تقريرى عن تويوتا ياريس 2009 بعد 13000 كم

[asemx1]

اشتريت ياريس من شهر 9 الى فات 2009 وكانت زيرو عامله 50 كم ودلوقتى وصلت ل 13000 كم وهقول رائى فى العربيه دى والى عملته فيها والعربيه فول ابشن اوتوماتيك
1- تركيب دى فى دى مكان الكاسيت العقيم الى كان فيها وكاميرا مع المارشدير
2- تركيب انزار بروافع للزجاج على نفس المفتاح بدون فصل السكيرتى بتاع الماتور
3- تركيب فرش جلد وارضيه جلد
4- تركيب سماعتين بايونير نضاف مكان الاتنين الى ورا الى صوتهم زى الزفت

المشاكل الى قابلتنى فى العربيه
1- الزوايا مكانتش مظبوطه 100% لما جبتها
2- العفشه كانت ناشفه جدا جدا جدا جدا لدرجه ان اقل مشوار برجع ظهرى متكسر واكتشفت فى الاخر ان الكاوتش كان منفوخ على 40
3-عند تغيير الزيت الصفيحه الى تحت دى بتعسف الى بيغير الفلتر بتاع الزيت
4-البهيه بتاعتها خفيفه اوى اقل حاجه بتتحك
5-فكره ان 3 يقعدوا ورا مستريحين دى صعبه اوى او انك تقعد حد على رجله ورا دى مستحيله علشان السقف واطى اوى
6- العربيه دى زى الديك الرومى كدا لو شيلت الريش هتلاقى مافيش حاجه تحتيه هههههههه لو جربتوا تشيلوا اى حاجه مغطيه زى الشطنه مثلا فيها الغطا او الغلاف بتاعها الى بكلبسات دا هتلاقى تحتيه فرااااااااااااااغ كبيييييير كان ممكن الشنطه تبقى واسعه جدا جدا جدا لولا الى الغطيان دى
7-التوكيل الغبى مانزلش ليه الشبوره مش فاهم يعنى هتغلى اد ايه علشان ماينزلهاش ؟؟؟؟؟

نيجى على المميزات
1- 13الف كيلو بالصيانه كل الفين كيلو ( تربيط عفشه وزوايا ) بصراحه العربيه زى مايوم ماجبتها لا ظهر فيها شخلله او اصوات عجيبه
2- استهلاك البنزين تحفه
3- ارتفاعها عن الارض روعه بجد
4- ثباتها كويس جدا جدا والفرامل ممتازه
5- الدريكسيون زى العاب الاطفال خفيف جدا
6- انا لحد دلوقتى مش ندمان ولا هندم انى جبتها رغم انها غاليه وممكن تجيب سيراتو او لانسر
بس فعلا ركبتهم كلهم حسيت ان عربيتى نوع وكلام تانى غير الانواع التانيه خالص
7- مفيش حد فى مصر كلها يقدر يقول ان العربيه دى مش عمليه للطرق والسفر والبهدله انا شايف انها رقم واحد للطرق المصريه
اعتقد انى قولت الى عندى الى عنده اى استفسارات يسال انا موجود :d

[TOYOTA_ZAGAZIG]

انا مالك توكيل تويوتا الزقازيق موزع معتمد
ووكيل تويوتا ايجبت
اتعرض عليا اكتر من مرة عربيات كرولا
بس المناسب فعلا للبيئة المصرية هيا اليارس
استهلاك بنزين قليل وارتفاع عن الارض اعلي من كرولا واعلي من عربيات كتير
انا برضة اشتريتها الحمد لله مواجهتش فيها اي مشاكل

كلامك كله تمام
تحياتي
واي استفسارات انا موجود

[BLOODY_STONE]

هي العربية ما شاء الله ممتازة ... بس فعلا موضوع العفشة الناشفة ده خانقني ... حبقى اروح ابص على ضغط الكاوتش لاني مشفتوش من ساعة ما جبت العربية!

[asemx1]

انا مالك توكيل تويوتا الزقازيق موزع معتمد
ووكيل تويوتا ايجبت
اتعرض عليا اكتر من مرة عربيات كرولا
بس المناسب فعلا للبيئة المصرية هيا اليارس
استهلاك بنزين قليل وارتفاع عن الارض اعلي من كرولا واعلي من عربيات كتير
انا برضة اشتريتها الحمد لله مواجهتش فيها اي مشاكل

كلامك كله تمام
تحياتي
واي استفسارات انا موجود

اهلا وسهلا يا باشا وفعلا العربيه دى مناسبه هيا اه غاليه جدا جدا على قيمتها بس معتقدش ان حد اشتراها وقال عليها فعلا مش عمليه

[asemx1]

هي العربية ما شاء الله ممتازة ... بس فعلا موضوع العفشة الناشفة ده خانقني ... حبقى اروح ابص على ضغط الكاوتش لاني مشفتوش من ساعة ما جبت العربية!

