مع احترامي لملاك كرولا الجديدة

[Medo007]

السلام عليكم ورحمة الله وبركاته

ازيكم يا شباب يارب تكونوا بخير

انا عايز احكي لكم على موقف حصل النهرده غريب شوية


بس في الاول عايز اوضح حاجة مهمة انا لا بسوء سمعة تويوتا كرولا ولايحزنون

انا بحترمها جداااااااا بس خلاص مبقتش احترم الموديل الجديد اللى هو بتاع جنوب افريقيا ناقل حركةMMT


اللى حصل كالتالى في المقطم وانت نازل من فوق رايح للاتوستراد


فيه في النص في الجزيرة كده نجيلة ركنت عندها انا وصحبي مستنيين واحد صحبنا جاى




وفيه نازلة والطريق لافف الاقي كرولا ماشية في امان الله


اول ما جت عن اللفة دي وهو واخد اللفة طبيعي مش على سرعة عالية


قامت فاقدة التوازن بتاعها وعومت منه راحت يمين شمال يمين شمال وقامت طالعة عالرصيف واستقرت على تلات

عجلات


المهم رحنا للراجل سلام عليكم خير ان شاء الله وسلامات


لقيت الراجل مندهش وبيقول انا ربنا كتب لى عمر جديد العربية كانت هتتقلب بيا الحمدلله انها جت على قد كده


وبعد كده قبل ما اكمل كلامي قال ماهي عربية بنت كلب وانا شربت مقلب فيها وانا قايل لبتوع التوكيل دي هتموت ناس وانا عارف كده


قلت له فيه ايه ؟؟!!



قالى انا جاي عند اللفة في امان الله واخد حارتي وبحط رجلى على الفرامل عشان اهدي على المنزل


مفيش فرامل قعدت ادوس ادوس مفيش فرامل خالص


والعربية قامت معومة مني والف الدركسيون في حتة والعربية تلف في حتة تانية لغاية ما طلعت بيا عالرصيف والكوتش اللى قدام عاليمين اتقطع


حرام بجد والكوتش نوعه كونتنتال الماني نوعه جميل يعني


المهم قلت له الحمدلله انها جت على قد كده وكويس انك مكنتش ماشي بسرعة


وقالى ده توكيل زبالة رحت الاسبوع اللى فات


وقالوا غيروا حاجات كانوا عاملين اعلان عنها مش عارف دبرياج وحاجات كده والعربية بقت اوحش من الاول حتى




وبعدين انا عارف عيب العربية دي كويس بس عرفت بعد ما جبتها قلت له ايه العيب



قالى العربية الفتيس بتاعها فيه مشكلة


المهم اللى فهمته منه انها بتسحب بمزاجها يعني سحبتها خنيقة ممكن ادوس بنزين وانا ماشي على 70



متزدش خالص ولاكانك دايس بعد كده اما تستجيب تقوم جايبة ضغطة رجلك


وراح التوكيل والمهندس جربها معاه وبيقول ركبها



مشي بيها على 130 قاله ماهي زي الفل اهي قاله تمااااااام فرمل شوية عشان العربية اللى قدامك دي فرمل



قاله دوس بقى المهندس جيه يدوس عشان يزود السرعة فعلا العربية مش عايزة تزيد



قالى بقى منظره وحش وبقت اقوله متزود يعم اتصرف

افتح الباب وزقها برجلك


المهندس قاله لالامعاك حق دي مشكلة في الكمبيوتر وعايز يتبرمج


فعلا صلحه العيب ده وبعد اسبوع رجع زي ما كان



المهم ياشباب انا بعد ما حكالى عن كل العيوب دي استغربت جدااااااااااااا


اما تويوتا كده يبقى خلينا ايه للهينونداي والكيا وغيره!!!!



