مشكله عويصه يا رجاله

[dr.amr]

السلا عليكم......
انا أمتلك نيو النترا 2007 عدادها عامل 10 الاف كم
بس يصراحه مش واثق فيها
هي جيده بلا شك
بس انا عايز ابيعها واجيب ياريس
ما رأيكم..............
مع العلم ان ابن عمي معاه ياريس هي جميله سوقتها
حسيت ان هي ملمومه كده وصغيره +انها ياباني
لدي كذا استفسار
1-الالنترا بتاعتي تعمل كام دلوقتي.
2-من الافضل ياريس ولا النترا
3-ياريس مانيوال ولا اتوماتيك
غبور ده مزبله مش توكيل .توكيل تويوتا رائع
انا عايز عربيه تعيش مش للمنظره

شكرااااااااااا لاهتمامكم
د/عمرو

[أبو عبدالله]

ممكن تلكمنا الاول عن الألنترا وليه سبب التغيير
مع ان الناس هنا كتير كانوا بيشكروا فيها قوي

وليه غبور مزبله لأن لما بنقول كده الناس بتقولنا ان احنا مبالغين ؟؟؟؟؟؟؟؟؟؟

[dr.amr]

اولا:غبور مزبله وده شيء معروف
انا اروح اغير الزيت واربط العفشه ادخل بالعربيه الساعه 8 اخرج بيها الساعه3 اوممكن توصل ل4 كمان
وبعدين كل الملاحظات اللي بكتبها لهم بينفضولها
لازم انزل اتخانق معاهم علشان يعملوا
طيب انا مره كان وش الكاسيت مكسور قلتله يغيروا قالي مش موجود ولكن لما روحت اعمل الصيانه بواصته المره اللي بعديها ركبهولي من غير ما اقوله(حاجه تقرف)
وبعدين مركز قليوب ده تحس انك قاعد في غرزه مش في مركز صيانه

اما توكيل تويوتا الصراحه حاجه نضيفه بجد ودينا العربيه الساعه 10 خرجنا 12
حاجه فل
وبعدين اللي بيستلم منك العربيه عارف فيها ايه وعارف اذا كان اللي بتشتكي منه ده عادي ولا عيب

اقولك الفرق بين الهيونداي والتويوتا في كلمتين
التويوتا trouble free car
اما الهيونداي فكل شويه يطلعلي فيها عيب حتي ولو كان صغير

[dr.amr]

عايز ارائكم يا رجاله

[ماجد يوسف وهبه]

طب أنت كنت من المحظوظين اللى طلعت بدرى الساعة 3 دانا يا محترم دخلت الساعة 10:30 صباحا خرجت السعة 8:30 مساءا يعنى مع العمال اللى مروحيين بيوتهم وايه واخد ميعاد حجز مسبق وكنت بعمل صيانة ال30000 كم وبعض الملاحظات البسيطة (اريال بيعلق، ضبط زوايا) مش عمرة موتور يعنى. والكلام ده فى أبو رواش

ده أحد الأسباب الرئيسية اللى خلانى ابيع العربية هو التوكيل

نصيحة لو ماعندكش مشاكل جامدة كارتك مش وحش ابدا بالعكس كفاية الأهتمام والمقابلة

[mohaismail]

اكيد غبور فااااااااااااااااشل بس صعب اوى تنزل من النترا لياريس طيب متشوف كورولا او صنى عربيات محترمة والتوكيلين انضف من بعض

[mhm]

طيب اية رايكم فى البيجو 307 او ال207

[Abonora]

طيب اية رايكم فى البيجو 307 او ال207

البيجو رووووووووعه لكن قطع غياره نااااااااار
و سمعت ان سعرها فى اعاده البيع بينزل خالص
دى نصيحه سمعتها من ناس كتير لانى كنت حابه اشترى 207
بصراحه تجنن و كنت منتظراها من قبل متنزل مصر شفتها من سنه تقريبا و هبلتنى
307 برضو جميله بس عائليه
و الله اعلم

[volcano12]

من وجة نظرى و ده رأى

احمد ربنا على اللى انتا فيه, الالنترا عربيه كويسه جدا , اليارس كاتيجورى أقل منها! و متقلقش من الكورى أنا شايف انه ماشى كويس و حاجته رخيصه. لو جت على يوم الصيانه معلش استحمله كل 6 شهور و لا سنه ده هوا يوم على حسب استخدامك, بس ده ميخليكش تكره العربيه...

