السيارات الياباني والكوري في كندا ...

[Anxs111]

تسعير العربيات الياباني في مصر مش مبني علي السعر الحقيقي انما مبني علي العرض والطلب ....

العربيات السوبارو هنا في أمريكا الشماليه فئة تنيه غير السيفك والكورلا ومازدا ٣ وسعرها أعلي منهم بكتير ...وهي سوبارو بتتكارن بالجولف والجتا ...

أما باقي الياباني فهو أصبح في نفس مستوي الكوري المكافء في الفئة ....يعني الانترا زي كورولا ...والفرق مش مبني علي كفاءة أو كوالتي أو سعر ...انما الفرق مبني علي مسئلة أذواق لدي المشتري ليس أكثر ....

لاكن في مصر الأسعار غريبة جدا ...

بمعني إن سوبارو هي أرخص واحدة عشان معليهاش طلب ، بينما سيفك متسعرة بغباء شديد ودي أسعار لا تعبر عن القيمة الحقيقيه ونفسي أعرف مين بيحددها .....

باقي الياباني والكوري اسعارهم منطقية ، يعني مازدا ٣ ولنسر شارك وكورولا والانترا وسيراتو...

مشكلة المازدا الأساسيه هي إن عفشتاها مش معمرة وبتبوظ بسرعة بس هي حاليا أشيك عربيه وأحسن هندلنج ... وطبعا الانترا الجديدة عامله شغل ممتاز ....

دي بس معلومات عامة حبيت اضافها عشان أزود حالة الوعي لدي الشباب وعشان ما نحكمش من أسعار البيع ....

أرجو أني اكون افدت وبالتوفيق ...

[aboomar22]

فى اوربا والدول المتقدمة العربية اللى شوارعها قشطة بيركبوا العربية 10 سنوات عندنا بقى اللى شوارعنا برضه قشطة بنورثها للاجيال

[Anxs111]

هو كدة يا أبو عمر هاتبقي العمليه مش متساوية....

أنا معايا في مصر كورولا عيون ٩٨ ...موتور ٧٥ حصان ...ومع ذلك أنا بحبها جدا ...مصر فيها بركه والحاجة فيها بتعمر بالرغم من كل العوامل .....

هو كل ما في الموضوع إن التسويق مش بيحدد السعر علي حسب الكفاءة أو القيمة الحقيقيه ....

أكبر مثال علي كدة هو سيفيك ....ازاي ٢٠٠ ألف مش فاهم ومع ذالك في ناس بتشتري ....لو أنت غاوي هقول معلش أما أنك تجيبها وأنت فكر إن السعر دة معناه أنها أحسن من الباقيين فده مش صحيح ...التكنولوجي في العفشه والفتيس في المازدا ٣ أعلي بكتير من السفيك ....

[Dr/ P.K.Sh]

شكرا يا باشا

[tutankhamoun]

يا باشا أي بلد التسعير فيها لأي سلعة بيكون عرض و طلب (ده مبدء السوق )

يعني على سبيل المثال ..... الفورد في أنجلترا (الفورد متوسط و صغير الحجم ) هو السيارة الشعبية في أنجلترا و سعرها من أعلى العربيات في السوق (عرض و طلب )
و هناك مثلا السوباورا مش منتشرة خالص و بناءا عليها مش مطلوبة و بناءا عليه سعرها مش عالي وزي مصر في مستوى السعر مش في السعر نفسه .

أحنا في مصر عندنا العربيات من الحاجات اللي مش بتفقد سعرها بعد الأستخدام علشان أحنا سعر عملتنا منخفض و بالتالي العربية سعرها عالي قوي و بالتالي صعب أن سعرها ينزل و بالتالي لازم نورثها للأجيال .

هي المشكلة بس أن الناس هنا في مصر بتجري وتدفع فلوس في حاجات ما تستاهلش ثمنها .

[Anxs111]

داه كلام سليم ...وجزء من سبب إن العربيه سعرها بيفضل عالي هو الجمرك المحترم اللي بيندفع فيها ....

بس في حاجات بتبقي زيادة أوي .....يعني مثلا مرسيدس وبي أم وأودي سعرهم متقارب جدا والناس بتختار علي حسب مزاجهم لاكن في مصر تلاقي لما التوكيلات بتنزل عربياتهم في فرق كبير في السعر بين هم عشان إستغلال ثقافة المستهلك ....

نفس الكلام عن هوندا سيفك اللي نزلة بسعر خيالي رغم إن هي ومازدا المفروض سعرهم متقارب ....

فدي حاجات سهل تفاديها من المشتري بس مفيش فايدة ..

[Land_Cruiser]

هى الجمارك عندنا من العوامل اللى بترفع الاسعار بطريقه بشعه و مع ذلك كمان بيشيلوا منها كتير من الكماليات و كمان احنا معايير الاختيار عند غالبيتنا بتعتمد على الشكل الملفت بدون تحكيم العقل بالنسبه لطبيعه الاحتياجات

[hamada22]

فى كمان ثقافة ما بعد الشراء اقصد انك بتفكر لو بعت العربية هتخسر فيها ولا تكسب قبل متشتريها فيكون اقبال بعض الناس على السبارات الاكثر انتشارا حتى لو عربيات مش جيدة

[Anxs111]

معايير الاختيار عند غالبيتنا بتعتمد على الشكل الملفت بدون تحكيم العقل بالنسبه لطبيعه الاحتياجات

أنا متفق معاك تماما

[Anxs111]

فى كمان ثقافة ما بعد الشراء اقصد انك بتفكر لو بعت العربية هتخسر فيها ولا تكسب قبل متشتريها فيكون اقبال بعض الناس على السبارات الاكثر انتشارا حتى لو عربيات مش جيدة

أنا زمان كنت أفكر في أنهي عربيه تبسطني وتناسبني أكتر ....بس كل ما أبص ألقي حكاية البيع دي مهمة عند ناس كتير وساعات بتبقي هي اللي بتحدد ...ما بقتش عارف إيه الصح وإيه الغلط ...

