الى كل من يملك او يفهم فى كورولا 99 عيون

[bedo_15]

السلام عليكم يا اجمل اعضاء فعلا انا استفدت منكم كتير اوى ندخل فى الموضوع
انا كنت عاوز اركب تويوتا ولقيت واحده موديل 99 هى بتاعت ابو واحد صحبى بس هو بيقولى انها عاوزة صيانه يعنى والده بيمشى بيها كده من غير ما يغير اى حاجه يعنى هو قالى مثلا تغير بوجيهات وفلاتر وكده وقالى عاوزة فانوس اشاره فا ياريت لو حد يقدر يتمنلى الكلام ده كله طبعا يتمنلى الحاجات الاساسيه الى المفروض تتغير وهى اتوماتيك على فكره 1300 سىسى معروضه عليا 45000 فا انا لو هصرف عليها علشان تكون زى الفل هيكلفنى كام وايه رائيكم فى العربيه اصلا من ناحيه كل حاجاه مميزات وعيوب
وشكرا واسف للاطاله

[عصام غنايم]

نصيحه متجبش حاجه تصرف عليها

ومتخدش عربيه من وراء واحد مبيصرفش هتتعب اوى

[zrzr1]

بس يا استاذ عصام اي حد بيشتري عربيه لازم بيغيرلها زيوت وفلاتر وسيور وبوجيهات
لو الموضوع علي اد كده بس وحضرتك كشفت علي اساسيات العربيه ولقيتها تمام وتكيفها شغال
وموتور كويس والعفشه...
يبقي توكل علي الله

[mahmoudselim]

لو العربية اسايتها سليمة توكل علي الله واشتريها صعب انك تلاقي عربية في مصر دلوقتس اساسيتها سليمة انا دورت اكتر من 6شهور وشوفت بلاوي لحد ما ربنا اكرمني.
الطبيعي انك بتغير سيور وفلاتر وزيت وبوجيهات وكملن هتغير فانوس اشارة يعني حسبة 300 400 جنية . عادى
كشفت علي العربية واساسيتها تمام كدا فل لو طلع لا قدر الله مثلا مساعد فنش او سوست او اي شغل ميكانيكا اخصمها علي طول من ثمن العربية وخلي بالك اوي من علبة الدركسيون لانها تقريبا اغلي حاجة عاملة يمكن 3000 او اقل شوية واكشف علي الفتيس برضوا ضرورى وشوف الطنابير اخبارها اية والبطارية محتاجة تغيير ولا قدمها 6 شهور علي الاقل مثلا والكوتشاااااات شوف حالتها اية لقيتهم بيودعو اخصم تمنها فورا او تخليها يشتري هو . .. ومتتكسف من الكلام دا مع صاحبك لان اكتر المشاكل بتيجي من بيعة الصحاب.. ان مش بقولك كدا علشان ابعدك عن العربية بس حرص وخد بالك واتكلم في كل حاجة من غير احرااااج . والاهم جداااااااا انك تصلي صلاة الاستخارة قبل كل مرحلة بتعملها وبأذن الله الحاجة الكويسة يكون لك نصيب فيها.

بوجيهات: 40
فلتر زيت: 35
فلتر بنزين: 80 تايواني 250 اصلي
فانوس الاشارة : 25 تايواني
سير كاتينة: 220 (مش متأكد) اصلي طبعا (لو سير الكاتينة الاصلي بيفضل ل 60000 كم
بقيت السيور دينمو وتكييف حسبة 140
مساعدين امامي استيراد مع السوست 1000 جنية (المساعد الواحد عامل 400 جنية وانتا وشطارتك)
شوف كدا وطمنا واي حاجة انا تحت امرك

[bedo_15]

شكرا لكل الى رد وفادنى بمعلومه
وشكرا خاص جدا جدا للاستاذ محمود سليم الرد عاجبنى اوى وتفصيلى جدا
بس يسلام لو تقلى رايك فيها عمتا

[mahmoudselim]

شكرا لكل الى رد وفادنى بمعلومه
وشكرا خاص جدا جدا للاستاذ محمود سليم الرد عاجبنى اوى وتفصيلى جدا
بس يسلام لو تقلى رايك فيها عمتا

لا شكر علي واجب يا باشا
من حيث العربية فهي كويسة جدا يعبها بعض الاشياء
اولها عدم وجود سوق ليها مثل باقي الكورولا وتكاد تكون شبة منعدمة للموديل ال بعديها علي طول الرموش
صالونها ضيق حبتين.. قطع الغيار الخارجية قليلة شوية لاكن موجودة .. لو بتحب تجري وكدا الموتور ال 1300 مع الفتيس الاوتوماتيك مش هيغجبك خاالص. ثبات مش عالي لاكن كويس . . دي عيوبها تقريبا. اما موضوع الشكل فا متروك ليك

المميزات اولها انها تقريبا قايمة علي نفس شاسية الموديل ال قبلها (الملكة) يعني نفس العفشة الا في حاجات بسيطة زي المقصات مثلا ودا بيدها ميزة توافر قطع الغيار دي في كل مكان غير كدا العفشة معمرة جدا لاقصى درجة وبتستحمل البهدلة "في حدود المعقول"
استهلاك البنزين ممتاز وموفر جدا بتعمل 500 كيلو في التفويلة واكتر كمان او 180 ل 200 في الصفيحة. التكييف ممتاز , سعر اعادة البيع جيد جدا والمكانيكا بتاعتها بسيطة مش معقدة وكتير بيفهم فيها .. دا كل ال انا فاكرة حاليا والله لو في اي سؤال معين تحت أمرك.

ملحوظة اخيرة اي عربية في الدنيا ليها مميزات وعيوب مفيش عربية خالية من العيوب او المميزات. ولو خلاص قررت الشراء وحبيت تكشف علي ميكانيكة العربية عرفني وانا هبعتك للمكانيكي بتاعي هو استااااذ ماشاء الله وعلية وحافظ كل مكان مسمار في العربية وشغال في الكورولا فقط وخصوصا الملكة .

[mr_sameh]

عربيه ممتازه عن تجربة

[bedo_15]

مش عارف بجد يا استاذ محمود ردودك كلها بتحرجنى جدا وياريت لو تعرفنى الميكانيكى دا فين
ومدام حضرتك خبره كده ايه رائيك هى ولا رينو كليو 2002 خاصا ان انا بحب الجرى بصراحه
فا الموضوع ده ممكن يخلينى اغير رأى

[Hishamfarghaly]

مفيش عربية تتقارن بالتيوتا كورولا طبعا الإيوان بتجري طبعا و لما بتتعدل بتبقي جميلة جدا