بخصوص ثبات النيو اكسنت

[semihuman]

ياجماعه عندي استفسار
معظم الناس بتقول الاكسنت مش ثابته
عندي سؤالين
1-الثبات بيقل قوي من سرعه كام؟
2-لو ركبت جنوط 15 هل ده هيساعد بفرق ملحوظ في تدعيم ثباتها
ياريت اهل الخبره يقوللنا

[حماده المصري]

عموما عندي قبل الجنط كانت بتخف على 160

وبعد الجنط ال 15 بقت احسن شويه بس كده كده هي خفيفه خصوصا بعد 160

والعربيه عامه مشكله كبيره فيها انها بتنطط خصوصا لو في ناس راكبه في الكنبه الخلفيه

بس هي بالنسبه لفئتها كويسه جدا

انت المفروض تختار الاماكن الي تجري فيها

[medhat_79]

ييا جماعة ربنا يكرمك حد يرد علينا ولو حد يعرف اى معلومة مفيدة عن النيو اكسنت يقولها لانى بفكر اشتريها وحتاج حد يقولى راى فيها وعايز اعرف اخبار الفتيس الاتومتييك بتعها اية اخبارة

[semihuman]

معروف ان الاكسنت خفيفه
بس بعد 160بتخف دا كده هي تعتبر ثباتها كويس(وجهه نظر)
يعني ممكن حد يقرنها بالياريس او الافيو عشان هي نفس الفئه او حتي بالهوندا سيتي
بس لسه بردو مش عارفيه يعني ممكن الواحد ياخد بيها غرز علي سرعه كام 80ولا 100؟ و شكرا

[semihuman]

انا لاحظت ان الاستاذ حماده المصري غير راضي عن النيو اكسنت
فمكن تقولنا ليه ؟
مع ان مفيش اي عربيه فيها الامكانيات دي بالسعر ده
مثلا
الافيو تمنها حوالي 77الف بس تقفيل مصري و ماتورها اضعف بكتير و بتسحب بنزين
الياريس مثلا 87الف وفاضيه طبها هي احسن بس في فرق كبير في السعر
الصني تمنها 86الف فعلا العربيه بجد تحفه و احسن من النيو اكسنت خصوصا لناحيه المتانه بس للاسف بتسحب بنزين بطريقه غير منطقيه وده من خلال قرائتي من كل الناس
(طبعا الصني فئه مختلفه عن الاكسنت بس انا بقارن بالسعر)
ودي مشكله خلتني اغير تفكيري
احسن عربيه في الفئه دي هي الهوندا سيتي بجد تحفه
يعيبها بس انها غاليه في قطع الغيار
بس من ناحيه الوسع ياخرابي زي الماتريكس
واستهلاك البنزين تحفه
بس للاسف مش موجوده في المعارض عشان موديل 2009 هينزل
من الاخر هي الاكسنت
تمنها 79الف ارخص من الصني 6الاف جنيه يكفوني تأمين و سنتين بنزين shine[1]:
فايه رايكم و محتاج اعرف راي الاستاذ حماده كمان

[pharonicking]

انتوا ازاى بتقارنوا اليارس اللى هيا يابانى 100% بعربية كورى
""وطبعا فيه فرق كبيييييييير بين الكورى واليابانى"
واللى ميعرفش وبيقول الاتنين زى بعض ""
يبقى ميعرفش فى العربيات""

[حماده المصري]

عموما العربيه عفشتها غير مريحه خصوصا للركاب الي ورا

صحيح انها كويسه في الثبات والعمليه

بس مش منظر تمشي بعربيه بتتنطط لو فيها 4 ركاب بس بعد الجنط اتزبطت شويه

وهي عامه من ركوب 2 او 3 بتبقى زي الفل وخصوصا لو بجنط بيبقىة ثباتها تحفه بالنسبه للفئه الي هي فيها


ولو كان على المشي ف السيتي مشيها حلوه ومريحه وكمان الافيو وكمان الجين تو

اليارس وراي شخصي واتمنى محدش ينافشني فيه (عربيه ضايعه من كله خصوصا السعر)


انما الاكسنت تسارعها جاااامد جامد جامد

وانا استعمالي قاسي للعربيه وهي حلوه بس العفشه الناشفه بتتكسر من كتر المطبات

4 مساعدين مغيرهم مرتين في خلال 120 الف كيلو ومغير مقصين وبارات وتيش مره وحده والعربيه موديل 2006
واسعار قطع غيار ناااار واغلى من عربيات اعلى في الفئه منها
---------------------

