لمن عنده الحل مشكلة خطيرة فى الفرامل

[edfeeoc]

حدثت لى مشكلة خطيرة فى الفرامل للعربية بتاعتى تويوتا كرولا 94 والحمد لله اننى على القيد الحياة حيث اننى اسافر على طريق الزقازيق الاسماعيلية كثيرا وهو من اسوء الطرق واثناء السفر فى احدى المرات توقفت امامى احدى السيارات على بعد 100 متر وعند استخدام الفرامل وجدتها تهرب منى بصورة غريبة فضغط بكل قوة واستخدمت فرامل اليد حتى توقفت السيارة وعندما وصلت غلى وجهتى ذهبت الى الميكانيكى الذى قام بأخذ الهواء من الاربع عجلات وتحسنت حالة الفرامل غلى ان سافرت مرة اخرة وايضا هربت الفرامل تانى فذهبت غلى ميكانيكى اخر وغير طقم صيانة الماستر وايضا تحسنت حالة الفرامل وسافرت مرة اخرة وحدث الامر مرة ثانية وبصراحة كده انا اتعقدت اووووووى ومعنتش بأثق فى اى ميكانيكى الغريب فى الموضوع ان ان الفرامل داخل البلد بترجع شبه طبيعية ولكن يحدث هذا الامر فى السفر بسرعات عالية
أرجو الافادة من ذوى الخبرة وشكرا ولاحظو يا جماعة انى معييش فرامل

[جندى مجند]

أنا كان معايا فليشيا قبل كدة كان بيحصل فيها نفس المشكلة دى بالضبط فى الأيام الحارة و غيرت طقم جلب ماستر الفرامل فاتصلحت المشكلة ... لو ملاقيتش الجلب بتتباع لوحدها ممكن تضطر تغير الماستر كله و أعتقد من الأفضل تغيره فى التوكيل ... صحيح حيبقى أغلى من برة كتير بس توكيل تويوتا محترم و حتضمن انه بيستخدم قطع غيار أصلية بالذات فى الحاجات الخطيرة زى الفرامل.

[ahmed1981]

هل زيت الفرامل بينقص؟؟؟؟
لو مبينقصش
يبقى العيب ده بيكون زي ما قال الجندي المجند
المشكلة في ماستر الفرامل الرئيسي اللي راكب قدام في السرفو فعلا
بيحصل ضعف في الجلب فعلا وده حصل قدامي في حالة من الحالات

ونصيحة غير الماستر الرئيسي بواحد جديد أصلي ومتصلحش القديم
لأن اهم حاجة في العربية الفرامل مفيش داعي للمجازفة

والله أعم
م/أحمد :D

[hanyfarrag]

أؤيد تغيير الماستر الرئيسى كاملا
وفحص الماستر الفرعى الخاص بكل عجلة
والتأكد من سلامة مسامير أخذ الهواء الموجودة فى كل عجلة

[edfeeoc]

شكرا على الرد ولكن حد عنده تفسير ليه الفرامل بترجع طبيعية

حد عنده تفسير ليه الفرامل بترجع طبيعية بعد ما بأركن العربية وامشى جوه البلد

[ahmed1981]

وأنت داخل البلد كل شوية بتهدي وتدوس فرامل
يعني الزيت كل شوية يتحضر في المستر لأنك تقريبا كل دقيقتين تدوس فرامل
على الطرق الطوالي ممكن تقعد فترة متدوسش فرامل خلال هذا الوقت يتسرب الزيت داخل الماستر الرئيسي من جلب الكبس بدون ما ينقص الزيت
وعندما تدوس فرامل تجد مفيش فرامل وبعدين تدوس تاني تلاقي في فرامل
في الأوقات الحرجة ممكن متلاقيش فرصة تدوس فرامل تاني

طول ما العيب ده عندك خليك حذر وكبر المسافة من اللي قدامك
لحد ما تركب ماستر رئيسي جديد أصلي وتراجع على مساتر العجل وتاخد منها الهواء
وإن شاء الله كله هيبقى تمام

م/أحمد :D

[Abdallah]

غير ماستر الفرامل كله بالكامل, انا حصلت معايا قبل كدة فى نفس الموديل وجربت جلب وجربت كل حاجة وفى الاخر جبت ماستر استيراد بحوالى 250 جنيه ولا زال شغال كويس من حوالى ثلاث سنوات.
ومش لازم تروح التوكيل لانه بيبقا غالى اوى فى القطع دى وممكن اى واحد بتاع عفشة محترم يظبطهالك بس المهم تجيب ماستر كويس وبتاع العفشة يكشفلك عليه...
لو حضرتك من المنصورة انا اقدر اخدمك فى الموضوع دة ان شاء الله...

[edfeeoc]

اخوانى الاعزاء بعد معناة مع الصنايعية فى الفرامل

اخوانى الاعزاء إليكم اخر تطورات موضوع فرامل التويوتا . بعد ان قمت بعمل تغيير كامل لجلد الماستر وايضا معرفش ايه فى الماستر الخلفى واتكلت على الله وسافرت الفرامل تعمل مع وجود نحر فى العجل الخلفى وبعد ان وصلت غلى وجهتى شمت رائحة شياط من التيل الخلفى وطبعا اتعكننت اخر عكننة وبعديت رحت لواحد ميكانيكى وبدء يعمل رجلشة للتيل ويخلينى اجرب لحد ما استقر الوضع وقى لازم تجرب فى سفر وبعدين جيت امبارح الاسماعيلية والحمد لله لم تسخن العربية ولم تهرب الفرامل حتى الان وادعو الله ان تستمر على هذا الوضع زعلى فكرة وانا عنده رحت اشتريت تيل امامى استثمارى مصرى علشان صوت العصفير بتاع التيل اليابانى اللى كان مجننى وربنا يسهل وميصفرش زى اخواته وشكرا

[حلواني]

طيب الحمد لله :)
شكرا لمشاركة لتطورات .

[Abdallah]

بنصحك لاخر مرة, متتهاونش وغير ماستر الفرامل العمومى لأنها ممكن تهرب منك فى اى وقت وبلاش تغامر بحياتك عشان خاطر جنيهات معدودة يا اخى, الماستر بتاع الفرامل لازم يتيغر والجلب دى مسكنات فقط وشوية وهتلاقيها باظت.