حجيب عربية للمدام!!!! الحقونى.... ربنا يستر!!!

[MoToRiZeR]

لازم المدام و إنت مسافر يكون معاها عربية لأن المواصلات في مصر أصبحت فوق البشعة و تحت الأدمية بمراحل .
و إنت مترضاش لمراتك و بناتك البهدلة و الإحتكاك بفئات بشر غير قابلة للتعامل ! مدام تقدر انا شايف إنك تجبلها عربية خاصة تريحها .

و رأيي ممكن تجيب إنت إلنترا مثلاَ و هاتلها سيريون أو سيريون وان قسط .. لأن العربية دي قليلة الإعطال جداَ و واسعة من جوة رغم إنها هاتش باك (هتلاقيها أوسع من الإلنترا !) .

يا إما لو ناوي كاش بقي هات عربيتين رخاص فيرنا و بيكانتو .. بس لازم يكون معاها عربية .. هتوجع دماغك شوية بس ده لراحة عيلتك .

[Angel_wolf]

انا لسه متجوزتش بس لو اتجوزت لازم اجيب عربية لمراتى
عدة اسباب
1-اتوبيس= نظريه علب السردين والسلامون ازاى تحط 10 سمكات فى علبة صغيرة اوى
2-مني باص = هو الصورة المصغرة للنظرية الى فوق
3-مكروباص = اكبر اهانة لكرامة المواطن لان المكروباص هو ابعد شى عن الادمية
4- تاكسى= ذل العبيد رغم ان الاسلام لغى العبودية سواقين التاكسى لسه بيستعبدوا الناس


الكلام دة مش تريقة دة من وحى خبرة وتعامل ان فى الاكادمية البحرية الى فى الشراتون و انا ساكن فى السيدة زينب لو حكيت لحضرتك على رحلة العذاب بتاعت كل يوم من مكروباصات توصلك مكان ماهى عايزة علشان يحمل المكروباص تانى وبلم اجرة تانى وقلة ادب و اتوبيسات و منى باصات ولاد جزمة يخلوا الواحد يتشعبط و ياسلام لو كان عندى فى اليوم دة رسم خلاص الحمد لله المسطرة الـ t و الرول او الادوات لازم حاجة تكسر او تضيع والتاكسى والله مابيوقفش و تقلة يؤلك لا مش رايح ابيض او اسود الاتنين ولا تيييييييييييييييييت اصلا هات عربية خلى ولادك يدعولك ميدعوش عليك

[youssefmustang]

انت فعلا هتغلط غلطة هتندم عليها ندم عمرك كله
بس قدر الله ومشاء فعل
ان لله وان اليه راجعون
اخوكم يوسف

[egyptawy2010]

طيب ياجماعة هو 30 الف ممكن يجيبوا بيكانتو موديل 2000
انا بالتمن ده ممكن اجيب برايد العصفورة فى الحالة ده مين احسن برايد ولا بيكانتو

[Samah AbdAllah]

اعتقد راى المدام هو الاهم
انا شخصيا مش بحب العربيات الهاتشباك اصلا

[mahmoud_magdy]

الراي السليم عربيتين واحده كبيره وواحده صغيره
نفرض مثلا ان حدود اللي معاك 120 الف وعاوز تجيب عربيتين
العربيه الكبيره ممكن تكون في حدود تمنينات مثلا سواء أقل او اكثر
والصغيره ستينات وتقسط الباقي يا اما تجيب عربيه مستعمله
لكن طبعا والمعروف ان الجديد اضمن (الزيرو زيرو )
ممكن تفكر في بروتون مثلا (واجا او بيرسونا (جين 2 احتمال ) )
او نيسان صني
شيفورليه لانوس
هيونداي فيرنا
رينو لوجان
ملحوطه : العربيات دي كبيره ومتوسطه

العربيه الصغيره
هيونداي i10
بيكانتو
سيريون1 (مش عارف سعرها )
سوزوكي سيلاريو
ماروتي (واختيار موفق بصراحه للسيدات خاصة بس من غير تكيف وعربيه صغيره وأبعادها سهله جداااا )

