تقييم أداء الياريس في السفر لمسافات طويلة

[Samir Elshahawy]

الاخوة الاعضاء الكرام ..

كل عام و حضراتكم و الامة الاسلامية بخير بمناسبة حلول شهر رمضان الكريم أعاده الله علينا باليمن و البركات

في البداية كنت متردد كثيرا في موضوع السفر بالسيارة في مثل هذا الطريق الطويل و في مثل هذا الجو الحار و لكن نظرا لضييق الوقت لم أستطع تدبير سيارة أخري أو حجز طيران و لأن لدي ثقة كبيرة في سيارتي توكلت علي الله و قررت السفر بها الي الغردقة و لكني اخذت بعض الاحتياطات بالطبع تمثلت في تجهيز السيارة للسفر كالتالي :
1- غسيل جسم السيارة الخارجي و غسيل الاطارات
2- غسيل الموتور و علي وجه الخصوص شبكة الردياتير
3- تنظيف فلتر الهواء
4- الكشف علي مستوي السوائل (مياه تبريد - مياه غسيل الزجاج - زيت المحرك - زيت الاوتوماتيك - زيت الفرامل - مياه البطارية)
5- الكشف علي الاطارات و ظبط ضغطها
6- التاكد من سلامة الانوار و الاشارات
7- ملء خزان الوقود من محطة موبيل الرحاب قبل التحرك

.... بدء التحرك :
بالفعل تحركت في صباح يوم الجمعة الموافق 6/08/2010 في حوالي الساعة العاشرة صباحا متخذا الطريق الدائري و منه الي طريق القطامية / السخنة الي الغردقة

- الطقس : درجة الحرارة مرتفعة جدا (أكثر من 38 درجة مئوية)
- الرياح : متوسطة و لم تشكل مقاومة ألا بعد الزعفرانة
- المسافة : 485 كم من القاهرة (الرحاب) الي بداية خليج مكادي
- الزمن المفترض للوصول : 4,5 ساعات
- الحمولة : أنا و زوجتي و اطفالي الاثنين + 5 حقائب و عربة أطفال متوسطة بأجمالي وزن = 80 كجم

أولا السرعة علي طريق القطامية / السخنة كانت في البداية 120 كم/ساعة و لكني زدتها بعد ذلك الي 140 كم/ساعة حسب حالة الطريق و لكن للأسف قبل نهاية الطريق بحوالي 6 كم ألتقطني أحد الرادارات علي سرعة 133 كم/ساعة مما دفعني للألتزام بالسرعات طوال الطريق

.... تجربة الياريس علي الطريق :
- التسارع و السحب : جيد جدا مع تشغيل التكييف و خاصة في المطالع
- الثبات و الاتزان : جيد جدا خاصة في منحنيات السخنة / الزعفرانة التي قطعتها في أقل من 40 دقيقة بمتوسط سرعة 120 كم/ساعة
- القدرة علي التخطي : كنت متخوف جدا من قدرة الياريس علي التخطي خاصة في منحنيات السخنة و أن السيارة لن تسعفني لذا كنت حريص جدا في تخطي السيارات و مع ذلك وجدت قدرة عالية لمحرك الياريس علي الاستجابة في بعض الفترات و لكن مع ذلك كما قلت لم احاول أن ادخل في مجازفات غير محسوبة
- التكييف : هنا كانت المفاجأة أن زوجتي كانت تطالبني بتخفيض التكييف لأن درجة الحرارة داخل السيارة كانت منخفضة جدا بالرغم من أن سرعة المروحة كانت علي 2 و بالغم من أرتفاع درجة حرارة الجو

.... الراحة و صلاة الجمعة ..
في تمام الواحدة وصلت الي مدينة رأس غارب حيث توقفت لأداء صلاة الجمعة و نيل قسط من الراحة دامت لمدة ساعة تقريبا أستانفت بعدها السير الي الغردقة
خلال فترة التوقف قمت بفحص سريع علي الاطارات و الاطمئنان ان درجة حرارتها معتدلة كما تاكدت من ثبات مستوي مياه التبريد و ان الجو الحار و السرعة لم تؤثر

.... الوصول الي الغردقة:
فعلا في تمام الرابعة ألا الربع وصلت الي القرية التي كنت أقصدها بخليج مكادي بعد ان قطعت بالفعل 483 كم أستغرقت مني قرابة ال 6 ساعات بتاخير زمني قدره 1,5 ساعة بسبب التوقف لمدة ساعة برأس غارب و نصف ساعة اخري بسبب التوقف في كمين الطريق بعد ان ألتقطني الرادار ليصبح الزمن الفعلي هو 4,5 ساعات و هو معدل طبيعي جدا

