سؤال مهم عن فترة التليين للسيارة ؟

[Tarek Fadl]

السلام عليكم ورحمة الله وبركاته
انا لما استلمت العربية قعدت لغاية 300 كم ماشي بها واحدة واحدة ومعدتش ال كم خالص وكنت بريحها قوي في الغيارات
لكن لما جيت مسافر بها من القاهرة لمرسي علم عشان شغلي الحقيقة مقدرتش اقاوم وجريت بها بس مش قوي يعني لغاية 130 كم وبعد كدة كنت بمسك نفسي وكمان كنت مشغل التكييف لان الجو كان حر جدا
1 - كنت عاوز اعرف ايه التاثير السلبي اللي ممكن يحصل للعربية وازاي اقدر اتلافاه ؟
2 - لغاية امتي تفضل في فترة التليين خصوصا انها دلوقتي عاملة 1000 كم
شكرا مقدما علي الردود والسلام عليكم ورحمة الله وبركاته

[Tarek Fadl]

عفوا معدتش ال 80 كم خالص في اول 300 كم

[ايهاب]

من 80-100 كم/ساعة---في اول 1000كم

[Nader]

اول حاجة وصولك لـ130 كيلو قبل الـ1000 الاولى دي كانت غلطة، بس المهم انك متنش مشيت على السرعة دي لمسافة "قليلة مش كبيرة كمان".

تاني حاجة تشغيل التكيف قبل الـ1000 كانت غلطة تانية.

لأن انت كدة بتقلل من عمر الموتور، اما كون انك عديت الـ1000 كيلو فانت كدة خلصت التلين، يعني خد رحتك "بس بالتدريج".

[temoo_110]

طيب يا استاذ نادر انا سافرت مصر وهيا تحت التليين بس ما عدتش ال80 بس مشيتبال 80 فترات كبيرة دى فيها مشكلة

[Nader]

لأ مفيش مشكلة بس حاول بعد كدة انك متمشيش على سرعة ثابتة لفترة طويلة حتى بعد التلين يعني اطلع شوية على 90 وانزل على 70 وكدة.

[temoo_110]

تمام انا كنت بعمل كده وانا انا رايح القاهرة انما وانا نازل كنت مستعجل جدا وغصب عنى انى كنت مثبت السرعة على 80 ومتشكر جدا على الرد

[Nader]

انت تأمر :)

[temoo_110]

الامر بالله يا نادر باشا بجد انت المفروض تمسك مهندس المنتدى لسرعة ردك ولردودك الرائعة

[Tarek Fadl]

طيب يا استاذ نادر يا ريت تقول لي ازاي اقدر اتلافي اي مشكلة حصلت بسبب عدم التزامي بالسرعة المحددة لفترة التليين او بسبب تشغيلي للتكييف وايه المشاكل اللي ممكن تقابلني في العربية عشان ابقي عارفها

[Nader]

الممكن تظهر بس على المدى الطويل وعلى حسب طول الفترة اللى انت ضغط فيها على الموتور يعني انت اخدت الـ1000 الاولاني كلة جري؟؟،للحفاظ على عربيتك وتلافي ظهور مشاكل في الموتور على المدى الطويل خليك دقيق في تغير زيت الماتور والفلتر.

[Tarek Fadl]

لا انا اخذت حوالي 500 كم علي سرعة من 110 الي 130 مع التكييف
وعموما الف شكر علي ردك السريع وجزاك الله خير

[Salah_sr]

سيدي لا تقلق إن شاء الله مفيش أي مشكلة أولا أنا أدعو كل شخص قبل قيادة عربية جديدة قراءة دليل الإستخدام الخاص بالعربية و لن يكون هناك أحرص و أعلم من صانع العربية بها بالنسبة للألنترا لا يوجد سرعة معينة للتلين ولكن يشترط الصانع ألا يرتفع ال RPM عن 3000 دورة في الدقيقة و ألا تسير العربية فترة طويلة علي سرعة ثابتة وهذا في الألف الأول و لا يوجد أي محازير علي إستخدام المكيف من أول كيلو و لكن يجب أن تعلم إنك تنتهي فترة التلين ليس فقط بعد الألف ولكن أيضا بتغير الزيت و اللفلتر يعني لازم تغير الزيت و الفلتر علشان تكون عديت فترة التلين و علي فكرة كانت نفس الكلام بالنسبة لللانسر أما البيجو 307 مفيهاش تلين و تغير الزيت عند 15 ألف و الأوبترا أعتقد (مش متأكد ) إن تغير الزيت عند 5000 كيلو و بالنسبة اللتكيف مفيش حد بيشتري عربية جديدة في الخليج و ينتظر ألف كيلو ( حيكون فطس )المهم لا تقلق و ربنا يطول لك في عمر العربية

[A.ELgamaL]

علي فكره التليين ده موضوع قديم عفي عليه الزمن و العربيات كلها بتيجي ملينه من المصنع

[ahmed1981]

علي فكره التليين ده موضوع قديم عفي عليه الزمن و العربيات كلها بتيجي ملينه من المصنع

العربيات فعلا بتيجي من المصنع متلينة
ولكن :!: :!: :!:
بتبقى متلينة على الواقف فلابد الواحد يلين برضه بالتدريج وهو ماشي