استفسارات هامة في صيانة الفيرنا

[مصري المصري]

السلام عليكم ورحمة الله اخوانا الفرناوية محتاج مساعدتكم في شوية استفسارات في الفيرنا الماتور الأسود واحد كامة 12 صباب
الاستفسار الأول: إزاي أحل سير طلمبة الباور وازاي أرجعه مكانه تاني عندي ونه في صوت المحرك وشاكك إنه يكون من بلية الباور فعاوز اشيل السير علشان اتأكد ولو كانت بلية طلمبة الباور هل بتتغير ورقم البلية كام بالظبط؟
الاستفسار الثاني: العربية أحيانا بتتاميل مني يمين وشمال من الإمام عند الفرملة الشديدة أو المفاجئة مع صرير قوي وزحف وريحة من الكاوتشات!!! إيه السبب؟ وما العمل؟
الاستفسار الثالث: عن أنسب زيت للفيرنا 1500cc الماتور الأسود واحد كامة 12 صباب بس عن خبرة وتجربة العربية ماشيه 140 الف؛ بس محدش يقولي شل الأصفر لأني لسه حاطه ومخلي صوت الماتور عالي جدا وبتنعر وحاسس إن نسبة البخر فيه عاليه حبه وهل يا ترى حد جرب زيت التعاون اللي درجته sm وهل هو تخليقي بالكامل ولا نصف تخليقي؟
الاستفسار الرابع: عن دواسة البنزين تقيله حبتين ثلاثة ونضفت البوابه وزيتها ورخيت الوير شويه وبرضو زي ما هي تقيله!! أحيانا بدوس فتعصلج شويه ومع الضغط سنتين تفك بس العربية تنط مني فأيه السبب؟! وإيه الحل ياترى؟!
الاستفسار الخامس: بخصوص مية التبريد أيهما أفضل الحمرا ولا الخضرا وأيه أفضل نوع أو المعقول عل الأقل وهل لابد الدورة تبقى كلها من الميه دي ولا ممكن تتكسر بميه مقطرة أو من التكييف أو من الفلتر عالي الجوده؟! وأيه أنسب طريقه لتنظيف دورة التبريد لأني لون الميه بني ومرغي شويه بس من غير ما افك الراديتير لأنه متفكش من قبل ولأني مش بحب طبقة السليكون اللي بيحطها الصنايعية عند تقفيل الراديتير بعد التسليك؟!
شاكر لأفضالكم وسعة صدركم ومستني منكم إجاباتكم الموثوقة واللي عن خبره وتجربه وعلم ربنا يبارك فيكم.

[مصري المصري]

يا مسهل يارب
يسر يارب ولا تعسر

[مصري المصري]

على العموم يا إخونا طالما مفيش رد من حضراتكم الكرام أوي أوي قلت أثقف نفسي بنفسي واجتهد على قدر استطاعتي في مسألة الكلام المفيد في الاستفسارات اللي طرحتها عليكم

[مصري المصري]

حل وربط سير الباور في الفيرنا

طبعا لأن زكاة العلم المفيد هي نشره وليس كتمه فسأخبر حضراتكم باللي توصلت له وأجري على الله ☝.
بالنسبة للاستفسار الأول فاللي عرفته وطبقته بنفسي إن ارخاء سير الباور وحله وشده وربطه بيكون من مسمارين في قاعدة ماسكة طلمبة الباور ومثبتاها بجسم المحرك مسمار بيبقى من فوق ورا طنبورة طلمبة الباور وواحد من تحت من ظهر الطلمبة بيتفكوا بمفتاح رقم 12 بس لازم يكون أصلي علشان ميبريش راس المسامير؛ بتهوي المسمارين دول شويه بعد كده بتبقى الطلمبة متاحة للتحرك للخلف وللأمام وبكدا ممكن ترخي السير وتطلعه كمان.
فك المسمارين دول بيكون عكس بعضهم وربطهم بيكون بالتالي عكس بعضهم
في الفيرنا 1500 طلمبة الباور بتكون في ظهر المحرك من عل يمين السائق من ناحية صدر العربية وفك المسمار اللي فوق بيكون ناحية صدر العربية لجوه وربطه بيكون ناحية وجه العربية والمراوح والراديتير
والمسمار اللي تحت في ظهر الطلمبة بيقى العكس في الحل والربط.
وفي الفيرنا 1600 طلمبة الباور بتبقى من قدام من عل يمين السائق وراء المروحة والراديتير.
طبعا علشان تربط الطلمبة بتاعت الباور بعد فكها بتلاحظ الأتي
* بترجع السير مكانه عل الطنابير أو بتستبدله لو هو تعبان وقديم
* هتحتاج لقضيب مفتاح أو سيخ علشان تدقر بيه الطلمبة بجسم المحرك علشان السير يتشد معاك واتخلي بالك إنك تشد السير شده معقوله بحيث إنه لا يكون مشدود أوي فوارد مع الزمن إنه يتقطع أو يحمل عل الطلمبة وبلي الرولمان اللي فيها ولا ترخيه أوي فيقع من عل الطنابير بتاعته ودي تبقى كارثة لإنه ده لا قدر الله لو وقع إنت وسايق هيوقف منظومة الباور والدركسيون هيبقى حجر زي الجبل ويصعب معاه التوجيه تخيل لو ده حصل معاك لا قدر الله في حالة تخطي اثناء القيادة

[مصري المصري]

تابع.....
* ارتخاء السير زيادة عن المطلوب بيترتب عليه إما إن السير يقع من عل الطنابير ودا يبقى كارثة
أو إنه عل أقل الأحوال يعمل صفير وزنه سيما مع بداية التشغيل
وخير الامور في شد سير الباور إنه يكون وسط ومعقول لاهو شادد اوي فيحمل عل الطلمبة وبليتها أو يتقطع ولا هو مرخي فيقع من عل الطنابير أو يعمل صفير وزنه والعربية أصلا مش مستحمله زن بسبب ضعف العزل أصلا
* بعد ما تتأكد إن شد السير معقول إنت وداقر الطلمبة بقضيب حديد أو مفتاح في جسم المحرك تبتدي تربط المسامير عكس الفك وتتأكد إن المسمارين مربوطين كويس علشان الطلمبة ما تحركش من مكانه تاني بس مش معنى كده إنك تنتقم من المسامير لحد ما يقتلو ويصعب فكهم مرة اخرى أو يتفكفوا بصعوبة بعد بري رؤسهم.
بعد كده شغل وجرب لاقيت الدنيا تمام احمد ربنا الدنيا مش مظبوطه فك وظبط من أول وجديد لحد ما توصل للنتيجه المطلوبة.

[مصري المصري]

دا مبلغي من العلم في المسألة دي ولو فيه حاجه عاوزه تتصحح أو فيه تعليق أو إفاده فمتبخلوش علينا والدال على الخير كفاعله
والسلام عليكم