.... رحلة العودة :
يوم الثلاثاء عصر تحركت في أتجاه العودة و لكني مررت بمدينة الغردقة للأطمئنان علي الاطارات بمركز بريدجستون و ظبط الضغط و ملء خزان الوقود

بالفعل تحركت من الغردقة في تمام الخامسة بعد الظهر و لم يكن هناك أي اختلاف عن رحلة الذهاب سوي وجود هواء شديد جدا علي طريق الغردقة / رأس غارب و مع ذلك لم يتأثر الثبات كثيرا رغم السير بسرعة 120 كم/ساعة

المهم وصلت الي القاهرة في تمام الساعة التاسعة و النصف بعد التوقف لمدة نصف ساعة في العين السخنة للراحة أي أنني قطعت المسافة في حوالي 4 ساعات نظرا لرفع معدل السرعة الي مافوق ال 120 كم/ساعة معظم فترات الطريق بحد أقصي 150 كم/ساعة

.... تقييم أداء الياريس خلال الرحلة :
- الثبات : جيد جدا و خاصة كما قلت سابقا في منحنيات السخنة الصعبة و ظهر هذا الثبات مع السرعة في بعض هذه المنحنيات
- التأثر بالهواء : حتي سرعة 140 كم/ساعة لم يكن هناك تاثير خطير مع وجود رياح شديدة نسبيا و لكن علي سرعة 120 كم/ساعة ثبات العربية و اتزانها ممتاز
- التسارع و السحب : الي حد ما يكون تسارع الياريس منخفض خاصة في المطالع و مع تشغيل التكييف و لكن عند ايقاف التكييف يحدث تحسن نسبي في التسارع
أما في المواقف الطارئة التي تستدعي تخطي سريع فأن تسقيط نقلات بشكل يدوي هو أكثر فعالية من الكيك داون
- التكييف : ممتاز خاصة مع الصيانة و تنظيف الشبكة الامامية بأستمرار
- أستهلاك البنزين : الكمية اللي مونتها قبل المغادرة من القاهرة كانت 38 لتر (بنزين 92) عملت معايا 520 كم بسرعة متوسطة 110 كم/ساعة مع التكييف
و في العودة تم تموين نفس الكمية و عملت 490 كم بسرعة متوسطة 120 كم/ساعة مع التكييف مع مقاومة هواء في رحلة العودة

كدا بحسبة بسيطة لتر البنزين بيعمل 13.7 كم علي سرعة 110 كم/ساعة
و بيعمل 12.9 كم علي سرعة أعلي من 120 كم/ساعة

- الراحة في السفر : بصراحة الصالون واسع و مريح و لم نشعر بعناء في السفر طوال هذه المسافة

كده تقييمي للياريس أنها سيارة تصلح للسفر بدرجة جيد جدا

معلش أسف علي الاطالة و لكن قلت انقل لكم التجربة و أرد علي كل اللي شككوا في قدرة الياريس علي انها تكون سيارة تصلح للسفر

و كل عام و حضراتكو بخير

مع خالص تحياتي
م/ سمير الشهاوي

[Ahmed A Rahman]

الف مبروك يا باشا انا كنت واثق ان العربية دي كويسة لاني بحبها جدا

بس داحنا طلعنا جيران بقى

انا ساكن في الخامسة

[Samir Elshahawy]

الف مبروك يا باشا انا كنت واثق ان العربية دي كويسة لاني بحبها جدا

بس داحنا طلعنا جيران بقى

انا ساكن في الخامسة

خلاص ممكن نتقابل بقي , حضرتك بتصلي التراويح فين ؟؟

[asemx1]

بسم الله ماشاء الله وحمدلله على السلامه انا عملت قبلك رحله لشرم الشيخ
وقعدت 4 ايام هناك وجيت
عملت فيهم 3000 كيلو هتقولى ليييييييه
هقولك رحت شرم وبعدين دهب وبعدين نويبع وطابا واخيرا سانت كاترين
كل مشوار برجع تانى لشرم مش ببات الا فى شرم فقط
وبصراحه بسم الله ماشاء الله ثبات وسرعه ونعومه وكل حاجه فى المطالع الرهيبه بتاعت سيناء

[myself112]

حمد لله على السلامة , و كل عام و حضرتك بخير ....
ربنا يباركلك فى الياريس لانها فعلا سيارة محترمة .......

[sam_zen_elden]

حمد لله على سلامتك والياريس سافرت بيها من اسكندرية لشرم سنتيين على التوالى واحترمتها جدا فى السفر بالنسبة لموتور 1300 اتوماتيك وحجمها فهى عظيمة

[asemx1]

ياجماعه انا عملت 30 الف كيلو فى سنه الا شهر بسم الله ماشاء الله ممتازه
قولوا بسم الله ماشاء الله علشان النق بس هههههههه

[حاتم سليم]

عزيزى م/ سمير الشهاوي

تقرير وافى و رائع

شكراً ...