بالنسبه للاستاذ الي عايز يشتري الصني ف الصني اوسع واكتر عمليه

وزييد على كده ان الصني قطع غيارها المعمره ارخص بكتييير من الاكسنت

وممكن تبصوا على قطع غيار الصني في القسم الياباني

انما قطع الغيار العاديه زي الفلاتر و الكلام ده الصني اغلى من الاكسنت

والصني ان مكانتش اثبت من الاكسنت فهي اكييد اريح منها في المشي الطبيعي

-------------------

على فكره يا جماعه

الراحه في عربيات معينه بتبقى على حساب الثبات زي الكرولا

واحيانا بيبقى العكس الاكسنت والانترا ثبااات عااالي مقابل راحه اقل

في عربيات بتجمع بين العربيات العفشه الناعمه وبين الثبات

زي المازدا والهوندا وعربيات اعلى شويه من الاكسنت والصني والكرولا

[حماده المصري]

وللامانه في صديق ليا جاب جين تو اول ما نزلت 06

واتقلب بيها وجاب صنى المصري زيرو 6 رشهور كان بايع العربيه جاب جين تو 08 زيرو بساله ليه قالي باللفظ لوتس دي شركه محترمه

[حماده المصري]

ولما اتقلب كان ماشي 210 على وادي النطرون وكاوتش اتفك من العربيه

ووهو بيشكر في ثباتها جداااا وبيقول الصنى مش اثبت من الجين

بس رايي ان الجين هتبقى اقل راحه من الصني

[M.Osman]

انتوا ازاى بتقارنوا اليارس اللى هيا يابانى 100% بعربية كورى
""وطبعا فيه فرق كبيييييييير بين الكورى واليابانى"
واللى ميعرفش وبيقول الاتنين زى بعض ""
يبقى ميعرفش فى العربيات""

طب ممكن حضرتك تفهم الناس اللى مبتفهمش ...

[ahmedsiyam]

السلام عليكم

الاخ الفاضل صاحب الموضوع

انا هارد عليك فيما يخص ثبات النيو اكسنت
انا لسه مجرب عربية واحد صديقى بنفسى و سوقتها زيى ماباسوق عربيتى الجين 2
وجدت التالى :
التسارع - النيو اكسنت تحفة فعلا و تتفوق على الجين 2 و موتورها زيى الفل و ناعم و جميل جدا جدا
الثبات - ممتازة و لكن الجين 2 اثبت منها على السرعات العالية

باختصار عربية فى الثبات جميلة جدا وانا جبت بيها 140 شايفها معقولة جدا جدا و ثابته ماشاء الله و فراملها حاضرة و جاهزة

[rock828]

انتوا ازاى بتقارنوا اليارس اللى هيا يابانى 100% بعربية كورى
""وطبعا فيه فرق كبيييييييير بين الكورى واليابانى"
واللى ميعرفش وبيقول الاتنين زى بعض ""
يبقى ميعرفش فى العربيات""

عقدة الياباني


المفروض لما نيجي نقارن يكون في امكانيات العربية
مش عشان دي ياباني ودي كوري يبقا الياباني احسن
العربيات الكوري ناجحة جدا ويمكن اكتر من الياباني

ورأيي انا كمان ان الاكسنت احسن من الياريس ومتتقارنش بيها اصلن

[semihuman]

تعجبني يا روك والله
فعلا كل عربيه و ليها ظروفها
ممكن تبقي الماني و فاشله
وممكن تبقي كوري و تحفه
العربيه الوحيده الي عمري ما شوفتها ناجحه هي الصيني هاهاها

[SAMEHNOSHI]

معلشى يا جماعة الياريس عربية محترمة و متينة و محدش يقدر ينكر دة, لكن عيبها بس ان سعرها اغلى من امكانيتها, يعنى التوكيل مخلى سعرها مبالغ فية شوية ... لا مش شوية قصدى كتيرجدا خصوصا بعد اسعارها الجديدة لسنة 2009 اللى ارتها فى المنتدى هنا فى قسم التيوتا, يا ريت تدخلوا تشفوا اسعرها الجديدة بنفسكم!!! لو كانت الاسعار دى صحيحة يبقى نقدر نقول انها عربية يابانى و متينة جدا و عملية بس باسعرها المبالغ فيها دى يبقى النيو اكسنت بسعرها الحالى اكيد احسن منها بكتيرو خصوصا ان الهيونداى فعلا اطور جامد عن زمان و الكورى قرب اوى من اليابانى و انا معايا جتز و عامل بيها 47,000 الف كيلو و العربية زى الفل لغاية دلوقتى و عمرى ما اشتكيت منها فى حاجة