عايز رايكم بخصوص اليارس

[magician]

انا كان معايا رينو ميجان هاتش باك و بعتها وعايز اجيب عربية محترمة بفكر فى اليارس و الالنترا و الاوبترا
مشكلة اليارس ناس كتير قالوا سحبها ضعيف عايز اعرف رايكم و اجيب مانيوال ولا اتوماتك و شكراا

[asemx1]

لو هتجيب ياريس زيرو مش عندك غير ال 1500 سى سى ودى قااااااااتله فى السحب بس غاليه 120 الف
وصدقنى اى عربيه جنبها هتدوسها
انما ال 1300 سحبها احسن من اى 1300 تانيه وعن تجربه ومش هتحس بكتمه فيها
هاتها اوتوماتيك فتيسها نفس فتيس الكورولا الشكل القديم وطبعا بلدنا معدش ينفع فيها مانيوال

[ramy01011]

صدقني و عن تجربة ل 3 سنين بجد عربية حلوة جداااااااا ال 1300 سحبها ممتاز جدا جدا تكيفها جبار و علي فكرة انا بمشي بيها 160 عادي علشان اللي يقول انها موش ثابتة فراملها حلوة جدااااااا و علي فكرة اوسع من الكورولا الجديدة و اعدتها اريح . العربية دي حمارة شغل و اعطالها تقريبا مافيش عالية عن الارض و مبتحكش في المطبات توكل علي الله و هاتها بس نصيحة حاول تجبها رقم واحد فل اوبشن

[Samir Elshahawy]

أخي الكريم ..

انا مش هأقولك هات الياريس و لكن سأذكر لك المميزات و العيوب من واقع تجربتي لها حوالي سنتين
أنا معايا الاوتوماتيك الفول أوبشن و عامل بيها 53000 كم معظمهم سفريات و سرعتي المتوسطة بتكون من 110 الي 120 كم/ساعة

.... المميزات :
1- محرك قوي بالنسبة لحجم ووزن السيارة بيحقق لها سرعة أستجابة عالية مقارنة بالسيارات اللي في نفس الفئة
2- أستهلاك أقتصادي جدا في الوقود (بأعمل حوالي 530 كم خارج المدن بالتكييف بحوالي 38 لتر) أي مايوازي 14 كم/لتر مع الاخذ في الاعتبار أن لو مشيت بالسرعة الاقتصادية (90-100) الاستهلاك هايقل أكتر من كده
3- موفرة جدا في قطع غيارها فعلي سبيل المثال تيل الفرامل لم يتم تغييره حتي الان و كذلك فلتر البنزين
4- صالونها واسع و مريح و الرؤية ممتازة
5- تكييف ممتاز له تأثير سريع في أقصي درجات الحرارة شدة و سخونة
6- ثبات و اتزان جيد جدا علي الطريق
7- أرتفاع السيارة عن الارض يجنبها الاحتكاك بالمطبات حتي و السيارة محملة بالافراد و الامتعة
8- سهلة و سلسة جدا في قيادتها لذا فهي مناسبة جدا للسيدات أيضا
9- عفشة ناعمة و قوية في نفس الوقت تجعل الاحساس بالمطبات بسيط
10- عزل الصوت جيد فلا تشعر بصوت المحرك ألا عندما يصل مافوق ال 4000 rpm
11- توجيه السيارة ممتاز و يتيح سهولة التحكم فيها و يعطيها قدرة مناورة عالية و أمكانية الركن في أضيق الاماكن
12- توكيل السيارة من التوكيلات الجيدة و المحترمة
13- جودة الخامات و التقفيل الياباني
14- الفرامل قوية و ممتازة مع وجود نظام ABS

.... العيوب :
1- بودي خفيف يتأثر من أقل خبطة
2- سعة الشنطة الخلفية ليست كبيرة و لكنها معقولة لأستخدام أسرة و لكن أيضا يمكن زيادة سعتها عن طريق طي الكنبة الخلفية
3- نقص بعض الكماليات بها و لكن يمكن تعويضها بتركيبها بشكل فردي مثل (الفوج لايت - سنسور خلفي)
4- أرتفاع سعر قطع الغيار و لكنها تدوم لفترات طويلة
5- أرتفاع سعر السيارة مقارنة بسيارات اخري و خاصة بالنسبة لأمكانياتها
6- شكوي البعض من الثبات و أن كنت لم أواجه تلك المشكلة
7- وجود العدادات و المؤشرات في المنتصف و هو امر يحتاج لوقت حتي تعتاد عليه

