مشكله فى الفتيس الاتوماتيك الالنترا 2008

[gendi_52]

المشكله كالتالى لما باجاى اتحرك بالعربيه واجبها على ال r او d بسمع صوت من بره زى صوت

تييييييييييييييييك بالظبط كان فيه خشونه فى الفتيس كده مثل مع تزيق خفيف شويه

مش عارف المشكله دى ممكن تبوظ حاجه


ارجو الحل ياجماعه عاوز اعرف ايه سبب المشكله دى


هى العربيه مشايه 10 الف بس

[Na7nology]

والله يا باشا أنا مش عارف أقولك أيه أنا معايا ألانترا 2010 أوتوماتيك برده والفتيس تقيل شوية فعلا ولازم أدوس على الفرامل الأول عشان ينقل....وانا وكنت محتاج أستفسر على حاجة فى الفتيس ده هو لو على 2 أو 3 وعاوز أكمل مشى عادى لازم أقف وبعدين أجيب d ولا ممكن أجيب d وأنا ماشى عادى؟!!!!! أرجو الأفادة

[eltorky]

عندي نفس القصة في عربية متسوبيشي بالزات و أنا راجع بالفتيس للخلف

[Na7nology]

طيب أنت رأيك أنى فى الأوتوماتيك ممكن أنقل والعربية ماشية ؟؟؟
يعنى مثلا لو داخل على زحمة وأنا على d ممكن أنقل على n وبعدين أدوس فرامل؟؟؟؟؟

[omarmakeen]

حصلت معايا فى الاكسنت مرة واحدة ومحصلتش تانى ياريت حد يقولنا اية السبب؟

[tarekabosdera]

والله يا باشا أنا مش عارف أقولك أيه أنا معايا ألانترا 2010 أوتوماتيك برده والفتيس تقيل شوية فعلا ولازم أدوس على الفرامل الأول عشان ينقل....وانا وكنت محتاج أستفسر على حاجة فى الفتيس ده هو لو على 2 أو 3 وعاوز أكمل مشى عادى لازم أقف وبعدين أجيب d ولا ممكن أجيب d وأنا ماشى عادى؟!!!!! أرجو الأفادة

اولا التقل ده يدل على متانية الجير بوكس وليس عيبا.

المهم احب انبه على كام حاجة عشان الحفاظ على الجير بوكس اطول فترة ممكنة.

اولا لازم الضغط على دواسة الفرامل في الحالات الآتية فقط : وخلي بالك من كلمة ( لازم ).

النقل من p الى r او n او d او 3 او 2 او L.

النقل من الوضع r الى الوضع p او من r الى d و n .

النقل من وضع d او n الى r .

غير الحالات السابقة لايشترط الضغط على دواسة الفرامل لكنه يفضل.

يعني من الوضع d الى n او العكس مش لازم الفرامل لكن انتبه !! ممنوع منعا باتا النقل من الوضع d الى n او العكس والعربية متحركة لازم توقف العربية الاول وبعدين تنقل .. الكلام ده مكتوب في الدليل كتحذير لانه خطر على الجير بوكس.

وبرضه لو انت واقف على نزلة كوبري متخليش العربية تتحرك اعتمادا على الوضع n لازم تعشق التروس يعني تخليها على الوضع d حتى لو العربية على نزلة كوبري.

يعني عموما متخليش العربية تتحرك على الوضع n اطلاقا لانه خطر .

واذا طالت الوقفة في الزحمة متفضلش ضاغط على دواسة الفرامل والعربية على وضع D انما خليها في الوضع n وارفع فرامل اليد اذا لزم الامر وده حفاظا على تيل الفرامل من التآكل السريع.

اما بالنسبة للاوضاع 3 و 2 مش لازم تضغط على الفرامل عشان تنقل لل d انما تنقل عادي ختى والعربية بتمشي بس متستخدمهاش كتير ( زيادة عن اللازم ) وخلي معظم مشيك على d الا اذا لزم الامر النقل ل 3 , 2 ,L

والوضع 3 ممكن يستخدم في حالة انك مش هتمشي على سرعة عالية يعني اقل من 60 .

اما الوضع 2 ده بيسخدم في الطلعات شديدة االانحدار وبيستخدم ك engine braking في حالة الاحتياج للفرملة المفاجئة والفرامل العادية مش هتسعف قبتنقل للوضع 2 بس متنكش العربية ماشية على سرعة عالية حفاظا على عدد لفات الموتور من الزيادة المفرطة التي قد تؤدي الى تلف المحرك.

اما الوضع L فده نادر الاستخدام في حالات لو عالربية غرست في رملة او طينة .

[Na7nology]

أستاذ طارق..
أفادك الله وشكرا جزيلا على المعلومات الهامة ده وخلاص أنا هبطل أجيب n والعربية ماشية وربنا يسهل والجير بوكس ميكونش جراله حاجة فى الفترة اللى كنت بعمل فيها كده وشكرا مرة تانية

[tarekabosdera]

المشكله كالتالى لما باجاى اتحرك بالعربيه واجبها على ال r او d بسمع صوت من بره زى صوت

تييييييييييييييييك بالظبط كان فيه خشونه فى الفتيس كده مثل مع تزيق خفيف شويه

مش عارف المشكله دى ممكن تبوظ حاجه


ارجو الحل ياجماعه عاوز اعرف ايه سبب المشكله دى


هى العربيه مشايه 10 الف بس

سيدي الفاضل انطلق الى التوكيل فورا ومتستناش يوم واحد لان الجير بوكس ده مهم جدا وحيوي في العربية ولو انتظرت اكتر من كده ممكن المشكلة تتضاعف.