چيتز ٢٠٠٩

[matta]

ياجماعة عندي سؤال عن الچيتز أنا نفسي أجيبها
أنا لسة جديد سواقة فهل العربية مناسبة ولا لأ وفي ناس خوفتني أني هي خفيفة :وزن يعني ومش عملية وقالي هات بيكانتو بس أنا مش عارف كمان قال لي أنه الچيتز هيوقفوا تصنيعها خوفت قوي من كلامة أنا محتاج رأيكم بسرعة لأني هاشتري قريب جداً جداً كمان كام يوم كده

[meshmeshahanem]

انا حجزت العربيه ودفعت فلوسها الحمد لله النهارده جيتز اتوماتيك كحلي
وانا مكدبش عليك انا مركبتهاش قبل كده وكنت قلقانا منها بس الحمد لله استخرت ربنا وربنا وجهني ليها
انا اللي عرفتوا عنها في موضوع الثبات انها ثابته لحد 140 وبما انك لسه جديد فالسواقه فأنت مش حتجري بيها ولا حتجيب اكتر من 140
وبعدين البيكانتو 1100 cc لكن الجيتز 1600cc فالمقرنه بينهم مش عادله
ولو قارنت حتكون النتيجه لصالح الجيتز لأنها اكبر حجما واقوي ماتورا وأمكانيتها اعلي وغير كده انا شايفه ان البيكانتو مبالغ في سعرها جدا
بعدين انت لازم تعرف انت عيزها عربيه عيله ولا ليك لوحدك, حتسافر بيها ولا لأ المبلغ اللي انت محدده كل دي اسئله لازم الاجابه عليها عشان تعرف تاخد القرار
يارب اكون عرفت اوضحلك الامور شويه

[matta]

أنا متشكر قوي قوي علي الرد السريع ومبروك العربية وربنايباركلك فيه ويحفظك
أنا لسه متجوز بقالي ٦ شهور ومشواري من حلوان لمصر الجديدة يومياً تقريباً يعني حوالي ٨٠ كيلو رايح جاي، نفسي أعرف لو في حد يعرف إستهلاكها للبنزين وقطع الغيار والصيانة يقول و متشكر قوي قوي

[matta]

ياجماعة هو ليه مفيش حد بيرد علي أنا نفسي أعرف

[mab]

انا معايا جيتز 2006 1600
بصراحة العربية جميلة جدا

العربية سريعة جدا
واستهلاكها فى البنزين معقول جدا
والتسارع رائع
وانا مزودتش عن 120 عشان اعرف موضوع الثبات ده
العربية فيها مميزات السيدان من حيث الموتور القوى وواسعة جدا من جوه
ومميزات الهاتشباك من حيث سهولة الركن والمناورة فى الزحمة
وان كنت ارى ان كفاية قوى ان اموتور يكون 1300 وترخص شوية

[mhmdsfwt]

طب اخبار قطع الغيار ايه
اسعارها عاملة ايه

[bmw323]

توكل على الله كل ألى ركبوا الجيتز بيشكرو فيها مترميش ودانك لحد وصلى ركعتين استخارة وتوكل على الله

[mahmoud19]

انا عاوز اعرف سعر البيكانتو هو المبالغ فيه ولا الجيتز بما انها عربيه هاتباك وفوق ال70000جنيه
دا ممكن الواحد يجيب عربيات سيدان كتيير بالسعر ده على فكره انا مجرب العربيه هيونداى اتوس 2008العربيه دى زى البيكانتو بالظبط وموتورها1100سىسى وهى ممتازه فى الطرق لما تكون زحمه تاخد غرز للصبح بس ممكن تكون على السرعات العاليه خفيفه
بس انا انصحك لو عايز تجيب عربيه فى السعر ده ممكن تجيب لانوس او نوبيرا او افيو سيدان او النترا 1 مستعمله العربيه الانترا دى ممتــــازه جدا انا بتكلم على موديل2007او2006
وشكرا

[bolamaged]

أنا معايا جيتز 2008
ومتفق مع رأى العضو "mab" فى الآتى:
بصراحة العربية جميلة جدا

العربية سريعة جدا
واستهلاكها فى البنزين معقول جدا (حوالى 7 لتر فى ال 100 كم)
والتسارع رائع (جداً)

بس أنا بقى عدّيت ال 120 كتيررر و جبت 190!!
العربية ثابتة تماما حتى 140-150 , بعد كدة بتبقى أخف شوية بس برضه ثابتة نسبيا (للعلم أنا مركب جنوط سبور14)
وبالنسبة لقطع الغيار: المرايا الشمال عندى اتكسرت وسألت على سعرها فى التوكيل كان حوالى 350-400 جنيه
فا جبتها من برة -شارع دمشق- تايوانى ب 175 جنيه ..

العربية مش واسعة قوى زى ما ناس بتوصف , بس أوسع من البيكانتو طبعا بكتيرر

لو رجع بيا الزمن هاجيبها برضه , بس بصراحة كنت هافكر أجيبها أوتوماتيك بدل المانيوال

أى أسئلة اتفضل و أنا هاجاوبك..

[MEMES]

العربيه معايا من شهرين وهى بجد ممتازه و الحمد لله
توكل على الله ومش هتندم

[matta]

يا جماعة أنا بجد متشكر قوي على كل الردود دي إنتوا فعلاً شجعتوني أنا فعلاً مقتنع بيها
في حد من الناس كان قال لي أنه الچيتز هيتوقف تصنيعها وهاينزل بدلها i20 بس أنا مش مصدق وبعدين أتصلت بهيونداي واحد من المبيعات قال لي الكلام ده مش صحيح حد عنده اي معلومة عن كده؟ أشكركم جداً على النصيحة

[bolamaged]

أنا برضو سمعت الكلام ده بس مش متأكد منه
بس مش حاسس انها تفرق كتير فى حاجة
الجيتز عربية كويسة فى حد ذاتها
فا سواء نزل مكانها حاجة تانية أو لأ هتفضل برضه كويسة

[mido_919]

انا عاوز اعرف سعر البيكانتو هو المبالغ فيه ولا الجيتز بما انها عربيه هاتباك وفوق ال70000جنيه
دا ممكن الواحد يجيب عربيات سيدان كتيير بالسعر ده على فكره انا مجرب العربيه هيونداى اتوس 2008العربيه دى زى البيكانتو بالظبط وموتورها1100سىسى وهى ممتازه فى الطرق لما تكون زحمه تاخد غرز للصبح بس ممكن تكون على السرعات العاليه خفيفه
بس انا انصحك لو عايز تجيب عربيه فى السعر ده ممكن تجيب لانوس او نوبيرا او افيو سيدان او النترا 1 مستعمله العربيه الانترا دى ممتــــازه جدا انا بتكلم على موديل2007او2006
وشكرا

يا باشا انت بتقول ان مشوارك كل يوم ييجي 80 كيلو يعني عايز عربية تسعفك لو حبيت تجري شوية وفي نفس الوقت تكون ثابتة او انا من رايي ممكن تجيب gen 2

[matta]

چين ٢ وياتري سعرها أيه أوتوماتيك؟؟ وقطع الغيار وكل الحاجات اللي تعرفها عنها لو أمكن

[MEMES]

يا جماعه الجيتز ثابته جدا جدا وماشاء الله بجرى بيها لحد 180 ومفيش مشاكل