ذلك ما أستطعت حصره حتي الان و أعذرني ان كنت قد نسيت أي عيوب أو مميزات اخري
و لكن بشكل عام السيارة جيدة جدا و كان من الممكن أن تكون بديلا لكلا من اللانوس و الفيرنا في الانتشار لولا سياسة التوكيل التسويقية

مع خالص تحياتي
م/ سمير الشهاوي

[magician]

الف الف الف الف شكر اي جماعة على الردود الجميلة دى و شكرا على الاهتمام خلاص انا ححاول انظر فى اليارس مرة اخرى ان شاء اللة و ربنا يوفق و يسهل بس اكيد سحبها كويس يا جماعة انا نازل من ميجان 2 هاتش باك بس زهتنى من مصاريفها و اعطالها

[magician]

و ياريت متوسط سعرها فى السوق الكاملة

[Samir Elshahawy]

بس اكيد سحبها كويس يا جماعة انا نازل من ميجان 2 هاتش باك بس زهتنى من مصاريفها و اعطالها

العربية سحبها كويس زي ما الجميع قالوا بس بالمقارنة في نفس فئتها 1300 لكن لو قارنتها بالميجان هاتتعب أوي فبلاش تعقد المقارنة دي بين الميجان و الياريس و أفي ضوء اللي ذكرناه لك شوف انت عايز أيه من عربيتك الجديدة

- جري و شد و سحب ؟؟ (الياريس = 7/10)
- أمان ؟؟ ( الياريس = 8/10)
- أقتصاد في التشغيل (بنزين - قطع غيار - ....) (الياريس = 10/10)

ممكن تعمل المقارنة بالشكل ده في باقي النقاط اللي أنت عايزها و بين عدد من العربيات من ضمنها الياريس

مع خالص تحياتي
م/ سمير الشهاوي

[mohamedkandel]

انا معايا ياريس مانويال 2008 سحبها ما شاء الله فوق الممتاز مع العلم اني بركب عربية حمايا النترا 2009 مانيوال (بسوقها كتير ) بحس ان تجميع الياريس اجمد (طبعا لان وزنها أخف من الالنترا بحوالي 250 كجم) المهم انا لو مكانك هفكر في الياريس والالنترا وهحتار لكن الاوبترا هستبعدها نهائي .
( العربيات مش بالشكل والحجم العربيات بجوده خامتها وقلة اعطالها وجودة التقفيل وتطورها التكنولوجي)

[magician]

انا معايا ياريس مانويال 2008 سحبها ما شاء الله فوق الممتاز مع العلم اني بركب عربية حمايا النترا 2009 مانيوال (بسوقها كتير ) بحس ان تجميع الياريس اجمد (طبعا لان وزنها أخف من الالنترا بحوالي 250 كجم) المهم انا لو مكانك هفكر في الياريس والالنترا وهحتار لكن الاوبترا هستبعدها نهائي .
( العربيات مش بالشكل والحجم العربيات بجوده خامتها وقلة اعطالها وجودة التقفيل وتطورها التكنولوجي)

تمام الف شكر يا استاذى انا حدور على حاجة سعرها كويس و ربنا يوفق ان شاء اللة

[ramy01011]

الف الف الف الف شكر اي جماعة على الردود الجميلة دى و شكرا على الاهتمام خلاص انا ححاول انظر فى اليارس مرة اخرى ان شاء الله و ربنا يوفق و يسهل بس اكيد سحبها كويس يا جماعة انا نازل من ميجان 2 هاتش باك بس زهتنى من مصاريفها و اعطالها

تجميعها ممتاز انا كان معايا قبلها بيجو 307 1600 سي سي اليارس تجميعها اسرع

[mr_sameh]

يكفي انها تويوتا بس عيبها العدادات اللي في النص

[hero]

توكل علي الله وهات الياريس وان شاء الله هاتعجبك جدااا ...بس لو مش هاتسافر علي طرق كتير هات الاوتوماتيك...علشان الزحااااام