بص انا بحب دايما ازود الكاوتش على 32 دا يحمى الكاوتش من انه يتكسر خصوصا انه ( بريدج ستون بوتينزا ) الفرده بتعدى ال 700 جنيه ومش موجوده فى مصر اساسا وعن تجربه
لكن لو خليتها على 30 او 29 هتلاقيها معاك زى السكينه فى الحلاوه
وعايز اضيف حاجه كمان
1- عزل العربيه مش تمام بس مقبول جدا لما تقفل الازاز يعنى مش زى الانسر مثلا فى الهدوء
2- الماتور صوته واطى جدا وتحس انه بيغنى كدا
3- اكيد كل واحد لما جاب العربيه متوقع ان الدركسيون الكهربا هيخليك منفصل تماما عن الارض ومش هتحس بالعفشه ولا باى حاجه وطلع الاعتقاد دا خاطىء خالص بس اكتر حاجه عجبتنى ان الشخلله بتاعت العفشه لو ماشى فى مكان كله ظلط مش بيزيد ولا تحس ان العفشه بتكفك
4- انا ربطت العفشه كذا مره بصراحه مش بتفك ولا بتحتاج تربيط خالص غير الانسر بتلاقيها بتفك عفشه بسرعه
5- اكتر ميزه عاجبانى وكانت مقلقانى لحد ما لقيت الحوار دا ان العفشه الى ورا متصله مش منفصله زى الانسر يعنى كامره واحده واخده العجلتين الميزه هنا هوا انك عمرك ما هتحتاج تظبط زوايا ورا ولا العفشه تفك منك ورا الا فى الحوادث لقدر الله

العيب الى عايز اضفه هوا
1- قطع الغيار الاصليه غاليه جدا جدا سواء فى التوكيل او موزع
( خبطت فى عمود على الارض كدا كسرلى الاكصدام والكارتيره والطاسه وخرملى كاوتش ونزلت الاستبن فى اول 200 كم :(
لقيت الكارتيره ب 220 جنيه الاصليه .........................
والطاسه ب 250 جنيه ...............................
والاكصدام ب 700 جنبه ...................
والكاوتش طبعا مش موجود
صلحت الاكصدام واشتريت كارتيره وعوضى على الله :(
اتمنى اكون افدتكم وبصراحه العربيه دى الى يرتبط بيها اوى يخاف عليها ويزعل من اقل حاجه تحصلها وانا بصراحه فى المود دا دلوقتى تقريبا كل يوم لازم احج حوليها علشان الخدوش والكلام دا من حبى فيها ههههههههههههه

[د.محمود صلاح]

تقييم مميز ,, ربنا يبارك له فيها .

[asemx1]

تقييم مميز ,, ربنا يبارك له فيها .

ربنا يخليك يا باشا واى خدمه عايزها اسال :)

[asemx1]

وعايز اضيف ان العربيه حاجه
1- بلاحظ لما تنقل على d بتلاقى نتشه حتى لو ضاغط على الفرامل بس مش عيب اوى
2- سحب العربيه ممتاز جدا فى الطلعات بعكس الانسر واى حاجه بس المشكله بقى ان فى الركن والزحمه بتبقى رخمه بتضطر تستخدم الفرامل
3- ( المرايا بتاعت الصالون دى فااااااااااكس مفروض تتشال وتتحط مكانها كاميرا احسن علشان ابعاد العربيه لايمكن انك تقدر تشوف الى وراك وانتا بتركن لارتفاع العربيه ) ودا عيب اكيد كل الناس عارفاه للى عندها ياريس والحل تركيب كاميرا عند المارشيدر

[BLOODY_STONE]

طب هو ال دي في دي اللي بكاميرا حضرتك ركيته بكام؟

[Hisham1]

1- تركيب دى فى دى مكان الكاسيت العقيم الى كان فيها وكاميرا مع المارشدير
2- تركيب انزار بروافع للزجاج على نفس المفتاح بدون فصل السكيرتى بتاع الماتور
:d

تقييم ممتاز وهي فعلا سيارة ممتازة وتستاهل فلوسها وماينفعش تقارنها بالكوري
1-ممكن أعرف ال دي في دي اللي بالكاميرا نوعه ايه وبكام ومنيين واذا في صور تبقى مشكور
2- ازاي بيتركب الانذار على نفس الريموت الأصلي للسيارة وشكرا

[asemx1]

طب هو ال دي في دي اللي بكاميرا حضرتك ركيته بكام؟

الدى فى دى نوعه AVH-p4150dvd بايونير متركب على كاميرا ريد اى علشان الروئيه فى الضلمه مكلفتى الاتنين على بعض 3500 جنيه

تقييم ممتاز وهي فعلا سيارة ممتازة وتستاهل فلوسها وماينفعش تقارنها بالكوري
1-ممكن أعرف ال دي في دي اللي بالكاميرا نوعه ايه وبكام ومنيين واذا في صور تبقى مشكور
2- ازاي بيتركب الانذار على نفس الريموت الأصلي للسيارة وشكرا

الدى فى دى نوعه AVH-p4150dvd بايونير متركب على كاميرا ريد اى علشان الروئيه فى الضلمه مكلفتى الاتنين على بعض 3500 جنيه
والانذار دا معرفش نوعه بس موجود عند ادريان وبيتركب على المفتاح الاصلى
يعنى لو عندك المفتاح الى فيه الريموت تقدر تشغل وتطفى الانزار منه مش عن طريق ريموت خارجى
كان مكلفنى بالروافع بتاع الازاز والتركيب 400 جنيه
اى استفسارات تانيه ؟؟

[megamoudy]

ااااااااااااااه واااااااااااااااااااااااه من الياريس عربية تحفة ف سواقتها بعشقها بجد

سلسة ف سواقتها وممتعة بعد ماتسوقها تحس انك عاوز تخترع اي مشوار عشان تنزل تسوقها تاني وتالت ورااااااااابع وخامس بعشق العربية دي

[ahmad--ezzat]

اليارس عربيه جميله وواحسن ميزه فعلا ان لا ظهر اصوات شخلله ولا اى حاجه

[kisho55555]

عربية جمياة وروعة ... سوا من استهلاك البنزين او السحجب ... بس انا مش بحب التابوة اللى فى النص يمكن عشان انا مش متعود عليه .. وبرده شكل الكبوت اللى عامل زى الجبنه النستوه ...

لكن فى المجمل عربية جميلة جدا ...

[mohamedhamam]

شكراً على التقييم المحايد و ربنا يبارك فيها