ظاهرة التصفيع(التسقيف)

[Ali_Abdelhamid]

السلام عليكم ورحمه الله وبركاته
أولا ... أنا عربيتى كرولا 2003 اوتوماتيك 1300 سى سى
سؤالى ... ما سبب التصفيع (التسقيف) مع أن العربيه اوتوماتيك
مع العلم بانى مغير
بوجيهات جداد و فلتر هواء جديد وفلتر بنزين جديد وبستخدم بنزين 92
انا شكيت فى البنزين ... فضلت ماشى بالعربيه لغايه ما أفضى التانك والروزلف ... ومونت تانى
وبردو ظاهرة التسقيف موجوده

الظاهره دى ما بتان الصبح وانا بمشى ... بتبان بالتحديد لما يكون الطريق واقف فتره كبيره ... وأول ما الطريق يمشى يبان التسقيف

برجاء حد يقولى ايه السبب

[coronawy]

ال rpm بتاع العربيه واطى و محتاج يعلى شويه لحد ما يوصل 0,8 هتلاقى كل حاجه تمام

[معتز]

اذهب الى التوكيل.او مركز معتمد محترم.واكشف على الموتور....اسمع طبعا لردود الزملاء و قرر........تحياتى

[ابوشريف]

غير البنزينه اللى بتمون منها

[Ali_Abdelhamid]

الاخ ابو شريف انا عملت كدا فعلا ومونت من بنزينه شل فى شارع مصطفى النحاس
الاخ كورونواى انا عربيتى 1300 سىسى لا يوجد بيها عداد ار بى أم

[Moe86]

غالبا البنزين هو السبب,الغش شغال الأيام دى 100 % , أنا فاكر قريب كان فى ميكانيكى راكب معايا العربية و لما سمع صوت الكركرة دة قالى "هو انت بتحطلها بنزين 80 ولا اية ؟!"
بتحصلى كل فترة , ولما أغير البنزينة بتروح

[walidabdelaziz]

سلام عليكم

هل العيب ده ظهر فجأة؟
هل العربية بتسقف وهى باردة بس ولا فى اى وقت؟
هل العربية بتنقص زيت؟
هل العربية بتسخن؟
هل سحبها مختلف (يقل او يزيد)عن اختلاف الحرارة؟

انا باحاول اجمع معلومات على اساس اعطيك اقرب اجابة

[coronawy]

عن تجربه معايا شخصيا فى عربيتى تويوتا كرونا 2001
وعربيه زميلى تويوتا راف 4
كانت عندنا نفس الشكوى ...الميكانيكى زود عدد لفات الموتور و بقت العربيات زى الفل بعدها لحد النهارده

[Ali_Abdelhamid]

الاخ وليد
أيوا العيب ده ظهر فجأه
بتسق لما بتسخن لفتره طويله ... بمعنى بعد فتره فى الزحام الشديد
ما فيه نقص للزيت
لا العربيه ما بتسخن عمرها ما عدت النصف فى العداد
السحب بيق عند السخونه

[sab3aawy]

لو تغيير مكان شراء الوقود لم يحل المشكلة اقترح عليك الكشف على حساس الصفع فى التوكيل او لدى مركز متخصص

[walidabdelaziz]

السلام عليكم
هو وارد زى الاخ سبعاوى قال حساس الصفع اللى هو knock sensor يكون اتأثر ببنزين سيىء او اثر على علبة البيئة catalytic- converter بس اى حساس بيبوظ فى العربية لازم تنور لمبة الصفراء فى التابلوه -check-engine

عادة التسقيف يبقى من
البنزين يكون مضروب او يكون بيسخن اوى
او
الكهرباء والتوقيت-- والعربيات دى توقيت اوتوماتيك مفيهاش ضبط مانيوال

خلى حد يفك الاربع بوجيهات ويبص عليهم اذا كان لونهم رمادى يبقى سليم غير كدة ممكن يبقى محروق(كهربا ضعيفة) او مكربن(بنزين كثير ومتحرقش كفاية عشان سيىء), دى افضل طريقة عشان تشيَك على الموتور.

احتمال يكون فى الفتيس ان يكون استهلك بعنف شوية بحيث ان الاسطوانات اتحرقت,فى الاول والعربية باردة, الاسطوانات تبقى لسة باردة ولما تسخن تبتدى تتزحلق بالتالى العربية ما بيوصلهاش كامل عزم الموتور وممكن تلاقى رجة خفيفة فى الطلوع وبعد كده تسقف.

ابقى طمنى وبالشفا ان شاء الله

[sherof128]

ياعم العيب بسيييييييييط انت محتاج تأخر كهربة العربية بس اى ميكانيكى يعملها

[mr_sameh]

ياعم العيب بسيييييييييط انت محتاج تأخر كهربة العربية بس اى ميكانيكى يعملها

لا طبعا الاسبراتير بتاع العربيه الكتروني بعكس الكورولا 92 طبعا فاهمني

[asemx1]

ماتوجعش دماغك كتير روح لمركز فيه كمبيوتر واكشف عليها هتتحل فى ثانيه
الموضوع بسيط وماتخليش ميكانيكى يمد ايده فى المواتير دى علشان مش بيعرفوا فيها حاجه وبيفتوا
تحياتى

[eab25]

بخصوص التصفيع

عن تجربة وحتستغرب كرولا 2009 معاية خليجي وانا في الخليج
العربية يا باني
المهم
التصفيق بيظهر عندي بس الحرارة لما تكون على النص وبيكون خيف جدا
وبيظهر عند السحب الخفيف عند السرعة من 30 -40

انا طبعاالعربية لسة في الضمان
وتنيت وراهم في التوكيل
عملو تشك كامل على العربية
ونزلو برنامج الكمبيوتر مرة أخرى
وغيرو الكونك سنسور المسئول عن هذه العملية

وازيدك من الشعر بيت ودو تقرير لليابان وردو عليهم بتغيير الكونك سنسور

المهم
مع العلم انا بحط بنزين 95
بس كنت سافرت لمصر وحطيت 92
ورجعت تاني الخليج وبحط 95
المهم المشكلة حاليا تقريبا غير محسوسة لان مبسمعهاش الى عند التركيز الكبير جدا
يعني لازم الشارع يكون فاضي بالمرة مفيش اي عربيات تانية
لازم الحرارة تقريبا على النص
لازم يكون فيه مباني على الجنين علشان الصوت يترد واسمعه

وفي حالة السحب الخفيف ذي ما الت بين 30 -40

المهم جربت عربية تانية لزميلي تقريبا نفس الحكاية

وأريت في المنول بتاع العربي وذكر فيه ان هذا الصوت في بعض الاحيان يظهر من وقت لآخر

تحياتي وارجو ان نسمع آراء أخرى