الفيرنا قلت ادبها معايا بس ربنا ستر

[EslaM_NagY]

بسم الله الرحمن الرحيم

اوﻻ : الحمد لله على كل شىء.

ثانيا : نبتدى الحكاية :--

يوم الاثنين الى فات نزلت كام مشوار فى عز الظهر والحمد لله وكله تحت السيطرة وشوية بعد ما ركنت حوالى ساعة بفتح العربية بالريموت لقيتها نورت الفلاشر مرتين كالعادة بس مسمعتش صوت السنتر قولت يمكن انا اتطرشت - بمد ايدى افتح الباب مش راضية - رحت دايس تانى برضو تنور ومتفتحش.

فكرت شوية قولت دى كدة فاهمة انى حفتح الباب وبالتالى الانذار مش حيشتغل رحت فاتح بالمفتاح - بس باب السواق هو الى فتح بس - الباقى مرضيوش رحت فاتحهم بإيدى.

قلت مش مشكلة انا فاضلى 2000 كيلو ع الصيانة مش مشكلة ابقى اشتغل بالمانفلة (المفتاح) الفترة دى مش مشكلة .

روحت بصيت على فيوزات الى تحت شمال الدبرياج لقيت الفيوز بتاع السنتر مقطوع قولت الحمد لله اغيره بلا غبور بلا نيلة ورحت مركب واحد نفس الامبير مكانة بدوس على الريموت راح ضارب هو كمان (الفيوز مش الريموت).

قولت مبدهاش سيبها هو عم غبور يعملها وسبيتها.

لحد هنا مفيش مشكلة عويصة

نيجى بقى يوم الخميس :-

نازل الساعة 7.35 الصبح متأخر وجى ادور الاقى الانوار كلها طفت والمارش مطلعلوش صوت - قولت خير يبقى البطارية عليها ملح وﻻ حاجة رحت منضف القواطيش بسرعة وداخل ادور وبرضو مفييييييش.

بس يبقى الهانم نامت

وبما انى نازل متأخر وعندى معاد فمفيش وقت للمحايلة رحت مديها غيار تانى وزقتها ومع تالت نطرة كانت دايرة وزى الفل رحت طاير على معادى وبقت شغالة تمام.

على الرغم من ان قلبى كان بيتقطع وانا بدورها زق بس هى الى عملت فى نفسها كدة.

وصلت المكان المنشود - وهو يبعد 10 كيلو من المنزل - مستنى ناس وطبعا مرديتش ابطل فلما اتأخروا عليا قولت انزل امشى رجلى على ما يجوا وبعدت عن العربية كام متر ببص تحتها - صعقت - لقيت بقعة بحجم النصف الخلفى بالكامل - قولت فى عقل بالى البقعة دى مكانتش موجود وﻻ مكنتش وقفت عليها رحت اتفحص الموضوع ولسة بوطى تحتها لقيت حنفية مية ﻻﻻﻻﻻﻻ قصدى حنفية بنزين فتحة ع الرابع من التنك رحت جارى مبطل العربية لقيت الحنفية بقت اقل بس لسة عمالة تنقط.

رحت زقتها بعيد شوية عن البنزين دا ورحت جايب رمل حطيته على البنزين الى ع الارض وبصيت لقيتها لسة بتجيب بس اقل من الاول.

رفعت الكنبة لقيت مكان الطرمبة غرقان بنزين.

رحت مكلم غبور ع الرقم المختصر قولتلو حصل كذا كذا وعايز ونش.

وصل الونش الساعة 10.30 رفع العربية وطلع بيها على ابورواش (مخدش فلوس ) وطبعا انا معاها ما خلاص اليوم راح.

خدت تقريبا 20 دقيقة على ما مهندس إستقبال وصل واستلمها وحكيتلو على الى حصل وشوية حجات خفيفة كدة ع الماشى وكان التقرير

الكشف على تسريب بالبنزين
الكشف على خراطيم البنزين
الكشف على البطارية
الكشف على السنتر
الكشف على صوت تصفير بالتيل الامامى بعد تغييره

بس كدة قالى تعال يوم السبت تكون خلصت قولتلو طيب.

يوم السبت رحت الساعة 10 لقيتها واقفة فى الورشة فى نفس المكان الى انا نزلتها فيه وعلى الحظ مهندس الاستقبال الى إستلهما اجازة يعنى لسة ححكى للمهندس بتاع الورشة على الفيلم من الاول.

بعد الشرح قالى طيب ساعتين تلاتة وتكون خلصانة.

الساعة 1 كلمنى قالى العربية خلصت رحت بصيت عليها فعلا خلصت وتمام.
التقرير النهائى :-

تسريب البنزين تنيجة تأكل وش طرمبة البنزين نتيجة سوء صناعة.
البطارية عمرها خلص.
السنتر معرفتش فيه ايه بس اتصلح.

طب يا راجل يا طيب البطارية بكام ؟؟

ب800 جنيه قولتو شكرررررررررررررررررررررا مش عايز خلصلى الورق عايز امشى

الورق خلص الساعة 1

الفاتورة :-

تغيير وش طرمبة -------- ضمان
تصليحات بالسنتر ---------ضمان
ونش ------------------------ضمان
مصنعيات كهرباء ---------ضمان
مصنعيات ميكانيكا ------ضمان
ـــــــــــــــــــــــــــــــــــــــ

إجمالى الفاتورة 0 جنيه


خدت العربية زقوهالى وخدتها دايرة روحت على محل البطاريات الى بتعامل معاه بصلى على البطارية قالى دى ميتة طب يا عم عايز واحدة قالى خد سائلة احسن قولتلو انت الى بتفهم ركب الى انت عايزه.
ركبلى ادلر الالمانية
وطبعا خد القديمة ودفعت 230 جنيه.