المهم الراجل قبل ما امشي قلت له اساعدك قالى لاااااااااااااا مش هعمل حاجة خالص اهم حاجة دلوقتي هعمل محضر باللى حصل وبعته للنيابة وهفضح تويوتا ان شاء الله وهطلع عينهم




قلت له ربنا معاك


وسلام عليكم


بس بصراحة من بعد ما سبته كل ما كرولا تقابلنا خلاص


سقطت من نظري



يالا ربنا يستر طريقكم يا اصحاب الكرولا وطريقنا كلنا ويريت تتجمعوا وتشتكوا لحماية المستهلك


بجد لازم تعملوا حاجة



في رعاية الله

[zahaan]

انا شايفها عادى جدا مع انى مش من ملاك تويوتا اساسا بس اى نوع عربيه فى الدنيا ولازم يحصل فيه حالات فرديه وده لا يقلل من جمال الكورولا

العيب هنا مش فى الكورولا العيب فى توكيلها و طبعا كل توكيلات مصر كده عايزة الحرق بس مش بجاز علشان دلوقت اغلى من البنزين ال80 .عايزين الحرق ببنزين 80 علشان خساره فيهم الجاز


وسوء التوكيل لا يقلل من شان العربيه كعربيه هو يقلل من سوقها و اعاده بيعها و قطع غيارها انما لا يقلل من العربيه نفسها

[ahmedbeirut123]

الكورولا لما كانت كويسة لغاية الشكل القديم بتاع من 2002 ل 2007

كانت بيتضرب بيها المثل فسعر اعادة البيع المرتفع

دلوقتى اللى بيجيب كورولا بيخسر 20 و 30 الف فالسنة الوادة

[محمد محمد]

هو حضرتك ازاي حللت الموضوع بأن السبب عيب في العربية وكمان عيب عام في الكورولا الجديدة؟علي اي اساس يعني؟.

[ahmedhee]

ممكن كل شئ واردفي اي سيارة.بس دي اول مرةاسمع حديشتكي من سحب mmt علي كل عيوبها.
ثانيا ممكن موضوع السحب دا يحصل لو السائق نزل بالسرعة و فضل على الخامس. انما ضغطةواحدة او ضغطتين علي ريش (-) ممكن تخلي الغربية صاروخ.

[sab3aawy]

هو بس انا فيه حاجة صغيرة كدة مش فاهمها

هو يه علاقة الفرامل بال mmt بالسحب؟

[محمد محمد]

هو بس انا فيه حاجة صغيرة كدة مش فاهمها

هو يه علاقة الفرامل بال mmt بالسحب؟

+ ايه علاقة الmmt بالطنابير والمساعدين والكوبلن وتيل الفرامل

[sigma]

من الواضح إن تقصير الشركه -ممثله فى التوكيل - فى شرح طريقة قيادة العربيه ولو حتى بإستخدام كتالوج مطبوع وشرح طريقة إستخدام دواسة البنزين وريش الفتيس الموجوده بالدركسيون فى زيادة النقله أو خفضها للتحكم فى سرعة السياره جعل المستخدم المتعود على قيادة الأوتوماتيك العادى يفشل فى قيادة السياره بدليل إن الأخ المشارك بيقول إنه داس على دواسة البنزين ولم تزيد السياره من سرعتها وكانت مخنوقه وكان الحل لهذا الطراز إنه ينزل بالنقله عن طريق الريشه اللى عليها علامة (-) وساعتها العربيه كانت حتسحب معاه زى الهوا علما بإن مجرد لمس الفرامل والعربيه على سرعه عاليه بتخلى السياره تنزل بالنقله تدريجيا علشان كده عند المطبات الصناعيه بتكون العربيه نزلت للنقله (الغيار 1) وعليه بعد عبور المطب مثلا يلزم للسائق تعلية النقله للغيار 2 بإستخدام الريشه (+) وكل تزويد أو تقليل للغيار يكون مصاحبه رفع القدم عن دواسة البنزين
طبعا من يقرأ هذا الكلام يحس إنه شغلانه ولكن مع التدريب فى خلال يومين بالكثير بتلاقى نفسك سايق عربيه مانيوال مريحه بدون إستخدام دواسة دبرياج
كمان يوجد الوضع es الذى يجعل التنقل بين الغيارات يتم بجوده أفضل من الوضع e ولكنه يستهلك بنزين أكثر شويه بالمقارنه بالوضع e
أرجو أن أكون أفدت حد من الملاك يكون بيقرا أو بيشارك فى الموضوع ومايكونش عارف إنها عربيه مانيوال بدون دبرياج

[Medo007]

هو حضرتك ازاي حللت الموضوع بأن السبب عيب في العربية وكمان عيب عام في الكورولا الجديدة؟علي اي اساس يعني؟.

