئة:
هيونداي سولاريس موتورها 1400 CC وقوته 107 حصان يعني موتور قوي وفي عربيات 1600 CC نفس الاحصنة او اكتر شوية او اقل وده احسن لتوفير البنزين
السحب: سحب العربية جميل والكيك داون بيسعفك وقت الزنقة وسحبها ناعم والنقلات سلسة بس في ناس حست انها تقيلة قبل سرعة 60 كم/ساعة بس ده طبيعي لو مش دايس بنزين اوي من الاخر العربية جراية
الارتفاع عن الارض: العربية عالية عن الارض والحمد لله محكتش معايا في مطبات حتى المطبات الغبية وكمان لما تكون العربية محملة مش بتحس انها نزلت او بقت منخفضة على الارض
الشنطة: واسعة ما شاء الله وتشيل كتير
الكشافات: نورها واضح وبتوضحلك الطريق كويس وكمان ممكن تتحكم في ارتفاعها
فوانيس الشبورة: أمامية وخلفية والامامية شغالة طول الوقت حتى بالنهار كاضاءة نهارية والناس كل شوية تقولي اقفل النور
العفشة: مريحة في الطرق المكسرة والمطبات
الموتور: صوته هادي كعادة هيونداي
الباور: خفيف على السرعات الخفيفة وبيتقل على السرعات وسلس في المناورة وهو زيت مش كهرباء
التقفيل: ممتاز
الفرامل: ممتازة وال ABS ممتاز
الخامات الداخلية: بلاستيك وجلد
الفرش: الفرش نظيف كخامات وتقفيل
التصميم: شبابي سواء الشكل الخارجي او التابلوه الداخلي
الاوبشنز: البلوتوث مفيد جدا في الرد على المكالمات في السواقة بس كنت اتمنى انه يدخل على ال contacts علشان يجيب اسم المتصل مش رقمه بس و السماعات عددها 4 سماعات وصوتهم عالي ونقي والكاسيت فيه USB و AUX
التكييف: مجربتوش كتير علشان الجو برد بس هواه قوي واكيد تبريده هيكون كويس زي الكوري
مساحات التخزين كتيرة
في عازل للكبوت والشنطة من جوه
فيه في الشنطة مكان على الشمال فيه حزام علشان تجمع فيه طفاية الحريق وشنطة الاسعافات بدل ما يقرفوك في الشنطة
الثبات: حلو انا جربتها لحد 140 كانت ثابتة بس الطريق مساعدنيش امشي اكتر من كده بس في ناس من الملاك جربوها على 160 و 170 وكانوا مبسوطين منها
كمبيوتر الرحلات: مفيد ووظائفة سهل الوصول اليها وكمان في اظهار لدرجة الحرارة الخارجية
بها مخرج كهرباء 12 فولت غير الولاعة يعني مخرجين كهرباء
في مصدرين اضاءة في السقف واحد للركاب الاماميين والثاني في نص السقف للركاب الخلفيين
العدادات واضحة والنور الابيض بتاعها مريح للعين الصبح وبالليل
المرايات كاشفة الطريق كويس

العيوب: مش مؤثرة
١- الريموت بيفتح الابواب بس ومش بيفتح الشنطة وده اتحل في الفئة الثانسة بس للاسف مكنتش نزلت لما كنت بشتري
٢- بحس بمكنة الباور لما بلف الدريكسيون وانا واقف ودايس فرامل
باختصار العربية صفقة رابحة
٣- عدم وجود مسند يد
٤- عدم وجود حساسات ركن

من الاخر العربية صفقة رابحة ما شاء الله

[blackgold2010]

هيونداى سولاريس عربيه جميله جدا ومحترمه انا لسه شاريها وعامل بيها 1000 كيلو

[malkawy]

انا معايه العربيه ومريحانى جدا وهاديه ومبسوط بيها اوى والحمد لله

[malkawy]

بس كان عندى استفسار بالنسبه لفوانيس الشبور هيا بتشتغل عند الناس كلها الصبح وبليل عادى ؟

[blackgold2010]

انا عندى فوانيس الشبوره بتشتغل الصبح بس

[Omar Sarray]

اشكر تقديم تقريرك الجميل تقبل مرورى