مساعدة فى تركيب فرش للنيو اكسنت

[sanad2010]

السلام عليكم

يا جماع انا محتار اركب فرش جلد ولا قماش للنيو اكسنت واركبة عند مين فى القاهرة مع العلم ان لون العربية فضى والفرش الداخلى ر مادى و ارجو من اصحاب الخبرة يدلونى على مكان كويس والسعر واللون المناسب
وشكرا

[BassamHafez]

ممكن الفرش يكون اسود سواء جلد او قماش

وممكن تروح سبير كار دول ناس كويسه والتشكيل اللي عندهم حلو

[kh_talaat]

بص سواء جلد أو قماش كل واحد فيهم له مميزاته وعيوبه بس أنا شايف ان الجلد أفضل طبعا

عيوب القماش

- هيلم تراب جامد خصوصا مع جو مصر المترب وممكن اللون لو غامق يبهت مع الشمس

- لو وقع علي الكنبه مثلا ميه القماش طبعا هيمتصها وتطلع ريحه وحشه خصوصا لو كان بيبسي أوعصير ودة بيحصل كتير لو بيركب معاك اطفال

- صعب في تنظيفه بعكس الجلد

ميزته الوحيدة أنه مسامه مفتوحه ومش بيعرق زي الجلد

مميزات الجلد

- يمكن غسيلة بالماء وتنشيفه بسهوله
- بيعزل حشو الكنبه وميدخلش لا تراب ولا ميه ( انا مره عندي في العربية زجاجه ميه اتفتحت ووقعت الميه على الكنبة بالكامل وكنت راكن العربية ورجعت لقيت الميه زي ما هي ودخلتش جوه حشو الكنبه ومسحتها بفوطه وانتهى الأمر )

عيبه الوحيد أنه بيعرقك خصوصا في الصيف لعدم وجود مسام واسعه زي القماش

[alisleman]

بس يا سيدى هات اللون اولا فيرانى او رمادى غامق شوية هيليق اوى على لون العربية

الجلد افضل طبعا مش هقولك بيعرق ولا الكلام دة لان فى تكيف
هى المشكلة فى الركنة ولما يكون فى الشمس مش هتعرف تقعد علية
الا لما تسيبه شوية بعد التكيف

انتا اللى هتحدد بنفسك طلباتك جلد او قماش
معاك اطفال و لا لا هيتبهدل منك و لا لا

[sanad2010]

شكرا يا جماعة على الاهتمام والرد. انا انشاء اللة هركب فرش جلد بس انا عاوز عنوان سبير كار ولو حد من الاخوة الاعضاء ركب عندة فرش يقولى على الانواع اللى عندة وهل دة تفصيل ولا بيبقى جاهز عندة وبيركبة بس .معلش احسن انا معنديش اى خبرة فى الموضوع دة.