الي مالكي الفيرنا سؤال بخصوص العفشة و الطنابير؟؟؟؟

[mostafabakry]

السلام عليكم جميعا

يا ريت يا جماعة حد يساعدني و يرد عليا
انا بفكر في شراء فيرنا 1600 بس سمعت من اكتر من واحد ان العربية عفشتها وحشة خالص و بتبوظ بسرعة خاصة و نتوا عارفين ان شوارعنا كلها مطبات و حفر و نقر و ترع كمان
و البعض قاللي ان العربية فيها عيب في طنابير الفرامل
بس بصراحة كل اللي قال كدا معندوش فيرنا بس بيقول انه له اصحاب معاهم فيرنا و بيشتكوا منها
يا ريت حد يرد عليا و يقولي ان الكلام دا صح ولا غلط
بصراحة العربية داخله دماغي جدا و شكلها مقبول بالنسبة لي خصوصا ان سعرها كويس خالص

شكرا

[bishoo33]

لو الكلام ده صح ماكنتش تلاقى فى كل شارع على الأقل سيارة فيرنا وجرب تنزل تشترى فيرنا كاملة 1600 مش حتعرف وده أكبر دليل على انها سيارة كويسه يعيبها فقط من وجهه نظرى انها ضيقه من الخلف اضيق من اللانوس ولكن موتور ولا يا ولا وعزم جبار بالنسبه لحجمها الفيرنا best value بالنسبه لفئتها السعريه وأحلى من الأفيو الأغلى بحوالى 6000 جنيه وكلام فى سرك الحق دور على واحده 1600 كاملة عشان أنا سامع ان انكل غبور بيفكر يستبدلها بالفيفا الهندى ويركز فى الكبير الألنترا والسوناتا
وربنا يوفقك فيما هو خير لك

[Ahmed_Ezz]

بالعكس العفشة اكتر من ممتازة و الطنابير مافيهاش اى مشكلة و الموتور جبار
عن تجربتى مش حتندم و ربنا يوفأك ان شاء الله فى ال 1600.

[bassam nagy]

لو الكلام ده صح ماكنتش تلاقى فى كل شارع على الأقل سيارة فيرنا وجرب تنزل تشترى فيرنا كاملة 1600 مش حتعرف وده أكبر دليل على انها سيارة كويسه

كلامك مظبوط ياستاذ محمد

[mostafabakry]

اولا شكرا لكم جدا يا جماعة علي ردودكم المقنعة
انا فعلا كنت مستغرب الكلام دا و مش مصدقة و خاصة ان عندنا في الغردقة التاكسي كله فيرنا و بتجري في الشوارع زي الصواريخ

شكرا لكم

[mtema99]

يا جدعان كلمه كويسه او وحشه ديه بتبقى بالمقارنه بمن حولها

[mostafabakry]

مش فاهم قصد حضرتك ايه يا استاذ matema99
ممكن توضح
:?:

[mtema99]

يعني مينفعش اننا نقيم عربيه بمفردها
لازم نقيمها بالمقارنه بكل اللي معاها في نفس الفئه و مش قصدي الفئه السعريه
لازم نقيمها مع اللي معاها فالفئه بتاعتها من نحيه الجوده و قلت العيوب و السعر و اسعار ما بعد البيع و جوده خدمه ما بعد البيع و الوكيل و سمعته في مصر و التكنولوجيا و كله عشان نعرف بالظبط مكان العربيه و تصنفها في الفئه بتاعتها

[mostafabakry]

يا باشا احنا دلوقتي مش بنقيم العربية
انا فعلا قيمتها مع مثيلاتها زي الدايو و الآسبيرانزا لقيت انها افضلم من وجهة نظري الشخصية ممكن حضرتك تختلف معايا في كدا
و لكن سؤالي كان اني سمعت من اكتر من واحد ان الناس بشتكي من ضعف عفشتها و في مشكلة في الطنابير بتاعتها و بصراحة اللي قالوا الكلام دا لا يملكوا فيرنا و لكن سمعوا ايضا الكلام ايضا من ناس تانية
انا كنت بتاكد من اصحاب الفيرنا هنا في المنتدي و ما حدش بيشتكي منها في الموضوع دا
الغريب ان الناس في المنتدي بتشتكي من الزوايا و انا ما سمعتش بره حد بيشتكي منها ؟؟؟؟؟؟؟؟؟؟؟؟؟