[Sehsss]

كلامك صح 100 %

[SAMEH_FOUAD]

انا بردة عندى سبب اخر فى نسبة العرض والطلب على السيارة وهو التوكيل من حيث

1- مدى توافر قطع الغيار فى التوكيل وبأسعار معقولة غير مبالغ فيها

2- نسبة الدعاية على السيارة واللى بجد مابشوفهاش نهائيا فى سيارات سوبارو الا كل فين وفين ليها عامل كبير جدا على النسبة الشرائية

3- عدم تواجد السيارة فى المعارض التى تقام وبجد ماشوفتش علامة السوبارو غير من سنة 2009 فى معرض اتوماك وبعد كدة اختفت

طبعا لو شوفنا بقية الشركات هنلاقى الدعاية والتواجد وقطع الغيار متوافرة

يعنى لو شوفنا الشركات الكورية مافيش معرض الا ويكونوا فية + الاعلانات اللى مالية الصحف والمجلات وشغالين الله ينور والناس بتشترى بالرغم من معاملة وسوء توكيل غبور بس الناس ماقدمهاش غير العربيات دية فى الفئة السعرية دية تشتريها وفى نفس الوقت فيها حاجات كتير تحسسهم انهم انتقلوا الى مرحلة افضل

يعنى من الاخر محدش يستغرب على سعر السيفيك انها توصل ل200 الف جنية والفرق مابينها وبين الجيتا مثلا 12 الف بس والناس بتشترى السيفيك لان الناس عارفة ان السيفيك بتحقق :

1- قوة محرك من اقوة محركات ال1600 فى مصر + امان+ ثبات عالى + امكانيات + شكل وهمى للمقصورة + اعتمادية عالية جدا + سعر اعادة بيع مناسب + قطع غيار موجودة داخل وخارج التوكيل جديد واستيراد

[Unendlich]

ا
يعنى من الاخر محدش يستغرب على سعر السيفيك انها توصل ل200 الف جنية والفرق مابينها وبين الجيتا مثلا 12 الف بس والناس بتشترى السيفيك لان الناس عارفة ان السيفيك بتحقق :

1- قوة محرك من اقوة محركات ال1600 فى مصر + امان+ ثبات عالى + امكانيات + شكل وهمى للمقصورة + اعتمادية عالية جدا + سعر اعادة بيع مناسب + قطع غيار موجودة داخل وخارج التوكيل جديد واستيراد

تسمحلي اسألك, فييييين اللي اشتروا السيفيك دول ؟!؟!
أنا لغاية دلوقتي ما شفتش غير بتاعتنا
اللي قبلها أول لما نزلت كانت بـ 135 ألف و الناس تهافتت عليها, انما 200 ألف يبقى تغور
الموديل ده اتحكم عليه بالفشل و اللي حابب يقول غير كده ينزل الشارع يشوف لو لقى واحدة ماشية

[Ahmod]

تسمحلي اسألك, فييييين اللي اشتروا السيفيك دول ؟!؟!
أنا لغاية دلوقتي ما شفتش غير بتاعتنا
اللي قبلها أول لما نزلت كانت بـ 135 ألف و الناس تهافتت عليها, انما 200 ألف يبقى تغور
الموديل ده اتحكم عليه بالفشل و اللي حابب يقول غير كده ينزل الشارع يشوف لو لقى واحدة ماشية

+111111111

انا فعلا لحد دلوقتي ماشفتش السيفيك الجديدة ولا مرة في الشارع ! لدرجة اني مابقتش عارف اذا كانت فعلا نزلت السوق وبدات تتباع ولا لاء ؟

كتير اوي 200 الف ! خاصا ان شكلها مش عاجب كل الناس خاصا العربية من ورا تحس انها قلبت على عربية صيني !

وزي ماسامح قال نقطة الدعاية دي بتفرق كتير اوي ! انا عايز اقول ان فيه ناس كتييييير ماتعرفش ان السيفيك نزلت شكل جديد ؟ ؟

بعكس الالنترا الجديدة لما نزلت ! اكنها عملت غزو فكري للمستهلك المصري فعلا نجحو انهم يسوقو العربية مع انها ماتستهالش 160 الف ابدا

[Anxs111]

يعني بس هو حضرتك جبت أكبر مثال .... السيفك والامبريزا ....

للعلم إن الئمبريزا هي أنضف حاجة في الياباني وبيتقارن بالألماني ....يعني اللي بيختار سوبارو بيبقي عايز حاجة شبة البي أم بس أرخص أو عايز حاجة في مستوي الجولف بس دفع رباعي وهكذا ...

وهنا الئمبريزا أغلي من إلسفيك بخمس تلاف دولار ...

تيجي في مصر العمليه معكوسة تماما ....

هل فرق كوالتي ولا عملية تسويق واستهبال من التوكيلات ...