بس ومن ساعتها زى الفل والتصفير راح بتاع الفرامل.




سبحان الله لوﻻ انى خدت بالى من البنزين كان لو واحد رمى سجارة ولعت فيها.

الخلاصة : غبور طلع مش بالصورة الى الناس متخيلنها وانا كنت منهم

وفى الاخر نحمد الله على كل شىء

[osos_lion]

حمد الله علي السلامه يا اسلام باشا
بس عند0ي سوال هو الونش بتاع غبور د0ه مخدش فلوس ازاي هو انتا مشترك فحخدمه الونش ولا حاجه زي كده ولا ايه
وفعلا نتيجه غير متوقعه من غبور شكلو عارف انك من نايلموتورز هههههههه
وبعدين غير الكوتش النسر الي فلعربيه اللامبورجيني دي بدل ميعملها معاك هوا كما

[EslaM_NagY]

حمد الله علي السلامه يا اسلام باشا
بس عند0ي سوال هو الونش بتاع غبور د0ه مخدش فلوس ازاي هو انتا مشترك فحخدمه الونش ولا حاجه زي كده ولا ايه
وفعلا نتيجه غير متوقعه من غبور شكلو عارف انك من نايلموتورز هههههههه
وبعدين غير الكوتش النسر الي فلعربيه اللامبورجيني دي بدل ميعملها معاك هوا كما

الله يسلمك

مخدش فلوس على إعتبار ان العطل سببه عيب تبع الضمان وبالتالى هم الى يدفعوا لو كان طلع العيب من حاجة مش فى الضمان كنت انا دفعت تمنه وكان فى الفاتورة 150 جنيه.

حظـــــــــة لسة محتطش الاستيكر

وبمناسبة الكاتوش انا خلاص شيلته من الامبورجينى ( رجعته فى الفيرنا)

[Samir Elshahawy]

حمد لله علي سلامتك و سلامة عربيتك بس كنت عايز أسأل حضرتك البطارية عمرها معاك قد أيه ؟؟

[EslaM_NagY]

حمد لله علي سلامتك و سلامة عربيتك بس كنت عايز أسأل حضرتك البطارية عمرها معاك قد أيه ؟؟

الله يسلم حضرتك

البطارية قعدت معايا سنتين و3 شهور بالظبط

مع العلم عمرى مزودتها وﻻ عملتلها صيانة.

[Samir Elshahawy]

البطارية قعدت معايا سنتين و3 شهور بالظبط

مع العلم عمرى مزودتها وﻻ عملتلها صيانة.

لا ده كده كتر خيرها اوي , بس ياريت تعمل صيانة و تتابع حالتها بأستمرار , يعني كل شهر مثلا تغسل القواطيش بمياه سخنة و تكشف علي مستوي المياه و تزودها لو أحتاجت و الافضل تروح للكهربائي يقيس الامبير علشان تعرف حالتها أول بأول و تتجنب العطل المفاجئ

[EslaM_NagY]

لا ده كده كتر خيرها اوي , بس ياريت تعمل صيانة و تتابع حالتها بأستمرار , يعني كل شهر مثلا تغسل القواطيش بمياه سخنة و تكشف علي مستوي المياه و تزودها لو أحتاجت و الافضل تروح للكهربائي يقيس الامبير علشان تعرف حالتها أول بأول و تتجنب العطل المفاجئ

ان شاء الله حيبقى اوديها كل شهر للراجل يعملها صيانة - مش مستاهلة انها تقف على كلام فاضى.

[AHMEDCAR]

حمد لله على السلامه و ربنا يقدرك على العربيه دى دى طلعت عربيه تعبانه قوى ايه الكلام ده و وكمان التوكيل ما يخدش منك فلوس يايى توكيل حقير ههههههههههههههههههه

لا بجد بقى مبروك الاصلاح و انشاء الله تكون اخر مره تقل ادبها معاك و كويس ان التوكيل عارف ان دى حاجه عيب صناعه

و الله التوكيل كويس بس عاوز ناس فاهمه تشتغل فيه

[EslaM_NagY]

حمد لله على السلامه و ربنا يقدرك على العربيه دى دى طلعت عربيه تعبانه قوى ايه الكلام ده و وكمان التوكيل ما يخدش منك فلوس يايى توكيل حقير ههههههههههههههههههه

لا بجد بقى مبروك الاصلاح و انشاء الله تكون اخر مره تقل ادبها معاك و كويس ان التوكيل عارف ان دى حاجه عيب صناعه

و الله التوكيل كويس بس عاوز ناس فاهمه تشتغل فيه

الله يسلمك مش عقبالك خاااااالص

ولا وخدت بالك من السرعة فى الاداء

وعلى فكرة يوم السبت دا كان زحمة جدااااااااااااااااااااااااااااااااااااا

وانا ماشى كنت سامع المهندس بينده على رقم 260

[BLACKVERNA]

الحمد لله انها جت على قد كده

و فعلا موقف حلو من غبور

اللهى ما نحتاجله ابدا قولوا امين

[EslaM_NagY]

الحمد لله انها جت على قد كده

و فعلا موقف حلو من غبور

اللهى ما نحتاجله ابدا قولوا امين

آميـــــــــــــــــــــــــــــــن

[mohamed_mohsen]

حمد الله علي سلامة الفيرنا يا باشا..و الحمد لله انها جت علي قد كده

[ahmad--ezzat]

الحمد لله انها اتصلحت...

[EslaM_NagY]

حمد الله علي سلامة الفيرنا يا باشا..و الحمد لله انها جت علي قد كده

الله يسلمك
شكررا

الحمد لله انها اتصلحت...

الحمد لله

[bishoy02010]

مبروووووووووووك على حل المشكلة :)