الشبورة والزينون

[mo7amed3afifi]

السلام عليكم ورحمة الله وبركاته
انا امبارح كنت في فيلم رعب وانا راجع من المنوفية بسبب الشبورة ...
فهل اللمبات الزينون كويسة في الشبورة ولا لا؟؟؟؟ علشان عايز اشتري فانوسين شبورة للعربية واجيب لمبات زينون فيها ,,,واجيب برضه لمبات زينون للفوانيس الكبيرة .. فهل هتنفع ولا لا؟؟
عربيتي كورولا 2007

[BLOODY_STONE]

تنفع بس اتوقع ان احسن اضاءة للشبورة هي الصفرا .. هات لمض شبورة و جرب لو منفعتش هات زينون .. انا شخصيا .. الاصفر بيوضحلي في الشبورة احسن

[KHALED AYMAN]

الزينون لو مش اصلى ...لو مش هيضرك فى الشبوره ..هيبقى ملوش لازمه ...انما الاصلى الى بيكون نازل فى العربيه كويس ...بس مش الفرق الى الناس متخيلاه

[A.Saad]

الزينون فى الشبورة مش مفيد

[mo7amed3afifi]

بس انا لما نورت النور العالي في الشبورة وانا ماشي اللي هو الاصفر الدنيا بتغمق اكتر ما هي غمقه!!!!!!!!!!!!!!!!!!!!!

[A.Saad]

فى الشبورة
متنورش العالى
تنور الفوجات لو عندك
تنور الوسط مش السهارى طبعا
لان العالى بيتعكس فى الشبورة ويخليك مش شايف حاجة

[mo7amed3afifi]

طب الفوجات افضل انها تكون زينون ولا هالوجين(الاصفر)

[A.Saad]

شخصيا بفضل الهلوجين
بس شوف برده تجارب الاعضاء فى زينون الفوجات

[samcar]

الضوء الاصفر هو الوحيد اللى بيخترق الشبوره - فى حدود طبعا - يعنى لو قلبت ضباب انسى - مفيش حاجه بتعدى

احسن حاجه تحاول تشوف مكان تركن بعيد عن الطريق - وتستنى ان شاالله بالساعات - مش حانسى منظر من زمن بعيد شويه - عند منزل كوبرى طنطا عديت 20 عربيه لابسين فى بعض ومناظر - لسه فى ذاكرة الواحد - ما فيش حاجه تستاهل العجله - ومفيش سواق حريف وكلام فارغ من ده - كل اللى بيعملوا حوادث فى الشبوره هم اللى فاكرين نفسهم حريفه- ما لاحظتش ان سواقين الترلات - يعنى درجه اولى - اول ما تنزل الشبوره بيروحوا راكنين ومولعين نار ويستنوا الصبح يطلع - اهم دول راكبين مصفحات وخبره فى السواقه لكن هم عارفين ان الطبيعه ما تتعاندش- ربنا يستر على الكل

[rompo10]

النور الاصفر طبعا لان دا كمان اللي بيتركب في عمدان الاناره

[BLOODY_STONE]

الاصفر رقم 1 في الشبورة

[mo7amed3afifi]

طب حد يعرف تكلفو الفانوسين للكورولا 2007 بكام باللمبات الهالوجين؟؟؟؟؟؟

[Adham]

مفهوم غلط عند ناس كتير ان النور الزينون او النور الازرق او الابيض الناصع المائل للزرقة هو افضل نور للشبورة

الصحيح ان افضل اضائة في الشبورة هي فوانيس صوديوم اضائها صفراء (زي الهللا بتاعه زمان)

او زي دي




انما النور الزينون او الابيض الناصع او المزرق لما تنورة في الشبورة بيكون اسوء من عدمة لانة بيخللي الشبورة كأنها حائط مصمت امامك

انما الاضائة الصفراء بتتخلل الشبورة و بتشوف من خلالها كويس قوي في الشبورة

انا جايب الفوانيس الإيطالي الصفراء دي كبيرة (قطرها تقريباً 20 سم) و مسطحه و بالتالي نورها بيفرش جامد قوي (مش بتبقى مركزة عالارض زي الفوانيس العادية او الشبورة اللي في الكساحه اللي بتبقى مركزة عالارض, لان في الشبورة محتاج تشوف الطريق لفوق و تشوف اي عربيات او عوائق)
و ماقولكش في يوم الشبورة اللي كان من اسبوعين انا نازل 7 الصبح في عز الشبورة و شايف عادي جدا

[Adham]

على فكرة يا جماعه ما يغركمش الجو المشمس دلوقتي لان فية غيامة غامقة قوي جاية من الشرق

وواضح ان خلال نصف او ساعه بالكتير حانشوف عاصفة امطار رعدية (انا باتكلم على شرق القاهرة - مدينة نصر بالطبع)

و نصيحتي للي عاوز ينزل لو مشوارة قريب يسرع ويكون في بيتة خلال نص ساعه

او يفضل يفضل في البيت لو مشوارة بعيد او مش ضروري

[amir]

على فكرة يا جماعه ما يغركمش الجو المشمس دلوقتي لان فية غيامة غامقة قوي جاية من الشرق

وواضح ان خلال نصف او ساعه بالكتير حانشوف عاصفة امطار رعدية (انا باتكلم على شرق القاهرة - مدينة نصر بالطبع)

و نصيحتي للي عاوز ينزل لو مشوارة قريب يسرع ويكون في بيتة خلال نص ساعه

او يفضل يفضل في البيت لو مشوارة بعيد او مش ضروري

قوه ملاحظه مع تفكير صحيح

فعلا انا شايفها مغطيه جزء كبير من السما