مساعده فى شراء هيونداى اكسيل.؟؟؟

[M_HaFeZ]

نويت باذن الله شراء سياره مستعمله فى حدود 30-35 الف وكتير من الناس نصحونى فى الاكسيل فياريت اعرف ايه رأيكم فيها وتقييم المتعاملين مع هيونداى لانها هتكون اول عربيه اشتريها باذن الله . والمواصفات اللى محتاجها هى تكون بتكييف وثابته على الطريق وصيانتها غير مكلفه ومشاكلها مش كتير

فايه رايكم ياجماعه وايه افضل الموديلات وايه اهم حاجات اخد بالى منها وياريت الاسعار

[hofo]

انا مقدرش افيدك كتير بس اللى ااكده ليك ان فعلا احسن اختيار فى الفئة السعرية من 30 الى 35 هى الاكسيل ولو عايز نصيحتى حاول تدور على الاكسل الهاتشباك موديل 96 او 97 لانها تقفيل كورى 100 فى 100 وكانت نازلة انجكشن حتى ال 1300 منها كان انجكشن و بتستحمل وعندنا واحدة موديل 96 وعاملى لغاية دلوقتى حوالى 200 الف وشوية وعمرها ما اشتكت ولا احنا اشتاكينا


اهم حاجة وانت بتشترى خد معاك ميكانيكى شاطر خليه يفليهالك واديله اللى هو عايزه ما تبخلش عشان ماطعيتش

[M_HaFeZ]

افهم منك ان السيدان مش تقفيل كورى ؟؟
الناس رشحتلى الاكسل علشان تقفيل كورى

[thegreatnileman]

زود الميزانيه شويه وهات اكسيل 1500 علشان ال1300 لما بتشغل التكييف فيها العربيه بتتكسح
وسيبك من حكاية المصرى والكورى لان غبور كان بيقفلها كويس زمان فى التسعينات مش زى الهبل بتاع دلوقتى

[ihab]

فعلا ال 1500 احسن بكثير من ال 1300 بس محتاج تزود الميزانية شوية
و خلى بالك و انت بتشترى و تبص فى الحوض كويس لانها بيبقى فيها شروخ زى بتاعت ال 128

[Nader]

افهم منك ان السيدان مش تقفيل كورى ؟؟
الناس رشحتلى الاكسل علشان تقفيل كورى

الكوري كان اخرة 94 وممكن تلاقي عربية 1300 كوري موديل 93 او 94 اغلى من الـ1500 المصري، المهم تكشف على العربية كويس قبل الشراء.

[hofo]

فعلا زى ما الاستاذ نادر بيئول الكورى اخره 94 وبعد كده اتجمعت فى مصر لكن الهاتشباك لم يكن لها خط انتاج فى مصر وكانوا بيتوردوها من بره عشان كده مش موجودة كتير

[zezo13178]

الهونداي كوري لحد 94 بس عموما 1500 احسن من 1300 بكتير حتي لو مصري لو عاوز تجيب بنفس السعر تقريبا ممكن تجيب سويفت احسن من الاكسيل من ناحيه الموتور والثبات لكن عموما الاتنين صاجهم ضعيف

[Mohamed A S]

على فكرة يا جماعة أنا لما كنت بدور على عربية كان أول اختيار ليه بناء على نصائح ناس كثير أوي كانت الاكسيل وفعلاً دورت كثير وشفت كثير منها ووجدت أن فيه موديلات 96 تقفيل كوري وفيه منها تقفيل مصري برده يعني الكوري نزل منها لحد 96. وفعلاً الملحوظة اللي قالها الأخ ihab مضبوطة تخللي بالك كويس وتبص في الحوض بتاعها وخصوصاً عند الكارتيرة يمين السيارة لأن بيبقى فيها شرخ في معظم العربيات. طبعاً بالإضافة للكلام اللي قاله الأخوة الكرام أن 1500 أفضل من 1300 بكثير، وربنا يوفقك.

[AYMAN4PLUS]

السلام عليكم ورحمة الله وبركاته ،


أنا معروض على سيارة اكسيل موديل 96 1300 CC بكل الكماليات ، وحالتها كويسة وبسعر 34000 الف جنيه وممكن تنزل ، هل أشتريها ؟

وهل الفرق بين الاكسيل 1500 و1300 كبير للدرجة التى تجعلنى لاأشترى ال1300 .

مع العلم أننى لاأشغل التكييف الا فى شهرين الصيف فى السنة ، وفى الشتاء لاأحب التكييف الساخن .

أرجو الرد من الاخوة أصحاب الخبرة .

[osama]

عربية ناعمة علي الطريق كماليانة حلوة علي سعرها تكيف - باور - 4 زجاج كهرباء - اريال كهرباء - فتح الشنطة كهرباء -
شنطة واسعة - تابلوة معقول -
عيوبها
صاج خفيف
خفيفة علي الارض ( بلاش تعدي 100 )
:lol:

[AYMAN4PLUS]

شكرا على الرد

ولكن سؤالى بالتحديد أنه أمامى سيارة 1300 CC بحالة جيدة وبسعر معقول ، هل أتوكل على الله وأشتريها ولا أنتظر (وأنا تعبت من طول الانتظار حتى أجد سيارة 1500 CC) ، مع العلم أننى لاأستعمل التكييف الا قليلا ، أى أن الموتور لن يتأثر كثيرا بتشغيل التكييف .

أرجو افادتى ، وشكرا مقدما . [smilie=mylove.gif]

[Hesham A.Megid]

السلام عليكم ورحمة الله وبركاته ،


أنا معروض على سيارة اكسيل موديل 96 1300 CC بكل الكماليات .

المفروض ان ال GLS مافيش منها 1300 سي سي، 1500 بس

[AYMAN4PLUS]

كلامك سليم ، أعتقد أننى نسيت وذكرت ان بها جميع الكماليات ، لاننى سوف أعاين السيارة على الطبيعة غدا ان شاء الله ، ولكن حسب كلام الصديق الذى سيحضر لى السيارة أخبرنى أن السيارة بها تكييف ، ولكن بالنسبة الى باقى الكماليات بالتأكيد ليس كلها متوافرة لان السيارة ليست GLS .

مازال السؤال فى انتظار الاجابة عليه : هل اذا كانت السيارة 1300 CC بحالة جيدة وبسعر معقول ، هل أتوكل على الله وأشتريها ولا أنتظر (وأنا تعبت من طول الانتظار حتى أجد سيارة 1500 CC) ، مع العلم أننى لاأستعمل التكييف الا قليلا ، أى أن الموتور لن يتأثر كثيرا بتشغيل التكييف .

أخيرا هل سعر 34000 جنيها مناسب لهذه السيارة .

أرجو الرد من أصحاب الخبرة بالسيارة .

وشكرا مقدما .

[moudy2002]

نصيحة من اخ لو حدودك متسمحش تزود 3 او 3.5 الف تانى يبقى هات ال 1300 ولكن لو تسمح حدودك بكدة او ممكن تصبر شوية يبقى تجيب 1500 احسن انت مش كل يوم هتشترى عربية
الفرق فى السحب بين 1300 و ال 1500 هتحس بية الى حد ما كمان لو محمل العربية نفرين ولا ثلاثة يفرق معلك جامد وكمان التكيف فى شهرين الصيف . كمان مشاكل 1300 كتير شوية غير الانجكشن فى 1500 هيوفر معاك فى الينزين
انا كنت محتار زيك كدة بالضبط لما جيت اشترى بين 1300 و 1500 ولكن صبرت شوية وجبت اكسنت 1500 فى الاخر.
والامر يرجع ل لله ورايك وربنا يوفقك