انا شاكر جدا لحضرتك لردك و اهتمامك و لكم مني كل التقدير

[Ahmed Anwer]

لأ حضرتك ، بإختصار الفيرنا عيبها الوحيد ثباتها و ده طبيعي في الفئة بتاعتها حتي الياريس و اللانسر خفاف
و بتتحل لما تجنط
هيا يعني مش خفيفة ، الخفة اللي تقلقل بس تسوق بالعقل وانا سافرت بيها و كانت مريحة جدا و ممتعة
بخصوص العفشة و الطنابير ، معنديش خلفية في الحكاية دي اوي عشان العربية لسه جديدة بس لما جيت اشتريها سألت مهندس عنده مركز صيانة في الحرفيين قاللي عكس الكلام ده بالعكس قال انشف و اقدر علي التحمل من اللانوس و الله اعلم

[mtema99]

لأ حضرتك ، بإختصار الفيرنا عيبها الوحيد ثباتها و ده طبيعي في الفئة بتاعتها حتي الياريس و اللانسر خفاف
و بتتحل لما تجنط
هيا يعني مش خفيفة ، الخفة اللي تقلقل بس تسوق بالعقل وانا سافرت بيها و كانت مريحة جدا و ممتعة
بخصوص العفشة و الطنابير ، معنديش خلفية في الحكاية دي اوي عشان العربية لسه جديدة بس لما جيت اشتريها سألت مهندس عنده مركز صيانة في الحرفيين قاللي عكس الكلام ده بالعكس قال انشف و اقدر علي التحمل من اللانوس و الله اعلم

صح كلامك

[analyzer]

السلام عليكم
استاذ مصطفى / الرد هدللك عليه بكلمتين صغيرين جدا
انا عندى فيرنا ومشغلها ايجار .
العربيه عمرها ما ا شتكت من العفشه ولا الطنابير مع انها بيركبها كل يوم واحد مختلف وطبعا بيطلع عنيها ومبيهموش ولا مطباط ولا انه يطير من على الارض ويدوس فرامل
باخنصار شديد دى اشاعه مؤاكده .
ارجوا ان اكون افادتك

[Ahmed Anwer]

بص يا أ/مصطفي هاقلوك نصيحة مفيدة جدا ،انا عملتها لما جيت اشتري
نايل موتورز موقع ممتاز و مليان ملاك فيرنا ، حضرتك اعمل بحث علي كلمة فيرنا في الموقع هيطلعلك نتايج كتيرة جدا ، لو فاضي اقراها بس ركز علي الكلام اللي كاتبه اصحاب السيارة و برده الفيرنا اكتر من الرز اسأل أصحابها
بس خاللي بالك الحكاية دي ممكن تزيد ترددك عشان هتقري هنا علي الموقع تجارب و خبرات و مشاكل للفيرنا ممكن تخوفك
بالنسبة ليا ، الحكاية دي ادتني صورة اكتر من 90% عن العربية قبل ما اشتريها

[mostafabakry]

شكرا جدا لكم يا جماعة و الله مش عارف اقول ايه بصراحة كلام جميل و مفيد
شكرا لكل من رد علي استفساري
جزاكم الله خيرا

[مهندس محمد صلاح]

ده من اهم ميزات الفرنا عفشتها .. جرب تمشى فى حته دوشه قوى وتقفل القزاز وقول لى حتحس بايه .. جرب وانت على الصحراوى وفاتح وقافل القزاز قول لى سامع ايه .. ولا صوت داخل لك جوه وده ان دل على شىء يدل على تقفيل العفشة الممتاز.. وبالنسبة للطنابير الملاحظة الوحيدة عندى انها بتسخن جدا مش عارف ليه .. العربية ممتازة وموتورها اوعى وشك