الحقوووووووني .... نيو النترا اتخبطت !!

[alivara]

السلام عليكم
النهاردة النترا اتخبطت مني و مش عارف اعمل ايه

الحكاية و انا ماشي في طنطا في شارع عادي واسع و كل حاجة بس كان زحمة عشان رمضان و انا بعدي من دوران في الشارع فجأة سمعت صوت جامد و العربية اتهزت عرفت ان العربية اتخبطت , نزلت لقيت واحد راكب عربية قديمة اوي داخل فيا و هو في الدوران , طبعا اتخانقت معاه و كنت هاخده على القسم بس عرفت انهم مش هيعملولي حاجة و قولت حسبي الله هو نعم الوكيل و خلاص

المهم ان الخبطة كلها في الصاج من فوق الاكصدام لحد الشنطة ورا في جنب العربية و البابين متطبقين في كذا حتة

مش عارف اوديها التوكيل و لا اشوف سمكري كويس يعملهالي لأن سمعت ان التوكيل هياخد مني فلوس كتير و كمان هيرشلي الجنب كله

ياريت تقولولي اتصرف ازاي العربية شكلها وحش جدا من الجنب
شكرا

[drkmf]

والله انا مش عارف اقول لك كل سنة وانت طيب ازاي ؟ المهم ماتزعلش وانت عملت الصح المحضر ماكنش حيعملك حاجة غير مضيعة الوقت ورفع الضغط
نصيحتي شوف سمكري كويس بس اتأكد انك لو صلحتها بره مش حتخرج من الضمان لان التوكيل ما بيصلحش على قد ما بيغير بالكامل يعني ممكن يقولك انا حغير الباب بحاله و طبعا حيكلف كتير لان زميلي عملوا معاه كده بس كان معاه نيسان صني
حصل خير و ربنا يحفظك من كل سوء و الحمد لله جات على قد كده
على فكرة انا برضه من شهرين واحد دخل في من الجنب بس كان معايا عربية قديمة و كانت الخساير بابين بالزجاج و العتبة و القايم والحمد لله على كده

[alivara]

انا فعلا روحت لصاحب المعرض اللي اشتريت منه العربية و هو دلني على سمكري شاطر هو زبون عنده و روحتله قاللي هياخد 400 جنيه , و البوهيجي اللي هيرش العربية هياخد 700 جنيه يعني كله 1100 جنيه
و ان شاء الله هوديله العربية قريب و هو اكدلي انها هترجع زي ما كانت

[alivara]

اللي مضايقني بس ان العربية جديدة ديه ما كملتش 3000 كم

[Raul_7]

قدر الله و ما شاء فعل.. ربنا يعوضك خير ان شاء الله.

أنا واحد صاحبي جاب Sunny اتخبطت تاني يوم في بنزينة الساعة 2 بالليل و هو واقف بالعربية كمان, نص نقل خبطت الباب الوراني بالخطاف الوراني ده خرمتلو الباب خرمة وحشه أوي, و اضطر يغير الباب كله.

قدر بقي.

[amr.elsayed]

قدر الله وما شاء فعل
متزعلش يا باشا وفداك اى حاجة
ويريت خبراء الهيونداى يأكدوا على موضوع الضمان لان العربية
لسة جديدة عاملة 3000 ك بس والضمان فى الوقت دة مهم جدا
وكل سنة وانت طيب ورمضان كريم

[memo_p910]

اتنزلت عن حقك بالسهوله دي؟؟؟؟ حاجه غريبه

[alivara]

ماهو كنت هعمل مشاكل على الفاضي و عمرهم ما هيعملولي حاجة و كله قاللي كده
لا انا ما طقتش منظر العربية و ما سألتش حد من التوكيل على موضوع الضمان لأني سألت صاحب المعرض و قاللي الخبطات و الكلام ده طالما ما حصلش تغيير للباب او اي قطع غيار يبقى الضمان مش هيحصله أي حاجة
و فعلا وديتها للسمكري و هاخدها بكرة بعد الفطار ان شاء الله

[thegreatnileman]

اللي مضايقني بس ان العربية جديدة ديه ما كملتش 3000 كم

قدر الله و ما شاء فعل.. ربنا يعوضك خير ان شاء الله

[drkmf]

ياعم انت زعلان عشان ما كملتش 3000 كيلو
تصدق بالله ان واحد زميلي اتخبط و هو خارج من المعرض بيقطع الطريق بالعرض و واحد ابن حلال ضيعله فانوس و اكصدام و صاحبي كان حيموت الراجل من كتر الخناق و الضرب
الحمد لله اولا واخيرا وبعدين بتقول الراجل اللي خبطك كانت عربيته قديمة يعني مش حيقدر يعوضك فاحتسبها عند ربنا وان شاء الله ترجع عربيتك زي الاول
امانة عليك تصورها بعد ماتخلص عشان نباركلك من جديد
على فكرة تكلفة السمكرة و الدهان كويسة انا لما خبطت كلفتني 950 جنيه بص طبعا عشان عربية قديمة و لونها ابيض مش ميتالك



ابقى بخرها قبل ماتمشي و علق العين الزرقا

[Samir Elshahawy]

طيب تقول أيه أنا لسه الاسبوع اللي فات شايف عربية "نيو سيراتو" زيرو لسه ماعلقتش نمر و مخبوطة من ورا و الشنطة ضايعة تماما , صدقني اللي يشوف مصايب غيره تهون عليه مصيبته

[KSA2011]

الحمد لله على كل شىء
المهم انك بخير والحاجات دى والله نصيب
وعلى فكره المحله و طنطا بلد زحمه جدااا انا كنت فيها لاول مره فى حياتى من يومين وشفت العجب وفيها لفات كتير وشوارع ضيقه حتى وانا ماشى بتاع تاكسى قالى انت كنتى هتتتخبط 4 مرات فى تقاطع فى نص البلد طبعا لانى مش عارف حاجه فى البلد وسايق بلطجه عشان انجز وبصراحه بقيت مهيأ نفسيا انه العربيه تتخبط فى اى لحظه لاسباب مش عايز اطول عليكم
المهم يمكن خير والحمد لله وربنا يعوضك خير عن الى حصل ان شاء الله
وكل سنه وانت طيب

[Mr_MoMo]

السلام عليكم

السلام عليكم
النهاردة النترا اتخبطت مني و مش عارف اعمل ايه

الحكاية و انا ماشي في طنطا في شارع عادي واسع و كل حاجة بس كان زحمة عشان رمضان و انا بعدي من دوران في الشارع فجأة سمعت صوت جامد و العربية اتهزت عرفت ان العربية اتخبطت , نزلت لقيت واحد راكب عربية قديمة اوي داخل فيا و هو في الدوران , طبعا اتخانقت معاه و كنت هاخده على القسم بس عرفت انهم مش هيعملولي حاجة و قولت حسبي الله هو نعم الوكيل و خلاص

المهم ان الخبطة كلها في الصاج من فوق الاكصدام لحد الشنطة ورا في جنب العربية و البابين متطبقين في كذا حتة

مش عارف اوديها التوكيل و لا اشوف سمكري كويس يعملهالي لأن سمعت ان التوكيل هياخد مني فلوس كتير و كمان هيرشلي الجنب كله

ياريت تقولولي اتصرف ازاي العربية شكلها وحش جدا من الجنب
شكرا

يا ريت لو حضرتك توريني صور العربيه , انا كان معايا النترا و ياما شاقت خبطات , بالسنبه لان انت مش عايز ترش الجمب علشان تخلي العربيه فابريكا , الحل انك توديا لسمكري بارد استاذ , انا اعرف واحد كويس اوي بس الاول وريني الخبطه عامله ازاي علشان اعرف اقيم صح.
شكرا

[zakiali]

للأسف البلد دي اخرها 128 مكسره عشان الواحد ميحرقش في دمه ... هنلاقيها منين ولا منين !

[EslaM_NagY]

للأسف البلد دي اخرها 128 مكسره عشان الواحد ميحرقش في دمه ... هنلاقيها منين ولا منين !

مش شرط

انا ال128 بتاعتى لما بتتكحت بزعل اووووووى