عربيتك اثبت و أقوى فى الموتور!
وفر فلوسك بدل ما تخسر فيها و العربيه مشتكتش, لسه 5 سنين كمان و ابقى بيعها و الله الموفق

و ابقى استخير ربنا كويس :)

[hazem_khidr]

حرام تبيع العربيه و هيا تعتبر زيرو بالمنظر دا.
و زي ما الاخوه قالو حتخسر فيها كتير مش اقل من 7 الاف جنيه من وجهه نظري
طب و ليه؟علشان التوكيل اهو يوم و يعدي.
دا رايي و انت حر.
بالنسبه للياريسفهي عربيه كويسه جدا بس دي فئه و الالنترا فئه تانيه حتحس انك مخنوق لو نزلت من كبير ركبت صغير

[crazyspicy]

السلام عليكم

السلام عليكمً يا دكتور عمرو انا بأيدك فى تغيير الالنترا لانها فيها انا شايف أخطر عيب من وجهة نظرى واكيد من وجهة نظر كل اللى معاهم عربيات

أولا صاج السيارة ضعيف وعدم وجود سيفتى بار كافية بالعربية على ضخامة الحجم النسبية

ثانياً والاهم ان الدريكسيون مش على علبة باور انما طلمبة كهرباء وده مخلى الباور عالى جدا عن اى عربية تانية بس مشكلته فى السفر والسرعات العالية انك لما تحط ايدك على الدريكسيون بتفقد ثبات العربية لان الباور بتاعها مبيفصلش على السرعات العالية

[crazyspicy]

فولكانو باشا

انت بتقول ان الياريس كاتيجورى اقل وده انا معاك فيها لكن بجانب كده الياريس هاى تكنولوجى لان المحرك بتاعها dohc مزود بعدد 2 كامة علوية متوازية وبتحول الموتور لتكنولوجى dual vvti اللى يخلى الياريس على سعتها اللترية 1300 تولد 92 حصان وده صعب جدا تلاقيه فى اى عربية تانيه مع العلم ان الياريس اوسع صالون بعد الهيونداى ماتريكس والكبوت قصير فمعامل الدوران اعلى بالنسبة لموقع جلوسك بالسيارة

[volcano12]

فولكانو باشا

انت بتقول ان الياريس كاتيجورى اقل وده انا معاك فيها لكن بجانب كده الياريس هاى تكنولوجى لان المحرك بتاعها dohc مزود بعدد 2 كامة علوية متوازية وبتحول الموتور لتكنولوجى dual vvti اللى يخلى الياريس على سعتها اللترية 1300 تولد 92 حصان وده صعب جدا تلاقيه فى اى عربية تانيه مع العلم ان الياريس اوسع صالون بعد الهيونداى ماتريكس والكبوت قصير فمعامل الدوران اعلى بالنسبة لموقع جلوسك بالسيارة

ماشى أنا معاك و انا كمان بحب الياريس اليابانى ... بس برده حرام تتقارن مع الالنترا الجديده 121 حصان و 1600 ... يبقى أكيد الالنترا أحسن

الياريس تتقارن مع اللى معاها فى السعر زى السيتى و الانسر و الاوبترا و الحجات ده اللى فى السعر ده أو قريب مع اختلاف الازواق و الاستخدام و الاحتياج و التوفير .... صح كده الكلام و لا غلط؟ :)

[TeMoON]

انا بتفق معاك فولكانو فى حاجات معينة ان الالنترا كا عربية كويسة مش وحشة بس انت بتشترى عربية اوك وبتشترى خدمة بردو والمفروض انك بتكون مرتاح معاها انا معايا بيجو 406 وعربية جميلة جدا وانا بحبها بس مضطر اغيرها وبفكر اجيب اية وبعمل مقارنة ما بين الكورولا وما بين السيفك ولسة بفكر
انا عاوز اقولك حاجة يا دكتور عمرو بيجو جميلة جدا وعربية حلوة بس بتنزل دايما بعيوب احنا معاانا 406 و 206 العربيتين حلوين بس عيوبهم وحشة وغير كدا ال 307 اول حاجة بتبوظ فيها الفتيس والفتيس بتاعها غالى استيراد وقطع غيارها حرائة جدا بس هى كا عربية من ثبات وسرعة وكماليات وصالون تحفة بس انا انصحك انك تشوف عربية توكيلها محترم وبصراحة انا دخلت توكيل تويوتا كان محترم جدا معايا فى المعاملة على عكس توكيل بيجو بهدلة دلوقتى انا ابن خالتى هو الى بيعدل ورا بتوع التوكيل انا بنصحك لو تقدر تجيب كورولا يكون احسن مع انى بعشق الاوربى اكتر من اليابانى بس انا قلت اجيب عربية حلوة وتتحمل زى الكورولا بس لو كدا انت راجع تفكيرك ورتب افكارك وشوف انت هتعمل اية فى الاخر لان القرار فى الاول وفى الاخر ليك انت

[Noha.M]

ايه ده حراااااااااااام :(((

انت لاقي فلوسك في الارض ؟؟؟؟؟ ماشي تويوتا محترم و كل الكلام دة بس انت كدة بتنزل و فئة تانية خالص و هتخسر و بعدين ما انت هتلاقي برضه عيوب بسيطة استحمل و خلاص و خليك ماشي بالواسطة اللى عندك و ربنا معاك
ما انا كانت عجبانى النيو اكسنت بس قلت تغووووووووور و يغور غبووووووور p: