محتاج مساعدتكم فى تسعير كورولا موديل 94

[elshreef_hemo]

قدامى تويوتا كورولا بتاعت واحد معرفة ، العربية موديل 94 زيتى ميتاليك ، منيوال 1300 ، فابريكة دواخل وراشة برة بالكامل ، ماشية تقريبا 150000 كيلو ، أتعملها صيانة للموتور فى التوكيل ( مش فاكر عمرة والا وش سليندر ) ، مش فيها كماليات ، بس مش محتاجة أى مصاريف وحالتها العامة كويسة من الداخل والخارج .
يا ترى تسوى كام ؟؟؟ علشان صاحب العربية معرفة وهتكسف أفاصل معاه
ولو عايز أركبلها كماليات ( أزاز كهربا وجنوط ) هيتكلفوا كام؟ وشكراااااا

[Ahmed Galal]

فى شهر 8 سنة 2007 جبت عربيتى ب 50 الف يعنى داخلة فى 3 سنين و كمان كانت عاملة 200 الف كيلو فديه بيتهيا لى تعمل من 45 ل 50 مع احتساب ال 3 سنين الفرق و تركيب ازاز كهربا لو من بتوع المحلات مش عارف كام لكن الصح بتاعها تجيب باكتتات ابواب بالكنترول بتاع لازاز و توصل عند حد محترم عشان تبقا حلوة انا هاعمل الموضوع ده ان شاء الله و الجنوط حسب سعر السوق بس هيا حلوة بدون جنوط

[elshreef_hemo]

شكرا يا احمد باشا على معلوماتك هوة الراجل فعلا طالب فى العربية 50 الف بس انا مستغليها أوى على الموديل ده ، بس هحاول أنزل فيها شوية ، طب وموضوع الموتور ، أزاى أتاكد بنفسى أن حالته كويسة ؟؟؟ وسؤال تانى معلش .. هوة صحيح قطع غيار التويوتا غالية؟ يعنى أغلى من الكورى بكتير؟

[Ahmed Galal]

شكرا يا احمد باشا على معلوماتك هوة الراجل فعلا طالب فى العربية 50 الف بس انا مستغليها أوى على الموديل ده ، بس هحاول أنزل فيها شوية ، طب وموضوع الموتور ، أزاى أتاكد بنفسى أن حالته كويسة ؟؟؟ وسؤال تانى معلش .. هوة صحيح قطع غيار التويوتا غالية؟ يعنى أغلى من الكورى بكتير؟

هوا فيه ناس بتبقا لسه ماسكة فى السعر ده يمكن عشان ماشية قليل شوية و المكنة ممكن تقيس كبسها و كمان بيبان من سحب العربية و لون العادم و هيا واقفة و تسريبات الزيوت حولين المكنة و الاهمال العام هاتلاحظة و يبقا معاك ميكانيكى كويس
و طالما العربية فبريكة من جوة هاتبص تانى بردكك على الدواخل كلها (حرص و لا تخونش يعنى)
و العفشة كمان شيك عليها هيا حمالة اسية لكن لما بتقع عفشتها بتصرف كتير

اما بقا قطع الغيار فى من كل شكل و لون (اصلى-استيراد-تايوانى-صينى) يعنى على قد ميزانيتك بس فى كل الاحوال اغلى من الكورى فى الاصلى بتاعها و قريبة منه فى التقليد و اليابانى و هاديك اسعار على ما اتذكر

فلتر زيت اصلى = 50 جنيه
طقم بوجيهات دنسو = 40 جنيه
فلتر هوا اصلى = 90 تقليد = 40
فلتر بنزي اصلى = 40
سير كاتينة اصلى = 220 تقريبا
بلية كاتينة = 50
اويل سيل كرنك او كامة او طرمبة زيت = 30
طرمبة زيت = 220
سير دينامو اصلى = 60 جنيه
غطا ردياتير اصلى = 65 تقليد يابانى 25
طقم مساعدين امامى اصلى = 1300 استيراد 400 تقليد يابانى 600
طقم خلفى مساعدين = نفس الكلام بتاع الامامى
علبة دركسيون اصلى مانيوال = 2200 استيراد 600
بيض عجل امامى اصلى 150
بارات علبة دركسيون خارجى اصلى 160
تيل فرامل امامى اصلى حوالى 270 تقريبا و الخلفى قريب منه
اسطوانة و دسك و بلية حوالى
كشافات خلفى استيراد 250 الواحد
الكشاف الكبير اللى بعرض الشنطة و عليه كلمة كورولا = 250 استيراد
فوانيس اشارة امامى سواء فى الاكصدام او جمب الفانوس الرئيسى الواحد 25 تايوانى
قواعد ماتور و فتيس القاعدة الواحدة بتتراوح من 150 ل 300 حسب حجمها
ده كل اللى قدرت اعصر دماغى فيه

بس ملحوظة للعربية ديه بالذات لازم تكون انت غاوى و عايز تركبها و هاتهتم بيها و ما تبخلش عليها و بعدها اركب و انسى

[elshreef_hemo]

والله يا باشا مش عارف أقولك أيه ، فعلا أفدتنى كتير خصوصا فى مسألة قطع الغيار ، هية فعلا فى حاجات غالية شوية فيها ، بس أنت نسيت تكتب سعر طقم الدبرياج ، وكمان كنت عايز أعرف أسعار البيبان والاكصدامات والرفارف والكبوت .
والله مخبيش عليك أنا فى حيرة من أمرى ، محتار بين الكورولا دى وبين عربية فيكترا معروضة عليا برضه ، بس 2000 سى سى اوتوماتيك ، خصوصا وأن الفيكترا سعرها أقل من الكورولا بحوالى 10000 جنيه ، بس الكورولا قطع غيارها ومصاريف تشغيلها أرخص .... أنت رأيك أيه يا محمد باشا ، انا خلاص قربت أتجنن

[Ahmed Galal]

و لا تحير نفسك و لا حاجة الدبرياج الطقم اصلى ب حوالى 700 جنيه اما بالنسبة للفكترا العربية مش وحشة بس خلى بالك انك هاتخش فى شريحة ضريبة و ترخيص اعلى و هاتستهلك بنزين اكتر لكن قصاد كده الفكترا اثبت شوية من الكورولا و تقفيلها هايبقا حلو لو المانى لكن فيها مشكلة باسمع عنها و هيا التبريد و تكييفها مش هايبقا زى الكورولا
الخلاصة الكورولا نعومة و اعتمادية و اقل فى المصاريف
الفكترا القوة الالمانية و مصاريف اكتر
اما اجزاء البودى انا الحمد لله ما اتعرضتش ليها بس هاتبقا فى الحدود بتاعت الكل يعنى مش غالية
و فى الاخر ربنا هايوجهك للى نصيبك فيه بس انا شايف الكورولا احسن

[Omar.Shawki]

اعتقد 50 الف كتير قوى قوى عليها انا معايا الموديل 98 وسعرها فى السوق مابين 45-50 الف حسب الحالة