وممكن تفكر في العربيات الصيني (انا مش موافق على الاختيار ده لكن للامانه فقط ) (وكمان معرفش انواع )

شكرااا

[semsem67]

أنا رأيي - وعن تجربة - الفيرنا للمدام -أنا فكرت زيك بالضبط وأقول لك أنه بعد عام واحد العربية كلها خبطات صحيح كلها صغيرة لكن نفعني إن الفيرنا عربية منتشرة وقطع غيارها معقولة ومتوفرة - لو جربت مرة واحدة البحث عن فانوس ولقيته غاااالي قوي أو مش موجود خالص حتقدر كلامي
وبعدين إيه عيوب الفيرنا التي تقودها سيدة ؟!!
1- أنها خفيفة - طيب السيدة مش حتحارب بالعربية
2- أنها ضيقة من الداخل - يادوب على المدام و الأطفال
3- أن وكيلها وحش - وهو مين الوكيل الكويس في هذا البلد؟؟
أنا رأيي أن أحسن استخدام للسيارة الفيرنا هو أن تكون السيارة الثانية للأسرة -أي سيارة المدام - وعلى فكرة كل اللي بيشتكوا منها بيشتكوا لأنهم يضعوها في استخدام آخر مثل : سيارة رب الأسرة أو سيارة الشباب اللي عايز يجري

[bishoy02010]

الأفضل انك تجيب عربيتين
تجيب دلوقتى للمدام لوجان عشان صاجها بيستحمل وسعرها ممتاز جدااا وبعد متنزل تبقى تختار اى عربية تانية :) وربنا يوفقك

[SAMEHNOSHI]

أنا رأيي - وعن تجربة - الفيرنا للمدام -أنا فكرت زيك بالضبط وأقول لك أنه بعد عام واحد العربية كلها خبطات صحيح كلها صغيرة لكن نفعني إن الفيرنا عربية منتشرة وقطع غيارها معقولة ومتوفرة - لو جربت مرة واحدة البحث عن فانوس ولقيته غاااالي قوي أو مش موجود خالص حتقدر كلامي
وبعدين إيه عيوب الفيرنا التي تقودها سيدة ؟!!
1- أنها خفيفة - طيب السيدة مش حتحارب بالعربية
2- أنها ضيقة من الداخل - يادوب على المدام و الأطفال
3- أن وكيلها وحش - وهو مين الوكيل الكويس في هذا البلد؟؟
أنا رأيي أن أحسن استخدام للسيارة الفيرنا هو أن تكون السيارة الثانية للأسرة -أي سيارة المدام - وعلى فكرة كل اللي بيشتكوا منها بيشتكوا لأنهم يضعوها في استخدام آخر مثل : سيارة رب الأسرة أو سيارة الشباب اللي عايز يجري

انا اشتريت خلاص فرنا هاف اوبشن لانى فكرت زيك بالظبط, الفرنا فعلا عربية جميلة بالنسبة لسعرها و قطع غيارها منتشرة فى كل حتى و رخيصة, و صيانتها سهلة وكل الميكانيكية بيفهموا فيها و العربية اثبتت نفسها فى شورعنا الجميلة وسهلة فى اعادة البيع لو فكرت تبيع و اللوجان عربية جميلة بردة و انا فكرت فيها هى و البيكانتو بس علشان الاسباب اللى فاتت فضلت الفرنا و انا سالت ناس كتير من ملاك العربية و معظمهم شكروا فيها و عيوبهاانها ضايقة او واطية زى مانت قلت مش فرقة معانا خالص و كمان لما ارجع مصر اخر السنة دية حتبقى عربية مشتركة نسوقها احنا الاثنين كام سنة كدة لحد مكمل على الفلوس الباقية ثمن عربية اقيم ان شاء الله و سعتها اسبلها الفرنا بقى حلال عليها كدة احسن من وجع دماغ الاقساط و كفاية عليا مصاريف البنتين و مدارسهم و الواحد مش عارف بكرة فى اية مع الازمة الاقتصادية دية.
متشكر يا جماعة لكل الناس اللى شاركوا برايهم و ردوا عليا
و ياريت اللى عايز يضيف راية يتفضل بغض النظر عنى و رائيكم بردة ممكن يفيد