ياباشا انا محللتش حاجة بس فيه ناس كتيرة اوى اشتكت من ناقل الحركة MMT
اصحاب العربية والراجل ده من ضمنهم
وصاحب العربية اكتشف عيبها بعد ما اشتراها
وراح التوكيل يتفاوض معاهم على انهم ياخدوها بسبب المشاكل اللى قالها دي ولكن
مفيش استجابة

هو بس انا فيه حاجة صغيرة كدة مش فاهمها

هو يه علاقة الفرامل بال mmt بالسحب؟

اكيد مفيش علاقة بينهم
بس هو قصده انه الموديل الجديد بتاع الفتيسmmt فيه مشاكل كتير
وهو مكنش يعرف ان فيه عيب في الفرامل الا بعد ما حصل الكلام ده معاه
وانا مصدقه لان العربية عومت منه ودخلت في الرصيف ومسمعناش صوت فرملة خالص
فبقت مشكلة جديدة بالنسبة له

+ ايه علاقة الmmt بالطنابير والمساعدين والكوبلن وتيل الفرامل

زي ما قلت ياباشا لقيته بيذم فيها كلها
وقالى فراملها وحشة كمان


طبعا اما لقيته بيكلم كده قلت له انت ماجرها يعني ولا بتاعتك
قالى لا انا لسة شاريها

اصل انتو عارفين طبعا قليل اوى اللى بيذم في عربيته بالطريقة دي حتى لو عملت معاه اي

[محمد محمد]

حصل خير ياباشا صحيح فيه شكاوي من الفتيس بس مش كل الناس بتشتكي صحيح فيه عيوب بس مش في كل العربيات....انا عربيتي داخلة في 64000ك والحمد لله مغيرتش فيها غير حاجتين بس قطع الفتيس والطنابير الخلفية مؤخرا ....والباقي الحمد لله كله سليم.

[Medo007]

حصل خير ياباشا صحيح فيه شكاوي من الفتيس بس مش كل الناس بتشتكي صحيح فيه عيوب بس مش في كل العربيات....انا عربيتي داخلة في 64000ك والحمد لله مغيرتش فيها غير حاجتين بس قطع الفتيس والطنابير الخلفية مؤخرا ....والباقي الحمد لله كله سليم.

الحمدلله
ربنا يستر طريقك وطريقنا أجمعين
وممكن تكون عيب في السيارة دي بس يعني هو حظه كده

وشكرا

[omaroof]

العيوب اللى موجوده فى العربيه الكورولا معظمه فى العربيات اللى جايبها الوكيل بتاع مصر الا ان العربيه الخليجى الموجوده فى الخليج كله يابانى ولا يوجد بها اى شكوى
ورغم كدا اسعارها فى مصر ناااااااااااااااااااار

[Samir Elshahawy]

أنا مش فاهم ....
هو أشمعني مصر بس اللي بتشتكي من الكورولا الجديدة و بيقولوا فيها عيب في الفتيس ز ناس تانية بتشتكي من الياريس و تقول خفيفة و مش ثابتة

مع ان معظم الحوادث اللي بأشوفها علي الطرق لعربيات تانية مش تويوتا خالص و نسبة كبيرة منها مش ياباني

مع خالص تحياتي
م/ سمير الشهاوي

[asemx1]

ههههههههههه انا شوفت فى المنصوره عربيه كورولا زييييييييرو مقصها مكسور لواحده كدا بدون ما يخبط فى حاجه او مطب او اى حاجه دا ماشى فى امان الله وفجاه هوب مقص اتكسر :d عااااااااااشت كورولاااااااااا عاااااااااش عااااااااااش

[د.محمود صلاح]

الكرولا في الخليج الآن تايواني مش ياباني