محتاج مساعدة كل الاعضاء فى الاختيار ده

[amrsabet]

انا بشكر مقدما كل الاعضاء اللى حتقولى رايها فى الحيرة اللى انا فيها فى الاختيار بين 3 عربيات :
- نيو سيراتو اول فئة مانوال
- هيونداى النترا مانوال
- هيونداى i30 مانوال

انا فى الحقيقة اقعدت فى 3 عربيات دول وحسيت ان الi30 افضلهم من الداخل ولكن من الخارج دى نقطة الحيرة بالنسبة لى انا حاسس ان السيراتو احسن شكل من الخارج لكن انا خايف من الاتى :

- عفشة السيراتو عمود التوائى زى التيو اكسنت وبالتالى ممكن تتناطط فى المطبات
- عزل الشكمان فى السيراتو مش كويس وبالتالى فى سخونة بتبان فى المنطقة اللى ادام الفتيس
- الخامات المستخدمة فى اول فئة قليلة شوية
- مفيهاش ريموت كونترول بس دى بالنسبة لى مش مشكلة اوى


نيجى للالنترا فانا حاسس ان بعد السيراتو مانزلت مبقاش ليها زهوة زى الاول بالاضافة الى ان خفيفة شوية

ال i30 انا مقتنع بيها جدا فى كل حاجة ماعدا شكلها من ادام حاسس ان فى حاجة غلط



انا برجو كل الاعضاء انهم يشاركونى فى الاختيار لانى محتار مع العلم انا 3 عربيات انا عايز اركبهم مانوال ولونهم يكون اسود

[Hosam_Optrawy]

سيراتو أو i30 اللى تستريحلها أكتر

[sss2000]

السيراتو جميلة مش وحشة في المطبات زي مانتا متخيل

[Diaby]

الi30 او الالنترا الالنترا رهيبة بس عيبها انها عريضة اوووووووى مش حتنفع فى شوارعنا و i30 تحفة وشكلها حلو جدا ووسعا من جوة وشكلها جميل وموتورها جميل بس الالوان الحلوة فيها النبيتى والفضى وهكذا للالنترا وانت برضه صلى ركعتين استخارة واتكل على الله ومبروك مقدما

[Samir Elshahawy]

أخي العزيز .....

كل عام و أنت بخير و صحة و سلامة ....


سيبك من الشكل الخارجي و الحركات دي , المهم في أختيار السيارة الاتي :
- توافر قطع الغيار و سهولة الصيانة بالنسبة اليك
- الاستهلاك الاقتصادي في البنزين
- قوة التحمل (وفق مشاويرك و الطرق التي تسلكها)
- موائمة السيارة لأستخداماتك (سفر كثير - داخل المدن - عائلتك كبيرة أم صغيرة - احتياجاتك للصالون الواسع أم الشنطة الخلفية الكبيرة)
- أسلوبك في القيادة (هادي - سريع - .....)
- تخطيطك بالنسبة الي اعادة البيع أو الاستبدال في المستقبل
- مقارنة العيوب و المزايا لكل نوع من الانواع السابقة ممن أستخدموا السيارات الثلاث

علي أساس البنود السابقة و أرتياحك للعربية توكل علي الله و أختار , و ربنا يوفقك و مبروك مقدما

[amrsabet]

انا قصدت انى اعمل نفس الموضوع فى قسم الكيا عشان اعرف اراء اصحاب العربية السيراتو ولكن تم نقل الموضوع الى قسم المقارنات وبالرغم من ده انا لحد دلوقتى موصلتش لرأي نهائى او موضوعى من مالكى الهيونداى

انا ده كان ردى فى قسم المقارنات وارجو ان الاعضاء فى قسم هيونداى يساعدونى بالمشورة :

انا وصلت للاختيار بين عربيتين السيراتو وال i30 انا بالنسبة للشكل الخارجى مرتاح اكتر للسيراتو اما باقى الحاجات زى الشكل الداخلى للتابلوه والمساحة الداخلية وشكل العدادات والخامات المستخدمة في العربية فانا مرتاح لل i30 يبقى نقطة الحسم فى الاتى :
- هل العربية السيراتو عفشتها تعطى ثبات عالى للعربية
- هل موضوع السخونة فى الكونسول بتاع التابلوه بسبب الشكمات ده موضوع بسيط وغير محسوس بيه تماما وان راى الاعضاء اللى قالوا علية كان مبالغ فية شوية
- هل العربية قعدتها فى السفر هتكون مريحة ولا متعبة
- هل العربية المانوال هيكون الاحساس بالنقل فى الفتيس زى الالنترا مثلا ولاهيكون مختلف ( لانى دى العربية الوحيدة المانوال فيهم اللى سوقتها )


انا فى النهاية محتار فى الحاجات السابقة دى وبطلب من الاعضاء انهم يقوللى رايهم بشكل محايد وموضوعى ويكون ناتح عن تحربة ليهم للعربيتين او على الاقل احد الاصدقاء ليهم عشان اقدر احسم موضوع العفشة والسخونة اللى انا خايف منهم فى السيراتو


وانابشكر كل الاعضاء اللى هتفدنى بالراى والمشورة الصائبة .

[Samah AbdAllah]

حضرتك ممكن تجرب تسوق الاتنين وتشوف هترتاح لانهى اكتر

[amrsabet]

مفاجاة ماكنتش على البال ولا على الخاطر اتصلت بغبور لقطع الغيار عشان اعرف اسعار قطع غيار i30 وهى كالاتى :
- فانوس امامى 1430
- فانوس خلفى 1045
- اكصدام امامى 1592
- اكصدام خلفى 1620
- الشبكة 800
-تيل الفرامل 520
- الكبوت 2470
- الشنطة 1320


تخيلوا ان مثلا حد خبطلى فاتوس امامى وشبكة شوفوا بقى هتدفع كام بالمصنعية تبقى مفاجاة لو قطع غيار الكيا سيراتو برده كده انا مش عارف اعمل ايه

[Ahmed.TV]

بصراحة ميستحلش غبور تشترى منه حاجة لان اسعاره بيهزر فيها وعربياته سعرها عالى ومفهاش اى وسائل امان ولو فيها بتلاقيها سعرها مولع نار مش عارف على ايه تخيلو سعر الالنترا اللى فيها abs وايرباجز ب121 الف فردوا انتم بالنيابة عنى عليه والنبى , فخاليك فى الكيا لان الوكيل بتعها محترم جدااا وكفاية ضمانها 5 سنين وسمعته تمام ووخالى بالك مفيش عربية كاملة وخاليك فى السيراتو طالما حاطط دول فى اختيارتك والسيراتوا احسنهم

[KSA2011]

والله يا باشا ال 3 زى بعض بس احسنهم ال i30 بس انا مش بحب الهاتش باك
لو بتحبها يبقى هى الاحسن فى الاختيار
لكن السيراتو والالنترا زى بعض تقريبا

[Eng.Sameh]

بجد ال i30 شكلها جميل جدا وانا اصلا شكلها بيعجبني عن السيراتو .. وطالما انت مقتنع بيها يبقه اتوكل على الله .. انا رأيي انها افضلهم فعلا

[Ghost2]

لا انا عايز اقول حاجه بس الاول .. ان الكيا والالنترا مختلفين مش زي بعض ... موتور الالنترا هو موتور Gamma 1 وده 121 حصان ... موتور الكيا هو موتور Gamma 2 وده 124 حصان ... غير ان الايرودايناميك ومقاومة الهوا في الكيا عاملة ثبات اكتر وسرعة اعلى .. عفشة السيراتو الامامية ماكفرسون وده نظام متعدد الازرع ومدي ثبات كويس جدا ... الالنترا كمان ثباتها معقول .. التقفيل الاتنين زي بعض ... التوكيل طبعا توكيل كيا افضل كتير ... ابعد عن ال i30 مش هتلاقيلها مسمار بره التوكيل واي حاجه لا قدر الله هتقرفك وهتصرف عليك مع انها احسن اختيار فيهم لانها ثابتة اكتر منهم بس مش احسنهم في حاجات تانية لانها هاتش باك ومتنفعش في بلدنا .. فا نصيحة خليك في السيراتو

[amrsabet]

المفاجاة التانية اللى حصلت انى اتصلت بتوكيل كيا عشان اعرف اسعار قطع غيار السيراتو وكانت مفاجاة جميلة بصراحة لانى لقيت ان قطع غيرها رخيصة جدا مقارنتا بالالنترا و i30 وهى كالتالى :
- فاونس امامى 990
- فانوس خلفى قطعتين 394+425
- شبكة 450
- اقصدام امامى 1200
- اقصدام خلفى 1220
- الكبوت والشنطة ( ارخص بكتير من العربيات i30 و الالنترا ) بس انا مش قادر افتكر الرقم بالضبط لانى كنت باتصل من الموبايل


وكانت المفاجاة ان اسعار قطع الغيار دى للعربيات اللى بضمان الوكيل فقط انما سعر الفانوس الامامى لما بيباع لعربية خليجى بيوصل ل 1450 جم

انطباعى من المكلمة ان الشخص اللى رد عليا محترم جدا وكان اسلوبه راقى بعكس الشخص اللى رد عليا فى توكيل هيونداى وقالى يافندم طالما ادارة الشركة بتدينى كل حاجة انا عايزها يبقى دى اقل حاجة ممكن تلاقيها من موظفى شركة كيا وهى المعاملة الحسنة

[mostafa3000]

لو عايز رايى يا باشا وطلعت لفوق 100 الف بلاش كوري خالص وفكر في الياباني