المرة دي كورولا 99 مرفوعة

[fighter_ss11v]

بعيد عن كورولا 2009 و2010 والmmt وقضاياهم نرجع 10 سنين لورا (الكورولا بتاعتنا هههههه)
ان شاء الله همتحن الرخصة بعد 10 ايام (واعتبروها معايا مانتو عارفين بلدنا) احم احم



المهم
العربية مرفوعة بقالها سنة نظر لظروف سفر الوالد وعدم حصولي على رخصة القيادة
دلوقتي لما انزلها

اعمل ليها ايه
يعني لو حد منكم رافع عربيته
وشغلها تاني يعمل بيها ايه
اخدها لمين؟
اكشف على الكهربا مثلا؟
ولا اعمل ايه


ارجو الافادة

[amrelsaqqa]

احسن حاجة تجيب ميكانيكى ب 20 30 بالكتير

هيعمل كل حاجة

ولو عايز تعرف انا عملت ايه في عربيتنا البيجو 504 ( برضه زيك كان والدى جاى من السعودية يوميها ومحتاج يسافر بيها تانى يوم )

بس الكلام ده عملته في العربية عندى الله اعلم هى مرفوعة عندك ازاى

اول حاجة تشوف البطارية تحطلها مية و تشحنها الاول ولا تشوف واحدة جديدة وتشوف نظامك عادية ولا جافة ( روح لبتاع بطاريات يعنى )

نيجى للعربية

افتح الكبوت واول حاجة تعملها ( عشان ما تنساش ) تقفل الحنفية بتاعت الردياتير ( كانت موجودة من تحت عندى ) لو مفتوحة وتملاه مية لو فاضى و تشوف مستوى الزيت ولو لقيته ناقص كتير او مفيش زيت لازم لازم تحطلها زيت الاول


بعد كدة ركب البطارية واربطها كويس وخلى بالك طبعا من السالب و الموجب ( واربط الحديدة اللى بتمسك البطارية كويس عشان ممكن تقع منك في الطريق لو ما ربطتهاش كويس )


بعد كدة هتنزل العربية

هترفع من قدام بالكوريك حسب نوعه وخلى بالك ترفع من مكان كويس

على الشاسيه من حتة كويسة في الوسط

وخلى بالك وخليك حذر جدا و لو مافيش خبرة ما تعملهاش لوحدك لان ممكن حاجة تقع عليك لا قدر الله

طبعا هتشيل الخشب اللى العربية مرفوعة عليه
وتنزل واحدة واحدة ( اوعى تنزل مرة واحدة لو عندك كوريك الهيدروليكى )



نفس الكلام مع العجل اللى ورا واحدة بواحدة

بعد كدة لو العربية كربريتور و اسبراتير زي البيجو القديمة في حالتى

هتفك العمة
هتفك خرطوم البنزين اللى داخل للكاربريتير و تشفط شوية بنزين ( اوعى تبلع ) ههههه الموضوع صعب ههههه
و بعد ما تشفطه تنزله على الكاربريتير من فوق

( او تعلى الكهربة لو مش عايز تشفط بنزين ودى قصة تانية )


لو العربية انجكشن و فيها طرمبة بنزين وطبعا اكيد عربيتك كدة
مش هتفك و لا تشفط و لا تظبط كهربة ( الحمد لله )

هتدخل جوة العربية و تدوس على البنزين كذا مرة كتيير قبل ما تدور

و بعدين دور وربنا يسهل وتدور معاك من اول دورة

[fighter_ss11v]

انا هجيب ميكانيكي حبيبي

بس برضه لازم اسأل

[rahmanboud]

نصيحه لازم تغير الزيت حتى لو كان مستوى الزيت مضبوط وده لأن الزيت بيقد خواصه مع الوقت حتى بدون استعمال (عمر إفتراضى يعنى ) مع تغيير الفلتر طبعا
تغيير مياه الردياتيير مع عمل غسيل للموتور من الداخل لأن ركود المياه بيعمل صدأ داخل مجارى التبريد بالموتور (ده بيتعمل فى معظم البنزينات الجديده )
مراجعة البطاريه والكهرباء
غسيل السياره وتشحيمها لترييح العفشه
بعدين ومع أول قيادة للسياره سوق العربيه وكأنك بتلين وشوف
الفرامل فيها حاجة -العربيه بتحدف - فى صوت غريب -أى حاجة غير طبيعيه -
أول ما تطمن للعربيه إفتح على 160 كم وعلى فكرة أنا معايا نفس السيارة ونفس الموديل أوتوماتك

[fighter_ss11v]

اول ما هاخد الرخصة هتابع معاكم ان شاء الله