[ابوشريف]

السلام عليكم

انا ايضا ذهبت من المنيا للغردقه حوالى 480 كيلو تقريبا

وكنت اسير بسرعه 160 الى 170 كيلوا فى طريق الشيخ فضل راس غارب لكن فى الملفات كنت بهدى ل120

بصراحه طريق جميل بمسافة 240 كيلو ليس فيها مطب واحد

والاجمل ليس به اى رادرات

لكن للاسف ليس به خدمات

اما الطريق الساحلى من راس غارب للغردقه به رادارات

كنت مشغل التكييف طوال الرحله ولم يؤثر مطلقا على سحب السياره

انا سيارتى 2008مانيوال

بصراحه سياره بعتمد عليها واقتصاديه ومريحه جدا ولله الحمد

[dr_mosab2081]

تسلم ايدك ع الريبورت دة يا باشمهندس
انا كنت محتار قوى ما بين الياريس واللانسر
بس بعد ما قريت التقرير دة ان شاء اللة نويت اجيب الياريس

[mcml_13]

طب ممكن اسأل حضرتك سؤال
اخبار العربية ايه لما بتيجى تعدى من جنب مقطورة او نقل على الطريق ؟؟؟؟؟
و معلش سؤال تانى لحضرتك ؟؟؟؟ لو حضرتك ركبت اى عربية تانية زى الكورولا و الصنى و الالنترا و البومة و السيراتو مثلا ممكن تقارنلنا الثبات بين الياريس و بين اى واحدة فيهم ؟؟؟ ده بس عشان نحكم على العربية صح لانى متأكد تماما ان الثبات ده نسبى و بيفرق مش من عربية لعربية بس لا ده من واحد لواحد كمان عشان طبيعة سواقة الناس مختلفة
و اسف لو طولت عليك

[Samir Elshahawy]

طب ممكن اسأل حضرتك سؤال
اخبار العربية ايه لما بتيجى تعدى من جنب مقطورة او نقل على الطريق ؟؟؟؟؟
و معلش سؤال تانى لحضرتك ؟؟؟؟ لو حضرتك ركبت اى عربية تانية زى الكورولا و الصنى و الالنترا و البومة و السيراتو مثلا ممكن تقارنلنا الثبات بين الياريس و بين اى واحدة فيهم ؟؟؟ ده بس عشان نحكم على العربية صح لانى متأكد تماما ان الثبات ده نسبى و بيفرق مش من عربية لعربية بس لا ده من واحد لواحد كمان عشان طبيعة سواقة الناس مختلفة
و اسف لو طولت عليك

أي عربية لو بتعدي من جنب نقل أو مقطورة بتحس أنها بتميل شوية ناحية النقل أو بعيد هنه حسب أتجاه الهواء علي الطريق فده طبيعي

لكن العربية مش خفيفة للدرجة اللي بتسمع عنها أن الهوا ممكن يشيلها يعني

أما الثبات فده نسبي زي ما أنت عارف و بيعتمد علي درجة تحكمك في العربية و معرفتك بأمكانياتها و علي الطريق , و اظن مافيش عربية هاتبقي ثابته علي الطرق بتاعتنا دي لأن دي مش طرق نحكم فيها علي عربيات أساسا

انا كان معايا لانسر 1300 قبل الياريس و ركبت برضه اللانسر ال 1600 و كمان جربت الصني و لكن الياريس انا سوقتها لأكثر من سنتين أما الباقي فأقصي مدة لأي عربية فيهم كانت شهر و ده مش كافي للحكم علي العربية و التمكن منها

لكن أقدر أقولك أن الياريس بالمقارنة بالعربيات دي كويسة جدا و تقريبا زيهم زي ماقولت و ده عن تجارب و مواقف مع العربية

مع خالص تحياتي
م/ سمير الشهاوي

[mcml_13]

لكن أقدر أقولك أن الياريس بالمقارنة بالعربيات دي كويسة جدا و تقريبا زيهم زي ماقولت و ده عن تجارب و مواقف مع العربية

و لو انى مش مقتنع بس عادى
الاختلاف فى الرأى لا يفسد للود قضية .... و سعيد بمعرفتك يا بشمهندس

[Samir Elshahawy]

و لو انى مش مقتنع بس عادى
الاختلاف فى الرأى لا يفسد للود قضية .... و سعيد بمعرفتك يا بشمهندس

أنا الاسعد بمعرفة حضرتك و التحاور معاك

سيبك انت ... العربيات زائلة و معرفة الناس و سيرتها الحلوة هيا الباقية